ॱसाल्केत् 12 - ल्होमीभुमु च्यीक् धङ् डुक् १-१७ 1 हुनी तेङ् यी़दु ङे ॱमीत् च्यीक्पे ता छ्यीम्मु च्यीक् थोङ्ज्युङ्। उन भुमु च्यीक् दुक्। हुगी घो़ दील ङीम डस्सी ओ़त् छ्यीम्मु च्यीक् घो़न्दुक्। हुगी कङ्ब दी दच्च्यल पो़दुक्। हुगी गो दील कर्म च्युन्नी च्येम्मे थोप् छ्यीम्मी़ स्यमुङ् च्यीक् घो़न्दुक्। 2 हुगी भुमु हुगो भुजीम दुक्। ॱनी हुगो कीस्सुक् लङ्न, अय अय सीन्न केत् ज्यक्कुक्। 3 हुनी यङ् तेङ् यी़दु ॱमीत् च्यीक्पे ता ॱयोङ्म च्यीक् थो़न्सोङ्। उन डुक् ॱमप्पु छ्यीम्मु च्यीक् दुक्। हुल गो दी़न् धङ् रच्च्योक् च्यु दुक्। ॱनी गो रीदङ् रील थोप् छ्यीम्मी़ ज्याबी़ स्यमुङ् री घो़न्दुक्। 4 हुगी डुक्की ॱङम दीगी ॱनम्गी कर्म घयेत् गो ॱसुम्ल तङे गो च्यीक् ॱसल पुर् तङ्सोङ्। ॱनी डुक् दी हुगी भुमु दीगी भीज कीनी, कीलोङ् मीक्ल डुन सज्येल हुगी भुमु दीगी दोङ्दु गुन दो़क्कुक्। 5 हुनी भुमु दील जम्बुलीङ्गी ज्यी़त् ज्यी़त् घयेत्ल च्यागी तोक्लङ्गी ॱवङ् च्योङ्गेन् भु च्यीक् कीसोङ्। ॱनी हुगी भु दी यल्ल को़न्ज्योक्की स्युडी ढुङ्ल ठोन खुर्सोङ्। 6 हुनी हुगी भुमु दी पक्क झ्यङ्दङ्ल ढो़सोङ्। ॱनी हुदु स्यक्पु ज्यब च्युन्नीदङ् ढुक्च्यु थुक् छ्योप्स ॱसने च्यीक् को़न्ज्योक्की ठोक्क झ्यीन स्यक्तुक्। ॱनी हुदु हुल कोबे सम दी को़न्ज्योक्की ॱनङ्गुक्। 7 हीनी तेङ् यी़दु ॱमक् ॱस्योर्सोङ्। तेङ् यी़गी भङ्ज्येम्ब मीखाएल् दी धङ् हुगी होक्की भङ्ज्येम्ब घयेत् दी छ्य च्यीक्, ॱनी हुगी डुक् दी धङ् हुगी लेङेन् घयेत् दी छ्य च्यीक् झ्यीन ॱमक् थुक्सोङ्। 8 ॱनी डुक् दी फम्न खुर्नी, हुगो धङ् हुगी होक्की लेङेन् घयेत् दी तेङ् यी़दु दो़त्तु ॱमत् ची़प्प, 9 यी़दो़न् ज्यप्न जम्बुलीङ्ल दीत्न पुर् तङ्सोङ्। ॱनी हुगी डुक् छ्यीम्मु दीगी मीङ् दील ॱङो़न् धङ्बी़ डी़, दी़क्की चो, कोलीमी घयेत्ल ॱयोङ्गोर् ज्यक्केन् धङ् शैतान् सीन्न सीगुक्। 10 हीनी तेङ् यी़नी केत् छ्यीम्मु च्यीक्ल ह हज्यरङ्ल थर्वे लम् झ्युङ्सोङ्। हज्यरङ्गी को़न्ज्योक्की ज्यागक् हीगो ह खोङ्गी छ्यक्ल झ्युङ्सोङ्। ह हीगो खोङ् धङ् खोङ्गी को़बे च्यप्को़न् ख्रीष्ट्की ॱवङ्ल झ्युङ्सोङ्। घन्ड हीन् सीन्न को़न्ज्योक्की ढुङ्दु हज्यरङ्गी पी़न्ज्या घयेत्ल ङीन् छेन् मीप्प ङीब कोप्केन् दी ह तेङ् यी़नी दीत्न पुर् तङ्सोङ्। 11 हज्यरङ्गी पी़न्ज्या घयेत् डुक् हुगोले ज्यला थो़न्ज्ये दी लुक्टुक्की ठक् धङ् रोरङ्सो़ ॱस्येप्पे दीम्बे केच्च्य दीगी थो़म्ब बेत्। ॱनी हुबे रोरङ्सो़ ॱरोक् दीरङ् च्यो़ गो़ ॱस्यर्न आक्, हुल फङ मत् झ्यीब बेत्। 12 ह तेङ् यी़ धङ् तेङ् यी़न यो़प्प घयेत् गेस झ्यी। जम्बुलीङ् धङ् छ्यु ज्यम्जो छ्यीम्मु घन्डे दुक्प। घन्ड हीन् सीन्न दी़क्की चो हुगो ॱसल पुर् तङ्नी, हुगी रोरङ्ल धी़ गक् मीप्प ॱह घोनी, खोङ्डोक्की मी बर डस्सी झ्यीक्केन् बेत् सीर ॱह घोज्युङ्। 13 हुनी हुगी डुक् दी तेङ् यी़नी मल्ल रोरङ् पुर् तङ दी ॱह घोनी, भुमु भु कीबे आम दी रीदीक् ज्यप्सोङ्। 14 हुनी को़न्ज्योक्की हुगी भुमु दील हुला छ्यीम्मी़ ॱस्योक्पक् ॱङी बीन्न पक्क झ्यङ्दङ्ल फीर्न ढो़दु ची़स्सोङ्। ॱनी हुदु डी़ दील ॱमीत् ॱङीच्च्येल लोङ छ्यीदङ् स्यी थुक् गोङ्न दो़त्तु ची़स्सोङ्। हुगो थुक्ल गो़बे सम हुल ॱनङ्सोङ्। 15 हुनी हुगी भुमु दी छ्यी़ ढी़त्तु ची़च्च्येल हुगी डी़ दीगी रोरङ्गी खनी छ्यु चङ्ज्येन् छ्यीम्मु च्यीक् तो़न्सोङ्। 16 हुनी भुमु दील छ्योप्च्येल ॱस ॱसीक्क घेन युङ्न, हुगी छ्यु चङ्ज्येन् दी हुनी मल्ल कुरीक् स्युसोङ्। 17 ॱनी हुगी डुक् दी भुमु दील खोङ्डोक् लङे, हुल छ्येप्पे ज्यी़त्, को़न्ज्योक्की क धङ् धम्ल चीगेन्, येशुगी ॱस्येप्पे केच्च्यल नेन्न थीरी दो़क्केन् घयेत्तङ् ॱमक् थुक्तु टप्सोङ्। 18 हुनी हुगी डुक् दी छ्यु ज्यम्जो छ्यीम्मी़ छीगदु देत् तङ्सोङ्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.