ॱसाल्केत् 11 - ल्होमीस्युक् थमे धी़ल कलुङ् ॱस्यो़क्केन् ॱङी थो़ङ्गेन् १-१४ 1 हुनी यङ् ङल छेत् ज्यक्च्येमे तोक्लङ् डस्सी च्यीक् बीन्न हीन्दुक् सीच्च्युङ्। तोक्लङ् हीगी को़न्ज्योक् स्युसे छ्यो़गङ् धङ् उन यो़प्पे छ्यो़प्प पुस दी छेत् ज्योप्। ॱनी उन छ्यक् छ्यो़प्प पुगेन् घयेत् दी ढङ्ज्युक् ज्योप्। 2 छ्यो़गङ्गी धङ्र छ्यीमा दी पी़प्पे ॱयोङ्मा घयेत् दील छेत् ज्योप्। घन्ड हीन् सीन्न धङ्र छ्यीमा हुगो ज्यी़त् ॱयोङ् ॱयोङ्गी मी घयेत्ल ची ज्यप्न स्यक्प बेत्। ॱनी को़न्ज्योक्की ढीक्ल पी़प्पे सार्ल हुब घयेत् दव स्यीप्च्यु स्यन्नी थुक् देत्न हुल छ्यम्गेन् बेत्। 3 ङे ढीक्ल दीम्बे केच्च्य ॱस्यो़क्केन् मीरङ् ॱङी को़न तोङ्गेन्। हुबे बोरागी घो़ घो़न्न स्यक्पु ज्यब च्युन्नी धङ् ढुक्च्यु थुक् कलुङ् ॱस्यो़क्केन् बेत् सीच्च्युङ्। 4 ॱनी जम्लीङ् की़ङ्गी चोव ज्यीन्दक्की ढुङ्न ओलीप्की दोङ्बु ॱङी धङ् छ्यो़त्मी ॱङी यो़प्प दी हुब ॱङील डोगेन् बेत्। 5 हुब ॱङीबुल च्यो़न् तोङ्गेन् ॱसु युङ्न अक्, हुबे खनी मी बरे मीज्ये तङ्न ड दीब ॱसेत् तोङ्गेन् बेत्। हुगो झ्यीनी च्यो़न् तोङ्गेन् ॱयोङ् ॱसु युङ्न अक्, हुगो हुन्दुक् दीरङ् झ्यीन ॱस्यी डोगेन् बेत्। 6 हुब ॱङीबी़ कलुङ् ॱस्यो़प्पे यङ्गी धी़ थुक्ल हुबल छ्येप्प ज्यक्तु ॱमीत् ची़क्केङ्गी ॱवङ् धङ् छ्यु घयेत् ठक् डस्सी स्यीलोक्सील तोङ्ज्येमे ॱवङ् हुबल बीन्न युङ्गेन् बेत्। ॱनी हरुङ् हुब ॱङीबी़ जम्बुलीङ्ल च्यो़न् घन्ड नम् तोङ्गीन् थेक्को़दङ् हुगो ॱनम्ब गज्येन् तोङ् छुगेन् बेत्। 7 हुब ॱङीबी़ केच्च्य ॱस्येप्पे ले घयेत् दी डुप् छर्नी, हुगी खीस मीप्पे ॱसेङ्दोङ दीनी थो़न्न युङ्गेन् हुगी ॱसीम्ज्येन् दी हुब ॱङीबुदङ् थुक्तु युङ्गेन् बेत्। हुनी ॱसीम्ज्येन् दी ज्यला थो़न्न, हुब ॱङीबु ॱसेत् तोङ्गेन् बेत्। 8 हुनी हुबे रो दी हुगी सार् छ्यीम्मी़ ॱसट्टक् दीदु रोरङ्सो़ ॱस्यीस्स दीदुरङ् ले डोगेन् बेत्। हुगी सार् दील पी डस्सील सदोम् धङ् मीस्र सीक्केन् बेत्। हुदु एल्ला रोरङ्सो़ चोव ज्यीन्दक् अक् कुरुस्ल तान ॱसेप्प बेत्। 9 हुनी जम्बुलीङ्गी ज्यागक् री, केच्च्योक् री धङ् ज्यी़त् री री कुरीक्नी मी घयेत् हुब ॱङीबी़ रो दील तदु युङ्गेन् बेत्। घन्ड हीन् सीन्न हुब ॱङीबी़ रो दी डुक्तु ॱमीत् ची़प्प, ॱसट्टक् दीदुरङ् स्यक्पु छ्यीदङ् स्यी थुक् स्योक्केन् बेत्। 10 हीनी जम्बुलीङ्गी मी घयेक्की ह हज्यरङ्ल दुक्प अयेक्प तोङ्गेन् कलुङ् ॱस्यो़क्केन् ॱङीबु दी ॱस्यीनत्तुक् सीन्न गेसक्की रोरङ्सो च्यीक्तङ् च्यीक्ल छ्यो़म तीर्री चीगेन् बेत्। 11 हीनी स्यक्पु छ्यीदङ् स्यीबु दी छीनी, हुगी रो ॱङीबु दील इगीनी मल्ल को़न्ज्योक्की उ ॱलुक्न बीन्नी, हुब ॱङीबु यङ् ॱसोम्बुल लोङ्सोङ्। ॱनी हुगो थोङ्गेन् घयेत् दीब ज्यीक्टक् धङ् ॱहङ्डक् झ्युङ्सोङ्। 12 हुनी इगी तेङ् यी़नी मल्ल केत् छ्यीम्मु च्यीक्ल हुब ॱङीबुल यल्ल ॱस्योक् सीस्सोङ्। हुनी हुब ॱङीबु ॱमुबे दल ड घयेत् दीबे थोङ्गीन् थोङ्गीन् तेङ् यी़ल फीर्सोङ्। 13 हुनी ॱस्यर्च्यक् ॱसेर छ्यीम्मु ज्यप्सोङ्। हुनी हुगी सार् दी गो च्युल तङे गो च्यीक् रुम्सोङ्। ॱनी मीरङ् तोङ्डक् दी़न् हुदु ॱस्यीसोङ्। ॱनी हुदु ॱमत् ॱस्यीय यो़प्प घयेत् दी टक्प सेत्न ज्यीबे, हुनी क तेङ् यी़गी को़न्ज्योक्ल तो़प्प पुसोङ्। 14 घन्डे दुक्प सीक्केन् ॱङीब दी ह ढुप्सोङ्। हरुङ् ॱसुम्ब दी ज्योबा युङ्गेन् बेत्। भङ्ज्येम्ब दी़म्बे कङ्लीङ् भी़ब १५-१९ 15 हुनी भङ्ज्येम्ब दी़म्ब दीगी पालोल कङ्लीङ् दी भी़सोङ्। हुनी तेङ् यी़दु केत् छ्यीम्मु च्यङ्ज्यङ्ल गज्येङ्गी हीन्दुक् सीस्सोङ्। ह जम्लीङ् की़ल्ल ज्यागक् च्योङ्गेङ्गी ॱवङ् दी हज्यरङ्गी चोव ज्यीन्दक् धङ् खोङ्गी को़बे च्यप्को़न् ख्रीष्ट्ल झ्युङ्सोङ्। हीनी झ्यीब दी धी़ नम ज्यी़न्दु खोङ्गी ॱवङ् च्योङ्गेन् बेत्। 16 हीनी को़न्ज्योक्की ढुङ्दु ॱवङ् च्येम्मे स्युडील दो़क्केन्, हुगी गोयो़प्प ङीस्स्यु चप्स्यीबु दीगी को़न्ज्योक्ल छ्यक् छेन हीन्दुक् सीस्सोङ्। 17 ॱङो़न्दु उक् यो़क्केन्, हुन्दो ओक् यो़क्केन्, ॱवङ् की़न् च्येम्मे चोव ज्यीन्दक् को़न्ज्योक् नीज्यरङ्ल थु छ्यी पुगेन्। घन्ड हीन् सीन्न जम्बुलीङ्ल च्योङ्ज्येमे ॱवङ् दी नीज्यरङ्गी छ्यक्ल ठोन, जम्बुलीङ्ल ॱवङ् च्योङ्गेन् ज्याबु दी नीज्यरङ् झ्युङ्सोङ्। 18 नीज्यरङ्ल खोङ्डोक् झ्यीक्केङ्गी ज्यी़त् ज्यी़त् घयेत्ल ङेल्लेन् च्यो़ज्येमे धी़ दी धङ् मी ॱस्यी छर घयेत्ल ठीम् च्यो़च्च्येमे धी़ दी ह ॱलीस्सोङ्। ॱनी नीज्यरङ्गी ॱयोक्पु कलुङ् ॱस्यो़क्केन् घयेत् धङ् नीज्यरङ्ल ज्यीब खुर्केन् नीज्यरङ्गी मी चङ्म छ्यीया च्युङा कुरीक्ल ॱल ॱनङ्ज्येमे धी़ दी धङ् जम्बुलीङ् मीत्तल तोङ्गेन् घयेत् दीब यङ् मीत्तल तोङ्ज्येमे धी़ दी ह ॱलीस्सोङ् सीन्न सीस्सोङ्। 19 हुनी तेङ् यी़गी को़न्ज्योक् स्युसे छ्यो़गङ् दी भीसोङ्। ॱनी हुगी नङ् दीन कगो़त् धम्स्यक् च्येम्मे गम् दी ङे थोङ्ज्युङ्। हुनी डुक्की च्यीला तो़न्न डुक्केक्की हुट्ट, ॱसीरा धङ् ॱसेर ज्यप्सोङ्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.