ॱसाल्केत् 10 - ल्होमीयीगी बुरीम खुरे भङ्ज्येम्ब ज्यीक्पोक्म १-११ 1 हीनी यङ् भङ्ज्येम्ब ज्यीक्पोक्म ॱयोङ्म च्यीक् तेङ् यी़नी मल्ल भप्न युङ ङे थोङ्ज्युङ्। हुगो ॱमुबे घुङ्ल तुम्न हुगी गो दील तीक् खीरी ज्य सुक्तुक्। हुगी झ्येत्ङे दी टक्सी ङीम डस्सी दुक्। ॱनी कङ्ब दी मीज्येगी का डस्सी दुक्। 2 हुगी लक्ल यीगी बुरीम च्युङेत्मु च्यीक् टम्न दुक्। हुगी कङ्ब ॱयेब दी छ्यु ज्यम्जो छ्यीम्मुल पो़सोङ्। ॱनी ॱयेम्म दी ॱसल पो़सोङ्। 3 हुगी ॱसेङ्गी ङरे केत् डस्सी तो़न्सोङ्। हुनी डुक्केत् दी़ङ्गी केत् ज्यप्न सीस्सोङ्। 4 हुगो सीन्नी, ङे हुगी केच्च्य दी यीगील ढीज्येम ॱयेङेन्। हुनी तेङ् यी़नी मल्ल केत् च्यीक् थो़न्न, हुगी ङल हुगो यीगील मत् ढी। ॱसुल आक् ॱमत् ॱस्यो़प्प, धम्डुक् ज्यप्न स्योक् सीच्च्युङ्। 5 हीनी हुगी छ्यु ज्यम्जो छ्यीम्मुल धङ् ॱसल कङ्ब पो़न दो़क्केन्, तेङ् यी़गी भङ्ज्येम्ब दीगी रोरङ्गी लक्प ॱयेब दी इगी तेङ् यी़ ङो़ल छ्यर्न, 6-7 तेङ् यी़ धङ् उन घङ् यो़प्प घयेत्, ॱस जम्बुलीङ् धङ् उन घङ् यो़प्प घयेत्, छ्यु ज्यम्जो छ्यीम्मु धङ् उन घङ् यो़प्प घयेत् जेङ् छ्यादु ची़क्केन्, धी़ नम ज्यी़न्दु ॱसोम्बु यो़क्केन् खोङ्गी छेन् डेन्न रोरङ्गी केच्च्य दी खुङ् हीन् धङ् मेल्ल हुगी ॱन झ्यीन हीन्दुक् सीस्सोङ्। ह भङ्ज्येम्ब दी़म्बी़ पालोल कङ्लीङ् भी़क्केन् बेत्। हुगी यङ्ल को़न्ज्योक्की खोङ् रोरङ्गी ॱयोक्पु कलुङ् ॱस्यो़क्केन् घयेत्लरङ् क तो़न्न टेप्पे खोङ्गी ढो़ तीङ् सप्पोक्म दी डुप्केन् बेत्। हीगी धी़ हीगो ज्यङ्न मीत् स्योक्केन् बेत् सीस्सोङ्। 8 हीनी ङल एल्ला तेङ् यी़नी मल्ल युङे केत् दीगी फीच्च्य यङ् छ्यु ज्यम्जो छ्यीम्मु धङ् ॱसल कङ्ब पो़न दो़क्केन् भङ्ज्येम्बे लक्ल टम्न यो़क्केन्, हुगी यीगी बुरीम दी लीन्दु ज्युक् सीच्च्युङ्। 9 हुनी ङ फीन्न ङल ॱनङ् सीन्न लीम्बेन्। ॱनी भङ्ज्येम्ब दीगी ङल हुगी यीगी दी टेत्न, ह हीगो रङ् सो। हीगो खल सेन डङ् डस्सी ॱङम्मु युङ्गेन् बेत्। खोक्तु यङ् हीगी ढोप्प छीक्केन् बेत् सीच्च्युङ्। 10 हुनी ङे हुगी यीगी बुरीम दी लीन्न सेबेन्। ॱनी खल डङ् डस्सी ॱङम्मु झ्युङ्। ॱनी खोक्ल स्युनी, ढोप्प दी छीक्च्युङ्। 11 हुनी ङल हीन्दुक् सीच्च्युङ्। रङ् हरुङ्द जम्बुलीङ्गी ज्यी़त् ज्यी़त् घयेत्, ज्यागक् घयेत्, केच्च्योक् घयेत् धङ् ज्याबु घयेक्की ढीक्ल ॱङो़स्स्यी ॱस्यो़त् गोगेन् बेत् सीच्च्युङ्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.