ॱसाल्केत् 1 - ल्होमी1 ह ज्योबा घन्ड हीन्न अक्, युङ्गेङ्गी केच्च्य घयेत् कुरीक् को़न्ज्योक्की येशु ख्रीष्ट्ल खोङ् रोरङ्गी ॱयोक्पु घयेत्ल तो़न् सीन्न तो़म्बे केच्च्य घयेत् दी हीन्दुक् झ्यीन युङ्गेन् बेत्। खोङ् रोरङ्गी ॱयोक्पु युहन्ना च्येल्ल तेङ् यी़गी भङ्ज्येम्ब च्यीक् तङ्न युङ्न हुगी केच्च्य घयेत् दी कुरीक् क तो़म्ब बेत्। 2 ॱनी को़न्ज्योक्की ॱसुङ्स्येत् धङ् येशु ख्रीष्ट्की ॱस्येप्पे केच्च्य घयेत् दी खुङ् हीम्ब हुगी थोङ्नी, हुगो धक्तेन् हीम्बे ढीक्ल हुगी पङ्बु झ्यीत् छुगेन् बेत्। 3 ॱनी हील यो़प्पे ॱङो़स्स्यीगी केच्च्य घयेत् ताबे धी़ दी ह ज्योक्पु ॱलीक्केन् बेत्। हीगो झ्यीनी ॱसी़ हीगो डोक्कुक्क ॱनी हील ॱसी़ नेन्न चीगुक्क हुगो ॱसोदी च्येम्म बेगो। 4-5 ॱनी खीत्रङ् उन एशीया लुङ्बन यो़प्पे छ्यो़ छो दी़म्बुल ङ युहन्नागी हीगो ढीन तोङ्गो़त्। ॱङो़न्दु उक् यो़क्केन्, हुन्दो ओक् यो़क्केन्, तीङ्ला आक् झ्यो़ङ्गेन् खोङ् च्यानी धङ् खोङ्गी ॱवङ् च्येम्मे स्युडी ढुङ्न यो़क्केन् थु दी़म्बु च्यानी धङ् थोङे केच्च्य घयेत् ज्युरुव मीप्प ॱस्यो़क्केन्, ढोङ्नी यङ् ॱसोम्बुल लोङ्गेन् ॱएन्स्युक्म, जम्बुलीङ्गी ज्याबु घयेक्की थोक्ल ॱवङ् डोगेन्, येशु ख्रीष्ट् च्यानी खीत्रङ्ल थुज्यी धङ् ॱसीम् दीव युङ्ज्ये यो़प्प तोङ्। हज्यरङ्ल झ्यम्ब जेक्केन्, हज्यरङ् दीक्पनी खोङ्गी ठक्की तो़ङ्गेन्, 6 हज्यरङ् खोङ्गी ज्यागक्की मीस्सीर् धङ् खोङ्गी यप् को़न्ज्योक्की छ्यो़प्पो़ल्ल सोगेन् खोङ्ल धी़ नम ज्यी़न्दु तो़प्प धङ् ॱवङ् छ्यीम्मु युङ् युङ युङ्ज्ये यो़प्प स्योक्च्यीत्। आमेन्। 7 खीत्रङ्सो तेदे, खोङ् इगीनी मल्ल ॱमुबे दल झ्यो़ङ्गेन् बेत्। हुनी छङ्म थम्ज्येक्की खोङ् थोङ्गेन् बेत्। खोङ्ल दुङ् चुक्केन् दीबे एक् थोङ्गेन् बेत्। हुनी जम्बुलीङ्गी ज्यी़त् कुरीक् ङुच्च्यङ् ॱस्योर्केन् बेत्। हीगो ॱङो़न्ने युङ्गेन् बेत्। आमेन्। 8 ॱङो़न्दु उक् यो़क्केन्, हुन्दो ओक् यो़क्केन्, तीङ्ला आक् झ्यो़ङ्गेन् ॱवङ् की़न् च्येम्मे चोव ज्यीन्दक् को़न्ज्योक्की ङ ॱनी अल्फा धङ् ओमेगा, गोम ॱङो़न् धङ् थम दी हीन् ॱसुङ्गुक्। कोलीमीगी ॱरेबु थोङ ९-२० 9 खीत्रङ्गी पी़न्ज्या ङ युहन्ना येशुदङ् मत् ढेब यो़प्पल खोङ्गी ढीक्ल दुक्प धङ् खोङ्गी ज्यागक्की मीस्सीर् हीम्बल धङ् गुर् थेक्पल खीत्रङ्दङ् कीदुक् च्यीक्प यो़त्। को़न्ज्योक्की केच्च्य धङ् येशुगी ढीक्की केच्च्य ॱस्येप्पे ढीक्ल ङ छ्यु ज्यम्जो छ्यीम्मी़ घुङ्गी ॱसने पत्मोस् झ्यीस्स च्यीक्तु च्येज्युङ्। 10 ॱनी ङ हुदु चोव ज्यीन्दक्की ङीङ्गी यङ्ल धम्बे थुगी ॱवङ्ल फीन्ज्युङ्। ॱनी तक्नी छुल्ल रच्च्योक्की कङ्लीङ्गी केत् छ्यीम्मु च्यीक्ल 11 रङ्गी घङ् थोङे केच्च्य घयेत् दी यीगील ढीन हुगो छ्यो़ छो दी़ल्ल तोङ्, एफीसस्ल, इस्मर्नाल, पर्गामम्ल, थीयाटीराल, सार्डीस्ल, फीलाडेल्फीयाल, लाओडीसीयाल सीन्न ॱस्येच्च्युङ्। 12 ॱनी हीगो ॱस्यो़क्केन् दी ॱसु बेक्क सीन्न तक्ल लोक्न तेन ॱसीर्की छ्यो़त्मी दी़न् 13 धङ् हुगी घुङ्न घो़ रीङ्मु घो़म्ब ढङ्गोक्नी फल्ल ॱसीर्की पेट्टी कीङ कोलीमीगी ॱरेबु डस्सी च्यीक् थोङ्ज्युङ्। 14 ॱनी खोङ्गी गो धङ् ट दी भा कप्पु खा डस्सी दुक्। ॱमीक् दी टक्सी मी बर डस्सी दुक्। 15 कङ्ब दी च्युक्म स्यी़न् तङ डस्सी टक्सी दुक्। ॱनी केत् दी छ्युरोक् छ्यीम्मी़ हुट्ट डस्सी दुक्। 16 खोङ्गी लक्प ॱयेब दील कर्म दी़न् दुक्। ख दीनी ढी पदङ् ॱनोन्दीम ख ॱङी च्येम्म थो़न्न युङ्गुक्। ॱनी स्यारे दी ॱनम्सङ्गी ङीम डस्सी टक्सी दुक्। 17 हीगो थोङ्नी, ङ खोङ्गी ढुङ्दु ॱस्यीन खुर डस्सील डीज्युङ्। हुनी खोङ्गी लक्प ॱयेब दीगी ॱवङ् केन, ङल रङ् ज्यीब मत् झ्यीत्। ङ गोम ॱङो़न् धङ् थम दी हीन्। 18 ङ ॱसोम्बु यो़त्। एल्ला ङ ॱस्यीज्युङ्। ॱनी ह धी़ नम ज्यी़न्दु ङ ॱसोम्बु यो़त्। ॱनी ॱस्यीव धङ् ॱस्यीवे यी़गी च्यी दी ङल यो़त्। 19 रङ्गी हुन्दो घन्ड झ्युङ थोङ्गो़दङ् हुगो धङ्, ॱनी तीङ्लागी ढीक्ल यङ् घन्ड युङ थोङ्गो़दङ् हुगो यीगील ढील स्योक्। 20 रङ्गी थोङे ङे लक्प ॱये छ्योगी कर्म दी़म्बु दी धङ् ॱसीर्की छ्यो़त्मी दी़म्बु दीगी तीङ् सप्पोक्मे धो़न् दी हीगो बेगो। कर्म दी़म्बु दी छ्यो़ छो दी़म्बी़ ढीक्ल को़बे को़न्ज्योक्की भङ्ज्येम्ब दी़ल्ल डोगेन् बेत्। छ्यो़त्मी दी़म्बु दी छ्यो़ छो दी़ल्ल डोगेन् बेत् सीन्न सीच्च्युङ्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.