फीलीप्पी 3 - ल्होमीकोलीमीगी ली़सीम्ल ॱलो ॱमीत् को़गेन् १-११ 1 स्युक् थदु ङे पी़न्ज्यासो, खीत्रङ् चोव ज्यीन्दक्तङ् मत् ढेब यो़प्पल गव झ्यीज्यीत्। खीत्रङ्ल धो़न् च्यीक्की ढीक्ल यङ्दङ् च्यङ्दङ् ढी गो़ झ्युङल ङ उ दुब मीन्दुक्। हीगो खीत्रङ् डम्दु युङ्ज्ये यो़प्पल बेत्। 2 स्यीलोक्सीगी की डस्सीगी मी, ले आक्सी झ्यीक्केन्, सी़बु ढेन यहुदीगी दक् ज्यक् गोगेन् बेत् सीन्न ॱलोप्केन्, हुन्दुक् झ्यीबे मी हुब च्यानी खीत्रङ् धोजीम् झ्यीन दो़च्च्यीत्। 3 घन्ड हीन् सीन्न हज्यरङ् धम्बे थुगी लम्नी को़न्ज्योक्ल धेप्प मो़ब झ्यीक्केन्, कोलीमी रङ्स्यीनी थो़म्बे लेमुल ॱलो ॱमीत् को़ब, ख्रीष्ट् येशुगी जेप्पे लेगी ङोम्ज्येत् झ्यीक्केन् दी हज्यरङ् बेत्। हुगो झ्यीनी हस्सो़त् दीम्बरङ्गी दक् फोक्पे को़न्ज्योक्की मी दी हज्यरङ् बेत्। 4 ङ ङरङ्गी कोलीमीगी ली़सीम्गी लेमुल ॱलो केन त, को़ छुगो़त्। ॱनी ङ ॱमीत् को़। मी ॱयोङ्म डस्सी कोलीमी रोरङ्गी ली़सीम्गी लेमुल ॱलो को़गेन् हीन्न त, ङ ॱसुम्ब हुले ॱल्हक्मु युङ्गो़त्। 5 ङ कीनी, स्यक्पु ज्येक्की ङीन् दी यहुदीगी दक् ज्यब हीन्। ज्यी़त्ल चीगेन् हीन्न, ङ इस्राएल्की मीस्सीर् हीन्। बेन्यामीन्गी दुङ्ज्यी़त्ल छ्येप्प, हीब्रुगी ज्यी़क्की हीब्रु हीन्। छ्यो़डीम्ल चीगेन् हीन्न, ङ फरीसी हीन्। 6 ङे स्यीदङ्ल तगेन् हीन्न, येशुगी छ्यो़ छो घयेत्ल दुक्प अयेक्प तङ्न युङेन्। छ्यो़डीम्ल चीये लम्नी ॱनम्बर् धक्पल थो़ङ्गेन् हीन्न, ङल हीगी ढीक्ल ङीबे ज्यी़त् घन्ड अक् मीत्। 7 ॱनी हीगी ङे घङ् झ्यीबे ले हीगो ङल खीब युङे ले ब अक् ॱनो़ज्युङ्। हुगो मेम्ब, तीङ्ला ख्रीष्ट्की लम्ल तेन क, हीगो घी़न्नक् जेङ् बेत् क। 8 ॱनी धो़न् ङोम दी ङे चोव ज्यीन्दक् ख्रीष्ट् येशु ङु ॱस्यीब हुगो चा छ्यीस्स्योल ॱनेगुक्। खोङ्दङ् ङोस्स्यीन् युङ धङ् खोङ्दङ् मत् ढेब हील तेन, ङे ॱएङ्गी ले घयेत् हुगो घी़न्नक् धङ् धो़म्मीक्की ले जेङ् झ्यीब हीम्ब छोर्कुक्। खोङ्गी धो़ल्ल हुगो कुरीक् फङ् छरेन्। 9 हुगो झ्यीनी छ्यो़डीम्ल चीन ङरङ्गी झ्यीबे लेगी ॱनम्बर् धक्पल थो़म्ब मेम्ब, ख्रीष्ट्ल छ्य स्यक्पे लम्नी ॱनम्बर् धक्पल थो़न्ज्युङ्। हीगो छ्य स्यक्पे लम्नी को़न्ज्योक्की ॱनङ्गेन् बेत्। 10 खोङ् गदु ङु ॱस्यीज्ये यो़प्प, खोङ् ढोङ्नी, यङ् ॱसोम्बुल लोङ्गेङ्गी ॱस्यीक् दी ङल अक् ॱङीच्च्ये यो़प्प, खोङ्ल नोङे दुक्प गुर्रो झ्यीच्च्ये यो़प्प धङ् खोङ् ढोङे लेमु डस्सी ङल अक् युङ्ज्ये यो़प्प तोङ् सीक्को़त्। 11 हीगो झ्युङ्न ॱनी, ङ अक् ॱस्यीनी, यङ् ॱसोम्बुल लोङ्ज्ये युङ्गेन् बेत्। पावल्की ॱमीदेल त गोगेन् १२-२१ 12 हुन्दो ङ ॱलीत् गो़बे थस्स्युक्ल ॱलीत्न, फी़न्सुम् छङल युङ् छुमोङ्। ख्रीष्ट्की ङ दक्पु झ्यीब डस्सी ङ अक् हुगी ॱनोप् गो़बे थस्स्युक्ल ॱनोप् छुज्ये यो़प्पल टेत् च्यो़क्को़त्। 13 पी़न्ज्यासो, ङे थस्स्युक्ल ॱनोप् छर हीन् ॱनो़ब मीत् झ्यीत्। ॱएङ्गी लेमु घयेत् दी जेङ् तक्ल ॱयुन स्यक्नी दोङ्ल घङ् युङल तेन ङ टेत् च्येत्न ज्युक्को़त्। 14 ङ थस्स्युक्ल ॱनोप् छुन तेङ् यी़दु ङल ज्ये थोप्च्ये यो़प्पल ॱसीम्ब ची च्यीक्ल तङ्न ङ टेत् च्येत्न ज्युक्को़त्। हीगी ढीक्ल को़न्ज्योक्की ङ ख्रीष्ट् येशुगी लम्नी भो़ज्युङ्। 15 खीत्रङ् उन फी़न्सुम् छङ च्येम्म ॱसु ॱसु यो़दङ् हुबे हीगो डस्सीगी ॱसम्ल तोङ्गो़ट्टो। ॱनी यङ् हीगो डस्सीगी ॱसम्ल ॱमीत् तोङ्गेङ्गी मील तीङ्ला को़न्ज्योक्की तो़न्न ॱह घोदु ची़क्केन् बेत्। 16 ॱनी घन्दुक् हीन्न अक्, हज्यरङ् घजो़त् थुक् ॱलीत् यो़दङ् हुनी यङ् डो गोगेन् बेत्। 17 ङे पी़न्ज्यासो, खीत्रङ्गी मीजीगी छ्यलु दी ङे ॱमीदेल तेन झ्यीज्यीत्। ङीक्की हुदु पी तो़म्बल तेन झ्यीक्केन् घयेक्की मीजीगी ॱमीदेल तेन खीत्रङ् झ्यीज्यीत्। 18 घन्ड हीन् सीन्न हीगो डस्सी मीत् झ्यीक्केन्, ख्रीष्ट्की कुरुस्ल ड झ्यीक्केङ्गी मी गज्येन् दुक्। हीगी ढीक्ल खीत्रङ्ल ङे एल्ला आक् लेम्म गज्येन् ॱस्येप्पेन्। ॱनी हुन्दो ओक् ॱमीक्च्यु फीक्कीन् फीक्कीन् ॱस्यो़क्को़त्। 19 थस्स्युक्ल हुब खरप्ल डोगेन् बेत्। हुबे को़न्ज्योक् दी रोरङ्सो़ ढोप्प बेत्। हुबे रोरङ्सो़ ॱमम्बीगी लेल तम्दो़त् ॱस्यो़क्केन् बेत्। हुबे ॱसीम् दी जम्बुलीङ्न यो़प्पे ढङ् घयेक्की थोक्ल तोङ्गेन् बेत्। 20 ॱनी हज्यरङ् घयेत् हुब डस्सी मेम्ब, तेङ् यी़गी मीस्सीर् बेत्। ॱनी इगीनी मल्ल हज्यरङ्गी च्यप्को़न् चोव ज्यीन्दक् येशु ख्रीष्ट् झ्यो़म्बल हज्यरङ् गुक्केन् बेत्। 21 हुनी कुरीक्की थोक्ल डोगेङ्गी खोङ्गी ॱवङ् दीगी हज्यरङ्गी हीगी ॱने ॱमन्दीक्मे ली़ हीगो खोङ् रोरङ्गी तो़त्वङ्गी ओ़च्च्य च्येम्मे ली़ डस्सील ज्युर्केन् बेत्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.