मत्ती 26 - ल्होमीयेशु ढोङ धङ् ॱसोम्बुल लोङे केच्च्य घयेत् २६:१–२८:२० येशु ॱसेत्तोङ् सीरे ढो़ १-५ 1 ॱनी हीगो कुरीक् ॱस्येत् छर्नी, येशुगी रोरङ्गी ॱलोप्टुक् दीबल 2 ह ॱनाङ्नी यहुदी घयेत् छ्यीबे धी़रीम् ॱलीक्केन् बेत्। हीगो खीत्रङ्ल ॱस्यो़च्च्ये यो़क्केन् बेत्। हीगी यङ्ल कोलीमीगी ॱरेबु डलक्ल तङ्न कुरुस्ल तान ॱसो़क्केन् बेत् सीन्न ॱस्येप्प बेत्। 3 हीनी छ्यो़प्पो़न् चो छ्यीया घयेत् धङ् लुङ्बे गेम्बा चो छ्यीया घयेत् दी छ्यो़प्पो़न् चो छ्यीस्स्यो कैयाफागी खीम्दु छोब बेत्। 4 हुबे येशु घन्दुक् झ्यीन ॱयो कोर्न सुङ्न ॱसो़क्केन्? सीन्न ढो़ झ्यीब बेत्। 5 ॱनी यङ् हुबे हीगी धी़रीम्गी यङ्ल मत् झ्यीदोङ्। हीगी यङ्ल झ्यीन ॱनी, मी घयेत् हुट्ट लङ्न युङ्गो़ट्टो सीन्न झ्यीब बेत्। भुमु च्यीक्की येशुल ॱनुम् ॱही़म्ब ६-१३ 6 हुनी येशु बेथानी युगङ्दु शीमोन् सीक्केन् जीस्सो़ च्यीक्की खीम्ल स्युन देप्प बेत्। 7 ॱनी हुदु सम सये यङ्ल भुमु च्यीक्की दोलोक्पल सो़बे ॱनो़च्च्य च्युङेत्मु च्यीक्ल ॱनुम् फम्बोक्म ढीम स्यीम्बो़त्म ॱहीक्केन् च्यीक् खुर्न युङ बेत्। ॱनी हुगी ॱनुम् दी खोङ्गी गोल योन ॱही़म्ब बेत्। 8 ॱनी ॱलोप्टुक् दीबे हुगो थोङ्नी, हुब हुल गज्ये ॱमत् छोर बेत्। हुनी हुबे घन्डल नुक्मे ॱनुम् घो ॱमीत् छ्यो़त्ल तोङ्गेन् बेक्क? 9 हुगो घोङ् छ्यीम्मु ॱनेगेन् बेत्। बोर हुगो चोङ्न टङ्बु घयेत्ल बीम्ब गा युङेत् क ॱनी झ्यीब बेत्। 10 हीगो येशुगी ॱह घोनी ॱलोप्टुक् दीबल खोङ्गी खीक्की घन्डल भुमु हुगो ॱसीम्ब नदु ची़क्केन्? हीगी ङल ले गङ्ज्येन् झ्यीन टेच्च्युङ्। 11 टङ्बु घयेत् हुब खीत्रङ्दङ् दल छीगङ् दो़क्केन् बेत्। ॱनी ङ छीगङ् मीत् दो़क्केन् बेत्। 12 भुमु हुगी ङल ॱनुम् स्यीम्बोक्म ॱही़म्ब हुगो ङे सी़ हीगो रो बेक्सल ॱलुक्च्येल ॱएन्सोनी रोगी ठोक्क झ्यीबल डोगेन् बेत्। 13 ङे खीत्रङ्ल गन्दीय ॱस्येत् योङ्। जम्लीङ् की़ल्ल केच्च्य ॱनेम्बु घल ढम्न डोगुक्क हुगोदङ् दल भुमु हीगी ले हीगो ओक् ढेन्सो़ युङ्ज्ये यो़प्पल ॱस्यो़क्केन् बेत् झ्यीब बेत्। येशु डलक्ल तोङ्गेन् यहुदा इस्करीयोत्की ढो़ १४-१६ 14 हुनी ॱलोप्टुक् च्युन्नीबु दीगी छीक्नी यहुदा इस्करीयोत् दी छ्यो़प्पो़न् चो छ्यीया घयेत् च्याल फीम्ब बेत्। 15 ॱनी हुगी हुबल खीत्रङ्गी लक्ल ङे खोङ् टेत्न ॱनी, खीक्की ङल घन्ड टो़क्केन्? सीन्न ढीब बेत्। ॱनी हुबे हुगोल ॱङुगी टङ्ग ॱसुम्ज्यु टेप्प बेत्। 16 ॱनी हुगी हुनी झ्यीनी येशु हुबे लक्ल तोङ्ज्येमे झ्यी़ ते तेब झ्यीब बेत्। यहुदी घयेत् छ्यीबे धी़रीम्गी सम १७-२५ 17 हुनी च्युर् मत् ज्यबे ढोप्ची सगेङ्गी धी़रीम्गी ङीन् धङ्बु दी ॱलीत्नी, ॱलोप्टुक् दीबे येशुल यहुदी घयेत् छ्यीबे हीगी धी़रीम् हीगो ॱसम्ज्येल हज्यरङ्ल गो़बे समे ढङ् घयेत् दी घदु ठोक्क झ्यी सीक्केन्? सीन्न ढीब बेत्। 18 हीगी लेल्ल खोङ्गी खीत्रङ् सार् फागी मी च्यीक् च्याल ज्युक्ल हुल हीन्दुक् झ्यी। चयेलमे नीज्यरङ्ल हीन्दुक् सीगुक्। ह ङे धी़जो़त् ॱस्यच्चल ॱलीस्सोङ्। ङदङ् ङे ॱलोप्टुक् घयेत् यहुदी घयेत् छ्यीबे धी़रीम् ॱसम्ज्येल सम सदु दी रङ्गी खीम्ल युङ्गेन् सीगुक् झ्यी सीन्न ॱङान तङ बेत्। 19 ॱनी ॱलोप्टुक् दीब हील नेन्न फीन्नी, हुगी खीम् दीदु यहुदी घयेत् छ्यीबे धी़रीम्गी यङ्ल गो़बे सम घयेत् दी ठोक्क झ्यीन स्यक्प बेत्। 20 ॱनी गोङ्ज्यो दी येशु धङ् ॱलोप्टुक् च्युन्नीबु दी हुगी खीम् दीदु जोम्न सम सदु देप्प बेत्। 21 ॱनी सम सये यङ्ल ॱलोप्टुक् दीबल येशुगी ङे खीत्रङ्ल गन्दीय ॱस्येत् योङ्। खीत्रङ्गी छीक्नी च्यीक्की ङ डलक्ल तोङ्गेन् बेत्। 22 हीगी केच्च्य हील ॱलोप्टुक् दीब ॱसीम्दुक् गज्येन् लङ्न, हुब रीदङ् रीगी खोङ्ल चोव ज्यीन्दक् हुगो ङ मेम्बेगङ् ॱनी। ङ मेम्बेगङ् ॱनी सीन्न झ्यीब बेत्। 23 ॱनी खोङ्गी हुबल ङ डलक्ल तोङ्गेन् दी ङदङ् दल हीगी ॱनो़च्च्य हील ढोप्ची पान सगेन् च्यीक् बेत्। 24 ॱसुङ्रप्ल यो़प्पल कोलीमीगी ॱरेबु जम्बुलीङ् हीनी डोव दी त डो गोगेन् बेत्। ॱनी हीन्न अक्, कोलीमीगी ॱरेबु डलक्ल तोङ्गेन् हुगो घन्डे दुक्प। बोर हुगो ॱमत् कीब झ्युङ्न, हुल हुगो गा युङ्गो़ट्टो झ्यीब बेत्। 25 डलक्ल तोङ्गेन् यहुदा इस्करीयोत् दीगी खोङ्ल रब्बी ङ मेम्बेगङ् ॱनी झ्यीब बेत्। ॱनी हुल खोङ्गी रङ्रङ् बेत् झ्यीब बेत्। झ्यील्लप् सये क २६-२९ 26 हुनी खोङ्जोसो सम दी सये यङ्ल येशुगी ढोप्ची च्यीक् छ्यक्ल ॱनम्न को़न्ज्योक्ल थु छ्यी पुन हुनी च्यक्न ॱलोप्टुक् दीबल ॱय हीगो लीन्। हीगो ङे सी़बु हीनो सीन्न गो़न टेप्प बेत्। 27 हुनी यङ् गोङ्ज्यङ् च्येम्मे फोप्प च्यीक् छ्यक्ल ॱनम्न खोङ्गी को़न्ज्योक्ल थु छ्यी पुन हुनी ॱलोप्टुक् दीबल बीन्न ॱय हीगो खीत्रङ् लीन्न थुङ्। 28 हीगो ङे ठक् बेगो। हीगो कगो़त् धम्स्यक् झ्यीप्पल थो़म्बे ठक् बेगो। हीगो दीक्प धक्च्येल मी कुरीक्की ढीक्ल थो़ङ्गेन् बेत्। 29 ङे खीत्रङ्ल ॱस्येत् योङ्। ह हीनी झ्यीब दी गोङ्गोङ्गी गोङ्ज्यङ् हीगो ङ ॱमीत् थुङ्। ङे यप्की ज्यागक्तु ॱलीत्नी, हस्सो़त् हुगी ङीन् दी हुदु खीत्रङ्दङ् दल गोङ्ज्यङ् ॱसम्ब ॱयोङ्म थुङ्गेन् सीन्न ॱसुङ बेत्। पत्रुस्की येशु ॱलो़ ॱमीत् तोङ् सीरे केच्च्य ३०-३५ 30 हुनी खोङ्जोसो़ को़न्ज्योक्ल पुगेङ्गी ॱलु च्यीक् लीन्न हुनी छ्यील कुरीक् थो़न्न ओलीप्की लदोक् दील जेन फीम्ब बेत्। 31 फीन्नी, येशुगी ॱलोप्टुक् दीबल हरीङ् छेम्मु खीत्रङ् कुरीक्की ङ ॱलो़ तोङ्गेन् बेत्। घन्ड हीन् सीन्न ॱसुङ्रप्ल थो़ङ्गेन् बेत्। लुक्चीब दी ङे दुङ्न ॱसेत्नी, हुनी लुक् मज्यु दीरङ् थीदोर्ल थोर् डोगेन् बेत् सीन्न को़न्ज्योक्की ॱसुङ थो़ङ्गेन् बेत्। (जकरीया १३:७) 32 हुनी यङ् ङ ॱसोम्बुल लोङ्नी खीत्रङ्ले एल्ला ङ गालीलाल डोगेन् झ्यीब बेत्। 33 ॱनी पत्रुस्की खोङ्ल ॱयोङ्म कुरीक्की नीज्यरङ् ॱलो़ तङ्न आक्, ङ त नीज्यरङ् नम्ल अक् ॱलो़ ॱमीत् तोङ् झ्यीब बेत्। 34 ॱनी येशुगी हुल ङे रङ्ल गन्दीय ॱस्येत् योङ्। हन्दरङ् छेम्मु झ्यबु भो़त् भो़त्ले एल्ला रङ्गी ङल लेम्म ॱसुम् हुगो ङु ॱमीत् ॱस्यीबेत् सीन्न सीक्केन् बेत्। 35 ॱनी हील पत्रुस्की ङ नीज्यरङ्दङ् दल ॱस्यी गो़रङ् ॱस्यर्न आक्, ङु ॱमीत् ॱस्यीबेत् त ङ ॱस्युली मीत् सीर् सीन्न झ्यीब बेत्। ॱनी ॱलोप्टुक् ॱयोङ्म दीबे एक् हुन्दुक् दीरङ् झ्यीब बेत्। गेत्समनीगी ॱसनेदु येशु ॱसुव तबे तम् ३६-४६ 36 हुनी खोङ्जोसो गेत्समनी सीक्केङ्गी ॱसने दील ॱलीत्नी, येशुगी ॱलोप्टुक् दीबल ङ फच्चो़त् फादु ॱसुव तोप्तु डोगेन्। खीत्रङ् हीदु दो़त् सीन्न 37 पत्रुस् धङ् जब्दीगी भु ॱङीबु दी ठीक्न फीम्ब बेत्। हुनी झ्यीनी खोङ्ल ॱसीम्डा धङ् दुक्ङा झ्युङ बेत्। 38 ॱनी खोङ्गी हुब ॱसुम्बुल ङ ॱनी ॱसीम्डागी ॱस्यीयेत्। खीत्रङ् हीदु ङदङ् दल ॱङीत् मत् लोक्पल दो़त् सीन्न, 39 खोङ् रोरङ् फच्चो़त् च्यीक्ल फीम्ब बेत्। ॱनी हुदु खेबुक्ल ॱसल नान हीन्दुक् सीन्न ॱसुव तब बेत्। ङे पब, झ्युङ्न, दुक्स्यी च्येम्मे फोप्प हीनी थुङ् मीत् गो़ब, या टो़रो झ्यी। ॱनी म दी ङे ॱनो़ब मेम्ब, नीज्यरङ्गी थुल यो़प्प दी युङ्ज्ये यो़प्प तोङ् सीन्न झ्यीब बेत्। 40 हुनी खोङ् लोङ्न ॱलोप्टुक् ॱसुम्बु दी च्याल युङ्न ॱलोप्टुक् दीब ॱङीत्ल ॱसोङ ठेप्प बेत्। ॱनी खोङ्गी पत्रुस्ल खीत् छ्युजो़त् च्यीक् इक् ॱङीत् मत् लोक्पल ङदङ् दल दो़त् ॱमीत् छुबेक्कक्? 41 खीत्रङ् दीक्पल छ्यी़ज्ये मीप्पे ढीक्ल खीत्रङ् ॱङीत् मत् लोक्पल ॱसुव तोप्कीन् दो़त्। खीत्रङ्गी ॱसीम् दीगी त झ्यीच्च्ये ॱनो़गेन् बेत्। ॱनी कोलीमी योक्या यो़क्केन् झ्यीनी, ॱअल ॱमीत् छगेन् बेत्। 42 हुनी फीच्च्य यङ् खोङ् फच्चो़त् च्यीक् फीन्न हीन्दुक् सीन्न ॱसुव तब बेत्। ङे पब हीगी फोप्प हीनी ङे ॱमत् थुङल मीत् युङ्गो़त्न ॱनी, नीज्यरङ्गी थुल यो़प्प दीरङ् युङ्ज्ये यो़प्प तोङ् सीन्न झ्यीब बेत्। 43 हुनी खोङ् ॱलोप्टुक् ॱसुम्बु दी च्याल युङ्न, हुब यङ् ॱङीत् लोक्कीन् यो़प्प दीरङ् ठेप्प बेत्। हुब ॱङीच्चोक्की लोङ्न दो़त् दीरङ् ॱमत् छुब हीङ्गो़प्प बेत्। 44 ॱनी खोङ् यङ् फीच्च्य फच्चो़त् दी ॱसक् फीन्न हीगोदङ् लेम्म ॱसुम् एल्लागी लेक्मु डस्सीरङ् झ्यीन ॱसुव तब बेत्। 45 हुनी यङ् ॱलोप्टुक् दीब च्यालरङ् युङ्न खोङ्गी हुबल खीत् हुन्दो ओक् ङे ॱसोगील्ल ॱङीत् दीरङ् लोक्को़प्प? कोलीमीगी ॱरेबु दीक्च्येन् घयेक्की लक्ल तोङे धी़ दी ह ॱलीस्सोङ्। 46 ह लोङ्ल डो। ङ डलक्ल तोङ्गेन् दी ॱनी ह हीन ॱलीच्च्युङ् सीन्न झ्यीब बेत्। येशु सुङे तम् ४७-५६ 47 ॱनी हीगो सीक्कीर्रङ् च्युन्नीबु दीगी छीक्नी यहुदा दी युङ बेत्। हुगी दल छ्यो़प्पो़न् चो छ्यीया घयेत् धङ् लुङ्बे गेम्बा चो छ्यीया घयेक्की तङे मी छेत्मीत् युङ बेत्। हुबे ढी पदङ् धङ् ज्युक्प खुर्न यो़प्प बेत्। 48 खोङ् डलक्ल तोङ्गेन् दीगी ङे ॱसुल च्युप् झ्यीगुक्क हुगो खीत्रङ् घयेक्की सुङ् सीन्न एल्लादु येशु सुङ्गेन् दीबल ढो़ टेप्प हीङ्गो़प्प बेत्। 49 ॱनी हुगी यहुदा दी थो़न्न युङ्न स्युङ्ज्योङ् खोङ् च्याल फीन्न खोङ्ल रब्बी नीज्यरङ्ल दीव युङ स्योक् सीन्न च्युप् झ्यीब बेत्। 50 ॱनी हुल खोङ्गी ॱवे दगु रङ्गी झ्यीच्च्ये ॱनो़बे ले दी ह झ्यी झ्यीब बेत्। हुनी ॱयोङ्म घयेत् दीब छुल्ल युङ्न येशु सुङ बेत्। 51 ॱनी उन येशुदङ् दल यो़क्केन् मीरङ् च्यीक्की रोरङ्गी ढी पदङ् दी पीक्न हुदु युङे मी च्यीक्ल बेन्न आम्ज्योक् दी स्योक् स्योन पुर् तङ बेत्। हुगो छ्यो़प्पो़न् चो छ्यीस्स्योगी ॱयोक्पु च्यीक् हीङ्गो़प्प बेत्। 52 ॱनी ढी बेङ्गेन् दील येशुगी ढी हुगो ॱस्युप्ल सीर्। घन्ड हीन् सीन्न ढी पीक्केन् घयेत् ढी लक्लरङ् ॱस्योर्केन् बेत्। 53 ङे ङरङ्गी यप्ल स्युदेन् ज्यप्न ॱनी, खोङ्गी ङे दगुल तेङ् यी़गी भङ्ज्येम्ब ॱमक्च्यप् च्युन्नीले एक् मङा तङ्न युङ्गेन् मेम्बेक्क ॱनी? 54 ङे हुन्दुक् झ्यीन ॱनी, ङल हीन्दुक् झ्यीब युङ् गोगेन् बेत् सीरे ॱसुङ्रप्ल ढीन यो़प्प घयेत् दी घन्दुक् झ्यीन डुप्केन् ॱनी? झ्यीब बेत्। 55 हुनी हुगी मी युङ घयेत् दीबल खोङ्गी खीक्की नुक्म ढी पदङ् धङ् ज्युक्प खुर्न ङ झ्यक्पा ब अक् ॱनो़न सुङ्दु युङ हीम्ब? ङ छीगङ् ङीन् रीम फो़स्स्यी छ्यो़गङ्गी च्यारीदु ॱलोप्स ज्यक्कीन् देप्पेन्। हुगी यङ्ल खीक्की ङ घन्डल मत् सुङ? 56 ॱनी हीन्न अक्, कलुङ् ॱस्यो़क्केन् घयेक्की ढीन स्यक्पे केच्च्य घयेत् डुप्च्येल हीगो डस्सी युङ्गेन् बेत् सीन्न ॱस्येप्प बेत्। हुनी येशुगी ॱलोप्टुक् घयेत् दीबे खोङ् ॱलो़ तङ्न कुरीक् ढो़नर बेत्। छ्यो़गी छोक्तेन् छ्यीम्मुदु येशुल छ्येप्प केब ५७-६८ 57 हुनी येशु सुङ्गेन् दीबे येशु छ्यो़प्पो़न् चो छ्यीस्स्यो कैयाफा च्याल ठीक्न च्येब बेत्। ॱनी उन छ्यो़डीम्गी चयेलम घयेत् धङ् लुङ्बे गेम्बा चो छ्यीया घयेत् जोम्न यो़प्प बेत्। 58 ॱनी पत्रुस् येशुगी तीङ्जो़त् तीङ्जो़त्ल युङ्न खोङ्ल घन्ड झ्यीक्को़दङ् ॱनो़न छ्यो़प्पो़न् चो छ्यीस्स्योगी खीम्गी च्यारी दीगी नङ्ल स्युन हुदु हुगी मी ॱयोक्पु दीबदङ् दल देप्प बेत्। 59 छ्यो़प्पो़न् चो छ्यीया घयेत् धङ् छ्यो़गी छोक्तेन् छ्यीम्मी़ सदस्यीय ॱयोङ्म घयेत् दीबे एक् येशु ॱसो़च्च्येमल खोङ्ल ॱएलमे ङीब कोप्केङ्गी मी पङ्बु ॱयेङ बेत्। 60 ॱनी ङीब कोप्केङ्गी मी गज्येन् थो़न्न ॱएलमे केच्च्य ॱस्येत्न आक्, ङीब घन्ड अक् ॱमत् ॱङीब बेत्। स्युक्ल मीरङ् ॱङी थो़न्न 61 हुबे हीगी मी हीगी को़न्ज्योक्की छ्यो़गङ् हुगो ॱरुम्नी यङ् स्यक्पु ॱसुम्ल सो छुबेत् सीस्सोङ् सीन्न ॱस्येप्प बेत्। 62 हुनी छ्यो़प्पो़न् चो छ्यीस्स्यो दी लोङ्न येशुल खो़त् घन्ड सीन्न लेम्बु छीक् च्यीक् इक् ॱमीत् ॱलोक्केन्? हीगी मी हीबे रङ्ल ङीब कोप्कुक् न ॱनी सीन्न झ्यीब बेत्। 63 हुन्दुक् सीन्न अक्, येशु ॱसीङ् थागी स्युब बेत्। हुनी यङ् हुगी खोङ्ल खो़त् को़न्ज्योक्की ॱरेबु, खोङ्गी को़बे च्यप्को़न् ख्रीष्ट् दी हीन् सीक्को़प्प ॱनी? ॱसोम्बु हीम्बे को़न्ज्योक् पङ्दु डेन्न तम् ॱस्यो़त् झ्यीब बेत्। 64 हुल येशुगी ङ नीज्यरङ्गी सीक्केन् दीरङ् हीन्। ङे खीत्रङ्सोल ॱस्येत् योङ्। तीङ्ला कोलीमीगी ॱरेबु ॱवङ् च्येम्मे ॱये छ्योदु दो़प्प धङ्, ॱनी इगीनी मल्ल ॱमुबल स्यो़न्न युङ खीत्रङ्गी थोङ्गेन् बेत् झ्यीब बेत्। 65 ॱनी हीगो घोनी छ्यो़प्पो़न् चो छ्यीस्स्यो दीगी रोरङ्गी घो़ दी च्येत्न उन मी ॱयोङ्म दीबल हीगी मी हीगी को़न्ज्योक्ल ॱमो़म्बी़त् तङ्सोङ्। हीगो खीत्रङ्गीरङ् ॱह घोसोङ्। ह हज्यरङ्ल घन्डे पङ्बी़ गो़ज्येत् दी यो़प्प? 66 ह खीक्की घन्ड झ्यीच्च्ये ॱनो़ब यो़प्प? सीन्न ढीब बेत्। हील ॱयोङ्म दीबे हुन्दुक् झ्यीक्केल्ल ॱसो़त् गोगेङ्गी छ्येप्प को़बल ओ़ब दुक् झ्यीब बेत्। 67 हुनी हुब घयेक्की खोङ्गी झ्येत्ङेल छ्युप्स्या कप्न खोङ्ल मुर्चोक् बेम्ब बेत्। ॱनी यरीगी यङ् डम्ज्यक् बेन्न 68 खोङ्ल खो़त् को़न्ज्योक्की को़बे च्यप्को़न् ख्रीष्ट् दी हीन्न, रङ्ल बेङ्गेन् दी ॱसु बेक्क ॱनी? खोक्की ॱङो़स्स्यी दी ॱस्यो़त्ते त सीन्न झ्यीब बेत्। पत्रुस्की येशुल ङु ॱमीत् ॱस्यीबेत् झ्यीब ६९-७५ 69 हुगी यङ्ल पत्रुस् च्यारीगी धङ्र दीन यो़प्प बेत्। ॱनी उन ॱयोक्मु च्यीक्की पत्रुस्ल ॱवे रङ् अङ् गालीलागी येशु हुगोदङ् दल दो़क्केङ्गी मी च्यीक् हीङ्गो़प्पेत् झ्यीब बेत्। 70 हीगी लेल्ल पत्रुस्की मी कुरीक्की दोङ्दु ङ हुगो मेन्। खोक्की घन्डे तम् सीगो़प्प ङल हुगो ॱस्यो़च्च्ये मीत् सीन्न झ्यीब बेत्। 71 हुनी पत्रुस् फच्चो़त्ल हुगी च्यारीगी गोक्केक् दीदु फीन्न देत्नी, हुदु उक् भुमु ॱयोङ्म च्यीक्की पत्रुस् थोङ्नी, उन यो़क्केन् मी दीबल हीगो ओक् नासरत्की येशु हुगोदङ् दल दो़क्केङ्गी मी च्यीक् हीङ्गो़प्पेत् झ्यीब बेत्। 72 ॱनी हील यङ् पत्रुस्की ङ हुगो मेन्। ङे हुगी मी हुगो ङु ॱमीत् ॱस्यीबेत् सीन्न ॱन झ्यीन टेप्प बेत्। 73 हुनी तीङ्जो़त्ल यङ् उन यो़प्पे मी यरीगी पत्रुस्ल रङ् गन्दीय हुगी छ्योगी मी च्यीक्रङ् बेत्। रङ्गी केच्च्योक् दीगीरङ् ङीक्की रङ् ङु ॱस्यीगुक् झ्यीब बेत्। 74 हुनी पत्रुस्की ॱमो़त् भोर्न ॱन झ्यीन ङे हुगी मी हुगो दीम्बरङ् ङु ॱमीत् ॱस्यीबेत् झ्यीब बेत्। हीनी ॱस्यर्च्यक् झ्यबु च्यीक् भो़ब बेत्। 75 हुनी येशुगी एल्ला पत्रुस्ल झ्यबु भो़त् भो़त्ले एल्ला रङ्गी ङल लेम्म ॱसुम् ङु ॱमीत् ॱस्यीबेत् सीन्न सीक्केन् बेत् सीर दी पत्रुस्ल ढेन्सो़ झ्युङ्नी, पत्रुस् छ्यील थो़न्न गन्दीक्म ङी़ब बेत्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.