यहुदा 1 - ल्होमी1 येशु ख्रीष्ट्की ॱयोक्पु याकुब्गी पी़न् ङ यहुदागी हीगो यप् को़न्ज्योक्की भो़बे झ्यम्बे मी, येशु ख्रीष्ट्की छ्योप्न स्यक्प घयेत्ल ङे हीगो ढीन तोङ्गो़त्। 2 खीत्रङ्सो घयेत्ल ॱङीङ्ज्यी, ॱसीम् दीव धङ् झ्यम्ब ज्येबर् युङ्ज्ये यो़प्प तोङ्। चयेलम जी़म घयेक्की ढीक्ल ३-१६ 3 झ्यम्बे मीसो, हज्यरङ्गी थर्वे लम् दी च्यीक् बेत्। ॱनी हीगी थर्वे लम् हीगी ढीक्ल एल्लानीरङ् ङे यीगी च्यीक् ढीगीन् थेस्सी झ्युङ्। ॱनी हीगो को़न्ज्योक्की मी चङ्म घयेत्ल फुगी ढीक्ल ॱनङे छ्य स्यक्पे लम् दी खीत्रङ्गी तोर्तु ॱमत् ची़प्प, दक्पु झ्यीन हुल मीत् डीक्पे लेमु युङ्गेन् घयेत्तङ् थुक्च्यीत् सीन्न ॱलोप्स ज्यक्पे तीम्मल हीगो ढी गो़ झ्युङ्। 4 खीत्रङ्गी उन को़न्ज्योक् ॱमीत् ॱसम्गेङ्गी मी यरी को़न्ज्योक् ॱसम्गेन् हीन् झ्युरील स्युन यो़क्केन् बेत्। हुबल घन्दुक् झ्यीबे छ्येप्प फोक्केन् बेक्क हुगो एल्लादु ढीन यो़क्केन् बेत्। हुबे हज्यरङ्गी को़न्ज्योक्की थुज्यी दी आक्सी छ्येल ॱनक्सी झ्यीन अक्, डीक्केन् हीम्बल सो़न यो़क्केन् बेत्। येशु ख्रीष्ट् हज्यरङ्गी चोव ज्यीन्दक् ॱवङ् छ्यीम्मु च्येम्म खोङ् च्यीगी च्यीक् यो़प्प हीम्बल हुबे मेम्बेत् सीन्न सीक्केन् बेत्। 5 म दी खीत्रङ्ल कुरीक् ॱस्यो़च्च्ये यो़क्केन् बेत्। ॱनी यो़त्न अक्, ङे ढेन्सो़ ॱलोङ्ज्येल हीगो ढीगो़त्। धङ्बु इस्राएली घयेत् मीस्रे लुङ्बनी चोव ज्यीन्दक्की तो़न्न ठीक्न युङ्नी इक्, तीङ्ला हुबे खोङ्ल छ्य मत् स्यक्पल छ्य मीत् स्योक्केन् घयेत् दी खरप्ल तङ् तङ बेत्। 6 इगीन तेङ् यी़गी भङ्ज्येम्ब घयेक्की रोरङ्सो़ ॱएङ्गी ॱवङ् च्योङ्ज्येमे ले दील ओ़ब मीत् झ्यीक्केन्, रोरङ्सो़ दो़स्स दी ॱलो़ तङ्न युङ घयेत् दी ठीम्ज्यो़क्की ङीन् छ्यीम्मु युङे धी़ थुक्ल खोङ्गी हुब घयेत् फु काब तोङ्गी ढीक्ल च्यागोङ् ज्यप्न मेन्नक्ल ॱलुक्न स्यक्न यो़क्केन् बेत्। 7 हीगो डस्सी सदोम् सार् धङ् गमोरा सार्, ॱनी हुगी थप्स्यीगी सार् घयेक्की मी इक् हुन्दुक् दीरङ् झ्यीन छ्येगी ॱवङ्ल ॱस्योर्न, कोलीमीगी लुसल मीप्पे झ्यीत् मत् रुङे ले एक् झ्यीब बेत्। हुन्दुक् झ्यीनी हुबल को़न्ज्योक्की छ्येप्प केब बेत्। ॱनी हुगो फुगी मी बर्से ॱनर्मी नोङ्से लेमु डस्सी झ्युङ बेत्। 8 ॱनी हुगो डस्सी दी क खीत्रङ्गी उन यो़क्केन्, ॱङीनम्ल ॱङीज्युङ् सीक्केन् रोरङ्सो़ ली़बु चङ्ज्ये मीप्पल सोगेन्, ॱसी़ ॱवङ्गी होक्ल अक् मीत् दो़क्केन् हुबे इगीगी ओ़च्च्य च्येम्म घयेत्ल ॱमो़म्बी़त् तोङ्गेन् बेत्। 9 तेङ् यी़गी भङ्ज्येम्ब चो छ्यीया मीखाएल् सीक्केन् दीगी इक् त मोशागी कुबुर्की ढीक्ल दी़क्की चोदङ् केच्च्य थुक्री चीये यङ्ल हुगी दी़त् दील मीखाएल्की ङेम्बे तम् लप्न ङीब ॱमत् कब, बोर रङ्ल चोव ज्यीन्दक्की कप्च्यो़न् ॱनङ्ज्ये यो़प्प स्योक्च्यीत् सीन्न झ्यीब बेत्। (जकरीया ३:२) 10 हुबे रोरङ्सोल ॱस्यो़च्च्ये मीप्प घयेक्की ढीक्ल ॱमो़न्ज्यक् तोङ्गेन् बेत्। हुबे ॱसम्ल दी ॱनोक्सम् मीप्पे ॱसीम्ज्येङ्गी लेमु डस्सी झ्यीन रोरङ्सो़ ॱह घोन युङे केच्च्य दीगी रोरङ्सो मीत्तल तोङ्गेन् बेत्। 11 हुब घन्डे दुक्प। कयीन्गी लम् ज्यी़त् दीक्केङ्गी मी हुब बेत्। धङ्बु लोप्की ॱवङ्ल ॱस्योर्न ङेम्बे लम्ल छ्यी़नरे मी बालाम् डस्सी हुब बेत्। धङ्बी़ कोरागी डन्दप् झ्यीब डस्सी हुबे झ्यीक्केन् बेत्। ॱनी कोरा डस्सीरङ् हुब अक् खरप्ल डोगेन् बेत्। 12 खीत्रङ् नङ्दु झ्यम्बे झ्यील्लप् सये यङ्ल खीत्रङ्गी घुङ्दु हुब छ्युल नक्तुक् स्युब डस्सी यो़क्केन् बेत्। हुब ङु छय मीप्प, सय धङ् थुङल मो़स्सक् ॱस्यो़क्केन् रोरङ् च्यीक्पु ढो़क्कोक् केङ्गेङ्गी डोक्पा डस्सी, ॱलुङ्गी खुर् डोगेन् घो ॱमीत् छ्यो़क्की ॱमुब डस्सी, तो़म्बु डलु ॱमीत् छ्यागेङ्गी दोङ्बु डस्सी धङ् चवनी पीक्न पुर् तङे दोङ्बु ॱस्यीनरदङ् छ्येत्मीक्की मी हुब बेत्। 13 छ्यु ज्यम्जो छ्यीम्मी़ भजुप् लोङ्न युङ्नी, फल्ल लोक्पे यङ्ल बुगक् लेनरदङ् छ्येत्मीत् हुबे ङु छय मीप्पे ले घयेत् दी यो़क्केन् बेत्। हुब ॱनम्गी कर्म रोरङ्गी लम्नी छ्यी़नरदङ् छ्येत्मीक्की मी बेत्। हुबे ढीक्ल फु काब तोङ्ल मीत् येगेङ्गी मेन्नक् ॱनक् थीङीय स्यक्न यो़क्केन् बेत्। 14-15 हुन्दुक् झ्यीबे मी घयेक्की ढीक्ल धङ्बु आदम्नी झ्यीनी मीदोक् दी़न् ॱसोङ्नी, थो़म्बे हनोक्की हीन्दुक् झ्यीबे ॱङो़स्स्यी ॱस्येत्न यो़क्केन् बेत्। मी छङ्म थम्ज्येत्ल ठीम् च्यो़त्तु चोव ज्यीन्दक् इगीनी मल्ल खोङ् रोरङ्गी मी चङ्म ठी बुम्गी दल झ्यो़ङ्गेन् बेत्। ॱनी हुगी यङ्ल को़न्ज्योक् ॱमीत् ॱसम्गेन् घयेक्की ङीबे ले री रील धङ् खोङ्ल ॱमीत् चीगेन् दीक्च्येन् घयेक्की खोङ्ल ङेन्दम् लब घयेत् थम्ज्येक्की ढीक्ल ठीम् च्येत्न छ्येप्प को़गेन् बेत् सीर यो़क्केन् बेत्। 16 हुगी मी हुब म दीरङ् घन्डल अक् गुव मीत् झ्यीक्केन्, ॱसोदी दीलरङ् मीन्दुक् ॱनो़ब झ्यीक्केन्, धेच्च्यो ङेम्बे ॱवङ्ल ॱस्योर्न डोगेन् तम्दो़त् छ्यीम्मु ॱस्यो़क्केन्, रोरङ्गी युङ्ज्यी़ल तेन मील तो़च्च्य की़क्केङ्गी मी हुब बेत्। 17 झ्यम्बे दगुसो, हज्यरङ्गी चोव ज्यीन्दक् येशु ख्रीष्ट्की ठीक्नल घयेक्की एल्लादु ॱस्येत्न यो़प्पे केच्च्य हीगो खीत्रङ्गी ॱसीम्बे यीक्ल सुङ्न स्योक्च्यीत्। 18 स्युक् थमे धी़ल छ्यगेङ्गी मी धङ् को़न्ज्योक् ॱमीत् ॱसम्गेन् धेच्च्यो ङेम्बे ॱवङ्ल डोगेन् घयेत् थो़न्न युङ्गेन् बेगो सीन्न ॱस्येत्न यो़क्केन् बेत्। 19 खीत्रङ् नङ्दु टेगेन् दीब हस्सो़त् हुब बेत्। हुब रोरङ्सो रङ्स्यीगी ॱसीम्बे ॱनो़जो़त्ल डोगेन् बेत्। हुबल म दीरङ् धम्बे थु मीप्प बेत्। 20 झ्यम्बे दगुसो, खीत्रङ् हुब डस्सी मेम्ब, खीत्रङ्गी छ्य स्यक्पे लेमु चङ्म दी ॱसप्स्योङ्दङ् छ्येत्मीत् झ्यीन हुल चीक्पक् डेन्न सो़ज्यीत्। धम्बे थुगी ॱस्यीक्की लम्नी ज्यी़न्दु ॱसुव तप् तब झ्यीज्यीत्। 21 हज्यरङ्गी चोव ज्यीन्दक् येशु ख्रीष्ट्की थुज्यीगी लम्नी फु तक्पे छी थोबल गुक्कीन् देत्न खीत्रङ् को़न्ज्योक्की ॱङीङ्दु ॱस्योङ झ्यीज्यीत्। 22 हीम्ब न, मेम्ब न? ॱनो़ब खुर्केन् घयेत्ल खीत्रङ्गी ॱङीङ्ज्यी झ्यीज्यीत्। 23 ॱनी यरी यङ् मीज्येगी घुङ्नी तो़न्न छ्यीब डस्सी थर्वे लम्ल तो़न्ज्यीत्। ॱनी यरील यङ् ॱङीङ् छन आक्, जीम्न दो़च्च्यीत्। ॱनी हुबे दीक्पल जप् तङे स्यीलोक्सीगी घो़ दील अक् ॱनम्दोक् झ्यीज्यीत्। 24 खीत्रङ् दीक्पनी छ्योप् छुगेन् खोङ्गी तो़त्वङ् छ्यीम्मी़ ओ़च्च्य गेस यो़स्सल खीत्रङ् नक्चक् मीप्प तो़न् छुगेन्, 25 हज्यरङ्गी च्यप्को़न् को़न्ज्योक् च्यीगी च्यीक्ल हज्यरङ्गी चोव ज्यीन्दक् येशु ख्रीष्ट्की लम्नी तो़त्वङ् छ्यीम्मी़ ओ़च्च्य, ॱवङ्दा छ्यीम्मु, ॱस्यीक् धङ् ॱवङ् ॱङो़न् धङ्बी़ धी़गी एल्लानी झ्यीनी हुन्दो धङ् ॱनी धी़ नम ज्यी़न्दु युङ् युङ युङ्ज्ये यो़प्प स्योक्च्यीत्। आमेन्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.