युहन्ना 9 - ल्होमीयेशुगी स्यर्च्योक् च्यीक् थोङ्गेल्ल सो़ब १-१२ 1 हीनी तीङ्ला ङीन् च्यीक् येशुसोल ज्यलम्दु कीजी़नीरङ् स्यर्च्योक् कीबे मी च्यीक् ठेप्प बेत्। 2 हुनी ॱलोप्टुक् दीबे येशुल रब्बी हीगो हीगी पब आमे दीक्प झ्यीनी, हीम्ब न, न रोरङ्गी दीक्प झ्यीनी, स्यर्च्योक् कीब बेक्क? सीन्न ढीब बेत्। 3 ॱनी येशुगी लेम्बुल हीगो रोरङ्गी दीक्प झ्यीबे एक्, मेम्बेत्। हीगी पब आमे दीक्प झ्यीबे एक्, मेम्बेत्। को़न्ज्योक्की हीगोल जेक्केङ्गी ले घयेत् मी कुरीक्की थोङ्ज्ये यो़प्पल हीगो स्यर्च्योक् कीब बेत्। 4 ङ तोङ्गेङ्गी ॱङाबे ले ङीन् यो़त्तोक्ल हज्यरङ्गी झ्यीत् गोगेन् बेत्। नम् ॱरो़नी, छेम्मु ॱसी़ इक् ले झ्यीत् ॱमीत् छुगेन् बेत्। 5 ङ जम्बुलीङ्दु यो़स्स्यीङ् भोर्ल जम्बुलीङ्गी मील युङे मेङ्ग दी ङ हीन् झ्यीब बेत्। 6 हीगो सीन्नी, येशुगी ॱसल छ्युमक् पो़त्न थलल जीन हुगी स्यर्च्योक् दीगी ॱमीक् दील ॱही़न्न टेप्प बेत्। 7 टेत्नी, हुल रङ् ज्युक्ल सीलोआम्गी लुमदु टी़लेत् सीन्न ॱङाब बेत्। सीलोआम्गी धो़न् दी तङल सीक्केन् बेत्। ॱनी हुगी मी दी हुदु फीन्न टी़नी, थोङ्गेल्ल ॱसोङ्न, रोरङ्गी खीम्ल लोक्नर बेत्। 8 हुनी हुगी खीम्जीब दीब धङ् हुगी एल्ला ॱसो़ङो़न् लीम्ब थोङे मी घयेत् दीबे हुगी स्यर्च्योक् दी ॱमीक्की थोङ्न डोव थोङ्नी, हुबे रोरङ्सो ॱनम्बु हीन्दुक् सीन्न झ्यीब बेत्। ॱसो़ङो़न् लीङ्गेन् स्यर्च्योक् दी हुगो मेम्बेक्क ॱनी? 9 ॱनी हील यरीगी हुगोरङ् बेत्। ॱनी यङ् यरीगी हीम्ब त, हुगो डस्सीरङ् दुक्। ॱनी म दी हुगो त मेम्बेत् सीन्न लप्री चीय बेत्। ॱनी हुगी स्यर्च्योक् दीगी ङ हुगोरङ् हीन् सीन्न ॱस्येप्प बेत्। 10 हुनी हुबे हुगोल खो़त् घन्दुक् झ्यीन थोङ्गेल्ल फीन्ज्युङ? सीन्न ढीनी, 11 ॱनी हुगी लेम्बुल येशु सीक्केन् मी च्यीक्की थलल ज्यक् सो़न ङे ॱमीक्ल ॱही़न्न, ङल ज्युक्। सीलोआम्गी लुमदु टी़लेत् सीच्च्युङ्। ॱनी ङ हुदु फीन्न टी़नी, थोङ्गेल्ल फीन्ज्युङ् झ्यीब बेत्। 12 ॱनी हुबे हुगी मी दी घन ॱनी? सीन्न ढीनी, हुगी लेम्बुल ॱमत् ॱस्यी। ङल ॱस्यो़च्च्ये मीत् झ्यीब बेत्। स्यर्च्योक् थोङ्गेल्ल सो़बे मील फरीसीगी ढीस्स्यीप् १३-३४ 13 हुनी हुब घयेक्की हुगो फरीसी घयेत् च्याल ठीक्न फीम्ब बेत्। 14 येशुगी थलल ज्यक् सो़न हुगी मी दील ॱही़न्न, थोङ्गेल्ल सो़बे ङीन् दी ङीत्तुव हीङ्गो़प्प बेत्। 15 ॱनी फरीसी दीबे एक् हुल खो़त् घन्दुक् झ्यीन थोङ्गेल्ल फीन्ज्युङ ॱनी? सीन्न ढीनी, हुगी लेम्बुल हुगी मी दीगी थले ज्यक् ॱही़न्न बीन्नी, ङे हुगो टी़नी, हुनी ङे थोङ्ज्युङ् झ्यीब बेत्। 16 ॱनी हुब यरीगी हुन्दुक् झ्यीन ङीत्तुवे कल ॱमीत् चीगेङ्गी मी को़न्ज्योक्की तङ्न युङे मील मीत् डोगेन् बेत् झ्यीब बेत्। ॱनी हुब यरीगी यङ् हुगो दीक्च्येङ्गी मी हीन्न, नुक्मे यीक् छ्यीम्मी़ लेगी ता घन्दुक् झ्यीन झ्यीत् छुगेन्? सीन्न, हुब हीगी ढीक्ल मत् डीक्प, रोरङ्सो नङ्दु भीनर बेत्। 17 ॱनी यङ् हुबे फीच्च्य हुगी मी दील खोक्की ॱमीक् थोङ्गेल्ल सोगेन् हुगी ढीक्ल खो़त् घन्ड सीक्केन्? सीन्न ढीब बेत्। ॱनी हुगी लेम्बुल हुगो को़न्ज्योक्की कलुङ् ॱस्यो़क्केन् च्यीक् हीङ्गो़प्पेत् झ्यीब बेत्। 18 ॱनी उन यो़क्केन् यहुदी छ्यीया घयेत् दीगी हुगो एल्ला स्यर्च्योक् खुङ् हीम्ब धङ् हुगो थोङ्गेल्ल ॱसोङ दील छ्य मत् स्यक्पल हुगी आम दी धङ् पब दी ठीक्तु तङ बेत्। 19 तङ्नी, हुगी आम पब दील हुबे हीगो खीक्की भु हीम्ब न मेम्ब? हीगो कीये यङ्नीरङ् स्यर्च्योक् यो़प्प ॱनी? यो़त्न, हुन्दो हीगो घन्दुक् झ्यीन थोङ्गेल्ल ॱसोङ बेक्क? सीन्न ढीब बेत्। 20 ॱनी हुगी आम पब दीगी लेम्बुल हीगो ङीक्की भु हीन्। कीये यङ्नीरङ् हीगो स्यर्च्योक् कीज्युङ्। 21 ॱनी हुन्दो घन्दुक् झ्यीन थोङ्गेल्ल ॱसोङ बेक्क, ॱसी़ थोङ्गेल्ल सो़ब बेक्क हुगो ङीत्ल ॱस्यो़च्च्ये मीत्। खीत्रङ्गीरङ् हील ढीरो झ्यी। हीगो ॱनोक्सम् ॱलीत् छरल रोरङ्गी ढीक्ल तम् घन्ड अक् ॱस्यो़त् छुगेन् बेत् झ्यीब बेत्। 22 हीगो यहुदी छ्यीया घयेत्ल ज्यीबे, हुबे हुन्दुक् झ्यीबे तम् ॱस्येप्प बेत्। यहुदी छ्यीया घयेक्की येशुल हुगो को़न्ज्योक्की को़बे च्यप्को़न् ख्रीष्ट् बेत् सीन्न मी ॱसी़ सीगुक्क हुगो यहुदीगी छ्यो़ छोनी पी़त्न दीक्केन् सीक्केङ्गी ढो़ एल्लादु झ्यीब हीङ्गो़प्प बेत्। 23 हीगो झ्यीनी, हुगी आम पब दीबे हीगो ॱनोक्सम् ॱलीत् छरल हीलरङ् ढीरो झ्यी झ्यीब हीङ्गो़प्प बेत्। 24 हुनी यङ् यहुदी छ्यीया दीबे फीच्च्य हुगी मी दीरङ् ठीक्न हुल रङ् को़न्ज्योक्ल तो़प्प युङल ढङ्बु झ्यीन ॱस्यो़त्। ङीत्ल त रङ् थोङ्गेल्ल सोगेन् हुगो दीक्च्येन् हीम्ब ॱस्यो़च्च्ये यो़त् झ्यीब बेत्। 25 ॱनी हुगी लेम्बुल ॱमत् ॱस्यी। हुगो दीक्च्येन् हीम्ब मेम्ब ङल ॱस्यो़च्च्ये मीत्। ङल ॱस्यो़च्च्ये यो़प्प दी ङ एल्ला स्यर्च्योक् यो़त्। ॱनी हुन्दो थोङ्गेल्ल फीन्ज्युङ् झ्यीब बेत्। 26 ॱनी हुबे यङ् फीच्च्य हुगोल खो़त्ल हुगी घन्दुक् झ्यीज्युङ ॱनी? घन्दुक् झ्यीन थोङ्गेल्ल सो़ज्युङ ॱनी? सीन्न च्युर बेत्। 27 ॱनी हुगी लेम्बुल ङे खीत्रङ्ल हुन्दोरङ् ॱस्येप्पेन् न ॱनी। खीक्की हुल मत् नेम्ब ॱनी? फीच्च्य यङ् घन्डे नेङ्गीन् थेप्प दुक्क? न घन्ड खीत् इत् हुगी ॱलोप्टुक्ल युङ्ज्ये ॱनो़ब दुक्क ॱनी? झ्यीब बेत्। 28 हुनी हुबे हुल छ्यस्सी़क्की केच्च्यल हुगी ॱलोप्टुक् रङ्रङ् झ्यी। ङीत् मोशागी ॱलोप्टुक् हीन्। 29 मोशाल को़न्ज्योक्की दीम्बरङ् केच्च्य ॱस्येप्प हीम्ब ङीत्ल ॱस्यो़च्च्ये यो़त्। ॱनी हुगी मी हुगो खुङ् दी घनीगी हीम्ब ङीत्ल हुगो ॱस्यो़च्च्ये मीत् झ्यीब बेत्। 30 हीनी हुगी मी दीगी लेल्ल ङे ॱमीक् थोङ्गेन् दील हुगी सो़न बीन्ज्युङ्। ॱनी हुगी खुङ् खीत्ल ॱस्यो़च्च्ये मीत् सीक्केन् हीगो घन्दुक् झ्यीबे ॱह लेबे तम् बेक्क? 31 दीक्च्येङ्गी केच्च्यल को़न्ज्योक्की ॱमीत् ॱसेङ्गेन् बेत्। ॱनी को़न्ज्योक्ल ॱसीम्बे यीक्नी ॱसम्गेन् खोङ्गी थुल यो़प्पे ले झ्यीक्केन् दीगी केच्च्यलरङ् खोङ्गी ॱसेङ्गेन् बेत् सीर हज्यरङ्ल ॱस्यो़च्च्ये यो़क्केन् बेत्। 32 ॱङो़न् धङ्बुनी झ्यीनी हजो़त् थुक्ल घल अक् कीये यङ्नीरङ् स्यर्च्योक् कीबे मी थोङ्गेल्ल सो़बे तम् ॱसी़ इक् ॱह मत् घोव बेत्। 33 ॱनी हुगो को़न्ज्योक्की मी मेन्न ॱनी, हुगी घन्दुक् झ्यीन हीन्दुक् झ्यीबे ले झ्यीत् छुगेन्? झ्यीब बेत्। 34 ॱनी हुगी फरीसी दीबे हुल रङ् त कीये यङ्नीरङ् दीक्च्येल्ल हरुङ्द ङीत्ल ॱलोप्केन् सीक्केन्? सीन्न हुबे हुगो छ्यील दीत् तङ बेत्। ॱसीम्बे ॱमीक्की ढीक्ल ३५-४१ 35 ॱनी हुगो छ्यील दीत् तङ बेत् सीरे तम् दी येशुगी ॱह घोव बेत्। ॱनी तीङ्ला हुगो येशुल ठेत्नी, खोङ्गी हुल खोक्की कोलीमीगी ॱरेबुल छ्य स्योक्को़प्प? सीन्न ढीब बेत्। 36 ॱनी हुगी लेम्बुल ला खोङ् ॱसु बेक्क ॱनी? ङ छ्य स्योक्च्येम झ्यीब बेत्। 37 ॱनी येशुगी हुल रङ्दङ् खच्चङ् ठेक्केन् दी हुन्दो तम्स्यु लप्केन् हीगो बेत् ॱनी सीन्न ॱस्येप्प बेत्। 38 हील हुगी मी दीगी चोव ज्यीन्दक् ङ नीज्यरङ्ल छ्य स्योक्केन् सीन्न येशुल छ्यक् छेब बेत्। 39 ॱनी येशुगी ङ म दी जम्बुलीङ्ल हीन्दुक् झ्यीबे छ्येप्प को़दु युङ हीन्। स्यर्च्योक् घयेत् थोङ्ज्ये यो़प्पल धङ् थोङ्गेन् घयेत् स्यर्च्योक्ल डोज्ये यो़प्पल सीन्न युङेन् झ्यीब बेत्। 40 ॱनी उन यो़प्पे फरीसी यरीगी हीगो ॱह घोनी, हुबे येशुल ङीक्की इक् ॱमीत् थोङेत् सीगो़प्प ॱनी? झ्यीब बेत्। 41 ॱनी येशुगी हुबल खीत्रङ् ॱमीत् थोङ्गेङ्गी मी हीन्न, खीत्ल घन्डे दीक्प युङ ॱनी। खीत्रङ्गी थोङ्गो़त् सीक्केन् बेत्। हुगो झ्यीनी, खीत्रङ्गी दीक्प मीत् धक्प युङ्गेन् बेत् झ्यीब बेत्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.