युहन्ना 6 - ल्होमीमी तोङ्डक् ॱङल सम टेप्पे तम् १-१५ 1 हीनी तीङ्ला येशुसो गालीलागी छो दीगी पारील फीम्ब बेत्। हुल तीबेरीयास्की छो ओक् सीगो़प्प बेत्। 2 ॱनी येशुगी नेप्प ढक्तु ची़त्न, यीक् छ्यीम्मी़ लेगी ता गज्येन् झ्यीप्प मी घयेक्की थोङ्नी, हुदु उक् येशुगी तीङ्ल मी छेत्मीत् युङ बेत्। 3 ॱनी येशु धङ् ॱलोप्टुक् दीब उन यो़क्केन् पोर्तोक् च्यीक्ल जेन देप्प बेत्। 4 हुगी यङ्ल यहुदी घयेत् छ्यीबे धी़रीम् ॱस्यच्चल ॱलीत् छर हीङ्गो़प्प बेत्। 5 ॱनी लस्स्यम् दीनी छुल्ल मी छेत्मीत् युङ थोङ्नी, येशुगी ॱलोप्टुक् फीलीप् दील मागी मी मजो़त् च्यीक्ल तीच्च्येमे सम हज्यरङ्गी घनी नोगेन्? सीन्न ढीब बेत्। 6 ॱनी म दी घन्ड झ्यीत् गोगेन् बेक्क हुगो येशु रोरङ्ल ॱस्यो़च्च्ये यो़प्प बेत्। हीगो फीलीप्ल खोङ्गी छो़त्लीन् तज्येल ढीबरङ् हीङ्गो़प्प बेत्। 7 ॱनी फीलीप्की लेम्बुल टङ्ग दीनार् ज्यब ॱङीगी ढोप्ची नो़न अक्, नुक्मे मी मङल अच्च्येत् री री इक् छ्यप्तोक्प मीन्दुक् झ्यीब बेत्। 8 ॱनी ॱलोप्टुक् ॱयोङ्मा शीमोन् पत्रुस्की पी़न् अन्द्रीयस् दीगी येशुल 9 हीन भीज च्यीक्ल नेगी ढोप्ची ॱङ धङ् न ॱङी त दुक्। ॱनी नुक्मे मी मङल उजो़त् च्यीक्की घन्ड च्यीक् युङ्ज्ये झ्यीब बेत्। 10 हुगी ॱसने दीन च गज्येन् कीन यो़प्प बेत्। हीनी येशुगी ॱलोप्टुक् दीबल मी घयेत् हुब ॱसल दो़त् झ्यी सीन्न ॱङाब बेत्। ॱनी उन मी छ्योगो घयेत् दीरङ् तोङ्डक् ॱङजो़त् च्यीक्की ची यो़प्प बेत्। 11 ॱनी हुगी भीज दीगी ढोप्ची ॱङबु दी येशुगी छ्यक्ल ॱनम्न को़न्ज्योक्ल थु छ्यी पुन, हुनी हस्सो़त् हुगी मी घयेत् दील च्यक्न टेप्प बेत्। ॱनी न ॱङीबु दी इक् हुन्दुक् दीरङ् झ्यीन घङ् स्यङ् स्यङ् च्यक्न टेप्प बेत्। 12 ॱनी मी कुरीक्की हुगो ढोप्प डङ् डङ् सेब बेत्। हुनी येशुगी ॱलोप्टुक् दीबल स ॱमत् छुबे ॱल्हक्टो़ फरक् फीरुक् घयेत् दी खीरोल डोदु ॱमत् ची़प्प, डुलेत् सीन्न ॱङाब बेत्। 13 ॱनी ॱलोप्टुक् दीब फीन्न डुनी, ढोप्ची ॱङे ॱल्हक्टो़ फरक् फीरुक् दी डालो च्युन्नी घेङ बेत्। 14 ॱनी हुगी मी घयेत् दीबे हीन्दुक् झ्यीबे यीक् छ्यीम्मी़ लेगी ता झ्यीप्प थोङ्नी, हुब रोरङ्सो नङ्दु जम्बुलीङ्ल को़न्ज्योक्की कलुङ् ॱस्यो़क्केन् च्यीक् तोङ्गेन् सीक्केन् दी हीगो हीङ्गो़प्पेत् सीन्न लप्री चीय बेत्। 15 हुनी हुबे येशु खेरक्की ज्याबुल सोज्ये ॱनो़ब झ्यीब बेत्। हीगो ॱह घोनी येशु रोरङ् च्यीक्पु हुबदङ् भीन हुनी यल्ल लदोक्ल जेनर बेत्। येशु छो़ थोक्नी छुल्ल छ्यम्न युङ १६-२१ 16 ॱनी गोङ्ज्यो दी ॱलोप्टुक् दीब मल्ल भप्न 17 कफर्नहुम्ल डोज्येल ढुल स्युन लम् छी़प्प बेत्। ॱनी नम् ॱरो़ छर्नी इक्, येशु ॱलोप्टुक् दीबदङ् मत् जोम्ब यो़प्प बेत्। 18 ॱनी छो दीगी थोक्नी छुल्ल भुयुक् छ्यीम्मु ज्यप्न युङ्नी, छ्यु दी भङ्ज्यीत् ॱलोङ्ज्यीत् झ्यीन युङ बेत्। 19 ॱलोप्टुक् दीब ढु ज्यप्न फीन्नी, दोम्ब तोङ्डक् ॱसुम्जो़त् च्यीक्की चील ॱलीब यो़प्प बेत्। ॱनी हुगी छो़त्ल येशु छो़ थोक्नी छुल्ल छ्यम्न युङ बेत्। ॱनी ॱलोप्टुक् दीबे हुगो थोङ्नी, टक्प सेप्प बेत्। 20 ॱनी येशुगी हुबल खीत्रङ् ज्यीक्टक् मत् झ्यीत्। ङ हीन् झ्यीब बेत्। 21 हुनी गेस लङ्न, हुबे येशु ढुल ॱलुक्प बेत्। हुनी ॱस्यर्च्यक् ढु दी ॱलीत् गो़बे ॱसनेल ॱलीत्न थो़म्ब बेत्। येशु छी च्येम्मे सम हीम्ब ॱस्यो़क्केन् २२-५९ 22 ॱनी छो़ फज्योगी छीगदु देत् तङे मी घयेत् दीगी उन ढु च्यीगी च्यीक् यो़प्प दील येशु मेम्ब, ॱलोप्टुक् दीबरङ् क स्युन डोव थोङ हीङ्गो़प्प बेत्। 23 ॱनी नेम्बेत् दी तीबेरीयास् सार्नी ढुबा गज्येन् ढु ज्यप्न, हुगी मी घयेत् झ्यीस्स चोव ज्यीन्दक्की थु छ्यी पुन सम टो़स्से ॱसने दील युङ बेत्। 24 ॱनी हुदु मी घयेत् दीबे येशु उक् मीप्प, ॱलोप्टुक् दीब अक् मीप्प थोङ्नी, हुब घयेत् येशु ॱयेङ्दु हुगी ढु घयेत् दील स्युन छुल्ल कफर्नहुम्लरङ् लोक्न युङ बेत्। 25 ॱनी हुबल हुदु येशु ठेत्नी, हुगी मी दीबे येशुल रब्बी, नीज्यरङ् हीदु नम्गी धी़ल झ्यो़म्ब? सीन्न ढीब बेत्। 26 ॱनी येशुगी लेम्बुल खीत्रङ्ल ङे गन्दीय ॱस्येत् योङ्। खीत्रङ् घयेक्की यीक् छ्यीम्मी़ लेगी ता तो़म्ब थोङ्नी, ङ ॱयेङ्गेन् मेम्ब, ङ च्यानी सम डङ् डङ् ॱनोङ्गुक् ॱनो़न ॱयेङ्गेन् बेत्। 27 हुन्दो ये डोगेङ्गी समे तीङ्ल मेम्ब, फुगी दो़क्केन् फु तक्पे छी थोप्केङ्गी समे तीङ्ल ॱसीम्ब तोङ्। हीगो तीक्केन् दी कोलीमीगी ॱरेबु बेत्। हीगी ढीक्ल यप् को़न्ज्योक्की ॱरेबुल क ॱनङ्न ता ज्यप्न तङ बेत् झ्यीब बेत्। 28 हीगो सीन्नी, हुगी मी घयेत् दीगी येशुल हुन्दुक् हीन्न, को़न्ज्योक् गुवे ले ङीक्की घन्ड झ्यीत् गोगेन् बेक्क? सीन्न ढीब बेत्। 29 ॱनी येशुगी लेम्बुल को़न्ज्योक् गुवे ले दी खोङ्गी तङे ॱरेबुल छ्य स्योक् गोगेन् बेत् झ्यीब बेत्। 30-31 ॱनी हुगी मी दीबे ङीत् घन्डल तेन, खो़त्ल छ्य स्योक्च्ये? धङ्बु हज्यरङ्गी पुबु ॱमुमु घयेत् पक्क झ्यङ्दङ्दु गीरे यङ्ल हुबे सम दील मन्न सेदुक्। हुगो खोङ्गी तेङ् यी़नी मल्ल पप्न टेप्प बेत् सीन्न ॱसुङ्रप्ल ढीन दुक्। (ॱसुङ्रप्की गुल्लु ७८:२४) ॱनी हुले एक् यीक् छ्यीबागी लेगी ता खोक्की घन्ड झ्यीक्केन्? झ्यीब बेत्। 32 ॱनी येशुगी हुब घयेत्ल ङे खीत्रङ्ल गन्दीय ॱस्येत् योङ्। इगीनी मल्ल सम टो़क्केन् दी मोशा मेम्ब, ङे यप् बेत्। ॱनी खीत्रङ्ल सम ॱङो़सल् दी हस्सो़त् खोङ्गी इगी तेङ् यी़नी मल्ल ॱनङ्गेन् बेत्। 33 ॱनी को़न्ज्योक्की तेङ् यी़नी मल्ल ॱनङे सम हुगी जम्बुलीङ्गी मील छी टेत्न ॱसोम्बुल सोगेन् बेत्। 34 हीनी हुब घयेक्की खोङ्ल नीज्यरङ्गी सम हुगो ङीत्ल छीगङ् ॱनङ्रो झ्यी झ्यीब बेत्। 35 ॱनी येशुगी हुबल छी च्येम्मे सम दी ङ हीन्। ङे तीङ्ल युङ्गेल्ल नम्ल अक् तोब मीत् युङ्गेन् बेत्। ङल छ्य स्योक्केल्ल नम्ल अक् कोम्ब मीत् युङ्गेन् बेत्। 36 खीत्रङ्गी ङ थोङ्न आक्, ङल छ्य दीरङ् मीत् स्योक्पे। हीगो ङे एल्लादु उक् ॱस्येप्पेन्। 37 यप्की घङ् ॱनङ घयेत् दीबरङ् क ङे तीङ्ल युङ्गेन् बेत्। ॱनी ङे हुब घयेत् च्यीगी च्यीक् इक् नम्ल अक् दीत्न ॱमीत् तोङ्। 38 घन्ड हीन् सीन्न ङ ङरङ्गी ॱनो़बे ले झ्यीत्तु युङ मेम्ब, ङ तोङ्गेङ्गी थुल यो़प्प घयेत् डुप्तु तेङ् यी़नी मल्ल युङेन्। 39 ङ तोङ्गेङ्गी थुल यो़प्पल खोङ्गी ङल च्योन स्यक्प घयेत् स्युक् थमे ङीन् तीङ्स्युक्मे यङ्ल हुब घयेत् ङे ॱसोम्बुल ॱलोङ्ज्ये यो़प्पल हुब च्यीगी च्यीक् इक् तोर्तु ॱमत् ची़प्प तगेन्। 40 ॱनी हरुङ् ङे यप्की थुल यो़प्पल मी ॱसी़ ॱरेबु थोङ्न हुल छ्य स्योक्कुक्क हुगोल फु तक्पे छी थोप्न युङ्गेन् बेत्। ॱनी स्युक् थमे ङीन् तीङ्स्युक्मे यङ्ल ङे हुगो ॱसोम्बुल ॱलोङ्गेन् बेत्। 41 तेङ् यी़नी मल्ल युङे सम दी ङ हीन् झ्यीबे येशुगी तम् दील यहुदी छ्यीया यरीब हुल गज्ये ॱमत् छोर बेत्। 42 हुगो युसुफ्की भु मेम्बेक्क ॱनी? हुगी पब धङ् आम हज्यरङ्गी ङु ॱस्यीगेल्ल हुगी घन्डल ङ इगी तेङ् यी़नी मल्ल भप्न युङेन् सीक्केन् बेक्क? झ्यीब बेत्। 43 ॱनी हीगो येशुगी ॱह घोनी, हुबल नुक् झ्यीबे मीत् गुवे तम् मत् लप्। 44 ङ च्याल ङ तोङ्गेन् यप्की ठीक्न युङ्न मेन्द, स्येन् मी ॱसु उक् युङ् ॱमीत् छुगेन् बेत्। ॱनी हुगो स्युक् थमे ङीन् तीङ्स्युक्मे यङ्ल ङे ॱसोम्बुल ॱलोङ्गेन् बेत्। 45 ॱनी हीगी ढीक्ल कलुङ् ॱस्यो़क्केन् घयेक्की ढीबे ॱसुङ्रप्ल तीङ्ला मी घयेत् कुरीक्ल को़न्ज्योक् खोङ् रोरङ्गीरङ् ॱलप्न टो़क्केन् बेत् सीन्न ढीदुक्। (यशैया ५४:१३) ॱनी यप्की ॱलबल नेङ्गेन् घयेत् दीरङ् ङे तीङ्ल युङ्गेन् बेत्। 46 ॱनी म दी को़न्ज्योक् च्यानी युङ्गेन् दीगी मेन्द, ॱयोङ्म ॱसी़ इक् यप् थोङ् ॱमत् ॱनोङ बेत्। 47 ङे खीत्रङ्ल गन्दीय ॱस्येत् योङ्। ङल छ्य स्योक्केल्ल फु तक्पे छी थोप् छर युङ्गेन् बेत्। 48 छी च्येम्मे सम दी ङ हीन्। 49 मन्ने सम सगेन् खीत्रङ्गी पुबु ॱमुमु घयेत् फु ॱमत् तक्प, धङ्बु पक्क झ्यङ्दङ्दु गीरे यङ्ल हुबे मीजी हुदुरङ् येनर बेत्। 50 ॱनी हुगो डस्सी मेम्ब, तेङ् यी़नी मल्ल युङे सम हीगो मी ॱसी़ सगुक्क हुगो ॱमीत् ॱस्यीगेन् बेत्। 51 तेङ् यी़नी मल्ल युङे सम ॱसोम्बु दी ङ हीन्। ॱनी हीगो ॱसी़ सगो़दङ् हुगो फुगी ॱसोम्बु दो़क्केन् बेत्। ॱनी हीगी सम दी ङे सी़बु हीगो हीन्। हीगो जम्बुलीङ्गी मी घयेत् ॱसोम्बुल युङ्ज्ये यो़प्पे ढीक्ल तीक्केन् सीन्न ॱसुङ बेत्। 52 हीनी हुगी यहुदी छ्यीया दीबे हीगी मी हीगी घन्दुक् झ्यीन रोरङ्गी सी़बु हज्यरङ्ल सज्येल तीत् छुगेन् बेक्क? सीन्न रोरङ्सो ॱनम्बु थुक्री चीय बेत्। 53 हुनी येशुगी हुबल ङे खीत्रङ्ल गन्दीय ॱस्येत् योङ्। कोलीमीगी ॱरेबी़ ॱस्य सेन धङ् ठक् थुङ्न मेन्द, खीत्रङ्ल छी मीत् युङ्गेन् बेत्। 54 ङे ॱस्य सगेन् धङ् ङे ठक् थुङ्गेन् दील फु तक्पे छी युङ्गेन् बेत्। ॱनी स्युक् थमे ङीन् तीङ्स्युक्मे यङ्ल हुगो ङे ॱसोम्बुल ॱलोङ्गेन् बेत्। 55 ङे ॱस्य हीगो दीम्बरङ्गी सम बेत्। ङे ठक् हीगो दीम्बरङ्गी थुङ्ज्येम बेत्। 56 ङे ॱस्य सगेन् धङ् ङे ठक् थुङ्गेन् दी ङदङ् मत् ढेब दो़क्केन् बेत्। ॱनी ङ हुगोदङ् मत् ढेब युङ्गेन्। 57 ङ तोङ्गेन् यप् ॱसोम्बु यो़क्केन् बेत्। हुगो झ्यीनी, ङ अक् ॱसोम्बु यो़क्केन् बेत्। ॱनी ङ सगेन् दी ङीत् डस्सी ॱसोम्बु युङ्गेन् बेत्। 58 ॱनी हीगो डस्सी धङ्बु खीत्रङ्गी पुबु ॱमुमी़ सेबे सम हुगो मेम्बेत्। हुगो सगेन् हुब मीजी ॱसोङ्न येनर बेत्। ॱनी इगी तेङ् यी़नी मल्ल युङे सम हीगो सगेन् दी फुगी ॱसोम्बु दो़क्केन् बेत् झ्यीब बेत्। 59 हीगी ॱलोप्स हीगो येशुगी कफर्नहुम्गी छ्यो़गी छोगङ्दु ॱस्येप्प बेत्। येशुगी तम्ल मत् गुव घयेत् ६०-७१ 60 ॱनी खोङ्गी हीगी केच्च्य हील येशुगी ॱलोप्टुक् गज्येङ्गी रोरङ्सो नङ्दु हीगो मीत् ओ़बे केच्च्य बेत्। घन्दुक् झ्यीन हीगो नेन् छुगेन्? झ्यीब बेत्। 61 ॱनी हुब मत् गुव दी येशुगी थुल ॱह घोनी, हुबल खोङ्गी ङे तम् हील खीत् घन्डल मक्का लङ्गुक्क? 62 हीले ज्यीक्पा कोलीमीगी ॱरेबु रोरङ् ॱङर् झ्यीस्सल यल्ल टप् डोव थोङ्न, खीत् घन्ड झ्यीक्केन्? 63 मील छी टेत्न ॱसोम्बुल सोगेन् दी धम्बे थु बेत्। हीगी ढीक्ल कोलीमी लुस ङो़नी फेन्दो घन्ड अक् मीत् युङ्गेन् बेत्। ङे खीत्रङ्ल ॱस्येप्पे केच्च्य घयेत् हीगो छी टो़क्केन् धम्बे थुगी तम् बेत्। 64 ॱनी हीन्न अक्, खीत्रङ् यरीगी छ्य दीरङ् मीत् स्योक्पे झ्यीब बेत्। हीगो म दी ॱलोप्टुक् घयेत् दीबे छीक्नी ॱसु ॱसी़ खोङ् रोरङ्ल छ्य मीत् स्योक्केन् बेक्क हुगो धङ् ॱनी तीङ्ला खोङ् डलक्ल तोङ्गेन् दी घङ्गो बेक्क हुगो खोङ्गी गोमनीरङ् ॱह घोन यो़प्प बेत्। 65 येशुगी फीच्च्य हुबल हीगी ढीक्ल खीत्रङ्ल ङे एल्लादु उक् ङे यप्की क ॱनङ्न मेन्द, स्येन् मी ॱसु उक् ङे तीङ्ल युङ् ॱमीत् छुगेन् बेत् सीन्न ॱस्येप्पेन् झ्यीब बेत्। 66 ॱनी हुनी झ्यीनी खोङ्गी ॱलोप्टुक्प गज्येन् खोङ्दङ् मत् देप्प, भीन टप्नर बेत्। 67 हीनी येशुगी उन ॱलोप्टुक् च्युन्नीबु दील खीत् इत् डोज्ये ॱनो़गुक्क? सीन्न ढीब बेत्। 68 ॱनी शीमोन् पत्रुस्की लेम्बुल चोव ज्यीन्दक् फु तक्पे छीये केच्च्य दी ॱनी नीज्यरङ्ल यो़क्केन् बेत्। ङीत् ॱयोङ् ॱसु च्याल डोज्ये? 69 नीज्यरङ् चङ्म को़न्ज्योक् च्यानी युङ हीम्बल ङीक्की छ्य स्यक्न यो़त्। ॱनी हीगो खुङ् हीम्ब दी इक् ङीक्की ॱह घोज्युङ् झ्यीब बेत्। 70 हीनी येशुगी हुबल खीत्रङ् च्युन्नीबु कुरीक् ङे दम्बेन्। ॱनी हीन्न अक्, खीत्रङ्गी छीक्न च्यीक् दी़क्की चो च्यीक् दुक् झ्यीब बेत्। 71 हीगो येशुगी शीमोन् इस्करीयोत्की भु यहुदागी ढीक्ल झ्यीब हीङ्गो़प्प बेत्। हुगो च्युन्नीबी़ छीक्नी च्यीक् बेत्। ॱनी हीन्न अक्, हुगी तीङ्ला येशु डलक्ल तङ बेत्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.