युहन्ना 20 - ल्होमीयेशुगी कुबुर् रो बेक्सन मीप्प ठेप्प १-१० 1 हुनी ङीत्तुवे नेम्बेत् स ङीमे ॱङेट्टो दी नम् मत् लोङल मरीयम् मग्दलीनी दी रो बेक्स दील फीम्ब बेत्। हुदु ॱलीत्नी, रो बेक्सल च्योरे दोलोक्प दी सुर्ल टी स्यक्प थोङ बेत्। 2 हुनी ॱस्यरी ज्युन युङ्न शीमोन् पत्रुस् धङ् येशुगी झ्यम्बे ॱलोप्टुक् दी च्येल्ल ॱलीब बेत्। ॱनी हुबल चोव ज्यीन्दक्की कुबुर् दी उन मीन्दुक्। खुर्नत्तुक्। घदु खुर्न स्यक् स्यक्? ह ङीत्ल ॱस्यो़च्च्ये मोङ्सोङ् सीन्न ॱस्येप्प बेत्। 3 हुनी हुब ॱङीबु रो बेक्स दील तदु ज्युन फीम्ब बेत्। 4 ॱनी ॱलोप्टुक् च्यीक्पु दी पत्रुस्ल ॱएङ्गोर् ज्यप्न फीन्नी, रो बेक्स दील हुगो एल्ला ॱलीब बेत्। 5 ॱनी ॱलीत्न आक्, हुगो नङ् दील मत् स्युब, छ्यीनी गुक् झ्यीन तेनी, खोङ्गी कुबुर् तुम्बे रे दीरङ् उन धबील यो़प्प थोङ बेत्। 6 हुनी शीमोन् पत्रुस् दी ॱलीत्नी, हुगो स्युङ्ज्योङ् नङ् दीलरङ् स्युन फीम्ब बेत्। ॱनी फीन्नी, उन सी़बु तुम्बे रे दी रङ्स झ्ये। 7 गो तुम्बे रे दी नुक् दीरङ् बुरीलील यो़प्प हुगी थोङ बेत्। 8 ॱनी ॱलोप्टुक् च्यीक्पु दी एल्ला ॱलीत्न आक्, नङ् दील हुनी क स्युन फीन्न हुगो जेङ् थोङ्नी, हुनी हस्सो़त् येशु ॱसोम्बुल लोङ हीम्ब दील हुगी छ्य स्यक्प बेत्। 9 हीगो थुक्ल हुबे येशु ढोङ्नी, यङ् ॱसोम्बुल गन्दीय लोङ्गेन् बेत् सीन्न ॱसुङ्रप्ल यो़प्पे केच्च्य दी ॱह दीरङ् मत् घोव हीङ्गो़प्प बेत्। 10 हुनी हुब ॱङीबु खीम्ल लोक्प बेत्। ॱएन्स्युक्ल येशु मरीयम् मग्दलीनील ठेप्प ११-१८ 11 ॱनी मरीयम् मग्दलीनी दी हुदुरङ् रो बेक्से छ्यी दीदु ङुगील्ल देप्प बेत्। ॱनी नङ् दील गुक् झ्यीन तेनी, 12 घो़ कप्पु घो़म्ब तेङ् यी़गी भङ्ज्येम्ब ॱङी हुगी थोङ बेत्। च्यीक् येशुगी कुबुर् स्योक्से गो ङो़ दीन धङ् च्यीक् कङ्स्यम् ङो़ दीन दो़प्प थोङ बेत्। 13 ॱनी हुब ॱङीबी़ मरीयम्ल भुमु, खो़त् घन्डल ङुगो़प्प? सीन्न ढीब बेत्। हील मरीयम्गी ङे चोव ज्यीन्दक्की कुबुर् दी इक् हीनी खुर्न खुर्तुक्। घदु खुर्न स्यक् स्यक्? ह ॱस्यो़च्च्ये मोङ्सोङ् सीन्न, 14 हुनी तक्ल लोक्न तेनी, येशु टङील यो़प्प थोङ बेत्। ॱनी येशु हीन्डो ॱनो़ब मत् युङ बेत्। 15 ॱनी येशुगी हुल भुमु, खो़त् घन्डल ङुगो़प्प? ॱसु ॱयेङ्गो़प्प? सीन्न ढीब बेत्। ॱनी मरीयम्गी हुगो ॱस्यीङ्नाल तगेङ्गी मी च्यीक् ब अक् ॱनो़न, हुल हीनी नीज्यरङ्गी खोङ्गी कुबुर् ॱयोङ्ल खुर हीन्न, घन स्यक्न यो़प्प? ङल ॱस्यो़त्रो झ्यी। ङ खुर्तु डोज्येम झ्यीब बेत्। 16 हुनी येशुगी हुल ॱवे मरीयम् सीन्न मीङ् दी तो़न्नी क, मरीयम् तक्ल खीर् लोक्न तेन, हुनी क खोङ् ङु ॱस्यीन रब्बोनी सीन्न झ्यीब बेत्। हीगी धो़न् दी हीब्रुगी केच्च्यल चयेलम सीक्केन् बेत्। 17 हुनी येशुगी ङल मत् सील्लेत्। ङ हुन्दो यप् च्याल ज्योक्पु मीत् डो। रङ् हुन्दो ङे पी़न्ज्या घयेत् च्याल ज्युक्ल हीगो ॱस्यो़त्लेत्। ङे एक् यप् खीत्रङ्गी इक् यप् ङे एक् को़न्ज्योक् खीत्रङ्गी इक् को़न्ज्योक् च्याल ह डोगेन् सीगुक् झ्यी सीन्न ॱङाब बेत्। 18 हुनी मरीयम् मग्दलीनी दी ॱलोप्टुक् दीब च्येल्ल फीन्न हुबल ङल चोव ज्यीन्दक् ठेच्च्युङ् सीन्न खोङ्गी ॱङाबे केच्च्य घयेत् दी ॱस्येप्प बेत्। ॱलोप्टुक् घयेत् दीबे घुङ्दु येशु थो़म्ब १९-२९ 19 ॱनी हुगी स ङीमे गोङ् दी ॱलोप्टुक् दीब खीम् च्यीक्ल जोम्न, यहुदी छ्यीया घयेत्ल ज्यीबे, गोच्च थम् च्येत्न पीक् ॱमीत् छुगेन् सो़न यो़प्प बेत्। ॱनी हुगी यङ्ल येशु हुबे घुङ्दु नुक्रङ् डङी थो़न्न खीत्रङ्ल स्यीव दीव युङ स्योक्च्यीत् सीन्न, 20 खोङ्गी लक्पे ॱमील दी धङ् ॱलोदोङे ॱमील दी हुबल तो़म्ब बेत्। हुन्दुक् झ्यीन चोव ज्यीन्दक् ठेत्नी, हुबल गेस लङ बेत्। 21 हुनी फीच्च्य यङ् येशुगी हुबल खीत्रङ्ल स्यीव दीव युङ स्योक्च्यीत्। यप्की ङ तङ डस्सी ङे एक् खीत्रङ् तोङ्गेन् झ्यीब बेत्। 22 हुनी येशुगी हुबल भी़न धम्बे थु लीन्। 23 ह खीत्रङ्गी मी ॱसुल दीक्प धक्तु ची़क्कुक्क हुगो धक् डोगेन् बेत्। ॱनी यङ् खीत्रङ्गी ॱसुल दीक्प धक्तु ॱमीत् ची़प्प स्योक्को़दङ् हुगो मीत् धक्केन् बेत् झ्यीब बेत्। 24 हुगी यङ्ल उन ॱलोप्टुक् च्युन्नीबु दीगी छीक्नी थोमा दी मीप्प हीङ्गो़प्प बेत्। हुल दीदीमस् सीन्न अक् सीगो़प्प बेत्। 25 ॱनी तीङ्ला ॱलोप्टुक् ॱयोङ्मा दीबे हुल हज्यरङ्गी चोव ज्यीन्दक् ङीत्तङ् ठेच्च्युङ् सीन्न ॱस्येप्प बेत्। ॱनी हील थोमा दीगी ङ त येशुगी लक्पल कट्टी फोक्पे ॱमील दी धङ् ॱलोदोङे ॱमील दील ॱस्युप्न तेनी मेन्द, ङ छ्य मीत् स्योक् झ्यीब बेत्। 26 ॱनी तीङ्मागी स ङीमे ङीन् दीगी यङ्ल थोमा दी इक् झ्यीन, हुगी खीम् दीदुरङ् ॱलोप्टुक् दीब जोम्न, गोच्च थम् च्येत्न पीक् ॱमीत् छुगेन् सो़न यो़प्प बेत्। ॱनी हुब घयेक्की घुङ्दु येशु नुक्रङ् डङी थो़न्न हुबल खीत्रङ्ल स्यीव दीव युङ स्योक्च्यीत् झ्यीब बेत्। 27 हुनी थोमा दील खोङ्गी ङे लक्पे ॱमीलल धङ् ङे ॱलोदोङे ॱमीलल ॱस्युप्न तेन, हीम्ब न मेम्ब ॱनो़ब ॱमत् खुर, रङ् छ्य स्योक्केन् हीम्ब झ्यीज्यीत् झ्यीब बेत्। 28 हुनी थोमा दीगी येशुल ॱवे नीज्यरङ्, ङे चोव ज्यीन्दक् ङे को़न्ज्योक् सीन्न झ्यीब बेत्। 29 ॱनी येशुगी हुल रङ्गी त ङ थोङ्नी, छ्य स्यक्सोङ्। ङ ॱमत् थोङ्न आक्, ङल छ्य स्योक्केन् घयेत् ॱसोदी च्येम्म युङ्गेन् बेगो झ्यीब बेत्। 30 ॱनी हील ढीन मत् स्यक्प, येशुगी यीक् छ्यीम्मी़ लेगी ता गज्येन् रोरङ्गी ॱलोप्टुक् दीबे थोङ्सल जेत्न तो़म्ब बेत्। 31 ॱनी हील घङ् ढीन यो़प्प घयेत् दी खीत्रङ् घयेत्ल येशु को़न्ज्योक्की ॱरेबु ख्रीष्ट् गन्दीय हीम्बल छ्य स्यक्न, खोङ्गी छेङ्गी लम्नी खीत्रङ्ल छी थोप्च्ये यो़प्पल सीन्न ङे हीगो ढीन स्यक्पेन्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.