याकुब् 5 - ल्होमीछ्युक्पु घयेत्ल छ्येप्प फोक्केन् १-६ 1 खीत्रङ् छ्युक्पु घयेत् नेन्। खीत्रङ्ल फोक्केङ्गी दुक्प घयेत् हुगो ॱसम्न ङुच्च्यङ् तोङ्। ङी़। 2 खीत्रङ्गी नोर् घयेत् भम् छर बेत्। घो़ घयेत्ल मुक्प छ्येत् छर बेत्। 3 खीत्रङ्गी ॱसीर् धङ् ॱङुल च छ्या छर बेत्। च छ्याब दी खीत्रङ्गी ङीबे दस्स्यीक्ल थो़ङ्गेन् बेत्। ॱनी हुगी खीत्रङ्गी ॱस्य दी मी छीक्प डस्सी सगेन् बेत्। घन्ड हीन् सीन्न हुन्दो स्युक् थमे धी़ल अक् खीत्रङ्गी नोर् ॱसान स्योक्केन् बेत्। 4 तेदे खीत्रङ्गी स्यीङ्गल ले झ्यीक्केन् लेमीय घयेत्ल खीत्रङ्गी ॱल ॱमत् टेप्पल हुबे कोल्लोक् ॱलोङ्गेन् बेत्। ॱनी तो़न्दोक् दी़क्केन् लेमीय हुबे कोल्लोक् ॱलङे केत् दी ॱवङ् की़न् च्येम्मे चोव ज्यीन्दक्की आम्ज्योक्ल ते ॱलीत् छर बेत्। 5 खीत्रङ् घयेक्की जम्बुलीङ्दु नोर्की लोङ्ज्यो़त्ल कीप् कीप् ज्या ज्या झ्यीन देत्न, तीङ्ला खीत्रङ्ल छ्येप्प केन ॱसो़प्पे यङ्गी ङीन् थुक्ल खीत्रङ्गी खीत्रङ् ज्यादु ची़त्न यो़क्केन् बेत्। 6 मी ढङ्बु गङ्ज्येल्ल खीत्रङ्गी छ्येप्प केन ॱसेप्प बेत्। हुगी खीत्रङ्ल लक् मत् लोक्प बेत्। धु च्यङ्न गुक् गोगेन् ७-११ 7 पी़न्ज्यासो, चोव ज्यीन्दक् झ्यो़न् झ्यो़न् थुक्ल खीत्रङ् धु च्यङ्न पी हील तेन दो़च्च्यीत्। ॱसप्ले ज्यक्केङ्गी मी इक् रोरङ्गी स्यीङ्गल छ्येप्प नम् ज्यक् ज्यक् थुक्ल धङ् गो़स्यो च्येम्मे तो़न्दोक् नम् छो़ छो़ थुक्ल धु च्यङ्न गुन दो़क्केन् बेत्। 8 चोव ज्यीन्दक् ज्योक्पु झ्यो़ङ्गेन् बेत्। हीगो झ्यीनी खीत्रङ् हुन्दुक् झ्यीन धु च्यङ्न थीरी दो़च्च्यीत्। 9 पी़न्ज्यासो, खीत्रङ्ल को़न्ज्योक्की छ्येप्प फोक्च्ये मीप्पे ढीक्ल खीत्रङ् नङ्दु च्यीक्तङ् च्यीक्की केच्च्यल गुर्च्यीत्। गुर्चीक् चोङ्री ॱमत् चीज्यीत्। गोक्केक्न ठीम्बो़न् ॱलीत् छर बेत्। 10 पी़न्ज्यासो, धङ्बु चोव ज्यीन्दक्की छेन्नी कलुङ् ॱस्यो़क्केन् घयेत् हुबल दुक्प नोङे यङ्ल हुबे घन्दुक्मे गुर् थेक्प झ्यीन धु च्यङ्दुक्क हुगी ॱमीदेल तो़। 11 तेदे हुबे गुर् थेक्पे धु हुल तेन हुब घन्दुक्मे गव च्येम्मे मी बेक्क सीन्न हज्यरङ्गी सीक्केन् बेत्। अय्युब्गी घन्दुक्मे गुर् थेक्पे धु छ्यीय च्यङ बेक्क हुगो खीत्रङ्गी ॱह घोव यो़ट्टो। ॱनी स्युक्तु अय्युब्ल चोव ज्यीन्दक्की घन्दुक्मे लेमु जेप्प बेक्क हुगो ओक् खीत्रङ्गी थोङ् यो़ट्टो। चोव ज्यीन्दक् थुज्यी धङ् ॱङीङ्ज्यी छ्यीम्मु च्येम्म यो़क्केन् बेगो। ॱन झ्यीच्च्ये मीत् युङ्गेन् १२ 12 ङे पी़न्ज्यासो, हरुङ् गो़स्योल हीगो सीक्केन्। खीत्रङ्गी ॱन मत् झ्यीज्यीत्। तेङ् यी़ हीन्, जम्बुलीङ् हीन्, यङ् ॱयोङ्मा घन्डरङ् हीन्न अक्, हुन्दुक् झ्यीब डेन्न ॱन मत् झ्यीत्। खीत्रङ्गी केच्च्य दी हीन्न ॱनी, हीन् दीरङ् झ्यी। मेन्न ॱनी, मेन् दीरङ् झ्यी। हुन्दुक् मत् झ्येन, को़न्ज्योक्की छ्येप्प को़गेन् बेत्। छ्य गन्दीक्म स्यक्न ॱसुव तोप् गोगेन् १३-१८ 13 खीत्रङ्गी घुङ्न ॱसुल दुक्प यो़दङ् हुगी को़न्ज्योक्ल ॱसुव तोप्च्यीत्। ॱनी यङ् ॱसुल गेनङ् यो़दङ् हुगी को़न्ज्योक्ल तो़त्लु लीन्न पुज्यीत्। 14 ॱनी खीत्रङ्गी घुङ्न ॱसु नगेन् यो़दङ् हुगी छ्यो़ छोगी गोयो़प्प घयेत् भो़ज्यीत्। ॱनी हुबे चोव ज्यीन्दक्की छेन्नी हुगी नेप्प दीगी गोल ॱनुम् ॱही़न्न हुगी ढीक्ल ॱसुव तोप्च्यीत्। 15 छ्य गन्दीक्म स्यक्न ॱसुव तबे लेगी हुगी नेप्प दी चोव ज्यीन्दक्की ढक्तु ची़क्केन् बेत्। हुगी दीक्परङ् झ्यीन यो़त्न अक्, धक् डोगेन् बेत्। 16 हुगो झ्यीनी खीत्रङ् नङ्दु रङ् रङ् ॱसोस्सो़ दीक्प च्यीक्तङ् च्यीक्ल तो़न्न ॱस्यो़त्ल हुनी छ्य झ्यीन च्यीक्तङ् च्यीक्की ढीक्ल ॱसुव तोप्। हुनी खीत्रङ् ढक्केन् बेत्। को़न्ज्योक्की मी ढङ्बी़ ॱसुव तबल धो़न् छ्यीम्मी़ ले डुप्केन् बेत्। 17 धङ्बी़ एलीया हुगो ओक् हज्यरङ् डस्सीगी कोलीमीरङ् बेत्। ॱनी हीन्न अक्, खोङ्गी छ्येप्प ज्यक्रो मत् झ्यीत् सीन्न ॱसुव गन्दीक्म तप्नी, लो ॱसुम्दङ् दव ढुक् थुक् लुङ्बल छ्येप्प मत् ज्यब बेत्। 18 ॱनी तीङ्ला यङ् खोङ्गी ॱसुव तप्नी, ॱनम्नी मल्ल छ्येप्प ज्यप्न, यङ् ॱसस्स्यीनी तो़न्दोक् झ्युङ बेत्। 19 ङे पी़न्ज्यासो, खीत्रङ्गी घुङ्नी ॱसु दीम्बे लम्नी सुर्ल छ्यी़न दुक्क हुगो यङ् ॱयोङ्म च्यीक्की ॱलोक्न युङ्न ॱनी, 20 खीत्रङ्गी हीगो ॱह घोव झ्यीज्यीत्। मी ॱसी़ हीगो डस्सी दीक्च्येन् हुगो रोरङ्गी ङीबे लम्नी ॱलोक्न युङ्गुक्क हुगो ॱस्यीवे लक्नी छ्यीन हुगी दीक्प छेत्मीत् यो़प्प दी धक्च्ये यो़प्पे लम्ल ॱलोक्केन् बेत्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.