याकुब् 4 - ल्होमीजम्बुलीङ्ल ॱसीम् छ्याब मत् झ्यीत् १-१० 1 खीत्रङ्गी घुङ्दु ठुक्प थक्मु ज्यक्केन् हुगो घनी युङ्गेन् बेक्क ॱनी? हुगो खीत्रङ् रङ् रङ् ॱसोस्सो़ ॱसीम्गी नङ्दु थप्री चीगेन् ॱसीम्ल लङ्गेङ्गी रङ्स्यीगी धेत्मो़ हुगो बेत्। 2 खीत्रङ्गी ॱमीक्ल फोक्पे ढङ् दी झ्यीच्च्ये ॱनो़गेन् बेत्। ॱनी हीन्न अक्, ॱमीत् थोप्केन् बेत्। ॱनी ॱमत् थोबल ठदोक् लङ्न, खीत्रङ्गी मी ॱसो़च्च्ये ॱनो़गेन् बेत्। हुनी इक् ॱमीत् थोप्केन् बेत्। ॱमत् थोबल हुनी ठुक्प थक्मु ज्यक्केन् बेत्। खीत्रङ्गी को़न्ज्योक्ल मीत् स्युवल ॱमीत् थोप्केन् बेत्। 3 ॱनी स्यी़न अक्, ॱमीत् थोप्च्ये दी खीत्रङ्गी स्युदेन् ज्यक्लु दी ङीगेन् बेत्। घन्ड हीन् सीन्न धेत्मो़ल ॱस्योरे युङ्ज्यी़गी खोज्येत् घयेत् खीत्रङ्गी लीङ्गेन् बेत्। 4 खीत्रङ् हुन्दुक् झ्यीन ॱनी, छ्येमु डस्सी युङ्गेन् बेत्। जम्बुलीङ्दङ् छ्यीट्टो झ्यीन ॱनी, हुगो को़न्ज्योक्ल ड झ्यीबल डोगेन् बेत् सीर खीत्ल ॱस्यो़च्च्ये मीप्प? ॱनी मी ॱसी़ जम्बुलीङ्दङ् छ्यीट्टो झ्यीच्च्ये ॱनो़न झ्यीगुक्क हुगो को़न्ज्योक्की डल डोगेन् बेत्। 5 हज्यरङ्गी खोक्ल को़न्ज्योक्की ॱलुक्न स्यक्पे ॱसीम्गी ढीक्ल खोङ्गी दो़न्दो़त् ढेन्सी धङ् ॱमीसीर् झ्यीक्केन् बेत् सीर ॱसुङ्रप्ल थो़ङ्गेन् बेत्। हीगो धो़म्मीक्की तम् ब अक् ॱनो़गुक्कक्? 6 ॱनी हीन्न अक्, खोङ्गी हज्यरङ्ल थुज्यी गज्येन् ॱनङ्गेन् बेत्। हीगी ढीक्ल ॱसुङ्रप्ल थो़ङ्गेन् बेत्। ज्यीङ्ब बोम्सी झ्यीक्केल्ल खोङ्गी ड झ्यीक्केन् बेत्। ॱनी ॱनोम्ज्युङ् झ्यीक्केल्ल यङ् थुज्यी ॱनङ्गेन् बेत्। (पीस्येत् ३:३४) 7 हुगो झ्यीनी खीत्रङ् को़न्ज्योक्की ॱवङ्गी होक्ल दो़च्च्यीत्। ॱनी दी़क्की चो हुल ड झ्यीन थुक्च्यीत्। हुनी हुगो खीत्रङ् च्यानी ढो़ डोगेन् बेत्। 8 खीत्रङ् को़न्ज्योक् ङो़ल ङीदु युङ्न ॱनी, खोङ् ओङ् खीत्रङ् ङो़ल ङीदु युङ्गेन् बेत्। खीत्रङ् दीक्च्येन् घयेत् लक्प धक्पोक्म टी़। खीत्रङ् ची ॱङील ॱस्योरे ॱसीम् च्येम्म घयेत् ॱसीम् ची च्यीक्ल देत्न चङ्मल सो़। 9 खीत्रङ् ॱसीम्दुक् झ्यी। ङुच्च्यङ् तोङ्। ङी़। खीत्रङ्गी ढो़स्सक् दी ङुच्च्यङ्ल ज्युर्च्यीत्। खीत्रङ्गी गवे ॱसीम् दी गेनङ् मीप्पल ज्युर्च्यीत्। 10 चोव ज्यीन्दक्की ढुङ्दु खीत्रङ् ॱनोम्ज्युङ् झ्यीज्यीत्। हुनी खोङ्गी खीत्रङ् यल्ल तो़क्केन् बेत्। फालप् लप्च्ये मीत् युङ्गेन् ११-१२ 11 खीत्रङ् पी़न्ज्या नङ्दु फालप् लप्री ॱमत् ची। पी़न् ॱयोङ्गी गोल थो़न्न फालप् लप्न च्यो़न्स्यो़त् तो़ङ्गेन् दीगी छ्यो़डीम्ल स्येन्दोङ् झ्यीन ड झ्यीबल डोगेन् बेत्। रङ्गी हुन्दुक् झ्यीन ॱनी, रङ् छ्यो़डीम्ल चीगेङ्गी मी मेम्ब, रङ् छ्यो़डीम्गी गोल थो़न्न ठीम् च्यो़क्केल्ल डोगेन् बेत्। 12 छ्यो़डीम् ॱनङ्गेन् धङ् ठीम्बो़न् दी खोङ् च्यीगी च्यीक्रङ् मेन्द, मीप्प बेत्। थर्तु ची़च्च्येमे ॱवङ् धङ् फुगी ढीक्ल खरप्ल तोङ्ज्येमे ॱवङ् दी इक् खोङ्ल मेन्द, मीप्प बेत्। ॱनी खो़त्ल घन्डे ॱवङ् दी यो़त् सीन्न ॱयोङ्गी गोल थो़न्न च्यो़न्स्यो़त् तो़ङ्गेन् सीक्केन्? तम्दो़त् ॱमत् ॱस्यो़त् १३-१७ 13 खीत्रङ् यरीगी हरीङ् हीन्, नेम्बेत् हीन्न अक्, ङीत् हुगी सार् हुल फीन्न हुदु लो च्यीक् देत्न छोङ् ज्यप्न नोर् ॱसक्केन् सीगो़ट्टो। हुन्दुक् सीक्केन् घयेत् हील नेन्। 14 खीत्रङ्गी मीजील नेम्बेत् घन्ड युङ्गो़दङ् हुगो ॱस्यो़च्च्ये मीप्प बेत्। खीत्रङ्गी छी दी ॱमुब डस्सी बेत्। हुगो ॱरीप् घङ्ल ये छुगेन् बेत्। 15 हुन्दुक् सीरले बोर खीत्रङ्गी हीन्दुक् सीन्न चोव ज्यीन्दक्की थुल यो़प्पल ङीत् ॱमत् ॱस्यीय देत्न ॱनी, हीन्दुक् झ्यीक्केन्, हुन्दुक् झ्यीक्केन् सीर् गोगेन् बेत्। 16 हीगो डस्सी मीत् झ्यीप्प, खीत्रङ्गी म दीरङ् तम्दो़त् ॱस्येत्न ज्यीम्सी हीन् सीक्केन् बेत्। हुन्दुक् झ्यीबे तम्दो़त् कुरीक् क गज्ये मेम्बेत्। 17 गये ले झ्यीत् गोगेन् बेत् ॱनो़ब ॱस्यो़च्च्ये यो़क्कीन् यो़क्कीन् हुगो ॱसी़ मीत् झ्यीप्पेक्क हुगो दीक्पल डोगेन् बेत्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.