याकुब् 3 - ल्होमीच्यीला दक्सुम् झ्यीत् गोगेन् १-१२ 1 ङे पी़न्ज्यासो, खीत्रङ्गी घुङ्नी खीत्रङ् गज्येन् चयेलमल थो़न्ज्ये ॱनो़ब मत् झ्यीज्यीत्। घन्ड हीन् सीन्न ङीत् चयेलम घयेत्ल ॱयोङ्माले ज्यीक्पा ठीम् च्यो़क्केन् बेत् ॱनो़ब ॱस्यो़च्च्ये यो़क्केन् बेत्। 2 हज्यरङ् कुरीक् ॱनम्ब गज्येल्ल ङीगेन् बेत्। ॱनी तम्ल ङीब ॱस्युली मीत् झ्यीक्केन् फी़न्सुम् छङे मी दीगी रोरङ्गी ली़सीम् छङ्म दक्सुम् झ्यीत् छुगेन् बेत्। 3 तबागी रोरङ्गी त दी ॱनो़जो़त्ल च्यी़न तोङ् छुज्ये यो़प्पल ते खल खरम् ज्यक्केन् बेत्। हुनी हस्सो़त् ते सी़बु दीरङ् घल अक् च्यु छुगेन् बेत्। 4 ॱनी पी हीगो डस्सी छ्यु ज्यम्जो छ्यीम्मुल ढु छ्यीम्मु घयेत् तङ्न डोये यङ्ल ॱलुङ्बु छ्यीम्मु ज्यप्न युङ्न अक्, ढु च्युगेङ्गी यप्च्य च्युङेत्मु च्यीक्की ढुबा दीगी रोरङ्गी ॱनो़बागी लम्ल च्यु छुगेन् बेत्। 5 ॱनी हीगो डस्सी सी़बी़ यल्लक् च्यीला च्युङेत्मु च्यीक्की इक् तम्दो़त् छ्यीम्मी़ केच्च्य ॱस्यो़त् छुगेन् बेत्। तेदे मीन्डुम् च्युङेत्मु च्यीक्की नादोङ् गर्चमल अक् मी ङा छुगेन् बेत्। 6 मी च्यीला हुगो मीन्डुम्दङ् छ्येत्मीत् सी़बी़ यल्लक् घयेक्की छीक्नी ढङ्ज्ये मीप्पे यप्च्य च्यीक् बेत्। ली़सीम् छङ्म चङ्ज्ये मीप्पल तोङ्गेन् धङ् मीजीगी लेमु छङ्मल मी ॱङोक्केन् दी हुगो बेत्। ॱनी यङ् रोरङ्ल मी ॱङोक्केन् दी ॱनल बेत्। 7 ॱसीम्ज्येन् ॱनजो, ॱनम्गी झ्य ॱनजो, ॱसल ढी़त्न डोगेङ्गी ॱसीम्ज्येन् ॱनजो धङ् ज्यम्जो छ्यीम्मी़ नङ्गी ॱसीम्ज्येन् घयेत् कोलीमीगी ॱवङ्यो़त् तङ्न डील ची़त् छुगेन् बेत्। ॱनी डील ची़त्न आक् यो़क्केन् बेत्। 8 ॱनी मी च्यीला हुगो ॱसी़ इक् डील ची़त् ॱमत् छुब यो़क्केन् बेत्। हुगो तेन्ज्ये मीप्प, ङेम्ब म दीरङ् ॱरोक् च्यो़क्केङ्गी धुक् डस्सी बेत्। 9 हज्यरङ्गी च्यीला हुगी चोव ज्यीन्दक् धङ् यप्ल यस्सो ओक् पुगेन्, ॱनी यङ् को़न्ज्योक्तङ् डवल सो़बे मील ॱमो़त्मु उक् ज्यक्केन् बेत्। 10 ख च्यीक्नी यस्सो ओक् पुगेन्, ॱमो़त्मु उक् ज्यक्केन्। ङे पी़न्ज्यासो, हीन्दुक् झ्यीब झ्यीच्च्ये मीत् युङ्गेन् बेत्। 11 छ्युग च्यीक्नी छ्यु स्यीम्बा धङ् मत् स्यीम्बा थो़ङ्गो़प्प बेक्कक् ॱनी? 12 ङे पी़न्ज्यासो, अप्ले दोङ्बुल ओलीप्की डलु छ्यागो़प्प बेक्कक् ॱनी? गोङ्गोङ्गी दोङ्बुल अप्ले डलु छ्यागो़प्प बेक्कक् ॱनी? छ्यु छगक् थो़न्सनी छ्यु स्यीम्बा थो़ङ्गो़प्प बेक्कक् ॱनी? तेङ् यी़नी युङे झ्यी़रीक् १३-१८ 13 खीत्रङ्गी घुङ्न झ्यी़रीक् च्येम्म धङ् ॱस्यीरप् च्येम्मे मी ॱसु यो़दङ् हुगी रोरङ्गी झ्यी़रीक् दी ॱम ॱयुङ्बोक्म धङ् खेजो़त् झ्यीन रोरङ्गी छ्यलु गङ्ज्येन् झ्यीन युङे लम् दीनी झ्यीन तो़न्ज्यीत्। 14 खीत्रङ्गी ॱसीम्ल सीगुक् धङ् रङ्ज्यी़ यो़त्न ॱनी, हुगी झ्यी़रीक्की ढीक्ल तम्दो़त् धङ् मीत् दीम्बे तम् ॱमत् ॱस्यो़च्च्यीत्। 15 हुन्दुक् झ्यीबे झ्यी़रीक् तेङ् यी़नी मल्ल युङ मेम्ब, हुगो जम्बुलीङ्नी, मी ॱसीम्बनी धङ् दी़त् ङो़नी युङ बेत्। 16 घन्ड हीन् सीन्न घदु ठदोक् धङ् रङ्ज्यी़ युङ्गो़दङ् हुदु मीत् डीक्पे लेमु धङ् आक्पागी ढङ् घयेत् युङ्गेन् बेत्। 17 ॱनी तेङ् यी़नी मल्ल युङे झ्यी़रीक् दी ॱएन्स्युक्ल हुगो चङ्म, हुनी थी़म्बोक्म, हुनी घी़न् थेक्पोक्म, थी़न्डीक्, ॱङीङ्ज्यी छ्यीम्मु च्येम्म, गये डेबु च्येम्म, दम्ङीत् मीत् झ्यीक्केन् धङ् ॱसीम् सङ्बु च्येम्म युङ्गेन् बेत्। 18 ॱनी छ्यम्ब डीक्प युङे ॱसो़न् तप्न ॱनी, हुगी डीक्च्याब दीबे ढङ्बी़ लेल झ्युङे डेबु दी़क्केन् बेत्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.