याकुब् 2 - ल्होमीदम्ङीत् झ्यीच्च्ये मीत् युङ्गेन् १-१३ 1 ङे पी़न्ज्यासो, तो़त्वङ् च्येम्मे हज्यरङ्गी चोव ज्यीन्दक् येशु ख्रीष्ट्ल खीत्रङ् छ्य स्योक्केङ्गी मी झ्यीनी, खीत्रङ्गी मील दम्ङीत् मत् झ्यीज्यीत्। 2-3 खीत्रङ्गी छ्यो़ छो छुसदु ॱसीर्की ॱसोत्तोक् धङ् घो़ गङ्ज्येन् घो़म्बे मी युङ्न, हुल खीत्रङ्गी थोङ् छ्यीया झ्यीन तेङ्ल दो़त् सीन्न स्योक्केन् बेत्। ॱनी यङ् मी टङ्बु घो़ बदुक्प घो़म्ब युङ्न ॱनी, हुल खीत्रङ्गी होक्तु टङ् टङ्ल स्योक्केन् बेत्। ॱनी यरील यङ् ङे कङ्स्यम्दु दो़त् सीक्केन् बेत्। 4 खीत्रङ् नङ्दु हुन्दुक् झ्यीन दम्ङीत् झ्यीन ॱनी, खीत्रङ् म दीरङ् ठीम्बो़न् दुक्च्या डस्सी युङ्गेन् मेम्बेक्क ॱनी? 5 ङे झ्यम्बे पी़न्ज्यासो, हीगो ॱह घोव झ्यीज्यीत्। छ्य स्यक्न युङे लेमुल छ्युक्पु युङ्ज्ये यो़प्प धङ् को़न्ज्योक्की खोङ् रोरङ्ल झ्यम्ब यो़प्प च्येम्म घयेत्ल टो़प्पे छ्यो़त्तुम् जेप्पे ज्यागक्की फक् दी थोप्च्ये यो़प्पल जम्बुलीङ्गी टङ्बु हीन्दोक्प च्येम्म घयेत् खोङ्गी दम्ब मेम्बेक्क ॱनी? 6 ॱनी हीन्न अक्, टङ्बु घयेत्ल खीत्रङ्गी दम्ङीत् झ्यीन आक्तोक्ल तोङ्गेन् बेत्। खीत्रङ्ल स्येन्दोङ् झ्यीक्केन् दी धङ् ठीम्सल च्यो़गेन् दी क हस्सो़त् छ्युक्पु घयेत् हुगो मेम्बेक्क ॱनी? 7 खीत्रङ्ल थोबे मीङ् गङ्ज्येन् हुल ॱमो़न्ज्यक् तोङ्गेन् दी इक् हुब घयेत्रङ् मेम्बेक्क ॱनी? 8 ॱसुङ्रप्ल थो़ङ्गेन् बेत्। रङ्गी लोल यो़क्केङ्गी मील रङ्गी रङ् डस्सीरङ् ॱसम्न झ्यम्ब झ्यीज्यीत् सीक्केङ्गी क ज्यीक्स्यो हीगोल खीत्रङ्गी गन्दीक्म चीन युङ्न ॱनी, खीत्रङ् गङ्ज्येल्ल थो़ङ्गेन् बेगो। (लेवी १९:१८) 9 हीगो मेम्ब, खीत्रङ्गी दम्ङीत् झ्यीन ॱनी, हुगो दीक्पल डोगेन् बेगो। हुनी खीत्रङ् छ्यो़डीम्ल ङीगेङ्गी मील डोगेन् बेगो। 10 घन्ड हीन् सीन्न मी ॱसी़ क च्यीक् पी़प्पे ॱयोङ्मा कुरीक्ल चीन युङ्न अक्, हुगी क च्यीक् ॱमत् चीय दीगी क कुरीक्ल ङीबल डोगेन् बेत्। 11 ॱयोङ्दङ् मत् ङीज्यीत् सीन्न क ॱनङ्गेन् दीगी मी ॱमत् ॱसो़च्च्यीत् सीक्केङ्गी क हुगो ओक् ॱनङ बेत्। (थो़म्ब २०:१३,१४) ॱनी रङ्गी ॱयोङ्दङ् ङीब मत् झ्यीन अक्, मी दी ॱसेत्न ॱनी, रङ् छ्यो़डीम्ल ङीगेङ्गी मील डोगेन् बेत्। 12 रङ्मो़ल तो़ङ्गेङ्गी छ्यो़डीम्ल यो़प्पे ठीम् खीत्रङ्ल को़न्ज्योक्की च्यो़क्केन् बेत् ॱनो़ब ॱसम्न खीत्रङ्गी तम् लप् ॱस्यीब धङ् ले झ्यीत् ॱस्यीब झ्यीज्यीत्। 13 घन्ड हीन् सीन्न ॱङीङ्ज्यी मीत् झ्यीक्केङ्गी मील ॱङीङ्ज्यी मीप्पे ठीम् दीरङ् च्यो़क्केन् बेत्। ॱनी ॱङीङ्ज्यी च्येम्मल यङ् को़न्ज्योक् च्यानी इक् ॱङीङ्ज्यी दीरङ् ज्यला थो़न्न युङ्गेन् बेत्। छ्य स्यक्प धङ् हुल डीक्पे ले गो़गेन् १४-२६ 14 ङे पी़न्ज्यासो, मी ॱसी़ ङ छ्य स्योक्केन् हीन् सीगुक्क हुगी रोरङ्गी छ्य स्यक्प दील पीबे ले दी मीत् झ्यीक्को़त्न ॱनी, हुगी घन्डे फेन् दी थोगो़त् सीक्केन्? हुन्दुक् झ्यीबे छ्य स्यक्पे लेमी़ थर् छुगो़प्प बेक्कक् ॱनी? 15 खीत्रङ्गी घुङ्न घो़ मीप्प सम मीप्पे पी़न्ज्या छ्योगो हीन्, भुमु हीन्न अक्, हुन्दुक् झ्यीब यो़त्न, 16 हुल खीत्रङ्गी ॱलो दीन्दीक्म झ्यीन ज्युक्ल घो़ ढोम्बोक्म घो़ल्लेत्। सम डङ् डङ् सोलेत् सीन्न तोङ्गेन्। ॱनी यङ् हुल गो़बे गो़ज्येत् घयेत् दी ॱमीत् तीक्को़त्न ॱनी, घन्डे फेन् दी थोगो़त् सीक्केन्? 17 ॱनी हीगो डस्सी छ्य स्यक्पे लुल अक् हुल पीबे ले दी मीत् झ्यीक्को़त्न ॱनी, हुगो ॱस्यीनरदङ् छ्येत्मीत् बेत्। 18 ॱनी मी यरीगी सीक्को़त्ल रङ्गी छ्य दीरङ् क स्यक्प बेत्। ॱनी ङल हुल डीक्पे ले दी इक् यो़त्। रङ्गी ले मीप्पे छ्य स्यक्प दी ङल तो़ल्लेत्। ॱनी ङे छ्य स्यक्प दी ङे ले दीगी तो़न् योङ्। 19 को़न्ज्योक् च्यीगी च्यीक्रङ् यो़प्प हीम्बल रङ्गी छ्य स्यक्न यो़क्केन् बेत्। हुगो गङ्ज्येन् बेत्। हीगो डस्सी त ॱनो़प्प अयेक्प घयेक्की इक् छ्य स्यक्न हुब ज्यीबे ॱनेगेन् बेत्। 20 ॱवे घुव, रङ्गी छ्य स्यक्नी हुल डीक्पे ले मीत् झ्यीक्केन् हुगो घो ॱमीत् छ्यो़त् बेत्। हीगो ॱह घोज्ये ॱनो़गुक्कक्? 21 हज्यरङ्गी पुबु अब्राहाम् ॱनम्बर् धक्पर्ल थो़न्ज्येगी चव दी खोङ्गी ले झ्यीन युङे लम्नी थो़म्ब मेम्बेक्क ॱनी? घन्ड हीन् सीन्न खोङ्गी रोरङ्गी भु इसहाक् को़न्ज्योक्ल छ्यो़प्पल पुज्येल पुदु फीम्ब बेत्। 22 खोङ्गी छ्य स्यक्प दी धङ् ले दी कङ्ज्यीक्ल झ्यीन युङ्नी, हुनी हुगी ले घयेत् दीगी खोङ्गी छ्य स्यक्प दी छङ्न युङ रङ्गी थोङ्गो़ट्टो। 23 हीगी ढीक्ल ॱसुङ्रप्ल थो़ङ्गेङ्गी केच्च्य हीगो डुब बेत्। अब्राहाम्गी को़न्ज्योक्ल छ्य स्यक्प बेत्। छ्य स्यक्नी, खोङ् ॱनम्बर् धक्पर्ल थो़म्ब को़न्ज्योक्की थोङ बेत्। (छ्यारप् १५:६) हीगो झ्यीनी अब्राहाम् को़न्ज्योक्की छ्यीट्टो सीरल ओ़ब झ्युङ बेत्। 24 हीगो हीन्न ॱनी, छ्य स्यक्प दी छ्युवक्की मीत् युङ्गेन् बेत्। छ्य स्यक्पल पीबे ले दी इक् झ्यीन क, मी ॱनम्बर् धक्पर्ल थो़म्ब हीम्ब खीत्रङ्गी ॱह घो छुगेन् बेत्। 25 ॱनी हीगो डस्सी छ्येमु राहाब् ॱनम्बर् धक्पर्ल थो़न्ज्ये दी इक् रोगी ले झ्यीब घयेक्की झ्युङ बेत्। घन्ड हीन् सीन्न च्यीव झ्यीत्तु तङ्न युङे मील रोगी ॱनेजङ् ॱयर्न लम् ॱयोङ्नी फल्ल डोदु ची़प्प बेत्। 26 ॱसीम् मीप्पे ली़बु ॱस्यीनर युङ्गेन् डस्सी ले मीप्पे छ्य स्यक्प दी छ्युवक् ॱस्यीनरदङ् छ्येत्मीत् बेत्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.