याकुब् 1 - ल्होमी1 को़न्ज्योक् धङ् चोव ज्यीन्दक् येशु ख्रीष्ट्की ॱयोक्पु ङ याकुब्गी खीत्रङ् लुङ्ब ॱसोस्सोल धर्न दो़क्केन् दुङ्ज्यी़त् च्युन्नीबुल छ्यक्सुम् थेमु यो़दो। छ्य स्यक्पल छो़त्लीन् युङ्गेन् २-४ 2 ङे पी़न्ज्यासो, खीत्रङ्ल छो़त्लीन् दुक्प ॱनजो युङ हुगो कुरीक्ल गव हीम्ब ॱनो़ब ॱसम्ज्यीत्। 3 घन्ड हीन् सीन्न खीत्रङ्गी छ्य स्यक्प दी तेल्लो़त् यो़त् हुल छो़त् युङल गुर् थेक्प झ्यीन ॱनी, धु दी छ्यीदु डोगेन् बेत् सीर खीत्रङ्ल ॱस्यो़च्च्ये यो़क्केन् बेत्। 4 खीत्रङ् फी़न्सुम् छङ युङ्ज्ये यो़प्पल खीत्रङ्गी धु च्यङ दील डेबु छ्याज्ये यो़प्प स्योक्च्यीत्। हुनी खीत्रङ्ल घन्डे गो़ज्येक्की तोक्प आक् मीत् युङ्गेन् बेत्। को़न्ज्योक्ल स्युवे लेमु ५-८ 5 खीत्रङ् ॱसुल झ्यी़रीक्की गो़ज्येत् यो़दङ् हुगी को़न्ज्योक्ल स्यी़ज्यीत्। खोङ्गी गोङ्ब ॱमीत् चोङ, ॱलो यङ्बोक्म झ्यीन खीत्रङ्ल ॱनङ्गेन् बेत्। 6 ॱनी खीत्रङ्गी खोङ्ल स्युवे यङ्ल ॱसीम्नी मीत् युङ्गो़ट्टो ॱनो़ब ॱमत् खुर, छ्य गन्दीक्म स्यक्न स्यु गोगेन् बेत्। मीत् युङ्गो़ट्टो ॱनो़ब खुर्केन् दी छ्यु ज्यम्जो छ्यीम्मी़ भजुप्तङ् छ्येत्मीत् ॱलुङ्बी़ ॱसोर्न, घल हीन्न हीन् छ्यी़ डोगेन् डस्सी युङ्गेन् बेत्। 7 हुन्दुक् झ्यीबे मी चोव ज्यीन्दक् च्यानी घन्ड थोप् योङ ॱनो़बे ॱसम्ल ॱमत् खुर्च्यीत्। हुल ॱमीत् थोप्केन् बेत्। 8 ॱसीम्ब ची ॱङील ॱस्योर्नरे मी छ्यलु दी घङ्गोल अक् थेक्ल मीप्प, हीम्ब न मेम्ब न? ॱनो़ब च्यङ्ज्यङ् खुर्केन् बेत्। 9 ॱनी पी़न्ज्या ॱनङ्ज्युङ् च्येम्म यङ् छ्यीयाल थो़न्न, हुगी ढीक्ल ङोम्ज्येत् झ्यीज्यीत्। 10 छ्युक्पु यङ् रोरङ् ॱनङ्ज्युङ्ल ॱसोङ्न, हुगी ढीक्ल ङोम्ज्येत् झ्यीज्यीत्। घन्ड हीन् सीन्न हुगो ॱङोमक्की मीन्दोक् येब डस्सी येगेन् बेत्। 11 ङीम छस्सी तङ्न ॱलुङ्बु ढोम्मु ज्यप्न युङ्नी, हुनी ॱङोमक् घयेत् कुरीक् रेक्न, मीन्दोक् घयेत् दी इक् घोक्नी, हुनी हुगी पम्सो दी इक् ये डोगेन् बेत्। हीगो डस्सी मी छ्युक्पु उक् रोरङ्गी मीजीगी लेमु झ्यीन युङ्गील्ल हुगो ये डोगेन् बेत्। ॱसीम्बे धेत्मो़ल ॱस्योर्केन् १२-१६ 12 छो़त्लीङ्गी दुक्प युङ गुर्न ॱसु थीरीय दो़क्कुक्क हुगो ॱसोदी च्येम्म युङ्गेन् बेगो। घन्ड हीन् सीन्न हुगो गुर् थेक्प झ्यीन हुनी थो़न्नी, को़न्ज्योक्की खोङ् रोरङ्ल झ्यम्ब यो़प्प च्येम्म घयेत्ल टो़प्पे छ्यो़त्तुम् झ्यीबे छीये ज्येगी स्यमुङ् दी हुल थोप्केन् बेत्। 13 मी ॱसी़ इक् दीक्पल ॱस्योर्च्येम ॱयेङे यङ्ल हुगी ङ दीक्पल को़न्ज्योक्की छ्यी़दु ची़क्कुक् ॱनो़ब ॱमत् खुर्च्यीत्। घन्ड हीन् सीन्न को़न्ज्योक् खोङ् रोरङ् अङ् ङेम्बे लम्ल ॱमीत् छ्यी़गेन् बेत्। ॱनी खोङ्गी मी ॱसु उक् ङेम्बे लम्ल ॱमीत् च्युगेन् बेत्। 14 दीक्पल ॱस्योर्च्येम ॱयेङे लेमु हीगो मी ॱसोस्सोरङ्गी ॱसीम्बे धेत्मो़ल ॱस्योर्न, ङेम्बे लम्ल रोरङ् रङ्स्यीगी छ्यी़ डोगेन् बेत्। 15 हुन्दुक् झ्यीन हुगी धेत्मो़ दी भुजीम थो़त्नी, हुनी दीक्प कीगेन् बेत्। दीक्प दील ओङ्बु तान युङ्नी, हुगी डेबु दील ॱस्यीव युङ्गेन् बेत्। 16 ङे झ्यम्बे पी़न्ज्यासो, गो ॱमत् थोम्ज्यीत्। 17 गये ढङ्गी ॱनङ्ज्येत् घयेत् धङ् फी़न्सुम् छङ च्येम्मे ॱनङ्ज्येत् घयेत् जेङ् ॱनम्गी ओ़च्च्य च्येम्म घयेत् छ्यादु ची़क्केन् इगी यप् च्यानी मल्ल युङ्गेन् बेत्। खोङ् ज्युरुव मीप्प धङ् खोङ् झ्यीस्सन ढीक्मक् मीप्प यो़क्केन् बेत्। 18 खोङ्गी छ्यादु ची़प्प घयेक्की छीक्नी हज्यरङ् खोङ्गी फी़त्ल युङ्ज्ये यो़प्पल खोङ्गी थुल ॱसम्न दीम्बे केच्च्ये लम्नी हज्यरङ् कीदु ची़प्प बेत्। ॱसुङ्रप्ल डीक्पे लेमु झ्यीत् गोगेन् १९-२७ 19 ङे झ्यम्बे पी़न्ज्यासो, हीगो ॱस्यीब झ्यीज्यीत्। मी ॱसोस्सो नेम्बल खेजो़त् झ्यीज्यीत्। हुनी तम् लबल धङ् खोङ्डोक् झ्यीप्पल ॱसम्ल तङ्न मेन्द, मत् झ्यीज्यीत्। 20 घन्ड हीन् सीन्न मी खोङ्डोक्की लेगी को़न्ज्योक् गुवे ले ढङ्बु दी मीत् डुप्केन् बेत्। 21 हीगो झ्यीनी चङ्ज्ये मीप्प ङीबे ढङ् धङ् आक्पागी ढङ् घयेत् फङ्नी, थर्तु ची़क्केन् खीत्रङ्गी ॱसीम्ल चुन यो़प्पे ॱसुङ्रप्की केच्च्य दीदङ् थी़म्ब ॱनोम्ज्युङ् झ्यीन हुगोदङ् डीक्प झ्यीज्यीत्। 22 ॱनी ॱसुङ्रप्की केच्च्य खीत्रङ्गी आम्ज्योक्की नेम्ब छ्युवक्की रङ्गी रङ्ल गो़गोर् तोङ्गेन् डस्सी बेत्। केच्च्य नेन्नी, हुगोदङ् डीक्प झ्यीन युङ् गोगेन् बेत्। 23 ॱसुङ्रप्की केच्च्यदङ् डीक्प मीत् झ्यीक्केन् आम्ज्योक्की छ्युवक् नेङ्गेङ्गी मी दी मीलोङ्ल रोरङ्गी ङोरी तेन फीन्नी, 24 हुनी फच्चो़त् च्यीक्नी रोरङ्गी ङोरी दी टोक् ज्यीप्नर डस्सीगी मी युङ्गेन् बेत्। 25 ॱनी ॱसुङ्रप्की केच्च्य नेन्नी टोक् ज्यीप्केन् मेम्ब, हुगोदङ् डीक्प झ्यीन रङ्मो़ ॱनङ्गेङ्गी फी़न्सुम् छङ च्येम्मे छ्यो़डीम्ल ॱसम्न दो़क्केन् दी ॱसोदी च्येम्म युङ्गेन् बेगो। 26 ॱनी मी ॱसी़ रोरङ् को़न्ज्योक् ॱसम्गेङ्गी मी हीन् ॱनो़ब झ्यीक्कुक्क हुगी रोरङ्गी च्यीलाल जीम्ब मत् झ्येन ॱनी, हुगी रोरङ्गी रोरङ्ल गो़गोर् तङ्न को़न्ज्योक् ॱसम्न युङे लेमु दी घो ॱमीत् छ्यो़त्ल तोङ्गेन् बेत्। 27 ॱनी को़न्ज्योक् हज्यरङ्गी यप्की थुल यो़प्पल धक्पर् धङ् नक्पी़ जी मीप्पे छ्यो़लु दी हीगो बेत्। धोजी धङ् मोरेङ्मु घयेत्ल दुक्प नोङे यङ्ल दगु झ्यीत् गोगेन् बेत्। ॱनी रोरङ् च्यप्सङ् ॱलुङ्सङ् युङ्ज्ये यो़प्पल जम्बुलीङ् ङो़गी लेमुल धोजीम् झ्यीत् गोगेन् बेत्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.