हीब्रु 9 - ल्होमीछ्यक् छ्यो़प्प पुबे लेमु ॱएम्मा १-१० 1 कगो़त् धम्स्यक् ॱएम्मा हुगी नङ्ल छ्यक् छ्यो़प्प पुगेङ्गी लेमु घयेत् धङ् ॱनी कोलीमी सो़बे छ्यो़गङ् दी इक् यो़क्केन् बेत्। 2 ॱनी हीगी घुर्की छ्यो़गङ्गी कोट्ट ॱमेक्मा दील कोट्ट चङ्म सीक्केन् बेत्। ॱनी उन गो दी़न् च्येम्मे छ्यो़त्मी दी धङ् को़न्ज्योक्ल पुबे ढोप्ची घयेत् च्येम्मे ढज्योक् दी यो़क्केन् बेत्। 3 हुनी योल नङ्मागी नङ्ल यो़प्पे कोट्ट दील कोट्ट चङ्स्यो सीक्केन् बेत्। 4 उन को़न्ज्योक्ल पो़गर्की पो़ ॱहेन पुसे ॱसीर्की ॱसीच्च्यु तङे यप्च्य दी धङ् कगो़त् धम्स्यक्की गम् ॱसीर्की ॱसीच्च्यु तङ दी यो़क्केन् बेत्। ॱनी गम्गी नङ् दील ॱङोल बरे हारुन्गी तोक्लङ् दी, ॱनी कगो़त् धम्स्यक् च्येम्मे दो ॱयम्बक् ॱङीबु दी धङ् ॱसीर्की ॱनो़च्च्य च्यीक्ल मन्न स्यक्न यो़क्केन् बेत्। 5 ॱनी थुज्यीगी डीक्च्या जेस्स गम् हुगी घप्तोक् दी कक्केन् दील को़न्ज्योक्की तो़प्प च्येम्म करुब् सीक्केन् ॱस्योक्पक् च्येम्म डवु ॱङी सो़न यो़क्केन् बेत्। हीजो़त् च्यीक् मेन्द, उन यो़प्पे केच्च्य ॱयोङ् कुरीक् ॱमत् ॱस्येत्न आक् डीक्केन् बेत्। 6 हुन्दुक् झ्यीन घुर्की छ्यो़गङ्गी लेमु दी सो़नी, छ्यो़प्पो़न् घयेत् दी कोट्ट ॱमेक्मा दीदु छ्यक् छ्यो़प्प पुदु छीगङ् स्युक्केन् बेत्। 7 ॱनी कोट्ट नङ्मा दील छ्यो़प्पो़न् चो छ्यीस्स्यो दीरङ् लोल लेन् च्यीक् स्युक्केन् बेत्। हुगो ओक् त ॱरोक्की ठक् दी ॱमत् खुरल मीत् स्युक्केन् बेत्। हुगी ठक् हुगो रोरङ्गी दीक्पे धो़ल्ल धङ् मीमङ् घयेक्की नोन्डु झ्युङे दीक्पे धो़ल्ल पुदु स्युक्केन् बेत्। 8 हीगो झ्यीनी धम्बे थुगी हीन्दुक् ॱसुङ्गेन् बेत्। घुर्की छ्यो़गङ् ॱएम्मा दी यो़स्स्यीङ् भोर्ल को़न्ज्योक् झ्यीस्स कोट्ट चङ्स्यो दील मीमङ् स्युक् ॱमीत् छुगेन् बेत्। 9 ॱनी हुगी लेमु घयेत् हुगो दङ् हरीङ् झ्युङ्न यो़क्केङ्गी पी हील डोगेन् बेत्। हुगी लेमी़ कप्ल मीमङ् घयेक्की ॱरोक् धङ् छ्यो़प्प पुब बेत्। ॱनी मी ॱसु उक् हुगी लेमु हुगी फी़न्सुम् छङल धङ् ॱसीम् धक्पर्ल सो़न ॱनोङ् मीप्पल सो ॱमत् छुब बेत्। 10 हुगी लेमु हुगो तीङ्ला लेमु ॱसम्ब युङ् युङ् थुक्ल सी़ल फेम्बे सय थुङ धङ् ठी़ ज्यक्च्येल टेप्प बेत्। कगो़त् धम्स्यक् तीङ्मागी लेमु ११-२८ 11 दङ् हरीङ्गी हीगी गागी ढङ्गी लेमी़ छ्यो़प्पो़न् चो छ्यीस्स्यो दील ख्रीष्ट् खो़त्न यो़क्केन् बेत्। ॱनी खोङ् कोलीमी लक्पे सो़बे घुर्की छ्यो़गङ्ल मेम्ब, हीले चा छ्यीया धङ् छङा यो़क्केङ्गी छ्यो़गङ्ल स्युन यो़क्केन् बेत्। ॱनी हीगी छ्यो़गङ् हीगो छ्यादु ची़प्पे जम्बुलीङ्गी नङ्ल मीत् युङ्गेन् बेत्। 12 हीगी लेमु डस्सी रबु धङ् ॱलङ्डुक्की ठक्की छ्यो़प्प पुदु मेम्ब, खोङ्गी फुगी ढीक्ल लेन् च्यीक्ल खोङ् रोरङ्गी ठक्की छ्यो़प्प पुन इगीगी कोट्ट चङ्स्यो दील स्युब बेत्। हुन्दुक् झ्यीन खोङ्गी हज्यरङ् फुगी ढीक्ल थर्वल ॱली़ब बेत्। 13 मी ली़गी ढीप् घयेत् धक्च्येल रबु धङ् ॱलङ्डुक्की ठक् हीन्, यङ् भ यम्मु छ्यो़प्पल ॱहेन पुबे घोदा दी हीन्न अक्, हुगो तोर्नी, हस्सो़त् चङ्मल धक्केन् बेत्। 14 ॱनी हीले ज्यीक्पा हज्यरङ् ॱस्यीस्सल च्यो़गेङ्गी हज्यरङ्गी मत् ओ़बे ले झ्यीबे ॱनोङ् घयेत् दी ख्रीष्ट्की ठक्की टी़न धक्तु ची़क्केन् बेत्। हुनी क हस्सो़त् ॱसोम्बु हीम्बे को़न्ज्योक्ल हज्यरङ्गी धेप्प झ्यीत् छुगेन् बेत्। ॱनी हीगो धी़ ज्यी़न्दु स्युगेन् धम्बे थुगी रोरम् जेत्न, नक्चक् मीप्प ख्रीष्ट्की खोङ् रोरङ्गी ॱरोक् को़न्ज्योक्ल पुबे लम्नी झ्युङ बेत्। 15 कगो़त् धम्स्यक् ॱएम्मा हुल ङीनरे मी घयेत् ख्रीष्ट् ढोङ्नी क, हुगी ङीबे लक्नी ॱली़ब बेत्। ॱनी हीगी ढीक्ल को़न्ज्योक्की भो़बे मी घयेत्ल खोङ्गी थर्वे फक् ॱनङे छ्यो़त्तुम् जेप्प दी फुगी ढीक्ल थोप्च्ये यो़प्पल कगो़त् धम्स्यक् ॱसम्ब स्योङ्गेन् ॱअर्की मी दील ख्रीष्ट् झ्युङ्न यो़क्केन् बेत्। 16 कगो़त् धम्स्यक् हीगो म दी खज्यीम् स्यक्पे लेमुदङ् छ्येत्मीत् बेत्। ॱनी खज्यीम् स्योक्केन् दी खुङ्देन् ॱस्यीनर हीम्ब दी ॱस्यो़च्च्ये झ्युङ्न ॱनी, हुनी हुगी खज्यीम् दी डुप्केन् बेत्। 17 घन्ड हीन् सीन्न खज्यीम् स्योक्केन् दी ॱमत् ॱस्यीय यो़त्न ॱनी, हुगी खज्यीम् दी खज्यीम्ल मीत् डोगेन् बेत्। 18 हीगो डस्सी कगो़त् धम्स्यक् ॱएम्मा हुगो स्योङे यङ्ल अक् ठक् ॱमत् तो़म्बल मत् युङ बेत्। 19 हुगी यङ्ल मीमङ्ल छ्यो़डीम्गी क घयेत् कुरीक् मोशागी डोन ॱस्येप्प बेत्। हुनी रबु धङ् ॱलङ्डुक्की ठक् दी तो़न्नी हुगो छ्युल ॱरीन हुनी हीस्सोप् सीक्केङ्गी ॱङोमक्की दोङ्बु च्यीक्की चीमुङ्ल भा ॱमप्पु च्यीक् डान हुगो ठक् दील ॱहोप्नी मीमङ् घयेत् दी धङ् यीगी दील तोर्न कब बेत्। 20 हीगो तोरे यङ्ल मोशागी मी घयेत् दील हीगी ठक् हीगो को़न्ज्योक्की ॱनङे कगो़त् धम्स्यक्ल हज्यरङ्गी ॱमीत् ची रीगी ढीक्ल तो़म्बे ठक् बेत् सीन्न ॱस्येप्प बेत्। (थो़म्ब २४:८) 21 हुनी हुगो डस्सीरङ् यङ् खोङ्गी घुर्की छ्यो़गङ् दी धङ् उन छ्यक् छ्यो़प्प पुज्येमे यप्च्य घयेत् दील अक् तोर्न कब बेत्। 22 छ्यो़डीम्ल यो़क्केन् ॱङीजो़त् ॱसुम्जो़त् च्यीक् पी़प्पे ॱयोङ्मा कुरीक्ल ठक्की ठी़ तोर्न चङ्बोक्मल सो गोगेन् बेत्। ॱरोक् पुन ठक् ॱमत् तो़म्बल दीक्प मीत् धक्केन् बेत् सीर यो़क्केन् बेत्। 23 हीगी लेमु हीगो इगी तेङ् यी़गी लेमी़ डवु डस्सी च्यीक्रङ् बेत्। ॱनी हीन्दुक् झ्यीबल अक् त हुन्दुक् झ्यीन चङ्बोक्मल सो गो़ ॱस्यर्केल्ल इगी म ॱङो़म दील ॱसुम्ब हीले ज्यीक्पागी ॱरोक् पुन, हुगी ठक्की टी़न धक्तु ची़त् गो़ ॱस्यर बेत्। 24 कोलीमी लक्पे सो़बे घुर्की छ्यो़गङ् हीगो इगीगी छ्यो़गङ् ॱङो़मे डवु डस्सी च्यीक्रङ् बेत्। ॱनी ख्रीष्ट् हील मत् स्युब, इगी तेङ् यी़ल झ्यो़न्नर बेत्। ॱनी इगीदु खोङ् हुन्दो हज्यरङ्गी धो़ल्ल को़न्ज्योक्की ढुङ्दु स्युदेन् ज्यक्केल्ल स्युन यो़क्केन् बेत्। 25 हीगी लेमुल छ्यो़प्पो़न् चो छ्यीस्स्योगी लो रीम फो़स्स्यी रोरङ्गी ठक् मेम्ब, ॱरोक् पुबे ठक् खुर्न कोट्ट चङ्स्यो दील स्युक्केन् बेत्। ॱनी ख्रीष्ट् हुगो डस्सी खोङ् रोरङ्गी ॱरोक् यङ्दङ् च्यङ्दङ् च्यो़दु तेङ् यी़ल स्युब मेम्बेत्। 26 स्येन् खोङ् ॱस धङ् ॱनम् छ्यादु ची़प्पनी झ्यीनी छीगङ् दुक्स्यी गुर्न ढोङ् गो़ ॱस्यरेत् क ॱनी। ॱनी हुगो मेम्ब, दीक्प धक्च्ये यो़प्पल फुगी ढीक्ल लेन् च्यीक्ल खोङ्गी रोरङ्गी ॱरोक् च्यो़दु स्युक् थमे धी़ हील खोङ् झ्यो़म्ब बेत्। 27 को़न्ज्योक्की कगो़त् यो़प्पल कोलीमी छङ्म की़न् लेन् री री ॱस्यी गोगेन् बेत्। हुनी तीङ्ला हुल ठीम् च्यो़क्केन् बेत्। 28 कोलीमी घयेक्की दीक्पे छ्येप्प दी ख्रीष्ट्की खुर्न खोङ्गी रोरङ्गी ॱरोक् च्येन कोलीमीगी लेमु डस्सी लेन् च्यीक् ढोङ् गो़ ॱस्यर बेत्। ॱनी खोङ् यङ् फीच्च्य जम्बुलीङ्ल झ्यो़ङ्गेन् बेत्। हुगो दीक्प धक्तु ची़च्च्येगी ढीक्ल मेम्ब, खोङ्ल गुक्केन् घयेत् छी थर्वल जेङ् तो़न्दु बेत्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.