हीब्रु 8 - ल्होमीयेशु छ्यो़प्पो़न् चो छ्यीस्स्योल खो़प्प १-६ 1 ङीक्की ॱस्यो़क्केङ्गी केच्च्य हीगी धो़ङ्गी चव दी हीगो बेत्। हज्यरङ्गी छ्यो़प्पो़न् चो छ्यीस्स्यो दी इगी तेङ् यी़न ॱवङ् की़न् च्येम्मे ज्याबी़ स्युडीगी ॱये छ्योन स्युन यो़क्केन् बेत्। 2 खोङ्गी छ्यो़प्पो़ङ्गी ले दी मी सो़बे घुर्की छ्यो़गङ्ल मेम्ब, इगीन चोव ज्यीन्दक्की सो़बे घुर्की छ्यो़गङ् ङोमे कोट्ट चङ्स्यो दीदु जेक्केन् बेत्। 3 छ्यो़प्पो़न् चो छ्यीस्स्यो घन् दीगी इक् ले दी को़न्ज्योक्ल छ्यो़प्प धङ् ॱरोक् पुगेल्ल बेत्। ॱनी खोङ् ओङ् छ्यो़प्पो़न् चो छ्यीस्स्यो झ्यीनी, रोरङ्गी घङ् यो़प्प दी पु गो़ ॱस्यर बेत्। 4 खोङ् हुन्दो जम्बुलीङ्न यो़त्न ॱनी, खोङ् छ्यो़प्पो़ल्ल ॱमत् खो़प्प यो़ट्टो। घन्ड हीन् सीन्न छ्यो़डीम्गी कल यो़प्पल छ्यो़प्प पुगेन् घयेत् हुन्दो ओक् ज्यी़क्की छ्यो़प्पो़ल्लरङ् खो़त्न युङ्गेन् बेत्। 5 छ्यो़प्पो़ङ्गी ले हुगो म दी इगी तेङ् यी़न यो़क्केन्, घुर्की छ्यो़गङ्गी लेमी़ ढीक्मक् डस्सी च्यीक्रङ् बेत्। ॱनी धङ्बु हीगी घुर्की छ्यो़गङ् सोये यङ्ल हुगो इगीगी दी डस्सी युङ्ज्येल को़न्ज्योक्की मोशाल रङ्ल ङे लदोक्तु तो़म्बे लेमु दी डस्सीरङ् ॱमत् ॱनोर, ठोक्क सो़ज्यीत् सीन्न ॱङाब हीङ्गो़प्प बेत्। (थो़म्ब २५:४०) 6 हीगी छ्यो़प्पो़ङ्गी ले हुले ख्रीष्ट्ल थोबे छ्यो़प्पो़ङ्गी ले हुगो खुङ् छ्यीया यो़क्केन् बेत्। ॱनी हीगो डस्सी खोङ्गी डीक्च्या जेत्न स्यक्पे कगो़त् धम्स्यक् दी इक् ॱएम्मागी दीले गज्येङ्गी खुङ् धक्पा यो़क्केन् बेत्। ॱनी को़न्ज्योक्की ॱनङे छ्यो़त्तुम् झ्यीब दी इक् ॱएम्मागी दीले गज्येङ्गी खुङ् धक्पा यो़क्केन् बेत्। कगो़त् धम्स्यक् ॱसम्बे केच्च्य ७-१३ 7 कगो़त् धम्स्यक् ॱएम्मा हुल घन्डे च्यो़न् ओ़न् मीत्न ॱनी, कगो़त् धम्स्यक् तीङ्मा हुगो मीत् गो़ब यो़ट्टो। 8 ॱनी कगो़त् धम्स्यक् ॱएम्मा हुल मी घयेक्की ॱमीत् चीय को़न्ज्योक्की थोङ्नी, हुगी ढीक्ल ॱसुङ्रप्ल हीन्दुक् सीर थो़ङ्गेन् बेत्। चोव ज्यीन्दक्की ॱसुङ्गुगो। तेदे, ह धी़ ॱलीक्केन् बेत्। हुगी धी़ल इस्राएल्की मी घयेत् धङ् यहुदीयागी मी घयेत्ल ङ कगो़त् धम्स्यक् ॱसम्ब च्यीक् स्योक्केन्। 9 हीगो धङ्बु मीस्रे लुङ्बनी लक्टी़त् तप्न ठीक्न युङे हुबे पुबु ॱमुमुल स्यक्पे कगो़त् धम्स्यक् दी डस्सी मेम्बेत्। हुबे ङे कगो़त् धम्स्यक्ल ॱमत् चीयल ङे हुब ङो़नी ख ज्युरेन् सीन्न चोव ज्यीन्दक्की ॱसुङ्गुगो। 10 इस्राएल्की मी घयेत्तङ् ङ हीन्दुक् झ्यीबे कगो़त् धम्स्यक् च्यीक् स्योक्केन् सीन्न चोव ज्यीन्दक्की ॱसुङ्गुगो। तीङ्ला हुगी धी़ल ङे छ्यो़डीम्गी क घयेत् हुबे ॱसीम्ल स्युक्तु ची़त्न हुबे ॱसीम्बे यीक्ल ढीन स्योक्केन्। हुनी ङ हुबे को़न्ज्योक् धङ् हुब ङे मीस्सीर् हीम्ब युङ्गेन् बेत्। 11 हुनी दगु ॱनम्बुल धङ् पी़न् नङ्दु चोव ज्यीन्दक् ङु ॱस्यीब झ्यी सीक्केङ्गी ॱलोप्स ॱसी़ इक् ज्यक् मीत् गो़गेन् बेत्। घन्ड हीन् सीन्न गेन्स्यो़म्मीत् कुरीक्की ङ ङु ॱस्यीगेन् बेत्। 12 हुबे छ्यो़डीम्ल ङीब झ्यीब घयेत् धक्तु ची़क्केन्। हुबे दीक्प झ्यीब घयेत् ङे ॱसीम्ल ढेन्सो़ मीप्पल सोगेन्। (यर्मीया ३१:३१-३४) 13 को़न्ज्योक्की कगो़त् धम्स्यक् ॱसम्ब सीन्न ॱसुङे केच्च्य हुगी कगो़त् धम्स्यक् ॱएम्मा दी ॱङीङ्बल सोगेन् बेत्। हुनी हुगो घो ॱमीत् छ्यो़त्ल ॱसोङ्न ज्योक्पु ये डोगेन् बेत्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.