हीब्रु 7 - ल्होमीयेशु मल्कीसेदेक्की लुसे छ्यो़प्पो़न् १-२८ 1 हुगी मल्कीसेदेक् हुगो शालेम्गी ज्याबु धङ् इगी थोरी चीदु स्युगेन् को़न्ज्योक्की छ्यो़प्पो़न् हीङ्गो़प्प बेत्। ॱनी अब्राहाम् ज्याबु घयेत्तङ् ॱमक् थुक्न खोङ् ज्येन लोक्न युङे यङ्ल खोङ्गी दोङ्ल मल्कीसेदेक् ठेत्तु युङ्न खोङ्गी अब्राहाम्ल ॱमेल्लम् स्यी़न टेप्प बेत्। 2 ॱनी ॱमक् थुक्सनी ज्येन युङे यङ्ल खुरे नोर् घयेत् दीनी गो च्युल तङे गो च्यीक् अब्राहाम्गी मल्कीसेदेक्ल पुब बेत्। मल्कीसेदेक्की मीङ्गी धो़न् च्यीक् को़न्ज्योक् ङो़गी ढङ्बु हीम्बे ज्याबु सीक्केन् बेत्। ॱनी यङ् धो़न् ॱयोङ्म दी खोङ् स्यीव सुङ्गेन्, शालेम्गी ज्याबु उक् सीक्केन् बेत्। 3 खोङ्गी फ धङ् म ॱसु हीम्ब, खोङ् ॱसी़ दुङ्ज्यी़त् हीम्ब, नम् कीब हीम्ब, नम्गी धी़ल ढोङ हीम्ब हुगी ढीक्ल ज्यी़ मीप्प बेत्। ॱनी म दी खोङ् को़न्ज्योक्की ॱरेबुदङ् छ्येत्मीत् धी़ ज्यी़न्दु छ्यो़प्पो़ल्ल को़न यो़क्केन् बेत्। 4 तेदे खोङ् घन्दुक्मे छ्यीय दुक्क? हज्यरङ्गी पुबु अब्राहाम्गी इक् रोरङ्गी ॱमक्सनी खुर्न युङे नोर् घयेत् दीनी गो च्युल तङे गो च्यीक् खोङ्ल पुब बेत्। 5 लेवीगी ज्यी़त्नी छ्यो़प्पो़ल्ल को़न यो़प्प घयेत्ल छ्यो़डीम्गी कल यो़प्पल रोरङ्सो़ फम पी़न् मीमङ् घयेत् दीगी ले झ्यीब दीनी गो च्युल तङे गो च्यीक् हुबल थोप्केन् बेत्। अब्राहाम्गी ज्यी़त् च्यीक्परङ् हीन्न अक्, रोसोल हुगो थोप् ओ़ब यो़क्केन् बेत्। 6 ॱनी मल्कीसेदेक् लेवीगी ज्यी़त् मेम्बेत्। ॱनी मेन्न अक्, अब्राहाम्गी लक्नी गो च्युल तङे गो च्यीक्पु दी खोङ्गी लीन्न को़न्ज्योक्की छ्यो़त्तुम् जेप्पे अब्राहाम्ल खोङ्जो़ ॱमेल्लम् स्यी़न टेप्प बेत्। 7 ॱमेल्लम् जीक्केन् दीले ॱमेल्लम् स्यी़न टो़क्केन् दी छ्यीया हीम्ब कुरीक्ल ॱस्यो़च्च्ये यो़क्केन् बेत्। 8 गो च्युल तङे गो च्यीक् लीङ्गेन् लेवीगी ज्यी़त् घयेत् हुब ॱस्यी डोगेङ्गी मी बेत्। ॱनी हुगो डस्सी मल्कीसेदेक् मेम्बेत्। खोङ् ॱसोम्बु यो़क्केन् बेत् सीन्न ॱसुङ्रप्की ॱस्यो़क्केन् बेत्। 9 अब्राहाम्गी मल्कीसेदेक्ल गो च्यी़ गो च्यीक्पु दी टो़प्पे यङ्ल गो च्युल तङे गो च्यीक् लीङ्गेन् लेवीगी इक् खोङ्ल टेप्प बेत् सीन्न सीर् छुगेन् बेत्। 10 घन्ड हीन् सीन्न लेवी हुगी यङ्ल रोरङ्गी ॱमुमु अब्राहाम्गी सी़नी ॱमत् छ्येप्प यो़प्प बेत्। 11 इस्राएली मीमङ् घयेत्ल ॱनङे छ्यो़डीम् हुगी नङ्ल लेवीगी ज्यी़त् छ्यो़प्पो़न् घयेक्की ढीक्ल अक् क धङ् लुस गज्येन् यो़क्केन् बेत्। ॱनी हुगी लुसे लम्नी हज्यरङ् फी़न्सुम् छङल थो़न् छुब हीन्न ॱनी, यङ् हारुन्गी लुसल मेम्ब, मल्कीसेदेक्की लुसल छ्यो़प्पो़न् ॱयोङ्म घन्डल युङ् गो़ ॱस्यर बेक्क ॱनी? 12 हुन्दुक् झ्यीन छ्यो़प्पो़ङ्गी लेमी़ लुस दीरङ् ज्युर्न खुर्न ॱनी, हुनी छ्यो़डीम् दीरङ् जेङ् ज्युर् गोगेन् बेत्। 13 हीगी छ्यो़प्पो़न् ॱयोङ्म सीक्केन् हुगो हस्सो़त् हज्यरङ्गी चोव ज्यीन्दक् बेत्। खोङ् हारुन्गी ज्यी़त्ल मेम्ब, पुबु ॱयोङ्गी ज्यी़त्ल कीब बेत्। खोङ्गी पुबु ॱमुमु घन् दीगी इक् छ्यो़प्पो़न् झ्यीन छ्यो़प्प पुबे ले मत् झ्यीब बेत्। 14 खोङ् पुबु यहुदागी दुङ्ज्यी़त्ल कीब हीम्ब कुरीक्ल ॱस्यो़च्च्ये यो़क्केन् बेत्। छ्यो़प्पो़न् युङे ढीक्ल मोशागी छ्यो़डीम्गी क ॱनङे यङ्ल यहुदागी दुङ्ज्यी़क्की ढीक्ल घन्ड अक् ॱमत् ॱस्येप्प बेत्। 15 मल्कीसेदेक्की लुसल डगेन् छ्यो़प्पो़न् ॱमीत् च्यीक्प ॱयोङ्म हुगो थो़न्न युङ्नी, हीगी केच्च्य हीगो हरुङ् गदु ॱह घो छुगेन् बेत्। 16 छ्यो़डीम्गी क घयेत्ल ॱसम्न कोलीमीगी लुस डस्सील खोङ् ज्यी़क्की छ्यो़प्पो़ल्ल झ्युङ्न युङ मेम्ब, खोङ् रोरङ्गी छीये थ मीप्पे ॱस्यीक्की खोङ् छ्यो़प्पो़ल्ल झ्युङ बेत्। 17 घन्ड हीन् सीन्न हीगी ढीक्ल ॱसुङ्रप्ल थो़ङ्गेन् बेत्। रङ् मल्कीसेदेक्की लुसदङ् डगेन् धी़ ज्यी़न्दु ज्युरुव मीप्पे छ्यो़प्पो़न् युङ्गो़दो। (ॱसुङ्रप्की गुल्लु ११०:४) 18 छ्यो़प्पो़ङ्गी ढीक्ल यो़प्पे हुगी क ॱएम्मा घयेत् हुगो घो ॱमीत् छ्यो़त्ल ॱसोङ्न, हुगी लम्नी घन्ड अक् मत् डुबल हुगो ह खोङ्गी मीप्पल सो़ तङ बेत्। 19 हुगी छ्यो़डीम् हुगी लम्नी मी ॱसु उक् को़न्ज्योक्की ढुङ्दु फी़न्सुम् छङल थो़न् ॱमत् छुब बेत्। ॱनी हुले ज्यीक्पागी रीगो ॱयोङ्म च्यीक् युङ्नी, हुगी लम्नी क हज्यरङ् को़न्ज्योक्तङ् ङीदु डो छुगेल्ल झ्युङ बेत्। 20 हीगी ढीक्ल को़न्ज्योक्की ॱन झ्यीब बेत्। लेवीगी ज्यी़त् छ्यो़प्पो़ल्ल को़प्पे यङ्ल खोङ्गी ॱन मत् झ्यीब बेत्। 21 ॱनी ख्रीष्ट् छ्यो़प्पो़ल्ल को़प्पे यङ्ल ॱन झ्यीब बेत्। हीगी ढीक्ल ॱसुङ्रप्ल चोव ज्यीन्दक्की थु ज्युर्स मीप्पे ॱन झ्यीन खोङ्ल रङ् धी़ ज्यी़न्दु छ्यो़प्पो़न् युङ्गो़दो सीर थो़ङ्गेन् बेत्। (ॱसुङ्रप्की गुल्लु ११०:४) 22 हुन्दुक् झ्यीन येशु कगो़त् धम्स्यक् ॱसम्ब हुगो डुप्च्येमे खक् खुर्केल्ल झ्युङ्न यो़क्केन् बेत्। हुगो झ्यीनी ॱएम्मा दीले हीगो गया यो़क्केन् बेत्। 23 धङ्बी़ छ्यो़प्पो़न् ॱएम्मा घयेत् हुब कुरीक् ॱस्यी डोगेङ्गी मी झ्यीनी, हुब घन् दी इक् धी़ ज्यी़न्दु छ्यो़प्पो़ङ्गी लेल दो़त् ॱमत् छुब, ॱस्यी गो़ ॱस्यर्नी, छ्यो़प्पो़न् गज्येन् को़त् गो़ ॱस्यर बेत्। 24 ॱनी येशु हुब डस्सी मेम्बेत्। खोङ् धी़ ज्यी़न्दु ॱसोम्बु स्युगेन् झ्यीनी, खोङ्गी छ्यो़प्पो़ङ्गी लेमी़ लुस हुगो फुगी ढीक्ल युङ्गेन् बेत्। 25 हुगो झ्यीनी खोङ्गी लम्नी को़न्ज्योक् च्येल्ल युङ्गेन् घयेत् खोङ्गी फुगी ढीक्ल छी थर्वल तो़न् छुगेन् बेत्। घन्ड हीन् सीन्न हज्यरङ्गी धो़न्दु को़न्ज्योक्ल स्युदेन् ज्यक्केल्ल खोङ् धी़ ज्यी़न्दु स्युन यो़क्केन् बेत्। 26 खोङ् डस्सीगी छ्यो़प्पो़न् चो छ्यीस्स्यो दी क हज्यरङ्ल गो़ब यो़क्केन् बेत्। खोङ् धक्पर् च्येम्म च्यत् थीङीय ङीबे जी मीप्प, दीक्च्येन् घयेत्तङ् भीन इगी तेङ् यी़ले थोवाल खोङ् तो़त्न यो़क्केन् बेत्। 27 खोङ्ल छ्यो़प्पो़न् चो छ्यीस्स्यो ॱयोङ्म डस्सी दीक्पे ज्यी़त् मीप्प बेत्। ॱयोङ्म हुबेरङ् ङीन् रीम फो़स्स्यी ॱएन्स्युक् दील रोरङ्गी दीक्पे धो़न्दु, हुनी क मीमङ्गी धो़न्दु दीक्पे ॱस्याबल ॱरोक् पुगेन् बेत्। ॱनी हुगो डस्सी मेम्ब, खोङ्गी फुगी ढीक्ल लेन् च्यीक्ल मी कुरीक्की दीक्पे ॱस्याबल रोरङ्गी ॱरोक् दी च्येन पुब बेत्। 28 छ्यो़डीम्गी कल यो़प्पल छ्यो़प्पो़न् चो छ्यीस्स्योल को़बे मी घयेत् हुब ॱसीम् योक्याब च्येम्मे मी च्यङ्ज्यङ् बेत्। ॱनी तीङ्मा युङे को़न्ज्योक्की ॱन झ्यीबे छ्यो़प्पो़न् चो छ्यीस्स्यो दील फुगी फी़न्सुम् छङ च्येम्मे खोङ्गी ॱरेबु को़ब बेत्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.