हीब्रु 6 - ल्होमी1-2 हुगो झ्यीनी ख्रीष्ट्की ढीक्की केच्च्य गोम क क आमे ॱलोप्सदङ् छ्येत्मीत् फीच्च्य यङ् ॱसप्तेन् तीङ्गेङ्गी लेमु डस्सी मत् झ्यीदोङ्। ॱस्यीस्सल च्यो़गेङ्गी ले घयेत् ॱलो़ तङ्न ॱसीम् ज्युर् गोगेन्, को़न्ज्योक्ल छ्य स्योक् गोगेन्, ठी़ ज्यक्केन् बप्तीस्की लेमु घयेक्की ढीक्की ॱलोप्स, लक्पे ॱवङ् को़बे ढीक्की ॱलोप्स, ॱस्यीनी यङ् ॱसोम्बुल लोङ्गेङ्गी ॱलोप्स धङ् फुगी ढीक्ल छ्येप्प फोक्केन् हीम्बे ॱलोप्स हुन्दुक् झ्यीब हुगो कुरीक् क क आमे ॱलोप्स डस्सीरङ् बेत्। उजो़त् च्यीक्की ॱमीत् छ्येप्प, धो़न् कुरीक् ॱस्यीन फी़न्सुम् छङ युङ झ्यीत् गोगेन् बेत्। 3 को़न्ज्योक्की थुल यो़त्न ॱनी, हज्यरङ् हुगो डस्सी झ्यीदोङ्ज्यीत्। 4-6 तेङ् यी़नी मक्की छ्यो़मल चक्की तेन, ॱसीम्ल नम् लोङ्न, धम्बे थु थोप्न, को़न्ज्योक्की ॱसुङ्रप् गस्सी हीम्ब छोर्न तीङ्मागी धी़गी यङ्ल युङ्गेन् ॱस्यीक् छ्यीम्मी़ ले घयेत् ज्यी़ यो़क्केन्, हुन्दुक् झ्यीबे मी घयेत् हुबे रोरङ्सो़ धेप्प दी ॱलो़ तङ्न यो़त्न ॱनी, फीच्च्य हुब ॱसीम् ज्युर्न ॱङर् डस्सील ॱलोक् ॱमीत् छुगेन् बेत्। घन्ड हीन् सीन्न हुन्दुक् झ्यीबे ले हुगो को़न्ज्योक्की ॱरेबु रोरङ्सो़ फीच्च्य यङ् कुरुस्ल तान ॱम पोप्केन् हीम्बल डोगेन् बेत्। 7 स्यीङ्गल अक् छ्येप्प ज्यप्न ॱनी, स्यीङ्गे दक्पु दील फेम्बे तो़न्दोक् कीन युङ्गेन् बेत्। हुन्दुक् झ्यीबे स्यीङ्गल को़न्ज्योक्की झ्यीन्ज्यी ॱलोप्केन् बेत्। 8 ॱनी यङ् हुगो मेम्ब, स्यीङ्गल चीन्देरेक्प च्यङ्ज्यङ् कीन युङ्न ॱनी, हुगो फेन्दो मीत् युङ, ॱमो़त्मु सुक्केङ्गी स्यीङ्गल डोगेन् बेत्। स्युक्ला हुगो मील च्योप् ॱहे तोङ्गेन् बेत्। 9 ङे झ्यम्बे दगुसो, खीत्रङ् हुगो डस्सी त मेम्बेत्। ङे हुन्दुक् सीन्न अक्, खीत्रङ् स्यीङ्ग गङ्ज्येन् हुगो डस्सी थर्वे लम्ल ॱङो़न्ने डोगेन् हीम्बल ङ देङ् खीन यो़त्। 10 को़न्ज्योक्की ढीक्ल खीत्रङ्गी घङ् झ्यीबे ले घयेत्, खोङ्गी मी चङ्म घयेत्ल स्यप्च्यी़ ज्युब हुगो धङ् ॱनी हुन्दो ओक् ज्युन खोङ्ल हुन्दुक् झ्यीन झ्यम्ब यो़प्प हुगो खोङ्गी टोक् मत् ज्यीब यो़क्केन् बेत्। ॱनी खोङ् ढीन्ज्येन् यो़क्केन् झ्यीनी, हुगी लेन् खीत्रङ्ल ॱनङ्गेन् बेत्। 11 खीत्रङ्ल यो़प्पे रीगो दी डुप्च्ये यो़प्पल खीत्रङ् रीदङ् रीगी हुन्दुक् दीरङ् झ्यीन स्युक् थम थुक्ल धेप्पे स्यीदङ् झ्यीन दो़त् छुगेन् बेत् ॱनो़बे रीगो यो़त्। 12 खीत्रङ् ॱअर्स्यी ॱमत् ॱस्यो़प्प, हीन्दुक् झ्यीबे मी घयेक्की ॱमीदेल तेन दो़च्च्यीत्। हुबे धु च्यङ्न को़न्ज्योक्की छ्यो़त्तुम् जेप्पल गुन छ्य स्यक्न युङ्नी, हुबल हुगो थोब बेत्। को़न्ज्योक्की छ्यो़त्तुम्ल ज्युरुव मीप्प १३-२० 13-14 हीगी ढीक्ल को़न्ज्योक्की अब्राहाम्ल रङ्ल ङे गन्दीय ॱमेल्लम् ज्यक्केन्। रङ्गी ज्यी़त् गज्येन् फीन युङ्गेन् बेत् सीन्न ॱसुङ बेत्। ॱनी हीगो खुङ् युङ धङ् मीत् युङल खोङ्ले छ्यीया ॱयोङ् मीप्पल खोङ् रोरङ्रङ् पङ्दु स्यक्न ॱन झ्यीब बेत्। (छ्यारप् २२:१६-१७) 15 ॱनी अब्राहाम्गी हुल धु च्यङ्न गुन युङ्नी, हुगो झ्युङ्न डुब बेत्। 16 मी लुसल अक् थक्मु ॱस्योर्न ॱनी, दीम्ब दीन्स्यीक् झ्यीच्च्येल रोरङ्ले छ्यीया च्यीक् डेन् ज्यप्न ॱन झ्यीन ॱनी, हुगी थक्मु दी थक् छ्यो़त् डोगेन् बेत्। 17 ॱनी हीगो डस्सी को़न्ज्योक्की इक् ॱसुल टो़प्पे छ्यो़त्तुम् जेत् यो़दङ् हुगो ॱङो़न्ने ॱमीत् टो़त् रीगी खोङ्गी ढो़ दी ज्युर्स मीप्पे ॱन झ्यीब बेत्। 18 ॱनी हीगी मीत् ज्युर्केङ्गी छ्यो़त्तुम् धङ् ॱन झ्यीबे केच्च्य ॱङीबु हुगो ॱएलम ज्यक् ॱमीत् ॱस्यीगेङ्गी को़न्ज्योक्की ॱसुङ्न यो़क्केन् बेत्। हुगो झ्यीनी हीगी रीगो हीगो ॱलो़ ॱमत् तङ दो़च्च्ये यो़प्पल हज्यरङ् खोङ्ल च्यीप्न दो़क्केन् घयेत्ल ॱलोप्स्यीक् छ्यीम्मु ॱङीक्केन् बेत्। 19 ॱनी हीगी रीगो हीगो ढु छ्यी़दु ॱमीत् ची़क्केन्, डम्बोक्म सुङ्गेन् च्यागी ओक्च्येलेङ्मदङ् छ्येत्मीत् बेत्। ॱनी पी हीगो डस्सी हज्यरङ्गी ॱसीम् सुङ्गेङ्गी ओक्च्येलेङ्म दी को़न्ज्योक्की घुर्की छ्यो़गङ्गी योले नङ्गी कोट्ट चङ्स्यो दीन यो़क्केन् बेत्। 20 हीगो येशुल डोगेन् बेत्। खोङ् मल्कीसेदेक्की लुसल धी़ ज्यी़न्दु छ्यो़प्पो़न् चो छ्यीस्स्योल झ्युङ्न, हज्यरङ्गी ढीक्ल उन हज्यरङ्ले एल्ला स्युन यो़क्केन् बेत्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.