हीब्रु 5 - ल्होमी1 हीन यो़क्केङ्गी हीगी छ्यो़प्पो़न् चो छ्यीस्स्यो दी मीमङ्गी छीक्नी दम्न को़न्ज्योक्ल छ्यो़प्प पुज्येल धङ् दीक्पे ॱस्याबल ॱरोक् पुज्येल मीमङ्गी छप्पुल को़न स्योक्केन् बेत्। 2 ॱनी हुगो रोरङ् ॱसीम् योक्याब मी ॱयोङ्म डस्सीरङ् झ्यीनी, च्यवु मेन्नक्प, ङीब झ्यीक्केन् घयेत्ल हुगी ॱङीङ्ज्यी झ्यीत् छुगेन् बेत्। 3 ॱनी रोरङ् अङ् मी ॱयोङ्म डस्सीरङ् ॱसीम् योक्याब झ्यीनी, मीमङ्गी ढीक्ल छ्युवक् मेम्ब, रोरङ्गी ढीक्ल अक् दीक्पे ॱस्याबल ॱरोक् पु गो़ ॱस्यर्केन् बेत्। 4 मी ॱसु उक् तो़प्प च्येम्म छ्यो़प्पो़न् चो छ्यीस्स्योगी लेल रोरङ् रङ्स्यीगी खो़त्न मीत् युङ्गेन् बेत्। को़न्ज्योक्की हारुन्ल भो़न को़ब डस्सी को़क्केन् बेत्। 5 ॱनी हीगो डस्सी तो़प्प च्येम्मे छ्यो़प्पो़न् चो छ्यीस्स्योल ख्रीष्ट् रोरङ् रङ्स्यीगी खो़त्न मत् युङ, को़न्ज्योक्की को़न खोङ्ल हीन्दुक् ॱसुङ बेत्। रङ् ङे ॱरेबु हीन्। हरीङ्नी रङ्गी यप् ङ झ्युङ्न यो़त् सीर थो़ङ्गेन् बेत्। (ॱसुङ्रप्की गुल्लु २:७) 6 ॱनी हरुङ् को़न्ज्योक्की खोङ्ल हीन्दुक् उक् ॱसुङ बेत्। रङ् मल्कीसेदेक्की लुसदङ् डीक्केन् रङ् धी़ ज्यी़न्दु दो़क्केङ्गी छ्यो़प्पो़न् युङ्गो़दो। (ॱसुङ्रप्की गुल्लु ११०:४) 7 ॱनी खोङ् हीदु कोलीमील कीन यो़प्पे यङ्ल ॱस्यीये लक्नी छ्यी छुगेन् को़न्ज्योक्ल खोङ्गी ङी़गेत् थोन ॱमीक्च्यु तोङ्गीन् तोङ्गीन् ॱसुव तप्न स्युदेन् ज्यब बेत्। को़न्ज्योक्की ॱवङ्गी होक्ल गो घुक्न युङ्नी, खोङ्ल लेम्बु ॱलोक्प बेत्। 8 खोङ् ॱरेबु बेत्। ॱनी हीन्न अक्, को़न्ज्योक्की कल चीन डोये लेमु दी खोङ्गी गुरे दुक्स्यी दीनी ॱह घोव बेत्। 9 हुनी खोङ् फी़न्सुम् छङल थो़न्नी, हुनी झ्यीब दी खोङ्गी कल चीगेन् घयेत्ल फु तक्पे छी थर्व ॱनङ्गेल्ल खोङ् झ्युङ्न यो़क्केन् बेत्। 10 ॱनी को़न्ज्योक्की खोङ् मल्कीसेदेक्की लुसदङ् डीक्केन् छ्यो़प्पो़न् चो छ्यीस्स्योल को़न स्यक्न यो़क्केन् बेत्। 11 ॱनी हीगी ढीक्ल खीत्रङ्ल ङीक्की केच्च्य गज्येन् ॱस्यो़च्च्ये ॱनो़गुक्। ॱनी खीत्रङ्सो हुन्दो ॱह घोव घासील ॱसोङ्नी, खीत्रङ्ल हुन्दो ङीक्की धो़न् हीगो गन्दीक्म टो़त् ॱमीत् छुबेत्। 12 हजो़त् स्येन् खीत्रङ् चयेलमल थो़न् रेन् छरे छ्यक्चो़त् ॱलीत् छर बेत्। ॱनी हीन्न अक्, खीत्रङ् हुन्दो भीज नुम थुङ्गेन्दङ् छ्येत्मीत् ॱसुङ्रप्ल यो़प्पे ॱलोप्स गोनी यङ् खीत्रङ्ल क क आमनी ॱलोप् गो़ ॱस्यर्केल्ल ॱसोङ्दुक्। हुगो झ्यीनी खीत्रङ्ल गेम्बागी सम डस्सी टो़त् ॱमीत् छुबेत्। 13 गोनी ॱलप्न टो़च्च्येम भीज नुम थुङ्गेन्दङ् छ्येत्मीक्की मी धो़न् तीङ् सप्पोक्म ॱह मीत् घोगेन् बेत्। 14 हुगो डस्सीगी धो़न् हुगो गेम्बागी सगेङ्गी समदङ् छ्येत्मीत् बेत्। सङ् ङेन् ॱयुव पीक् ॱस्यीगेन्, ज्योङ्दर् थो़प्पे मीलरङ् हुन्दुक् झ्यीबे धो़न् टेत्न आक् घोगेन् बेत्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.