हीब्रु 4 - ल्होमीको़न्ज्योक्की मीस्सीर् थङ् ॱसो़से यी़ १-१३ 1 खोङ्गी थङ् ॱसो़से यी़ल ॱलीच्च्ये ॱनोङ्गेन् सीक्केन् हुगो हुन्दो ओक् हज्यरङ्गी ढीक्ल खुङ्देन् यो़क्केन् झ्यीनी, हज्यरङ् च्यङ्जो़त् झ्यीन दो़त् गोगेन् बेत्। स्येन् खीत्रङ् ॱसु उक् हुल ॱलीत् ॱमीत् छुब लेगेन् बेत्। 2 धङ्बु हुब घयेक्की ॱह घोव डस्सी हज्यरङ्गी इक् केच्च्य ॱनेम्बु ॱह घोव बेत्। ॱनी हुबे म दी रोरङ्सो़ घोवे केच्च्य दील छ्य मत् स्यक्पल हुबल हुगो ॱमत् फेम्ब बेत्। 3 ॱनी हज्यरङ् छ्य स्यक्न यो़क्केन् घयेत्रङ् खोङ्गी थङ् ॱसो़से यी़ल स्युक्च्ये ॱनोङ्गेन् बेत्। थङ् ॱसो़से यी़गी ढीक्ल को़न्ज्योक्की ॱस धङ् ॱनम् छ्यादु ची़त्न खोङ्गी ले घयेत् डुप्नी इक्, खोङ्गी हीन्दुक् ॱसुङ बेत्। हुबल ङ खोङ्डोक् लङ्नी, हुबे ढीक्ल ङे हीन्दुक् झ्यीबे ॱन झ्यीबेन्। हुब थङ् ॱसो़से ङे यी़ल नम्ल अक् स्युक्तु ॱमीत् ची़त् झ्यीबेन्। (ॱसुङ्रप्की गुल्लु ९५:११) 4 ॱङो़न् धङ्बी़ स्यक्पु दी़न् ॱसोङे ङीङ्गी ढीक्ल ॱसुङ्रप्ल हरुङ्द थो़ङ्गेन् बेत्। ले ढुप्नी, स्यक्पु दी़ङ्गी ङीन् दी को़न्ज्योक्की ले मत् जेप्प, स्युन थङ् ॱसो़ब बेत्। (छ्यारप् २:२) 5 ॱसुङ्रप्ल हरुङ्द हुगी ढीक्लरङ् हुब थङ् ॱसो़से ङे यी़ल नम्ल अक् स्युक्तु ॱमीत् ची़त् झ्यीबेन् सीर थो़ङ्गेन् बेत्। (ॱसुङ्रप्की गुल्लु ९५:११) 6 केच्च्य ॱनेम्बु स्येन् हुबे धङ्बुदु ॱएन्स्युक्ल ॱह घोव बेत्। ॱनी हुबे हुल मत् नेम्बल को़न्ज्योक्की थङ् ॱसो़से यी़ल हुब स्युक् ॱमत् छुब बेत्। ॱनी यङ् यरी स्युक् छुगेन् बेत् सीक्केन् हीगो दङ् हरीङ्गी ढीक्ल अक् ॱङो़न्ने यो़क्केन् बेत्। 7 हीगो झ्यीनी हज्यरङ् घयेत् एत् स्युक् छुज्ये यो़प्पल हरीङ् सीक्केङ्गी ङीन् ॱसम्ब हुगो को़न्ज्योक्की सो़न स्यक्प बेत्। ॱनी यङ् तीङ्ला दाऊद्गी खनी खोङ्गी ॱसुङे केच्च्य हीगो ङे एल्ला आक् कोक्न ढीबेन्। हरीङ् खीत्रङ्गी को़न्ज्योक्की ॱसुङ्स्येत् ॱह घोनी, हुनी मी गट्टक्पे ॱसीम् डस्सी खीत्रङ्गी ॱमत् खुर्च्यीत् सीर थो़ङ्गेन् बेत्। (ॱसुङ्रप्की गुल्लु ९५:७-८) 8 धङ्बु हुब घयेत् थङ् ॱसो़से यी़ ॱङो़सल् दील यहोशुगी ठीक्न ॱलीत् छुब हीन्न ॱनी, यङ् हज्यरङ् थङ् ॱसो़से यी़ल स्युक् छुबे ङीन् ॱयोङ्गी ढीक्ल को़न्ज्योक्की ॱमत् ॱसुङ् यो़ट्टो। 9 हीगो झ्यीनी को़न्ज्योक्की मीमङ् घयेत्ल थङ् ॱसो़स ङीत्तुवे ङीन् दी ॱङो़न्ने युङ्गेन् बेत्। 10 ॱनी हुगी थङ् ॱसो़से यी़ हुल ॱसु स्युक् छुगुक्क हुगोल को़न्ज्योक्की ॱङो़न् धङ्बु स्यक्पु दी़ङ्गी ङीन् दी ले मत् जेप्प, थङ् ॱसो़ब डस्सी युङ्गेन् बेत्। 11 हीगो झ्यीनी हज्यरङ् मीत् नेङ्गेल्ल ॱसोङ हुबे ॱमीदेल तेन ॱसु उक् युङ्ज्ये मीप्प, बोर टेत् च्येत्न हुगी थङ् ॱसो़से यी़ हुल स्युक् छुब झ्यीदोङ्ज्यीत्। 12 को़न्ज्योक्की ॱसुङ्रप् ॱसोम्बु धङ् ॱस्यीक् छ्यीम्मु यो़क्केन् बेत्। हुगो ढी पदङ् ख ॱङी च्येम्म कङ् धङ् छीमीक्ल ते छ्यो़क्केल्ले एक् ॱनोया झ्यीनी, हज्यरङ्गी ॱसीम्, ॱनो़रीक्, ॱनोक्सम् धङ् धेत्मो़ घयेत् इप्स्येङ् पीक्न तगेन् बेत्। 13 को़न्ज्योक्की घङ् छ्यादु ची़प्प घयेत् खोङ्गी ॱमीत् थोङ्सल गोङ् छुगेन् च्यीक्तङ् मीप्प बेत्। खोङ्गी तेन ॱनी, कुरीक् दोरी यो़प्प थोङ्गेन् बेत्। कोलीमी घयेक्की हीदु ॱसोस्सोरङ्गी घङ् झ्यीबे लेगी चीस्यी घयेत् खोङ्ल पु गो़ ॱस्यर्केन् बेत्। येशु छ्यो़प्पो़न् चो छ्यीस्स्यो हीम्ब १४-१६ 14 इगी तेङ् यी़ल ते झ्यो़न्न स्युगेन्, को़न्ज्योक्की ॱरेबु येशु, हज्यरङ्गी छ्यो़प्पो़न् चो छ्यीस्स्यो दी बेत्। हुगो झ्यीनी हज्यरङ्गी बेत् सीन्न सीक्केङ्गी छ्यो़लु हील थीरी देत्तोङ्ज्यीत्। 15 हज्यरङ्गी छ्यो़प्पो़न् चो छ्यीस्स्यो खोङ्गी हज्यरङ् ॱसीम् योक्याबे मील ॱङीङ्ज्यी जेत् छुगेन् बेत्। घन्ड हीन् सीन्न हज्यरङ्ल झ्युङे छो़त्लीन् डस्सी खोङ्ल आक् कुरीक् झ्युङ बेत्। ॱनी झ्युङ्न अक्, खोङ्गी दीक्प ॱस्युली मत् झ्यीब बेत्। 16 हीगो झ्यीनी हज्यरङ्ल ॱङीङ्ज्यी धङ् थुज्यी थोप्च्ये यो़प्पल, ॱनी दगु गो़बे कप्ल दगु युङ्ज्ये यो़प्पल हज्यरङ् थुज्यी छ्यीम्मु च्येम्मे को़न्ज्योक्की ॱवङ् च्येम्मे स्युडी ढुङ्दु ज्यीक्टक् मीप्प स्युदेन् ज्यक्तु डो। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.