हीब्रु 3 - ल्होमीख्रीष्ट् मोशाले छ्यीया हीम्ब १-६ 1 हुगो झ्यीनी इगी तेङ् यी़न स्युगेङ्गी भो़न यो़प्पे ङे पी़न्ज्या चङ्म घयेस्सो, येशुगी ढीक्ल ॱसम्ल तोङ्ज्यीत्। खोङ् हज्यरङ्गी बेत् सीन्न सीक्केङ्गी छ्यो़लुगी छ्यो़प्पो़न् चो छ्यीस्स्यो धङ् को़न्ज्योक्की को़न तङे कुजब दी बेत्। 2 मोशागी को़न्ज्योक्की ढोङ्बे नङ्दु ले तेम्बर् झ्यीब डस्सी खोङ्गी इक् खोङ् रोरङ् को़न तोङ्गेङ्गी ॱङाबे ले दी तेम्बर् जेप्प बेत्। 3 खीम् सोगेङ्गी सोबो़ल्ल खीम् दीले ॱल्हक्मागी तो़प्प युङ्गेन् बेत्। ॱनी हीगो डस्सी मोशाल युङे तो़प्पले येशुल युङे तो़प्प हुगो गज्येङ्गी छ्यीयाल ॱनेगेन् बेत्। 4 खीम् घङ्गो ओक् सोगेन् दी सोबो़न् युङ्गेन् बेत्। ॱनी हीगो डस्सी हीन घङ् यो़प्प हीगो जेङ् सोगेन् दी को़न्ज्योक् बेत्। 5 को़न्ज्योक्की स्युक्ला तो़न्न युङ्गेङ्गी केच्च्य घयेत् ॱङो़न्ने हीम्ब धक्च्येल मोशागी ॱस्येत्न को़न्ज्योक्की ढोङ्बे नङ्दु ॱयोक्पी़ ले तेम्बर् झ्यीन युङ बेत्। 6 ॱनी ख्रीष्ट् को़न्ज्योक्की ढोङ्बदु ॱवङ् च्येम्मे ॱरेबु बेत्। खोङ् घन्डल अक् तेम्बर् यो़क्केन् बेत्। ॱनी हज्यरङ्गी ॱआर् झ्यीन ङोम्रीन् छ्योक्पे रीगोल स्युक् थम थुक्ल थीरी देत्न ॱनी, हज्यरङ् को़न्ज्योक्की ढोङ्बे मीजङ् हीम्बल डोगेन् बेत्। छ्य मत् स्यक्पे डेबु ७-१९ 7 हीगी ढीक्ल ॱसुङ्रप्ल धम्बे थुगी हीन्दुक् ॱसुङ्न यो़क्केन् बेत्। हरीङ् खीत्रङ्गी को़न्ज्योक्की ॱसुङ्स्येत् ॱह घोनी, 8 ह खीत्रङ्गी पुबु ॱमुमी़ ॱसीम् डस्सी ॱमत् खुर्च्यीत्। घन्ड हीन् सीन्न धङ्बु हुबे पक्क झ्यङ्दङ्दु को़न्ज्योक्की डल लोङ्न खोङ् गुर् थेक्लो़त् यो़त् खोङ्ल छो़त्लीन् तये यङ्ल हुबे गट्टक्पे ॱसीम् खुर बेत्। 9 खीत्रङ्गी पुबु ॱमुमु घयेक्की पक्क झ्यङ्दङ्दु लोङ स्यीप्च्यु थुक् ङे झ्यीबे ले छ्यीम्मु घयेत् थोङ्नी इक्, हुबे हुगी यङ्ल ङल छो़त्लीन् तेज्युङ्। 10 हुगो झ्यीनी हुगी यङ्गी मी घयेत्ल ङ मक्का लङ्ज्युङ्। हुनी ङे हुबे ढीक्ल ङे हीन्दुक् झ्यीबेन्। म दीरङ् छीगङ् हुब घयेक्की ॱसीम् दी छ्यी़ डोगेन् बेत्। ङे ॱङाबे लेल हुबे आम्न मीत् झ्यीक्केन् बेत्। 11 हुन्दुक् झ्यीनी हुबल ङ खोङ्डोक् लङ्नी, हुबे ढीक्ल ङे हीन्दुक् झ्यीबे ॱन झ्यीबेन्। हुब घयेत् थङ् ॱसो़स, ङे यी़ल नम्ल अक् स्युक्तु ॱमीत् ची़त् झ्यीबेन्। (ॱसुङ्रप्की गुल्लु ९५:७-११) 12 पी़न्ज्यासो, च्यङ्जो़त् झ्यीन दो़च्च्यीत्। ॱसीम् अयेक्प धङ् ॱलो ॱमत् खीब झ्यीन ॱसोम्बु हीम्बे को़न्ज्योक् च्यानी भीन डोगेन् हुब डस्सी खीत्रङ् ॱसु उक् युङ्ज्ये मीप्प झ्यीज्यीत्। 13 बोर खीत्रङ् ॱसु उक् दीक्पे ॱयोङ्गोर्ल छ्यी़न गट्टक्पे ॱसीम् युङ्ज्ये मीप्पल खीत्रङ् नङ्दु ङीन् रीम फो़स्स्यी हरीङ्गी ङीन् सीर हुगो नम् यो़ यो़ थुक्ल च्यीक्तङ् च्यीक्ल ॱलोप्स्यीक् टो़त्री चीज्यीत्। 14 गोम ॱलो खीन युङ डस्सी हज्यरङ् मीजी भोरी ख्रीष्ट्ल ॱलो केन थीरी देत्न ॱनी, हज्यरङ् खोङ्दङ् दल कङ्ज्यीक्प यो़प्पल डोगेन् बेत्। 15 हीगी ढीक्ल फीच्च्य ॱसुङ्रप्ल नेन्। हरीङ् खीत्रङ्गी को़न्ज्योक्की ॱसुङ्स्येत् ॱह घोनी, धङ्बु खोङ्गी डल लोङे यङ्गी मी गट्टक्पे ॱसीम् डस्सी हुन्दो खीत्रङ्गी ॱमत् खुर्च्यीत् सीर थो़ङ्गेन् बेत्। (ॱसुङ्रप्की गुल्लु ९५:७-८) 16 को़न्ज्योक्की ॱसुङ्स्येत् ॱह घोनी इक्, खोङ्गी डल लोङ्गेङ्गी मी घयेत् दी ॱसु ॱसु बेक्क ॱनी? हुब मोशागी मीस्रे लुङ्बनी तो़न्न ठीक्न युङे मी घयेत् दी बेत्। 17 लोङ स्यीप्च्यु थुक् को़न्ज्योक्ल सोक्प ॱलोङ्गेन् घयेत् दी ॱसु ॱसु बेक्क ॱनी? हुब दीक्प झ्यीनी पक्क झ्यङ्दङ्दु ॱस्यी गो़ ॱस्यर घयेत् हुगो मेम्बेक्क ॱनी? 18 को़न्ज्योक्की ॱन झ्यीन थङ् ॱसो़से ङे यी़ल स्युक्तु ॱमीत् ची़त् सीन्न हीगो ॱसु ॱसुल झ्यीब बेक्क ॱनी? हीगो को़न्ज्योक्की खल मीत् नेङ्गेन् घयेत् हुबल झ्यीब मेम्बेक्क ॱनी? 19 हुब हुगी लुङ्बल स्युक्च्ये ॱमत् ॱनोङ दी हुबे छ्य मत् स्यक्पे छ्यीत्तु हीम्ब हज्यरङ्गी थोङ्गेन् बेत्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.