हीब्रु 2 - ल्होमी1 हुगो झ्यीनी थर्वे लम्नी हज्यरङ् छ्यी़ज्ये मीप्पल ॱरेबु च्यानी घोवे केच्च्य घयेत् दील गन्दीक्म नेन्न ॱसम् गोगेन् बेत्। 2 धङ्बु को़न्ज्योक्की खोङ् रोरङ्गी तेङ् यी़गी भङ्ज्येम्ब घयेक्की लम्नी घङ् ॱसुङे केच्च्य घयेत् दी धक्तेन् यो़क्केन् बेत्। हुगो झ्यीनी ॱसी़ हुगी कल ॱमत् चीयेक्क, ॱसी़ हुल ॱमत् ॱसम्बेक्क हुल ओ़बे छ्येप्प हुबल फोक्प बेत्। 3 हीगो झ्यीनी ॱनी दङ् हरीङ् हज्यरङ्गी ॱह घोवे नुक्मे चा छ्यीये थर्वे केच्च्यल हज्यरङ्गी आम्न मत् झ्यीन ॱनी, घन्दुक् दी झ्यीन हज्यरङ्ल फोक्केङ्गी छ्येप्प हुनी थर्केन्? हीगी थर्वे केच्च्य हीगो गोम ॱएन्स्युक्ल ॱसुङ्गेन् दी चोव ज्यीन्दक् खोङ् रोरङ् बेत्। ॱनी हीगो ॱह घोगेन् घयेक्की ङीत्ल धक्पर् हीम्ब ॱस्येत्न यो़क्केन् बेत्। 4 हुबे केच्च्य हीगो धक्तेन् हीन् धङ् मेल्ल को़न्ज्योक्की यीक् छ्यीम्मी़ लेगी ता, यम् छेम्मे ले, ॱस्यीक् छ्यीम्मी़ ले गज्येन् झ्यीत्तु ची़प्प धङ् खोङ्गी थुल यो़प्पल पीब धम्बे थुगी कबप् मी घयेत्ल खोङ्गी ॱनङ्न धक्पर् जेप्प बेत्। येशु कोलीमी घयेक्की पी़न् हीम्ब ५-१८ 5 ङीक्की सीक्केन् तीङ्ला युङ्गेङ्गी जम्बुलीङ् हुगो च्योङ्गेन् दी को़न्ज्योक्की खोङ् रोरङ्गी तेङ् यी़गी भङ्ज्येम्ब घयेत् मीत् स्योक्प, कोलीमी घयेत् स्योक्केन् बेत्। 6 हीगो धक्तेन् हीन् धङ् मेल्ल ॱसुङ्रप्ल थो़ङ्गेन् बेत्। नीज्यरङ्गी ढेन्सो़ झ्यीप्पल ओ़ब मीप्प कोलीमी हीन्दुक् झ्यीबल अक् नीज्यरङ्गी ॱसम्गेन् बेत्। नीज्यरङ्गी थुज्यी सीबल ओ़ब मीप्प कोलीमीगी भीज हीन्दुक् झ्यीबल अक् नीज्यरङ्गी सीगेन् बेत्। 7 कोलीमी ॱरीप्चो़त् च्यीक् तेङ् यी़गी भङ्ज्येम्ब घयेत्ले च्युङाल स्यक्प बेत्। हुनी यङ् नीज्यरङ्गी कोलीमी हुल तो़प्प तो़त्न तो़त्वङ्गी ओ़च्च्य झ्युङ बेत्। 8 ॱनी हुगी ॱवङ्गी होक्ल नीज्यरङ्गी कुरीक् स्यक्न यो़क्केन् बेत् सीर यो़क्केन् बेत्। (ॱसुङ्रप्की गुल्लु ८:४-६) हुगी ॱवङ्गी होक्ल मत् स्यक्प च्यीक्तङ् मीप्प बेत्। हुगी होक्ल जेङ् स्यक्न यो़क्केन् बेत्। हुन्दो ॱअल हज्यरङ्गी हुगी होक्ल यो़प्प दी ॱमीत् थोङ्गेन् बेत्। 9 ॱनी हीन्न अक्, म दी यङ् येशुगी ॱवङ्गी होक्ल यो़प्प दी हज्यरङ्गी हुन्दोरङ् थोङ्गीन् यो़क्केन् बेत्। को़न्ज्योक्की थुज्यीगी ढो़ल यो़प्पल मीरङ् रीदङ् रीगी धो़ल्ल खोङ् ढोङ् ढोङ् थुक्ल खोङ्ल दुक्स्यी गुर्च्ये यो़प्पल को़न्ज्योक्की तेङ् यी़गी भङ्ज्येम्ब घयेत्ले ॱरीप्चो़त् च्यीक् खोङ् च्युङाल स्यक्न युङ बेत्। हुनी यङ् खोङ्ल तो़प्प तो़त्न तो़त्वङ्गी ओ़च्च्य झ्युङ बेत्। 10 मी गज्येन् को़न्ज्योक्की भीज हीम्बल सो़न तो़त्वङ्गी ओ़च्च्य झ्यीस्सल ठीक्केन् दी खोङ् बेत्। हीन घङ् यो़प्प घयेत् हीगो जेङ् को़न्ज्योक्की खोङ् रोरङ्गी ढीक्ल धङ्बु छ्यादु ची़प्प बेत्। ॱनी येशु मी घयेक्की थर्वे लम्बाल युङ्ज्ये यो़प्पल खोङ्गी दुक्स्यी गुर हुगी लम्नी को़न्ज्योक्की फी़न्सुम् छङल सो़ब बेत्। 11 धक्पर् युङल सोगेन् येशुगी यप् धङ् धक्पर् युङल सो़ छरे मी घयेक्की यप् दी च्यीक् झ्यीनी, हुनी येशुगी हुब घयेत्ल पी़न्ज्या हीन् सीरल ङु ॱमीत् छगेन् बेत्। 12 हीगी ढीक्ल खोङ्गी को़न्ज्योक्ल ॱसुङ ॱसुङ्रप्ल थो़ङ्गेन् बेत्। ङे फम पी़न् घयेत्ल नीज्यरङ् ङोस्स्यीन् टो़क्केन्। छ्यो़ छोल जोम्न नीज्यरङ्ल ङ तो़त्लु पुगेन्। (ॱसुङ्रप्की गुल्लु २२:२२) 13 ॱनी हरुङ् ॱसुङ्रप्ल थो़ङ्गेन्। ङ खोङ्ल ॱलो केन दो़क्केन् सीर धङ् ॱनी यङ् तो़दे, को़न्ज्योक्की ङे लक्ल च्योन स्यक्पे भीज घयेत्ल सीर थो़ङ्गेन् बेत्। (यशैया ८:१७-१८) 14 को़न्ज्योक्की भीज हुब कोलीमी झ्यीनी, खोङ् हुब डस्सीरङ् कोलीमील कीन युङ बेत्। हीगो युङ्ज्ये दी ॱस्यीवे दक्पु दी़क्की चो हुगो खोङ् ढोङे ले हुगी खरप्ल तोङ्ज्येल बेत्। 15 ॱनी हीगो छ्युवक् मेम्ब, मीजी भोर्ल ॱस्यीवल ज्यीन ज्यीबे होक्ल ॱस्योर्न दो़क्केन् घयेत् तो़न्दु उक् खोङ् कीन युङ बेत्। 16 तेङ् यी़गी भङ्ज्येम्ब घयेक्की ढीक्ल मेम्ब, खोङ् हज्यरङ् अब्राहाम्गी ज्यी़त् घयेत्लरङ् दगु झ्यीत्तु कीन युङ बेत्। 17 ॱङीङ्ज्यी च्येम्म छ्यो़प्पो़न् चो छ्यीस्स्यो, को़न्ज्योक्की ले तेम्बर् झ्यीक्केन् धङ् खोङ् मीमङ्गी ढीक्ल दीक्पे ॱस्याब पु छुज्ये यो़प्पल खोङ्गी पी़न् हज्यरङ् डस्सीरङ् खोङ् झ्यीन झ्यो़न् गो़ ॱस्यर बेत्। 18 दीक्पल छ्यी़ज्येम ॱयेङ्गेन् घयेत्ल खोङ्गी दगु यङ्दीक् झ्यीत् छुगेन् बेत्। घन्ड हीन् सीन्न खोङ्ल आक् दीक्पल च्युगेङ्गी लेमी़ दुक्स्यी झ्युङ बेत्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.