हीब्रु 13 - ल्होमीको़न्ज्योक् थु गुवे छ्यलु झ्यीत् गोगेन् १-६ 1 खीत्रङ् पी़न्ज्या नङ्दु झ्यम्ब झ्यीत्री चीज्यीत्। 2 डोम्बुल खीत्रङ्गी ॱनेजङ् ॱयोर्च्ये दी ॱलो़ ॱमत् तोङ्ज्यीत्। हीगो डस्सी झ्यीक्केन् मी यरीगी ॱस्यो़च्च्ये मीप्पल तेङ् यी़गी भङ्ज्येम्बल ॱनेजङ् ॱयर्न च्यङ बेत्। 3 चो़ल्ल ॱस्योर्न यो़प्प घयेत्ल खीत्रङ्गी रङ् डस्सीरङ् हीन् ॱनो़ब ॱसम्न हुबल दगु झ्यीज्यीत्। ॱनी यङ् छ्यी मी घयेक्की दुक्प तङ्न यो़प्पे पी़न्ज्या घयेत्ल खीत्रङ्गी ङरङ्गी सी़ डस्सी च्यीक्प हीन् ॱनो़ब ॱसम्न हुबल दगु झ्यीज्यीत्। 4 समील खो़त्न यो़प्प घयेत् समी नङ्दु च्यो़न् मीप्प युङ झ्यीज्यीत्। ॱयोङ्दङ् ङीन समी नङ्दु धक्च्ये मीप्पल मत् सोज्यीत्। छ्ये ज्युक्केङ्गी ढङ्ल को़न्ज्योक्की छ्येप्प को़गेन् बेत्। 5 खीत्रङ्गी ॱसीम् दी पयीसक्की लोप्की ॱवङ्ल ॱमत् तोङ्ज्यीत्। खीत्रङ्ल घङ् यो़प्प दील ॱलो दीय झ्यीज्यीत्। को़न्ज्योक्की हीन्दुक् ॱसुङ थो़ङ्गेन् बेत्। ङ नम्ल अक् रङ् ॱलो़ ॱमीत् तोङ्। रङ् च्यम् मीत् स्योक्। (ठीम्लु ३१:६) 6 हीगो झ्यीनी हज्यरङ्ल ॱआर् ॱङीत्न, चोव ज्यीन्दक् ङे ज्यप्तक्ल यो़क्केन् झ्यीनी, ङल ज्यीब घन्ड अक् मीन्दुक्। ङल ॱसु दीगी घन्डे च्यो़न् तोङ् छुगेन्? सीन्न हज्यरङ्गी सीर् छुगेन् बेत्। (ॱसुङ्रप्की गुल्लु ११८:६) 7 एल्ला खीत्रङ्ल को़न्ज्योक्की केच्च्य ॱस्यो़क्केन् खीत्रङ्गी गोयो़प्प घयेत् ढेन्सो़ झ्यीज्यीत्। हुबे छ्यलु धङ् हुबे घन्दुक् झ्यीन रोरङ्सो़ मीजी भोर्ल छ्य तेम्बर् स्यक्न युङ बेक्क हुगी ॱमीदेल तेन दो़च्च्यीत्। 8 येशु ख्रीष्ट् दङ्, हुनी हरीङ् इङ् धी़ ज्यी़न्दु ज्युरुव मीप्प यो़क्केन् बेत्। 9 मीत् डीक्केङ्गी ॱलोप्स यो़च्चो़त् ज्यबल नेन्न खीत्रङ् ॱमत् छ्यी़ज्यीत्। समे ढीक्ल यो़प्पे क घयेत्ल चीन युङे लम्नी हज्यरङ् डम्दु मीत् डोगेन् बेत्। हज्यरङ् डम्दु दील को़न्ज्योक्की थुज्यी ॱनङ्नी क, हस्सो़त् युङ्गेन् बेत्। हुन्दुक् झ्यीबे कल चीन युङे मी घयेत्ल हुगी फेन् ॱमत् थोब बेत्। 10 हज्यरङ्ल छ्यो़प्प पुस च्यीक् यो़क्केन् बेत्। ॱनी हज्यरङ्गी छ्यो़प्प पुसे हुगी छ्यो़प्प दीनी हीगी घुर्की छ्यो़गङ्ल छ्यो़प्प पुगेन् यहुदीगी छ्यो़प्पो़न् घयेत्ल सज्येमे ॱहक् मीप्प बेत्। 11 हुबे छ्यो़प्पो़न् चो छ्यीस्स्यो दीगी ॱरोक् पुबे ठक् दी घुर्की छ्यो़गङ्गी कोट्ट चङ्स्यो दील खुर्न मीमङ्गी दीक्पे ॱस्याबल तोर्केन् बेत्। हुनी ॱरोक् मदुम्ब दी मीमङ्गी दीरनी छ्यील तो़न्न मील जेङ् ॱहेक्केन् बेत्। 12 ॱनी हीगो डस्सील क येशुगी खोङ् रोरङ्गी ठक्की मीमङ् धक्पर् युङ सोज्येल सार्की च्यारीगी गोच्चेक्की छ्यीदु दुक्स्यी गुर्न ढोङ बेत्। 13 हुगो डस्सी हज्यरङ् अङ् खोङ्दङ् छ्येत्मीत् दीरनी छ्यील थो़न्न हज्यरङ्ल अयेक्प झ्यीब घयेत् दी हुदु गुर्तु डो। 14 घन्ड हीन् सीन्न हज्यरङ्ल हीदु फुगी दो़स्से सार् मीप्प बेत्। हज्यरङ् इगी तेङ् यी़गी सार्ल ॱलीच्च्ये यो़प्पल रीगो झ्यीक्केन् बेत्। 15 को़न्ज्योक्ल येशुगी लम्नी हज्यरङ्गी खनी छीगङ् तो़प्पे छ्यो़प्प पु पुब झ्यीदोङ्ज्यीत्। खोङ् चोव ज्यीन्दक् दीरङ् बेत् सीन्न तो़प्पे ले हुगो हज्यरङ्गी खनी थो़म्बे डेबु दी बेत्। 16 खीत्रङ्गी गये ले झ्यीक्कीन् यो़प्प हुगो ॱलो़ ॱमत् तोङ, हुन्दुक् दीरङ् झ्यीज्यीत्। ॱसुल गो़बे खोज्येत् दुक्क हुल खीत्रङ् यो़प्प च्येम्म दीगी टो़च्च्यीत्। हीन्दुक् झ्यीबे लेमी़ छ्यो़प्पल को़न्ज्योक् थु गुव युङ्गेन् बेत्। 17 खीत्रङ् हुगी गो दी़क्केन् गोयो़प्प घयेक्की खल नेल्ल हुबे ॱवङ्गी होक्ल दो़च्च्यीत्। हुबे को़न्ज्योक्ल ची पु गोगो़त् ॱनो़ब ॱसम्न खीत्रङ्ल भच्ची झ्यीक्केन् बेत्। हुबल घी़रीम थो़न्दु ॱमत् ची़प्प, ॱसीम् गव झ्यीन हुगी गोयो़प्पे ले दी झ्यीत् छुज्ये यो़प्पल खीत्रङ् हुबे खल नेन्ज्यीत्। स्येन् खीत्रङ्ल फेन्दो घन्ड अक् मीत् युङ्गेन् बेत्। 18 ङीक्की ढीक्ल ॱसुव तोप्रो झ्यीज्यीत्। ङीक्की मीजील छीगङ् ढङ्बु झ्यीच्च्ये ॱनो़बे ॱसीम् च्यङ्ज्यङ् खुको़र्त्। हुगो झ्यीनी ङीत्ल ॱनोङ् मीत् लङ ॱसीम् सङ्बु ॱङीत्न यो़त्। हीगो गन्दीय हीम्बे देङ्जो़त् ङीत्ल यो़त्। 19 ङ खीत्रङ् च्याल ज्योक्सी युङ् छुज्ये यो़प्पल हरुङ् गन्दीक्म ॱसुव तोप्रो झ्यी सीन्न स्युव ज्यक्केन्। 20 लुक् घयेत्ल तगेन् लुक्चीब छ्यीम्मु हज्यरङ्गी चोव ज्यीन्दक् येशु ढोङ्नरनी ॱसोम्बुल स्यीव दीव ॱनङ्गेन् को़न्ज्योक्की ॱलोङ बेत्। ॱनी येशु ठक् थो़न्न ढोङे धो़न् दी फु तक्पे कगो़त् धम्स्यक् स्योक्पे ढीक्ल बेत्। 21 को़न्ज्योक्की थुल यो़प्पे लेमु घयेत् झ्यीत् छुज्ये यो़प्पल खीत्रङ्ल गो़बे खोज्येत् घयेत् थोप्च्ये यो़प्प तोङ्। खोङ् थु गुवे लेमु घयेत् येशु ख्रीष्ट्की लम्नी हज्यरङ्गी ॱसीम्ल डुप्च्ये यो़प्प तोङ्। ख्रीष्ट्ल धी़ नम ज्यी़न्दु तो़प्प युङ् युङ युङ्ज्ये यो़प्प स्योक्च्यीत्। आमेन्। 22 पी़न्ज्यासो, हीगो ङे खीत्रङ्ल ॱलोप्स्यीक् थोबे ढीक्ल ढीबे यीगी तुङेत्मु च्यीक् हीनो। हील खीत्रङ् धु च्यङ्न नेन् सीन्न सीक्को़दो। 23 हज्यरङ्गी पी़न्ज्या तीमोथी चो़न्नी तङ्दुक्। हीगो खीत्रङ्ल ॱस्यो़क्केन् हीनो। तीमोथी ङ च्याल ज्योक्पु युङ्न ॱनी, तीमोथी इक् ठीक्न खीत्रङ् च्याल ॱलीत् योङ्। 24 उन यो़क्केन् गो दी़क्केन् गोयो़प्प घयेत् धङ् को़न्ज्योक्की मी चङ्म घयेत्ल ङे छ्यक्सुम् थेमु यो़दो। ॱनी इटालीगी लुङ्बे पी़न्ज्या घयेक्की इक् खीत्रङ्ल छ्यक्सुम् थेमु यो़दो सीगुगो। 25 खोङ्गी थुज्यी खीत्रङ् घयेत्ल थोप् थोब युङ्ज्ये यो़प्प स्योक्च्यीत्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.