हीब्रु 12 - ल्होमीको़न्ज्योक्की छर्की च्येप्पल नेन् गोगेन् १-१३ 1 हज्यरङ्ल छ्य स्योक्ली़ ॱमीदे तो़ङ्गेन् घयेत् म दीरङ् तीक् खीरी गज्येन् यो़क्केन् बेत्। हुगो झ्यीनी हज्यरङ्ल ॱनो़ङ्गेङ्गी खेद घयेत् धङ् येक्योक्ल युङ्गेङ्गी दीक्प घयेत् फङ्न हज्यरङ् डोस्से लम् दील ज्येबर् थो़न्ज्ये यो़प्पल धु च्यङ्न ज्युदोङ्ज्यीत्। 2 छ्य स्योक्केन् घयेक्की लम्बा ॱङो़म फी़न्सुम् छङल सोगेन् खोङ् येशुल हज्यरङ्गी ॱसीम्बे फोरी तेन ज्युदोङ्ज्यीत्। खोङ्ल दुक्स्यी छ्यीम्मु नोङे यङ्ल खोङ्गी इक् तीङ्मागी ॱसीम् गव युङ्गेन् दील तेनी, कुरुस्तु ॱम पबल तव मत् झ्यीब, हुगो गुर बेत्। हुन्दो खोङ् को़न्ज्योक्की ॱवङ् च्येम्मे स्युडीगी ॱये छ्योन स्युन यो़क्केन् बेत्। 3 खीत्रङ् थङ् छ्येत्न ॱअयु छ्यक्च्ये मीप्पे ढीक्ल खोङ्ल तो़ज्यीत्। दीक्च्येन् घयेक्की खोङ्ल घन्दुक्मे ड चो़त्न आक्, खोङ्गी हुगो गुर बेत्। 4 खीत्रङ्गी हुन्दो दीक्पदङ् ठक्तो़न् ॱमदो़र्रङ् युङ्सोङ् ॱसम्ब ॱमत् थुक्प बेत्। 5 भीजल पबे ॱलोप्स्यीक् टो़क्केन् डस्सीगी ॱसुङ्रप् हीगो खीत्रङ्गी टोक् ज्यीप्न खुर हीम्ब न? ङे भु रङ्ल चोव ज्यीन्दक्की छर्की च्येत्न ॱनी, हुगो रङ्गी घन्ड अक् मेम्बेत् ॱनो़ब ॱमत् ॱसम्ज्यीत्। खोङ्गी रङ्ल लप्स्य तङ्न ॱनी, हुल रङ् ॱअयु छ्यक्प मत् झ्यीज्यीत्। 6 घन्ड हीन् सीन्न चोव ज्यीन्दक्की मी ॱसुल झ्यम्ब जेक्को़दङ् हुगोल छर्की च्यो़क्केन् बेत्। खोङ्गी ॱसु रोरङ्गी भीजल सो़न यो़दङ् हुगोल बेङ्गेन् बेत् सीर थो़ङ्गेन् बेत्। (पीस्येत् ३:११-१२) 7 खीत्रङ्ल नोङे दुक्स्यी हुगो खीत्रङ् छर्की च्यो़च्च्येल बेत्। खीत्रङ्ल को़न्ज्योक्की रोरङ्गी भीज हीम्ब ॱसम्गेन् बेत्। ॱनी हज्यरङ् हीगी पबे एक् रोरङ्गी भीजल छर्की ॱमीत् च्यो़क्केन् दी ॱसु यो़प्प बेक्क? 8 को़न्ज्योक्की खोङ् रोरङ्गी भीज घयेत्ल छर्की च्यो़क्केन् बेत्। ॱनी हीगो डस्सी छर्की ॱमत् च्येत्न ॱनी, खीत्रङ् नली डस्सी धम्जीक् मीप्पल डोगेन् बेत्। 9 ॱनी हरुङ् हीन यो़क्केन् हज्यरङ्गी हीगी पबे छर्की च्येप्पल आक् त, नेन्न युङ्गो़त्न ॱनी, छी ॱनङ्गेन् इगीगी यप्की छर्की च्येप्पल ॱसुम्ब हुले मङा नेन्न खोङ्गी ॱवङ्गी होक्ल दो़त् गोगेन् बेत्। 10 हीन यो़क्केन् हज्यरङ्गी हीगी पबे हज्यरङ्ल धोबा च्यीक् थुक्की ढीक्लरङ् रोरङ्गी घङ् ॱस्यीबे छर्की च्यीक् च्यो़क्केन् बेत्। ॱनी इगीगी यप्की हीगो डस्सी मेम्ब, खोङ्गी हज्यरङ्ल छर्की च्यो़क्केन् हुगो हज्यरङ्ल फेन्दो युङे ढीक्ल खोङ् धक्पर् यो़प्प डस्सी हज्यरङ् अङ् युङ् छुज्ये यो़प्पल बेत्। 11 खोङ्गी हज्यरङ्ल छर्की च्यो़प्पे यङ्ल गोम दी हुगो ॱसीम् ॱमत् कीब दुक्स्यी नोङ्गेन् बेत्। ॱनी तीङ्ला हुल ज्योङ्दर् थो़त्नी, हुगी डेबु दील ॱसीम् दीव धङ् ढङ्बु युङ्गेन् बेत्। 12 खीत्रङ्गी कङ्ब लक्पल ङेस्यीक्प लङ्दु ॱमत् ची़प्प, खेत् गेन्ज्यीत्। 13 खीत्रङ् ॱहेन्ज्योक् दन्ज्योक्ल मत् डोव, थर्वे लम् दील ॱसीरी ॱसीत्त डो गोगेन् बेत्। हुनी क थेङ्गोक्परङ् हीन्न अक्, यङ् छी ॱमीत् पुर, डो छुब युङ्गेन् बेत्। को़न्ज्योक्ल ॱअप्स्यी़त् मीप्प मत् झ्यीज्यीत् १४-२९ 14 खीत्रङ् मी छङ्म थम्ज्येत्तङ् छ्यम्ब डीक्प झ्यीन दो़त् छुज्ये यो़प्प धङ् खीत्रङ्गी मीजीगी छ्यलुल धक्पर् युङ् छुब झ्यीज्यीत्। धक्पर् मत् युङे मी ॱसी़ इक् चोव ज्यीन्दक् ज्या ॱमीत् छुगेन् बेत्। 15 खीत्रङ् ॱसु उक् को़न्ज्योक्की थुज्यीदङ् मत् ढेब युङ्ज्येल धङ् मत् स्यीम्बे इबीक्की केच्च्य खनी थो़न्ज्ये मीप्पे ढीक्ल च्यङ्जो़त् झ्यीन दो़च्च्यीत्। मत् स्यीम्बे इबीक्की केच्च्य थो़न्न ॱनी, ठुक्चुप् धङ् मी गज्येन् ॱसीम् धक्पर् मीप्पल डोगेन् बेत्। 16 ॱनी हरुङ् ॱसु उक् छ्ये ज्युक्केन् युङ्ज्ये मीप्पल धङ् भु गेन्स्योगी ॱहक् समदङ् ज्यप्न सगेन् छ्यो़सीम् मीप्पे मी एसाब् डस्सी खीत्रङ् ॱसु उक् युङ्ज्ये मीप्पल च्यङ्जो़त् झ्यीन दो़च्च्यीत्। 17 हुगी एसाब् हुगी रोरङ्ल थोप्केङ्गी ॱहक् च्येम्मे ॱमेल्लम् दी स्युदु तीङ्ला रोरङ्गी पब च्याल फीन्नी, हुगो ॱमत् थोब बेत्। हुनी ॱमीक्च्यु तङ्न घजो़त् स्यी़न अक्, रोरङ्गी हुगी ले दी ज्युर् ॱमत् छुबल ॱमत् थोब बेत्। हीगो खीत्रङ्ल ॱस्यो़च्च्ये यो़क्केन् बेत्। 18 खीत्रङ् को़न्ज्योक् च्याल युङे लेमु दी धङ्बु इस्राएली घयेत् जम्बुलीङ् हीगी सीनै लदोक्तु को़न्ज्योक् च्याल युङ डस्सी मेम्बेत्। हुगी लदोक् हुदु मीरेक् छ्यीम्मु बर, मेन्नक् ॱनक् थीङीय धङ् भुयुक् युङ बेत्। 19 ॱनी हुदु रच्च्योक्की कङ्लीङ्गी केत् धङ् को़न्ज्योक्की ॱसुङ्स्येत् थो़म्ब बेत्। ॱनी हुगी ॱसुङ्गेत् दी इस्राएली घयेक्की नेन् ॱमत् छुब, हुबे ह ङीत्ल उजो़त् च्यीक्कीरङ् युङेत् सीन्न स्युदेन् ज्यब बेत्। 20 को़न्ज्योक्की कगो़त्ल हुगी लदोक् हुल रेक्केन् दी ॱसीम्ज्येर्रङ् हीन्, घन्डरङ् हीन्न अक्, हुगो दोर्तुङ् बेन्न ॱसो़त् गोगेन् बेत् सीरे कगो़त् दील हुबे नेन् ॱमत् छुब बेत्। (थो़म्ब १९:१२-१३) 21 हुबे हुदु घङ् झ्युङ थोङ घयेत् दी ज्यीसी झ्यीनी, मोशागी इक् ङ ज्यीक्टक्की दर्कुक् झ्यीब बेत्। (ठीम्लु ९:१९) 22 खीत्रङ् हुगो डस्सील युङ मेम्ब, सीयोन्गी लदोक् ॱसोम्बु हीम्बे को़न्ज्योक्की सार् तेङ् यी़गी यरुशलेम्ल युङ्न यो़क्केन् बेत्। ॱनी उन तेङ् यी़गी भङ्ज्येम्ब छेत्मीत् ढङ्मीत् धङ् 23 तेङ् यी़गी थोल मीङ् ढीन यो़क्केन् को़न्ज्योक्की भु गेन्स्यो घयेत् छोसे गव कीप्प च्येम्मे छ्यो़ छो यो़क्केन् बेत्। ॱनी हरुङ् उन कोलीमी घयेत्ल ठीम् च्यो़क्केन् को़न्ज्योक्, ॱनी फी़न्सुम् छङल थो़न् छरे मी ढङ्बु ॱस्यीनर घयेत्, 24 ॱनी कगो़त् धम्स्यक् ॱसम्बे ॱअर्की मी येशु धङ् ॱनी डीक्च्या जेप्पे ढीक्ल थो़म्बे खोङ्गी ठक् आक् उन यो़क्केन् बेत्। हबील्की ठक्की ङेङ्गु स्यक्पे तम् ॱस्येप्प बेत्। ॱनी खोङ्गी ठक्की हुले गागी तम् ॱस्यो़क्केन् बेत्। 25 च्यङ् थोन दो़च्च्यीत्। को़न्ज्योक्की घन्ड ॱसुङ्गो़दङ् हुल खीत्रङ् ॱअप्स्यी़त् मीप्प मत् झ्यीज्यीत्। धङ्बु इस्राएली घयेत्ल खोङ्गी सीनै लदोक्तु ॱसुङे ॱसुङ्स्येत्ल हुबे ॱअप्स्यी़त् मत् झ्यीबल हुब ॱमत् थर बेत्। ॱनी हुब अक् त ॱमत् थरे ॱनी, हुन्दो तेङ् यी़नी मल्ल ॱसुङ्गेन् येशुल हज्यरङ्गी तक् तो़न्न ॱसुम्ब घन्दुक् झ्यीन थर्केन्? 26 धङ्बु खोङ्गी ॱसुङ्गेक्की ॱस दीरङ् भीर् भीर् झ्यीब बेत्। ॱनी हुन्दो खोङ्गी ॱसुङ्न यो़प्पल ङ हुन्दो फीच्च्य यङ् लेन् च्यीक् ॱस जम्बुलीङ् हीगो छ्युवक् मेम्ब, इगी तेङ् यी़ थम्ज्येत् टुक्केन् सीर थो़ङ्गेन् बेत्। (हाग्गै २:६) 27 ॱनी हीगी फीच्च्य यङ् लेन् च्यीक् सीक्केन् हीगो खोङ्गी छ्यादु ची़प्प घयेत् दी कुरीक् टुन तेनी, योक् योक् झ्यीक्केन् घयेत् दी पुर् तोङ्गेन् बेत्। ॱनी यङ् योक् योक् मीत् झ्यीक्केन् घयेत् दी फुगी स्योक्केन् बेत्। 28-29 ॱनी हज्यरङ् योक् योक् ठी़त् ठी़त् मीत् झ्यीक्केङ्गी ज्यागक्की मीस्सीर्ल झ्युङ्नी, को़न्ज्योक्ल हज्यरङ्गी थु छ्यी पुदोङ्ज्यीत्। हज्यरङ्गी को़न्ज्योक् मीरेक् छ्यीम्मु बरदङ् छ्येत्मीत् यो़क्केन् बेत्। हुगो झ्यीनी खोङ्ल ज्यीब खुर्न तो़त्न खोङ् थु गुवे धेप्प झ्यीदोङ्ज्यीत्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.