हीब्रु 11 - ल्होमीछ्य स्योक्ली़ ॱमीदे १-४० 1 हज्यरङ्गी छ्य दी स्यक्नी क, हस्सो़त् हज्यरङ्ल यो़प्पे रीगोगी केच्च्य दी खुङ्देन् हीम्ब ॱह घो छुगेन् बेत्। ॱनी ॱमीक्की ॱमीत् थोङ्गेङ्गी रीगोगी केच्च्य घयेत् दी इक् खुङ्देन् हीम्बे देङ्जो़त् युङ्गेन् बेत्। 2 छ्य स्यक्पे लम्नी क धङ्बी़ पुबु ॱमुमु घयेत्ल अक् को़न्ज्योक्की खोङ् थु गुवे केच्च्य ॱस्येप्प बेत्। 3 को़न्ज्योक्की ॱसुङ्स्येक्की ॱस धङ् ॱनम् हीगो छ्यादु ची़प्प बेत्। ॱनी हीन यो़क्केन् हज्यरङ्गी ॱमीक्की थोङ्गेन् घयेत् हीगो, ॱमीत् थोङ्गेन् घन्ड अक् मीप्पनी सो़ब बेत्। ॱनी हीगो हज्यरङ्गी छ्य स्यक्पे लम्नी ॱह घो छुगेन् बेत्। 4 कयीन्गी छ्यो़प्प पुब दीले हबील्की छ्यो़प्प पुब दी को़न्ज्योक्की दम्बा झ्यीन हुगो खोङ्गी स्यागी स्यीन खोङ् थु गुवे केच्च्य ॱस्येप्प बेत्। घन्ड हीन् सीन्न हबील्की रोरङ्गी छ्य स्यक्पे लम्नी पुब हीङ्गो़प्प बेत्। ॱनी हबील् ॱनम्बर् धक्पल थो़न्ज्ये दी इक् रोगी छ्य स्यक्पे लम्नी थो़म्ब बेत्। ॱनी हबील् ॱस्यीन खुर्न आक्, रोगी छ्य स्यक्पे लुस हुगी हज्यरङ्ल ॱमीदे तो़न्न यो़क्केन् बेत्। 5 छ्य स्यक्पे लम्नी धङ्बु हनोक् ॱमत् ॱस्यीयलरङ् को़न्ज्योक्की खोङ् झ्यीस्सल ठीक्नर बेत्। ॱनी को़न्ज्योक्की ठीक्नर झ्यीनी, हनोक् हीदु ॱसुल आक् ॱमत् ॱङीब बेत्। ॱनी हुले एल्ला को़न्ज्योक् हनोक्ल थु गुनी, हुगी थु गुवे केच्च्य हुगो हनोक्ल ॱस्येप्प हीङ्गो़प्प बेत्। 6 छ्य स्यक्पे लम्नी मेन्द, को़न्ज्योक् थु मीत् गुगेन् बेत्। हीगो झ्यीनी को़न्ज्योक्की ढुङ्दु ॱसु युङ्गो़दङ् हुगी को़न्ज्योक् ॱङो़न्ने यो़प्प दील छ्य स्योक् गोगेन् बेत्। हुनी खोङ् चर च्येत्न युङ्गेन् घयेत्ल खोङ्गी लेन् ॱनङ्गेन् बेत् ॱनो़ब हीम्बल अक् हुगी छ्य स्योक् गोगेन् बेत्। 7 नुहल को़न्ज्योक्की एल्ला मत् युङे केच्च्य च्यीक् ॱस्येत्नी, हुनी नुह को़न्ज्योक्ल ज्यीब खुर्न रोरङ्गी मीजङ् घयेत् थर्च्ये यो़प्पल ढु छ्यीम्मु च्यीक् सो़ब बेत्। ॱनी हीगो नुहे छ्य स्यक्पे लम्नी सो़ब बेत्। हीगी छ्य स्यक्पे लेमु हीनी हुगी यङ्गी जम्बुलीङ्गी मी घयेत्ल ठीम् च्येत्न छ्येप्प केब बेत्। छ्य स्यक्पे लम्नी ॱनम्बर् धक्पल थो़ङ्गेङ्गी थर्वे फक् थोप्केन् च्यीक् नुह झ्युङ बेत्। 8 को़न्ज्योक्की अब्राहाम् भो़न रङ्ल ङे लुङ्ब च्यीक् टेत् योङ्। ॱनी रङ् हुल ज्युक् सीन्न ॱसुङ बेत्। ॱनी हुगी ॱसने दी घनल यो़प्प हुगो ॱस्यो़च्च्ये मीत्न अक्, हुल नेन्न छ्य स्यक्पे लम्नी अब्राहाम् हुनी थो़न्न फीम्ब बेत्। 9 हुनी हुगी छ्यो़त्तुम्गी लुङ्ब दील ॱलीत्नी, हुदु छ्योबादङ् छ्येत्मीत् झ्यीन छ्य स्यक्न घुर् ज्यप्न देप्प बेत्। को़न्ज्योक्की हुगी छ्यो़त्तुम्गी केच्च्य हुगो इसहाक् धङ् याकुब्ल अक् डोगेन् बेत्। ॱनी हुब अक् हुदु हुन्दुक् झ्यीनरङ् देप्प बेत्। 10 अब्राहाम् हुदु दो़च्च्ये दी को़न्ज्योक्की ढो़ल यो़प्पल सो़बे धी़ ज्यी़न्दु दो़क्केङ्गी ॱसप्तेन् तीङे सार्ल दो़च्च्ये युङ्गेन् बेत् ॱनो़बल रीगो झ्यीन अब्राहाम् हुदु छ्योबा डस्सी झ्युङ्न दो़त् गो़ ॱस्यर्न आक्, देप्प बेत्। 11 ॱनी हुदु साराल भीज कीये येम् यो़ छर्नी इक्, छ्य स्यक्पे लम् दीनी रोल भीज युङ्ज्ये यो़प्पे ॱस्यीक् थोब बेत्। घन्ड हीन् सीन्न हुगी छ्यो़त्तुम्गी केच्च्य ॱसुङ्गेन् खोङ् ज्युरुव मीप्प, तेम्बर् च्येम्म बेत् ॱनो़न ॱसम्ब बेत्। 12 ॱनी अब्राहाम् ॱस्यीक् मीप्प गेत्तुक्ल ॱसोङे मी हीन्न अक्, खोङ् च्यीगी च्यीक्नी ज्यी़त् छेत्मीत् ढङ्मीत् ॱनम्गी कर्म धङ् छ्यु ज्यम्जो छ्यीम्मी़ छीगे झ्यीम डस्सी फीन युङ बेत्। 13 हुब घयेक्की रोरङ्सो नम् ॱस्यी ॱस्यी थुक्ल छ्य स्यक्न युङ बेत्। हुब घयेत्ल को़न्ज्योक्की छ्यो़त्तुम् जेप्प घयेत् दी हुबे ङोल मत् युङ्न अक्, पीगीनी छुल्ल युङ दी हुबे ॱसीम्बे ॱमीक्की थोङ्नी, हुल ॱसुमी़ झ्यीब डस्सी झ्यीन गुब बेत्। हुब घयेक्की रोरङ्सो हीगी जम्बुलीङ् हीदु ङीत् लुङ्ब ॱयोङ्गी मी छ्योबा हीन् सीन्न झ्यीब बेत्। 14 हुन्दुक् सीक्केङ्गी मी घयेत् रोरङ्सो़ फुगी फयु ढेम्ब झ्यीक्केङ्गी मी हीम्ब हज्यरङ्गी ॱह घो छुगेन् बेत्। 15 हुब रोरङ्सो गोम थो़न्न युङ्से लुङ्ब दीलरङ् ढेन्न लोक्च्ये ॱनो़न ॱनी, लोक् छुगेन् बेत्। 16 ॱनी हुगो मेम्ब, रोसो़ हुले त गा तेङ् यी़गी लुङ्ब ढेम्ब छ्यीया झ्यीन देप्प बेत्। हुगो झ्यीनी को़न्ज्योक्की इगीन हुब दो़स्स सार् च्यीक् सो़न ठोक्क झ्यीन यो़क्केन् बेत्। ॱनी हुबे को़न्ज्योक्ल ङीक्की को़न्ज्योक् हीन् झ्यीबल खोङ् मक्का मीत् लङ्गेन् बेत्। 17 को़न्ज्योक्की अब्राहाम्ल छो़त्लीन् तये यङ्ल छ्य स्यक्पे लम्नी इसहाक् ॱरोक्ल पु छ्योक् झ्यीब बेत्। हुगो एल्ला को़न्ज्योक्की अब्राहाम्ल छ्यो़त्तुम् जेत्न ॱनङे भु दी हीङ्गो़प्प बेत्। ॱनी हुगी भु च्यीगी च्यीक्पु दी अब्राहाम्गी छ्यो़प्पल पु छ्योक् झ्यीब बेत्। 18 हीगी छ्यो़त्तुम्गी केच्च्य दील को़न्ज्योक्की अब्राहाम्ल रङ्गी ज्यी़त् घयेत् इसहाक्की होक्नीरङ् क फीन युङ्गेन् बेत् सीन्न ॱसुङ हीङ्गो़प्प बेत्। (छ्यारप् २१:१२) 19 हुगी यङ्ल अब्राहाम्गी ॱनो़बल इसहाक् ॱस्यीन खुर्न आक्, को़न्ज्योक्की ॱसोम्बुल ॱलोङ् छुगेन् बेत् ॱनो़बे ॱसम्ल खुर बेत्। ॱनी हीगो डस्सी दीरङ् इसहाक् ॱस्यीनरदङ् छ्येत्मीत्नी ॱसोम्बुल लोङ डस्सी झ्युङ बेत्। 20 हुनी तीङ्ला इसहाक्की रोरङ्गी भु याकुब् धङ् एसाब्ल रीदङ् रील छ्य स्यक्पे लम्नी तीङ्मागी ढीक्ल ॱमेल्लम् स्यी़न टेप्प बेत्। 21 हुनी याकुब् गेङ्गेल्ल ॱसोङ्न ॱस्यीज्येम ॱयेङे यङ्ल युसुफ्की भु ॱङीबु दील रीदङ् रील छ्य स्यक्पे लम्नी ॱमेल्लम् स्यी़न टेप्प बेत्। हुनी याकुब्गी रोरङ्गी तोक्लङ्ल ठे गेन्न को़न्ज्योक्ल छ्यक् छेब बेत्। 22 हुनी तीङ्ला युसुफ् नेस्सो स्युक् जोबे थल ॱलीत्नी, रोरङ्गी कुबुर्की ढीक्ल इस्राएली घयेत् मीस्रनी थो़न्न डोये यङ्ल घन्ड झ्यीत् गोगेन् बेक्क हुगी ढीक्ल छ्य स्यक्पे लम्नी केच्च्य ॱङान स्यक्प बेत्। 23 मोशागी आम पबे एक् मोशा कीजो़त्ल ॱङीङ् ज्यीस्सी थोङ्नी मीस्रे ज्याबी़ कल ॱमत् चीय, हुल ज्यीब मत् झ्यीब, छ्य स्यक्पे लम्नी दव ॱसुम् थुक् बेन स्यक्प बेत्। 24 तीङ्ला मोशा गर्च ॱलीत्नी, रोरङ् फारोहागी भुमी़ भु बेत् सीरे थोप् दी इक् मोशागी छ्य स्यक्पे लम्नी ॱलो़ तङ बेत्। 25 मोशागी ॱरीप्चो़त् च्यीक् दीक्पल कीप् कीप् झ्यीन दो़प्पले त बोर को़न्ज्योक्की मीमङ्दङ् दल दुक्स्यी नोङ दी दम्बा झ्यीब बेत्। 26 हुगो मोशागी इगीगी ॱलल तेन मीस्रे लुङ्बे तीर् धङ् नोर् झ्यीप्पले त ख्रीष्ट्की ढीक्ल नोङे ॱमो़म्बी़त् दी नोर् छ्यीया हीम्ब ॱसम्ब बेत्। 27 मीस्र लुङ्बनी मोशा थो़न्न डोज्ये दी हुगी ज्याबी़ खोङ्डोक्ल ज्यीन थो़म्ब मेम्ब, रोगी छ्य स्यक्पे लम्नी थो़न्न फीम्ब बेत्। इगीन यो़क्केन् को़न्ज्योक् रोगी ॱमीक्की ॱमत् थोङ्न आक्, ॱसीम्नी थोङ्नी धु च्यङ्न दो़त् छुब बेत्। 28 हुनी मीस्रे भु छ्यीस्स्यो घयेत् ॱसो़त्तु इगीनी मल्ल युङ्गेन् दीगी इस्राएली घयेक्की खीम् ङु ॱस्यीन खीम् ॱयोङ्ल डोज्ये यो़प्पल छ्य स्यक्पे लम्नी मोशागी इस्राएली घयेक्की खीम्ल ठक् ॱही़म्बे ढीक्ल धङ् हुनी इस्राएली घयेत् छ्यीबे धी़रीम् ॱसम्बे ढीक्ल क टेप्प बेत्। 29 हुनी छ्य स्यक्पे लम्नीरङ् छ्यु ज्यम्जो छ्यीम्मु ॱमप्पु सीक्केङ्गी घुङ्नी फल्ल लम् भीन, इस्राएली घयेत् ॱस कम्बुल फीम्ब डस्सी डो छुब बेत्। ॱनी मीस्रे मी घयेत् एत् हुगो डस्सीरङ् झ्यीन हुबे तीङ्ल युङ्नी, हुब घयेत् कुरीक् ॱङङ्न ॱस्यीनर बेत्। 30 हुनी छ्य स्यक्पे लम्नीरङ् इस्राएली घयेक्की यरीहो सार्ल ङील्ल पच्च्येन् लेन् री री गीर्नी, ङीम दी़न् छीबे ङीन् दी हुगी च्यारी दी हीन्दुक्रङ्ल रुम्नर बेत्। 31 हुगी यङ्ल को़न्ज्योक्की खल मीत् नेङ्गेन् हुगी सार्की मी घयेत् दी कुरीक् ॱसेत् तङ बेत्। ॱनी छ्येमु राहाब् हुगोरङ् रोरङ्गी छ्य स्यक्पे लम्नी ॱसो़ब बेत्। एल्ला हुगी सार्ल च्यीव झ्यीत्तु युङे मी घयेत्ल रोगी ॱनेजङ् ॱयर्न दो़त्तु ची़प्प हीङ्गो़प्प बेत्। 32 हीले मङा ॱस्यो़त्तु फीन्न, गज्येन् थोगुक्। गीदोन्, बाराक्, साम्सोन्, यीप्त, दाऊद्, शमुएल् धङ् कलुङ् ॱस्यो़क्केन् घयेक्की ढीक्ल हुन्दो कुरीक् ॱस्यो़त् ॱमीत् छुबेत्। 33 छ्य स्यक्पे लम्नी हुबे ज्यागक् गज्येन् ॱनुप्न युङ बेत्। हुब यरीगी ढङ्बु झ्यीन ॱवङ् च्यङ बेत्। हुब यरील को़न्ज्योक्की छ्यो़त्तुम् जेप्प दी झ्युङ बेत्। हुब यरीगी ॱसेङ्गी घयेक्की ख ॱहेक् ॱमीत् छुगेल्ल सो़ तङ बेत्। 34 हुब यरीगी मीरेक् बर ॱसेत् तङ बेत्। हुब यरी ढी पदङ्गी खनी थर बेत्। हुब यरील ॱस्यीक् मीप्पल ॱस्यीक् ॱङीब बेत्। हुब यरील ॱमक् थुक्पे यङ्ल ॱस्यीक् ॱङीत्न, ड ॱमक्कक् री दीत् तङ बेत्। 35 ॱनी हुब भुमु यरील रोरङ्सो़ मीजङ्गी मी ॱस्यीनर को़न्ज्योक्की ॱसोम्बुल ॱलोङ्न टेप्प बेत्। हुब यरी दुङ्दक्की लक्ल ॱस्यीय बेत्। हुगी लक्नी हुब थर् छुगो़त्न आक्, हुबे हुगो मत् दम्ब, हुगी लक्लरङ् ॱस्यीन ॱसोम्बुल लोङ्न हीले गज्येङ्गी गा इगीगी छी लीन्ज्ये दी ॱनो़ब झ्युङ बेत्। 36 हुब यरील छ्यस्सी़त् ज्यब बेत्। हुब यरील डेङ्ज्यक् नोङ बेत्। हुब यरील च्यागोङ् ज्यप्न चो़ल्ल ॱलुक्प बेत्। 37 हुब यरील दोर्तुङ् बेन्न ॱसेप्प बेत्। हुब यरील ॱआर ज्यप्न कीत्तुप्ल तुप् तङ बेत्। हुब यरी ढी पदङ् बेन्न ॱसेप्प बेत्। हुब यरील आक्सीगी दुक्प धङ् दुक्स्यी तङ्न, घन्ड अक् मीप्पल सो़नी, र धङ् लुक्की पाबोक् घो़न्न गीर् गो़ ॱस्यर बेत्। 38 जम्बुलीङ् दीरङ् हुबे ढीक्ल ओ़ब मत् युङ बेत्। हुब मी मीस्स पक्क झ्यङ्दङ् धङ् लदोक् लदोक्ल गीर्न ढक् उक् धङ् धोङ्गी नङ्ल दो़त् गो़ ॱस्यर बेत्। 39 छ्य तेम्बर् स्यक्पे ढीक्ल हुबल को़न्ज्योक्की थु गुवे केच्च्य ॱस्येप्प बेत्। ॱनी हीन्न अक्, को़न्ज्योक्की छ्यो़त्तुम् जेप्प दी हुबे ङोल ॱमत् थोब बेत्। 40 घन्ड हीन् सीन्न हुगी यङ्ल को़न्ज्योक्ल हुन्दो हज्यरङ्गी ढीक्ल हुले गागी ढो़ च्यीक् यो़प्प बेत्। ॱनी हुगी ढो़ हुगो डुप्नी क, हुब घयेत् एत् हज्यरङ्दङ् दल फी़न्सुम् छङल सो छुब बेत्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.