हीब्रु 10 - ल्होमीख्रीष्ट्की फुगी ढीक्ल रोरङ्गी ॱरोक् पुब १-१८ 1 हीगी छ्यो़डीम्गी लेमु घयेत् हीगो म ॱङो़म दी मेम्ब, तीङ्मा युङ्गेन् गागी ढीक्मक् च्यीक्रङ् बेत्। हीगो झ्यीनी छीगङ् लो रीम फो़स्स्यी छ्यो़प्पल ॱरोक् पु पुब झ्यीन अक्, हुगी छ्यक् छ्यो़प्प पुगेन् दी हुगी लम्नी नम्ल अक् को़न्ज्योक्की ढुङ्दु फी़न्सुम् छङल ॱमीत् थो़ङ्गेन् बेत्। 2 छ्यक् छ्यो़प्प पुगेन् घयेत् लेन् च्यीक् टी़ब दीगी फुगी ढीक्ल धक्पर्ल थो़ङ्गो़त्न ॱनी, दीक्पे ॱनोङ् दी इक् ॱसेङ्न छ्यो़प्प पुज्ये दी इक् च्यम् स्यक् तोङेत् क ॱनी। 3 हीगो मेम्ब, लो रीम फो़स्स्यी ॱरोक् छ्यो़प्पल पुगेङ्गी लेमु हुगो दीक्पे ॱनोङ् ढेन्सो़ ॱलोङ्ज्येल बेत्। 4 घन्ड हीन् सीन्न म दी ॱलङ्डुक् धङ् रबी़ ठक्की दीक्पे ॱनोङ् ॱसेङ् ॱमीत् छुगेन् बेत्। 5 हीगो झ्यीनी ख्रीष्ट् जम्बुलीङ्ल थो़न्ज्येम ॱयेङे यङ्ल खोङ्गी को़न्ज्योक्ल हीन्दुक् ॱसुङ थो़ङ्गेन् बेत्। ॱरोक् धङ् छ्यो़प्पे ढे घयेत् हुगो नीज्यरङ्गी थुल ॱमत् ॱसोङल नीज्यरङ्गी ङे ढीक्ल सी़ च्यीक् ठोक्क झ्यीन स्यक्तुक्। 6 ॱहेन पुबे छ्यो़प्प धङ् दीक्प धक्च्ये यो़प्पल पुबे छ्यो़प्प घयेत्ल नीज्यरङ् थु मत् गुव बेत्। 7 हुगो झ्यीनी हुनी ङे झ्यीबेन्। ॱवे को़न्ज्योक्, ङे ढीक्ल ॱसुङ्रप्की यीगील ढीन यो़क्केन्, नीज्यरङ्गी थुल यो़प्प दी डुप्तु डोज्येल ङ यो़त् सीन्न ॱसुङ बेत्। (ॱसुङ्रप्की गुल्लु ४०:६-८) 8 खोङ्गी गोम ॱसुङ्गेन् ॱरोक्, छ्यो़प्प, ॱहेन पुबे छ्यो़प्प धङ् दीक्पे ॱस्याबल पुबे ॱरोक् घयेत् हुगो नीज्यरङ्गी थुल ॱमत् ॱसोङ, हुल मीत् गुव झ्युङ बेत् सीर थो़ङ्गुक्। ॱनी म दी छ्यो़डीम्गी कल हुन्दुक् झ्यीन पु गोगेन् बेत् सीर यो़त्न अक्, खोङ्गी हुन्दुक् ॱसुङ बेत्। 9 खोङ्गी हरुङ्द ॱसुङे ॱसुङ्गेत्ल ॱवे को़न्ज्योक्, नीज्यरङ्गी थुल यो़प्प दी डुप्तु डोज्येल ङ यो़त् सीर थो़ङ्गेन् बेत्। ॱनी हुन्दुक् झ्यीन लुस तीङ्मा दी चव चुक्पे ढीक्ल लुस ॱएम्मा दी मीप्पल को़न्ज्योक्की सो़ तङ बेत्। 10 को़न्ज्योक्की थुल यो़प्पे ढो़ हुगो डुप्च्येल येशु ख्रीष्ट्की फुगी फेम्बे ढीक्ल खोङ् रोरङ्गी सी़बु दी ॱरोक्ल लेन् च्यीक्लरङ् पुब बेत्। हीगी लम्नी क हज्यरङ् धक्पर् हीम्बल झ्युङ बेत्। 11 छ्यो़प्पो़ङ्गी ङीन् रीम फो़स्स्यी छ्यो़प्प पुबे ले दी झ्यीप्पे यङ्ल हुब लोङ्न पु गोगेन् बेत्। ॱनी हुन्दुक् झ्यीन घजो़त् ॱरोक् पुन आक्, हुगी लम्नी ॱस्युली दीक्प ॱसेङ् ॱमीत् छुगेन् बेत्। 12 ॱनी ख्रीष्ट्की हुगो डस्सी मत् झ्येब, खोङ्गी हज्यरङ्गी दीक्पे ॱस्याबल फुगी ढीक्ल ॱरोक् च्यीगी च्यीक् पुन हुनी खोङ् को़न्ज्योक्की ॱये छ्योन स्युन यो़क्केन् बेत्। 13 हुनी झ्यीनी खोङ्गी ड घयेत् खोङ्गी कङ्बे होक्ल नम् ॱलुक्न स्योक् स्योक् थुक्ल खोङ् इगीन गुक्कीन् स्युगेन् बेत्। 14 खोङ् रोरङ्गी ॱरोक् च्यीगी च्यीक् छ्यो़प्पल पुबे लम्नी धक्पर् हीम्बल सो़ब घयेत् फुगी ढीक्ल फी़न्सुम् छङल थो़न् छुब बेत्। 15 हीगो खुङ् हीन् धङ् मेल्ल धम्बे थुगी इक् हज्यरङ्ल ॱअल एल्ला हीन्दुक् ॱसुङ्गेन् बेत्। 16 ङे मीमङ् घयेत्तङ् ङ हीन्दुक् झ्यीबे कगो़त् धम्स्यक् च्यीक् स्योक्केन् सीन्न चोव ज्यीन्दक्की ॱसुङ्गुगो। तीङ्ला हुगी धी़ल ङे छ्यो़डीम्गी क घयेत् हुबे ॱसीम्ल स्युक्तु ची़त्न हुबे ॱसीम्बे यीक्ल ढीन स्योक्केन् सीर थो़ङ्गेन् बेत्। (यर्मीया ३१:३३) 17 हरुङ्द ॱसुङ्गेन् बेत्। हुबे दीक्प घयेत् धङ् छ्यो़डीम्ल ङीबे ले घयेत् हुनी झ्यीब दी ङे ॱसीम्ल ढेन्सो़ मीप्पल सोगेन् सीन्न ॱसुङ थो़ङ्गेन् बेत्। (यर्मीया ३१:३४) 18 ॱनी हुन्दुक् झ्यीन दीक्प धक् छर्न ॱनी, यङ् फीच्च्य दीक्पे ॱस्याब पु मीत् गो़ब युङ्गेन् बेत्। तेम्बर् धङ् धु गो़ब १९-३९ 19 हीगो झ्यीनी पी़न्ज्यासो, येशुगी ठक्की कुट्टीङ्गी हज्यरङ् घयेत् हुगी कोट्ट चङ्स्यो दील ज्यीब मीप्प स्युक् छुगेन् बेत्। 20 ॱनी हीगी छी थर्वल च्यो़गेङ्गी लम् ॱसम्ब हीगो खोङ्गी सी़बु ॱरोक्ल पुन हुगी ॱअर्तक्की योल दी पेक्न हज्यरङ्ल तो़म्ब बेत्। 21 को़न्ज्योक्की ढोङ्बे मीजङ् हज्यरङ् घयेत्ल छ्यो़प्पो़न् छ्यीम्मु दी खोङ् यो़क्केन् बेत्। 22 हुगो झ्यीनी ह हज्यरङ् ॱसीम् ढङ्बु खुर्न को़न्ज्योक्ल ॱलो केन येशुगी ठक्की ॱसीम्ल ॱनोङ् मीप्प धक्पर्ल सो़नी, छ्यु चङ्मे सी़बु टी़न को़न्ज्योक्की ढुङ्दु डोज्यीत्। 23 हज्यरङ्गी बेत् सीन्न सीक्केङ्गी रीगो दी ॱलो़ ॱमत् तङ, थीरी सुङ्न देत्तोङ्ज्यीत्। को़न्ज्योक् ज्युरुव मीप्प, तेम्बर् यो़क्केन् झ्यीनी, खोङ्गी हज्यरङ्ल छ्यो़त्तुम् जेप्प दी डुप्केन् बेत्। 24 खीत्रङ्गी ॱसम्ल दी च्यीक्तङ् च्यीक्ल झ्यम्ब धङ् गये ले झ्यीच्च्ये यो़प्पे ढीक्ल खुर्च्यीत्। 25 छ्यो़ छोल मीत् जोम्गेङ्गी मी यरी डस्सी मेम्ब, हज्यरङ् जोम्न च्यीक्तङ् च्यीक्ल ॱलोप्स्यीक् टो़त्री चीदोङ्ज्यीत्। चोव ज्यीन्दक्की ङीन् ॱस्यच्चल ॱलीत् छर हीम्ब हज्यरङ्गी ॱह घोन, हरुङ् ज्यीक्तु हुन्दुक् झ्यीदोङ्ज्यीत्। 26 हज्यरङ्ल दीम्बे केच्च्य कुरीक् ॱस्यो़च्च्ये झ्यीनी इक्, यङ् हज्यरङ् ॱनो़बागी दीक्प झ्ये झ्येब देत्न ॱनी, हुगी दीक्पे ॱस्याबल ॱयोङ् घन्ड अक् मीप्प बेत्। 27 बोर को़न्ज्योक्की खोङ् रोरङ्गी ड घयेत् मीरेक्की च्योप् छीक् डोगेङ्गी छ्येप्प को़बे धी़ थुक्ल हुगो ज्यीगीन् ज्यीगीन् दो़त् गो़ ॱस्यर्केन् बेत्। 28 मोशागी छ्यो़डीम् आक्तोक्ल तोङ्गेङ्गी मी ॱसु यो़दङ् हुल पङ्बु मीरङ् ॱङीजो़त् ॱसुम्जो़त् च्यीक् थो़न्न ॱनी, हुल ॱङीङ्ज्यी मत् झ्येब, हुगो ॱसो़त् गोगेन् बेत्। 29 ॱनी को़न्ज्योक्की ॱरेबु तीङ्बे होक्ल तीङ्गेन्, रोरङ् धक्पर्ल सोगेङ्गी कगो़त् धम्स्यक्की ठक्ल चङ्म हीम्ब ॱमीत् ॱसम्गेन् धङ् थुज्यी च्येम्मे धम्बे थुल अयेक्प सीक्केन् मी ॱसु यो़दङ् हुल ॱसुम्ब हुले ज्यीक्पागी छ्येप्प फोक्केल्ल ओ़ब युङ्गेन् मेम्बेक्क ॱनी? 30 हीगी ढीक्ल हीन्दुक् सीर थो़ङ्गेन् बेत्। ङेल्लेन् च्यो़गेन् दी ङ हीन्। ङेल्लेन् च्यो़ज्येम दी ङे लक्ल यो़त्। ॱनी हरुङ् हीगो ओक् थो़ङ्गेन् बेत्। चोव ज्यीन्दक्की खोङ् रोरङ्गी मीस्सीर्ल ठीम् च्यो़क्केन् बेत्। (ठीम्लु ३२:३५-३६) हीगो ॱसुङ्गेन् दी हज्यरङ्गी ङु ॱस्यीगेन् बेत्। 31 ॱसोम्बु हीम्बे को़न्ज्योक्की छ्यक्ल ॱस्योर्न ॱनी, हुगो ज्यीसी बेत्। 32 गोम खीत्रङ्गी ॱसीम्ल नम् लोङ्न यो़प्पे कप्ल दुक्प छ्यीम्मु गज्येन् नोङ बेत्। ॱनी हुगो दुर्न गुर् थेक्प झ्यीब दी ढेन्सो़ झ्यीज्यीत्। 33 हुगी यङ्ल खीत्रङ् यरील छ्यी मी घयेक्की दुक्स्यी तङ्न ॱम पब बेत्। ॱनी यङ् खीत्रङ् यरी ॱयोङ्म ॱम पप्न यो़प्पे छ्यीट्टो़ दगुल अक् फीन्न देप्प बेत्। 34 ॱनी चो़ल्ल ॱस्योर्न यो़प्पे छ्यीट्टो घयेत्ल अक् खीत्रङ् ॱङीङ् छन दगु झ्यीब बेत्। हुगो छ्युवक् मेम्ब, खीत्रङ्ल नम्ल अक् मीत् सेक्केङ्गी चा छ्यीम्मी़ नोर् च्यीक् यो़प्प खीत्रङ्गी ॱह घोनी, हुनी खीत्रङ्ल हीन यो़प्पे नोर् दी ॱयोङ्गी लुप्न न अक्, च्युगा घन्ड अक् मत् झ्यीब, ॱसीम् गव झ्यीब बेत्। 35 खीत्रङ्ल ॱल छ्यीम्मु थोप्को़त् ॱनो़न ॱअयु छ्यक्प मीप्प, ॱआर् झ्यीन दो़च्च्यीत्। 36 को़न्ज्योक्की थुल घङ् यो़प्प घयेत् दी खीत्रङ्गी डुप्न, खोङ्गी छ्यो़त्तुम् जेप्प दी थोप्च्ये यो़प्पल खीत्रङ्ल धु गो़गेन् बेत्। 37 ॱसुङ्रप्ल को़न्ज्योक्की हीन्दुक् ॱसुङ थो़ङ्गेन् बेत्। इगीनी मल्ल झ्यो़ङ्गेन् खोङ् फीन्दीक्म मेम्ब, ज्योक्सी झ्यो़ङ्गेन् बेत्। 38 ङे मी ढङ्बु, छ्य स्यक्पे लम्नी ॱसोम्बु हीम्ब युङ्गेन् बेत्। रोरङ् ॱङर्की लम्ल लोक् डोगेल्ल यङ् ङ गुव मीन्दुक्। (हबकुक् २:३-४) 39 हज्यरङ् हुगी ॱङर्की लम्ल लोक्न खरप्ल डोगेन् हुगो डस्सी मेम्ब, हज्यरङ् छ्य स्योक्केन् छी थर्वल थो़ङ्गेङ्गी मी बेत्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.