गलाती 6 - ल्होमीच्यीक्तङ् च्यीक्की गेन् खुर्रो झ्यीत् गोगेन् १-१० 1 पी़न्ज्यासो, खीत्रङ्गी घुङ्दु मी च्यीक्की ङीब झ्यीप्प खीत्रङ् ॱयोङ्गी ॱह घोन ॱनी, धम्बे थुगी ठीक्पे लम्ल तेम्बोक्म डोगेन् घयेत् दीबे ॱम ॱयुङ्बोक्म झ्यीन हुगी मी दी ॱएङ्गी लम्ल ॱलोक् गोगेन् बेत्। ॱनी हुब रोरङ्सो ओक् ॱनोम्ज्युङ् झ्यीन च्यङ्जो़त् मत् झ्येन ॱनी, स्येन् रोरङ्सो ओक् छ्यी़न ङी छुगेन् बेत्। 2 खीत्रङ् च्यीक्तङ् च्यीक्की गेन् खुर्रो झ्यीन दगु झ्यीत्री चीज्यीत्। हुनी क हस्सो़त् ख्रीष्ट्की ॱनङे क दी डुप्केन् बेत्। 3 मी ॱसु म दी रोरङ् घन्ड अक् मेम्ब, यङ् रोरङ्गी रोरङ्ल छ्यीया हीम्ब ॱसम्गो़त्न ॱनी, हुगो रोरङ्गी रोरङ्ल गो बो़दु ची़क्केन् बेत्। 4 खीत्रङ् ॱयोङ्गी लेल मेम्ब, रङ् रङ् ॱसोस्सो़ झ्यीक्केङ्गी लेल नम् च्येत्न तो़ज्यीत्। हुनी रङ्गी ले दी गङ्ज्येल्ल थो़न्न ॱनी, तम्दो़त् दी ॱयोङ्गी झ्यीबे लेनी मेम्ब, हस्सो़त् रङ्गी लेनी युङ्गेन् बेत्। 5 घन्ड हीन् सीन्न मी ॱसोस्सोरङ्गी गेन् दी ॱसोस्सोरङ्गीरङ् खुर् गोगेन् बेत्। 6 ॱसुङ्रप्की ॱलोप्स थीबे मी ॱसु यो़दङ् हुगी रोरङ्गी चयेलमल ढील्लेन् च्यो़ गोगेन् बेत्। 7 को़न्ज्योक्ल रङ्गी गो़गोर् तोङ् ॱमीत् छुगेन् बेत्। हुन्दुक् झ्यीन ॱनी रङ्गी रङ् गो बो़दु ची़क्केल्ल डोगेन् बेत्। घन्ड हीन् सीन्न मी ॱसी़ रोरङ्गी घन्डे ॱसो़न् तोप्को़दङ् ॱनी हुगी ॱसो़ङ्गी तो़न्दोक् दीरङ् दी़क्केन् बेत्। 8 कोलीमीगी ॱसीम्बे रङ्ज्यी़गी ॱसो़न् तोप्केन् दीगी ॱस्यीवे तो़न्दोक् दी़क्केन् बेत्। ॱनी यङ् धम्बे थुदङ् डीक्पे ॱसो़न् तोप्केन् दीगी धम्बे थुगी लम्नी फुगी छी तक्पे तो़न्दोक् दी़क्केन् बेत्। 9 हीगो झ्यीनी हीगी ढीक्ल गये ले झ्यीप्पल हज्यरङ् घाब मत् झ्यीदोङ्। हील हज्यरङ् थङ् ॱमत् छ्येप्प झ्यीन ॱनी, तीङ्ला धी़जो़त्ल हज्यरङ्ल हुगी तो़न्दोक् दी़च्च्ये ॱनोङ्गेन् बेत्। 10 घङ् झ्यीत् छु छु मी कुरीक्ल गये ले झ्यीदोङ्। ॱनी मो़स्स्योल हज्यरङ् छ्य स्योक्केन् नङ्जोदु झ्यीत् गोगेन् बेत्। यहुदीगी दक् ज्यक् मीत् गो़गेन् ११-१६ 11 तो़दे, ह हीनी मल्ल ङरङ्गी लक्पे ढीबे इक्टु घन्दुक्मे छ्यीय दुक्क। 12 खीत्रङ्ल यहुदीगी दक् ज्यक् गोगेन् बेत् सीक्केन् हुबे म दी सी़ल दक् हुगो ज्यप्न ॱनी, यहुदी घयेत् गुगेन् बेत्। हुब गुनी क, हस्सो़त् ख्रीष्ट् कुरुस्तु ढोङे केच्च्ये ढीक्ल दुक्प अयेक्प ॱमीत् तोङ्गो़ट्टो ॱनो़ब खुर्केन् बेत्। 13 ॱनी दक् ज्यक् गोगेन् बेत् सीक्केन् हुबे हीगी क हीलरङ् चीनी, छ्यो़डीम्गी क ॱयोङ्म घयेत्ल हुबे ॱमीत् चीगेन् बेत्। हुबे दक् ज्यक्च्येगी ले हुगो डुप् छुन, रोरङ्सोल तम्दो़त् ॱस्यो़च्च्ये ॱनोङ्गो़ट्टो ॱनो़ब खुर्केन् बेत्। 14 ॱनी ङे तम्दो़त् दी हज्यरङ्गी चोव ज्यीन्दक् येशु ख्रीष्ट् कुरुस्तु ढोङे ढीक्की केच्च्ये ढीक्ल मेन्द, ॱयोङ् घन्डे ढीक्ल अक् मीत्। खोङ् कुरुस्तु ढोङे लेगी ङ ङो़नी जम्बुलीङ्गी ढङ् घयेत् कुरुस्ल ता छरदङ् छ्येत्मीत् बेत्। ॱनी जम्बुलीङ् ङो़नी यङ् ङ कुरुस्ल ता छरदङ् छ्येत्मीत् यो़त्। 15 यहुदीगी दक् हुगो ज्यप्न अक् बेत्। मत् ज्यप्न अक् बेत्। हुगी फेन्दो घन्ड अक् मीत् युङ्गेन् बेत्। फेन् थोस्योल हज्यरङ्ल ॱसीम् ॱसम्ब छ्यादु ची़प्प हुगो बेत्। 16 ॱनी हीगी लुसल युङ्गेन् को़न्ज्योक्की मीस्सीर् इस्राएली जेङ्ल खोङ् च्यानी ॱसीम् दीव धङ् ॱङीङ्ज्यी युङ्ज्ये यो़प्प तोङ्। 17 ह हीनी झ्यीब दी मी ॱसी़ इक् ङल दुक्स्यी ॱमत् तोङ्लेच्च्यीत्। घन्ड हीन् सीन्न येशुगी ढीक्ल दुक्प नोङ्न ङे सी़ल खोङ्गी ङोत्तागी ॱमील यो़त्। 18 पी़न्ज्यासो, हज्यरङ्गी चोव ज्यीन्दक् येशु ख्रीष्ट्की थुज्यी खीत्रङ् घयेक्की ॱसीम्गी दगुल युङ् युङ युङ्ज्ये यो़प्प स्योक्च्यीत्। आमेन्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.