गलाती 4 - ल्होमीॱयोक्पु मेम्ब को़न्ज्योक्की भीज १-७ 1 ङे हरुङ्द हीगो ॱस्येत् योङ्। नोर्की दक्पी़ भीज च्युङेत्मु यो़प्पे कप्ल ढोङ्बे दक्पी़ भीजरङ् हीन्न अक्, हुगो रङ्मो़ मीप्पे ॱयोक्पुजो़त् मेन्द, मीत् युङ्गेन् बेत्। 2 फमे स्यक्पे धी़जो़त् दी थुक्ल हुगी भीज दी हुगी ढोङ्ब च्योङ्गेन् भीज ॱसोगेन् ॱयोक्पु घयेक्की ॱवङ्गी होक्ल युङ्गेन् बेत्। 3 ॱनी हीगी भीज च्युङेत्मु डस्सी ङीत् घयेत् एत् एल्ला जम्बुलीङ्गी टोलु घयेक्की ॱयोक्ल ॱस्योर्न यो़क्केन् बेत्। 4-5 हुनी को़न्ज्योक्की एल्ला स्यक्पे हुगी धी़जो़त् दी ॱलीत्नी, को़न्ज्योक्की खोङ्गी ॱरेबु इगीनी मल्ल तङ बेत्। हज्यरङ् छ्यो़डीम्गी होक्नी ॱली़न, को़न्ज्योक्की भीजल युङ् छुज्ये यो़प्पल को़न्ज्योक्की ॱरेबु कोलीमीगी भुमुल कीन, छ्यो़डीम्गी होक्ल देप्प बेत्। 6 ॱनी हुन्दुक् झ्यीन खीत्रङ् को़न्ज्योक्की भीज हीम्बल झ्युङ्नी, को़न्ज्योक्ल खीत्रङ्गी ॱवे अब्बा पब सीन्न सीक्केल्ल खोङ्गी ॱरेबी़ थु खीत्रङ्गी ॱसीम्बे नङ्ल तङ्न यो़क्केन् बेत्। 7 हीगो झ्यीनी रङ् ह ॱयोक्पु मेम्ब, भीज बेत्। ॱनी भीज झ्यीनी ॱनी, भीजल थोप्केङ्गी फक् दी इक् को़न्ज्योक् च्यानी रङ्ल थोप्केन् बेत्। गलातीयागी ढीक्ल पावल्ल च्युगा ८-२० 8 खीत्रङ्गी एल्ला को़न्ज्योक् ङु ॱमत् ॱस्यीबे यङ्ल खीत्रङ्गी को़न्ज्योक् मेम्ब, ॱयोङ्मा यो़च्चो़त्ल ॱसम्न हुगी ॱयोक्ल ॱस्योर्न यो़क्केन् बेत्। 9 ॱनी ह हुन्दो खीत्रङ् को़न्ज्योक् ङु ॱस्यीगेल्ल ॱसोङ बेत्। ॱनी हीले ज्यीक्पा हरुङ् को़न्ज्योक्की खीत्रङ् ङु ॱस्यीगेन् बेत्। हीगो झ्यीनी ॱनी, घन्डल खीत् हुन्दुक् झ्यीब घो ॱमीत् छ्यो़त् दुक्च्यागी ॱएङ्गी टोलु घयेक्की ॱयोक्ल यङ् स्युक्केन्। 10 हुन्दुक् झ्यीन खीत्रङ् छीरङ् दव लो धी़रीम् घयेत्ल ॱसम्गेन् बेत्। 11 खीत्रङ्गी हुन्दुक् झ्यीनी, हुदु ङे खीत्रङ्गी ढीक्ल कले च्येप्पे ले दी धो़म्मीत्ल ॱसोङ हीम्ब न? ॱनो़बे च्युगा झ्युङ्। 12 पी़न्ज्यासो, खीत्रङ्ल ङ ॱलोप्स हीगो ज्यक्केन्। ङदङ् खीत्रङ् हुदु कङ्ज्यीक्ल यो़प्पे यङ्ल यहुदीगी टोल ॱमत् ॱसम्ब डस्सी दी हुन्दो ओक् खीत्रङ् हुन्दुक् दीरङ् युङ्ज्ये यो़प्प झ्यी। ङ हुदु यो़प्पे यङ्ल खीत्रङ्गी ङल मत् ओ़ब घन्ड अक् झ्यीमोङ्। 13 ङे हुदु खीत्रङ्ल गोम केच्च्य ॱनेम्बु ॱस्यो़च्च्ये दी ङ थङ्ज्ये मीप्प झ्युङ्न लेनी ॱस्येप्पेन्। हुगो खीत्रङ्ल ॱस्यो़च्च्ये यो़क्केन् बेत्। 14 ङ थङ्ज्ये मीप्प झ्युङ्नी, खीत्रङ्ल घाब दुक्प झ्युङ बेत्। ॱनी हीन्न अक्, खीत्रङ्गी ङल स्यीलोक्प मत् झ्यीब, आक्तोक्ल ॱमत् तङ, तेङ् को़न्ज्योक्की भङ्ज्येम्बदङ् छ्येत्मीत्, ख्रीष्ट् येशुदङ् छ्येत्मीत् थोङ् झ्यीज्युङ्। 15 ॱनी हुगी यङ्ल खीत्रङ्गी दो़न्दो़त् गव झ्युङ् सीगुक्। ॱनी हुगो हुन्दो घन ॱनी? हुगी यङ्ल खीत्रङ्गी ङे ढीक्ल ॱमीक्रङ् तो़न् गो़ ॱस्यर्न आक्, तो़न्न टो़क्केङ्गी ॱसीम्ब खीत्रङ्गी खुर्न यो़प्प ङल ॱस्यो़च्च्ये यो़त्। 16 ॱनी हीन्दुक्मे गय यो़प्पल खीत्ल ङे दीम्बे केच्च्य ॱस्येप्पल ङ खीक्की डल लोङल डोगेन् बेक्क ॱनी? 17 हुगी चयेलम हीन् सीक्केन् हुबे खेत् गेन्न खीत्रङ् घयेत् रोरङ्सो़ छ्योल थीङ्गेन् बेत्। हीगो गागी ढीक्ल मेम्ब, हुबे छ्यल सो़न रोसोल ॱसीम्बे यीक्नी ॱसम्न युङ्ज्येल हुबे खीत्रङ् ङदङ् टेज्ये ॱनो़ब झ्यीक्केन् बेत्। 18 ॱनी ङ हुब डस्सी मेम्ब, ङे खीत्रङ्ल फेम्बे लेमु मेन्द, ॱयोङ् ङे ॱसीम् दीलरङ् ॱमीत् खुर यो़त्। ॱनी ङे हीगो हुदु यो़प्पे यङ्ल छ्युवक् मेम्ब, धी़ ज्यी़न्दु खुको़र्त्। 19 ङे भीजसो, खीत्रङ्गी धेप्प दी यो़च्चो़त्ल मेम्ब, ख्रीष्ट् ङो़ल छ्युवक् युङ् युङ् थुक्ल खीत्रङ्गी ढीक्ल ङल कीस्सुक् लङदङ् छ्येत्मीक्की च्युगा लङ्गुक्। 20 ङ खीत्रङ्दङ् दल झ्युङ्न, ङे केत् हीगो रङ्स च्यीक्ल तो़न्न ॱस्यो़च्च्ये झ्युङ्न दो़न्दो़त् गा युङ्गो़ट्टो ॱनो़गुक्। खीत्रङ्ल झ्युङे केच्च्य हुगो ङे ॱनी ॱयुव पीक् दीरङ् छुमोङ्। हागार् धङ् सारागी ज्यी़त् २१-३१ 21 ङे ॱस्येत् योङ्। खीत्रङ् छ्यो़डीम्गी होक्ल स्युक्च्ये ॱनो़ब झ्यीक्केन् घयेक्की छ्यो़डीम्गी केच्च्यल नम् च्येत्न तो़। 22 ॱसुङ्रप्ल थो़ङ्गेन् अब्राहाम्ल भु ॱङी यो़क्केन् बेत्। ॱनी च्यीक् रङ्मो़ मीप्पे ॱयोक्मुल कीब बेत्। च्यीक् रङ्मो़ च्येम्मे च्यीमेल्ल कीब बेत्। 23 रङ्मो़ मीप्पे ॱयोक्मुल कीब दी कोलीमी लुसल झ्यीन झ्युङ बेत्। ॱनी रङ्मो़ च्येम्मे च्यीमेल्ल कीब दी को़न्ज्योक्की छ्यो़त्तुम्ल यो़प्पे लम्नी झ्युङ बेत्। 24 ॱनी भुमु ॱङीबु हुगो हीगो डस्सीगी पील आक् डोगेन् बेत्। हुब ॱङीबु कगो़त् धम्स्यक् रीदङ् रील डोगेन् बेत्। ॱनी कगो़त् धम्स्यक् च्यीक् सीनै लदोक्तु ॱनङ बेत्। हुगो च्येन्नी रङ्मो़ मीप्पे भीज घयेत् कीगेन् बेत्। हुगो हस्सो़त् रङ्मो़ मीप्पे ॱयोक्मु हागार्ल डोगेन् बेत्। 25 हागार् हुगो अरब् लुङ्बे सीनै लदोक् हुल अक् डोगेन् बेत्। ॱनी दङ् हरीङ्गी यरुशलेम्ल अक् डोगेन् बेत्। घन्ड हीन् सीन्न यरुशलेम्गी मीस्सीर् घयेत् छ्यो़डीम्गी ॱयोक्ल ॱस्योर्न रङ्मो़ मीप्प दो़क्केन् बेत्। 26 ॱनी हस्सो़त् इगीगी यरुशलेम् दी क रङ्मो़ च्येम्म हज्यरङ्गी आम साराल डोगेन् बेत्। 27 हीगी ढीक्ल ॱसुङ्रप्ल भीज ॱमीत् कीगेन् भुमु कम्डेङ्म रङ् गेस झ्यी। भीज कीये कीस्सुक् नोङ् ॱमत् ॱनोङे भुमु रङ्गी गेस दी ॱसीम्ल मत् स्योक्प, खनी तो़ल्ल ॱस्यो़त्। घन्ड हीन् सीन्न छ्योबु च्येम्मे भुमुले छ्योबु मीप्पे भुमुल भीज मङा युङ्गेन् बेत् सीर यो़क्केन् बेत्। (यशैया ५४:१) 28 ङे पी़न्ज्यासो, इसहाक् डस्सी खीत्रङ् को़न्ज्योक्की छ्यो़त्तुम् जेत्न ॱनङे भीज हीम्बल डोगेन् बेत्। 29 ॱनी हुगी कोलीमीगी लुसनी कीबे भीज दीगी धम्बे थुगी कीदु ची़प्पे भीज दील हुगी यङ्ल दुक्प तङ बेत्। ॱनी हीगो डस्सी दी क दङ् हरीङ् इङ् यो़क्केन् बेत्। 30 हीगी ढीक्ल ॱसुङ्रप्ल थो़ङ्गेन् बेत्। रङ्गी रङ्मो़ मीप्पे ॱयोक्मु हुगो धङ् हुगी भीज हुगो दीत्न तोङ्। घन्ड हीन् सीन्न रङ्मो़ च्येम्मे भीजदङ् च्यीक्प हुल नोर्की फक् ॱमीत् थोप्केन् बेत्। (छ्यारप् २१:१०) 31 ॱनी हीगो झ्यीनी ॱनी, ङे पी़न्ज्यासो, हज्यरङ् हुगी रङ्मो़ मीप्पे ॱयोक्मी़ ज्यी़त् मेम्ब, हज्यरङ् रङ्मो़ च्येम्मे च्यीमेङ्गी ज्यी़त् हीम्बल डोगेन् बेत्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.