गलाती 3 - ल्होमीॱनम्बर् धक्पल थो़म्बे लेमु १-१४ 1 ॱवे गलातीया घुर्तीङ घयेस्सो, खीत्रङ्ल ख्रीष्ट् कुरुस्ल ढोङे धो़न् ङे एल्लादु खीत्रङ्गी ॱमीक्की दोङ्दु गन्दीक्म ॱस्येत्न स्योक्कीन् स्योक्कीन् हुन्दो खीत्ल ॱसी़ ॱङुव ज्यप्न सुक्च्युङ? 2 धम्बे थु खीत्ल छ्यो़डीम्गी कल चीन युङे लम्नी थोप्च्युङ न, न केच्च्य ॱनेम्बु ॱह घोन हुल छ्य स्यक्पे लम्नी थोप्च्युङ? हीगी लेम्बु ङल ॱलोक्लेत्ते त। 3 गोम खीत्रङ्गी छ्य स्यक्पे लेमु दी धम्बे थुगी झ्यीन युङ बेत्। हुन्दो यङ् खीत् खीत्रङ्गी ॱस्यीक्की डुप् छुब झ्यीक्केन् सीक्केन्? घन्डे घुवे मी। 4 खीत्रङ् हुन्दुक् झ्यीच्च्ये ॱनो़न ॱनी, खीत्रङ्गी एल्ला गुरे दुक्प हुगो धो़म्मीत्ल तोङ्गेन्? हुगो धो़म्मीत् मेम्बेत्। 5 को़न्ज्योक्की नुक्रङ्ल धम्बे थु खीत्रङ्ल ॱनङ्न युङ हुगो धङ् खीत्रङ्गी घुङ्दु खोङ्गी ॱस्यीक् छ्यीम्मी़ ले जेक्केन् हुगो खीक्की छ्यो़डीम्गी कल चीन युङे लम्नी खीत्ल झ्युङ ॱनी? मेम्बेत् हुगो। खीत्रङ्गी केच्च्य ॱनेम्बु ॱह घोन, हुल छ्य स्यक्पे लम्नी झ्युङ मेम्बेक्क ॱनी? 6 अब्राहाम्गी ॱमीदेल तो़। खोङ्जो़ को़न्ज्योक्की ॱसुङे ॱसुङ्स्येत्ल छ्य स्यक्प बेत्। ॱनी हुगी छ्य स्यक्प दीगी क खोङ्जो ॱनम्बर् धक्प हीम्ब को़न्ज्योक्की थोङ बेत्। (छ्यारप् १५:६) 7 हीगो झ्यीनी छ्य स्योक्केन् घयेत् अब्राहाम्गी ज्यी़क्की मी हीम्बल डोगेन् बेत्। हीगो ॱह घोव झ्यी। 8 ज्यी़त् ॱयोङ् ॱयोङ्गी मी इक् छ्य स्यक्पे लम्नी को़न्ज्योक्की ॱनम्बर् धक्पल तो़ङ्गेन् सीक्केन् हीगो एल्लानीरङ् खोङ्गी थुल यो़क्केन् झ्यीनी, ॱसुङ्रप्ल हीगो थो़ङ्गेन् बेत्। को़न्ज्योक्की अब्राहाम्ल रङ्गी लम् ज्यी़त्नी ज्यी़त् रीदङ् रील ॱमेल्लम् ॱनङ्गेन् सीन्न केच्च्य ॱनेन्सी ॱस्येप्प बेत्। (छ्यारप् १२:३) 9 हीगो झ्यीनी अब्राहाम् डस्सी छ्य तेम्बर् स्योक्केन् ॱसु यो़दङ् हुल ॱमेल्लम् थीप्केन् बेत्। 10 मी ॱसी़ छ्यो़डीम्गी कल चीन रोरङ् ॱनम्बर् धक्पल थो़न् छुबेत् ॱनो़न युङ्गुक्क हुल को़न्ज्योक्की छ्येप्प फोक्केन् बेत्। घन्ड हीन् सीन्न छ्यो़डीम्ल ढीन यो़प्पे क घयेत् कुरीक्ल मी ॱसी़ ची ॱमीत् छुबेक्क हुल को़न्ज्योक्की छ्येप्प फोक्केन् बेत् सीन्न ॱसुङ्रप्ल यो़क्केन् बेत्। (ठीम्लु २७:२६) 11 हीगो झ्यीनी छ्यो़डीम्गी कल चीन युङे लम्नी मी ॱसु उक् को़न्ज्योक्की थोङल ॱनम्बर् धक्पल ॱमीत् थो़म्ब हीम्ब हीनी धक्पोक्म ॱह घोगेन् बेत्। हीगी ढीक्ल ॱसुङ्रप्ल हीन्दुक् सीर यो़क्केन् बेत्। छ्य स्यक्पे लम्नी ॱनम्बर् धक्पल थो़म्बे मी दी को़न्ज्योक् ङो़ल ॱसोम्बु युङ्गेन् बेत्। (हबकुक् २:४) 12 छ्यो़डीम्गी ङोगी यङ्ल छ्य स्योक् गोगेङ्गी लेमु मेम्ब, छ्यो़डीम्ल यो़प्पे क घयेत्ल चीन दो़त् गोगेङ्गी लेमु यो़क्केन् बेत्। हीगी ढीक्ल ॱसुङ्रप्ल छ्यो़डीम्गी क कुरीक्ल चीन दो़क्केन् दीरङ् को़न्ज्योक् ङो़ल ॱसोम्बु हीम्ब युङ्गेन् बेत् सीर यो़क्केन् बेत्। (लेवी १८:५) 13 ॱनी हुगी क घयेत् हुल ची ॱमत् छुबल हज्यरङ्ल फोक्केङ्गी छ्येप्प दी ख्रीष्ट्की खुर्न हज्यरङ् हुगी लक्नी ॱली़ब बेत्। हीगी ढीक्ल ॱसुङ्रप्ल ॱस्यीङ्ल ॱनम्ल ता स्यक्पे मील को़न्ज्योक्की छ्येप्प फोक्नर बेत् सीर यो़क्केन् बेत्। (ठीम्लु २१:२३) 14 ख्रीष्ट् येशुगी हज्यरङ् ॱली़बे धो़न् दी को़न्ज्योक्की अब्राहाम्ल ॱनङे ॱमेल्लम् दी ज्यी़त् ॱयोङ् ॱयोङ्गी मी घयेत्ल अक् थीप्च्ये यो़प्पल धङ् धम्बे थु ॱनङे छ्यो़त्तुम् जेप्प दी छ्य स्यक्पे लम्नी हज्यरङ्ल थोप्च्ये यो़प्पल बेत्। छ्यो़त्तुम् धङ् छ्यो़डीम्गी ढीक्ल १५-१८ 15 पी़न्ज्यासो, हज्यरङ् कोलीमीगी लुसल अक् छ्यो़त्तुम् स्यक्नी ॱनी, हुगो मीत् झ्यीप्प मीत् युङ्गेन् बेत्। हुल ॱनो़म्ब आक् ज्यक् ॱमीत् छुगेन् बेत्। 16 अब्राहाम् धङ् अब्राहाम्गी ज्यी़त्ल ॱमेल्लम् ॱनङे छ्यो़त्तुम् जेप्प दी अब्राहाम्गी ज्यी़क्की मी कुरीक्ल मीत् सीक्केन् बेत्। ॱसुङ्रप्ल थो़ङ्गेन् रङ्गी ज्यी़त् घयेक्की छीक्नी च्यीक्लरङ् ॱनङ्गेन् सीर यो़क्केन् बेत्। (छ्यारप् १३:१५) ॱनी हीगी ज्यी़त् च्यीक्पु दी क हस्सो़त् ख्रीष्ट् बेत्। 17 हीगी धो़न् दी ङे ॱस्येत् योङ्। गोम को़न्ज्योक्की अब्राहाम्दङ् कगो़त् धम्स्यक् स्यक्नी, लोङ ज्यब स्यीदङ् ॱसुम्ज्यु छीनी क, हस्सो़त् छ्यो़डीम् ॱनङ बेत्। ॱनी छ्यो़डीम् ॱनङ्नी, यङ् ॱएम्मागी को़न्ज्योक्की कगो़त् धम्स्यक् स्यक्प दी धङ् ॱमेल्लम् ॱनङे छ्यो़त्तुम् जेप्प दी घो ॱमीत् छ्यो़त्ल ॱमत् ॱसोङ बेत्। 18 को़न्ज्योक्की हीन्दुक्रङ्ल ॱनङे छ्यो़त्तुम् जेप्प दी छ्यो़डीम्गी कल चीन युङे लम्नी थोप्को़त्न ॱनी, खोङ्गी छ्यो़त्तुम् जेप्प हुगो मीत् गो़ब, घो ॱमीत् छ्यो़त्ल डोगेन् बेत्। ॱनी को़न्ज्योक्की अब्राहाम्ल ॱनङे छ्यो़त्तुम् जेप्प हुगो छ्यो़डीम्गी कल चीये लम्नी मेम्ब, हीन्दुक्रङ्ल ॱनङ बेत्। छ्यो़डीम्गी धो़न् १८-२५ 19 हुगो हीन्न ॱनी, छ्यो़डीम् हुगो घन्डे धो़ल्ल ॱनङ बेक्क? हीगो मी घयेक्की रोरङ्सो़ ङीब झ्यीब घयेत् ॱह घोज्ये यो़प्पे ढीक्ल तीङ्ला क ॱनङ बेत्। छ्यो़डीम् हुगो अब्राहाम्ल रङ्गी ज्यी़त् च्यीक्ल ॱमेल्लम् ॱनङ्गेन् झ्यीबे ज्यी़त् दी नम् झ्यो़न् झ्यो़न् थुक्की ढीक्लरङ् स्यक्प बेत्। हीगो को़न्ज्योक्की खोङ् रोरङ्गी तेङ् यी़गी भङ्ज्येम्ब घयेक्की लम् ज्यी़त्नी ॱअर्की मी लक्ल ॱनङ्न, हुनी मीमङ्ल झ्युङ बेत्। 20 ॱअर्की मी यो़त्न ॱनी, स्युङ्ज्योङ् च्यीक्की च्यीक्ल केच्च्य ॱमीत् ॱस्यो़क्केन् बेत्। ॱनी हीन्न अक्, यरी को़न्ज्योक्की ॱअर्की मी मीप्पल अक् स्युङ्ज्योङ् केच्च्य ॱस्येप्प बेत्। 21 छ्यो़डीम् हुगो एल्ला को़न्ज्योक्की ॱनङे छ्यो़त्तुम् जेप्प हुगी डल डोगेन् बेक्क ॱनी? हुगो ॱस्युली मेम्बेत्। घन्ड हीन् सीन्न को़न्ज्योक् ङो़ल ॱसोम्बु युङ दी छ्यो़डीम् हुनी युङ्गो़त्न ॱनी, ॱनम्बर् धक्पल थो़ङ्गेन् दी इक् छ्यो़डीम् हुनीरङ् युङेत् क ॱनी। 22 मी घयेत् जेङ् दीक्पे होक्ल ॱस्योर्न थो़न् ॱमीत् छुगेल्ल ॱसोङ्न यो़क्केन् बेत् सीर ॱसुङ्रप्ल थो़ङ्गेन् बेत्। ॱनी हीगो झ्यीनी को़न्ज्योक्की छ्यो़त्तुम्गी केच्च्य दी येशु ख्रीष्ट्ल छ्य स्योक्केन् घयेत्ल छ्य स्यक्पे लम्नी ॱनङ्न डुप्तु ची़क्केन् बेत्। 23 छ्य स्योक्पे लुस हीगो मत् युङे एल्ला ङीत् यहुदी घयेत् छ्यो़डीम्गी होक्ल ॱस्योर्न ॱनम्बर् धक्पल थो़न् ॱमत् छुब, हुगी ॱवङ्यो़त्ल लेब बेत्। 24 छ्यो़डीम् हुगो ङीत् यहुदी घयेत्ल ख्रीष्ट् झ्यो़न् झ्यो़न् थुक्ल गोयो़त् झ्यीक्केन् लम्बा बेत्। ॱनी म दी खोङ् झ्यो़न्नी खोङ्ल छ्य स्यक्पे लम्नी क ङीत् ॱनम्बर् धक्पल थो़न् छुगेल्ल झ्युङ बेत्। 25 स्युक्ला हीगी छ्य स्योक्पे लुस हीगो युङ्नी, ह हुगी गोयो़त् ॱएम्मा हुगी ॱवङ्यो़त्ल दो़त् मीत् गो़गेन् बेत्। को़न्ज्योक्की भीज हीम्ब २६-२९ 26 ख्रीष्ट्ल छ्य स्यक्पे लम्नी खीत्रङ् घयेत् को़न्ज्योक्की भीजल झ्युङ्न, हुन्दो ख्रीष्ट्तङ् मत् ढेब यो़क्केन् बेत्। 27 खीत्रङ् ॱसु ॱसु बप्तीस्ल स्युन यो़दङ् हुब घयेत् हीगी लम्नी ख्रीष्ट्तङ् मत् ढेबल झ्युङ्न, ख्रीष्ट् खीत्रङ्गी छ्यलुल घो़दङ् छ्येत्मीत् घो़म्बल डोगेन् बेत्। 28 ॱनी ख्रीष्ट्तङ् मत् ढेबे मी खीत्रङ् यहुदी हीन्, ज्यी़त् ॱयोङ्गी मी हीन्, रङ्मो़ मीप्पे ॱयोक्पु हीन्, रङ्मो़ च्येम्मे मी हीन्, छ्योगो हीन्, भुमु हीन्, खीत्रङ् ॱसुरङ् हीन्न अक्, हुल को़न्ज्योक्की च्यीक् हीम्ब ॱसम्गेन् बेत्। 29 ॱनी खीत्रङ् ख्रीष्ट् ङो़गी मी झ्यीनी, हुगी लम्नी खीत्रङ् अब्राहाम्गी ज्यी़त् हीम्बल डोगेन् बेत्। हुगो झ्यीनी अब्राहाम्गी ज्यी़क्की ढीक्ल अब्राहाम्ल ॱनङे छ्यो़त्तुम् दी खीत्रङ्ल थोप्केन् बेत्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.