गलाती 2 - ल्होमीयरुशलेम्दु पावल् धङ् ठीक्नल ॱयोङ्मा १-१० 1 हीनी तोम्दु लोङ च्युप्स्यी ॱसोङ्नी क, बार्नाबास्तङ् दल ङे तीतस् ठीक्न ङीत् यङ् यरुशलेम्ल फीम्बेन्। 2 हीगो ङल को़न्ज्योक्की तो़न्न ज्युक् सीन्न ॱङानी फीम्बेन्। ॱनी ज्यी़त् ॱयोङ् ॱयोङ्गी मी घयेक्की घुङ्दु ङे घन्दुक् झ्यीबे केच्च्य ॱनेम्बु ॱस्येप्प बेक्क हुगो ङे हुदु छ्यो़ छोगी चो छ्यीया हीन्दोक्पे मी घयेत्ल छ्युवक् ॱस्येप्पेन्। स्येन् ङे ज्युबे ले घयेत् दी धो़म्मीत्ल डोगो़ट्टो ॱनो़ज्युङ्। 3 ॱनी हुबे ङदङ् दल युङे तीतस् ज्यी़त् ॱयोङ् ग्रीक्की मी हीन्न अक्, हुल यहुदीगी दक् ज्यक् गोगेन् बेत् सीन्न घन्ड अक् सीम्मोङ्। 4 ॱनी हुगी यङ्ल उन पी़न्ज्या हीन्दोक्पल स्युन यो़क्केन् मी यरी म दी जी़म बेत्। हुबे ङीत् छ्यो़डीम्गी ॱयोक्ल कुज्ये ॱनो़न ख्रीष्ट् येशुदङ् मत् ढेब झ्यीनी ङीत्ल खोङ्गी घन्दुक्मे रङ्मो़ ॱनङ्न यो़प्प बेक्क हुल च्यीव झ्यीत्तु युङ बेत्। 5 ॱनी खीत्रङ्ल केच्च्य ॱनेम्बु हीगो दीम्ब हीम्ब ॱनेज्येल ङीक्की हुबदङ् केच्च्य लप्री चीये यङ्ल हुब केच्च्य छीक् च्यीक्ल आक् ज्यला थो़न्दु ॱमत् ची़त्। 6 हुगी चो छ्यीया हीन्दोक्प हुबे ङे ॱस्येप्पे केच्च्य हुल उजो़त् च्यीक्की ॱमीत् छङेत् सीन्न सीम्मोङ्। हुब म दी चो छ्यीयारङ् हीन्, घन्डरङ् हीन्न अक्, ङल च्यीक्परङ् दुक्। को़न्ज्योक्की मी खल ॱमीत् तगेन् बेत्। 7 ॱनी हरुङ् यहुदीगी दक् ज्यबे मी घयेत्ल केच्च्य ॱनेम्बु ॱस्यो़क्केल्ल को़न्ज्योक्की पत्रुस्ल ॱलो खीन को़ब हीम्ब डस्सी यहुदीगी दक् मत् ज्यब ज्यी़त् ॱयोङ् ॱयोङ्गी मी घयेत्ल ॱस्यो़क्केल्ल ङल ॱलो खीन को़ब हीम्ब हुबे ॱह घोसोङ्। 8 यहुदी घयेक्की घुङ्दु ठीक्नले ले झ्यीक्केल्ल पत्रुस्ल ॱस्यीक् ॱनङ्गेन् दीगी ङल अक् ज्यी़त् ॱयोङ् ॱयोङ्गी मी घयेक्की घुङ्दु ठीक्नले ले झ्यीच्च्येल ॱस्यीक् ॱनङ्न यो़त्। 9 ॱनी को़न्ज्योक्की थुज्यीगी ङ घन्दुक्मे लेल को़ब बेक्क हुगो चो छ्यीया छ्यो़ छोगी का धोम्बु डस्सील ॱसम्न यो़क्केन् याकुब्, पत्रुस् धङ् युहन्ना झ्यीबे हुनी क ॱह घोसोङ्। खोबसो यहुदी घयेत् च्येल्ल डोवल धङ् यङ् ङदङ् बार्नाबास् ज्यी़त् ॱयोङ् ॱयोङ्गी मी च्याल डोवल छ्य च्यीक्की मी हीम्ब ॱसम्न ङीत्ल खोबसो़ लक्प ॱयेब तङ्न थी़न्डीक् झ्यीज्युङ्। 10 ॱनी खोबसो़ ङीत्ल हीगी टङ्बु घयेत्ल दगु झ्यीत्रो झ्यी सीन्न हीगोरङ् क सीच्च्युङ्। हीगो त ङे ॱसीम्बे एक् झ्यीच्च्ये ॱनो़ब यो़त्। पत्रुस्की ङीबे ढीक्ल पावल्की लप्स्य ११-२१ 11 हुनी तीङ्ला पत्रुस् लेन् च्यीक् एन्टीयोक्ल युङ्नी, हुदु गोत्ते ङीब झ्यीबे ढीक्ल ॱयोङ्म कुरीक्की घुङ्दु ङे गोत्तल लप्स्य तङेन्। 12 हुदु एल्ला गोत्त ज्यी़त् ॱयोङ्गी मीदङ् मुल देत्न छीगङ् सम सेबे मी यङ् तीङ्ला यरुशलेम्नी याकुब् च्यानी यहुदी ज्यी़क्की मी यरी युङ्नी, गोत्त ज्यी़त् ॱयोङ्गी, एन्टीयोक्की पी़न्ज्या घयेत्तङ् भीज्येम ॱयेङ्दुक्। घन्ड हीन् सीन्न दक् ज्यक् गोगेन् बेत् सीक्केन् यहुदी ज्यी़क्की पी़न्ज्या घयेत्ल ज्यीबे, हुन्दुक् झ्यीदुक्। 13 गोत्ते ख यच्च्येक्की लुस डस्सी दील हुगी यहुदी ज्यी़क्की पी़न्ज्या ॱयोङ्म घयेत् दीबे गोत्ते ॱमीदेल तेनी, हुब अक् हुगो डस्सील झ्युङ्सोङ्। ॱनी बार्नाबास् थम्ज्येत् गोत्ते ख यच्च्येक्की लुसल छ्यी़सोङ्। 14 हुबे हुन्दुक् झ्यीन दीम्बे केच्च्य ॱनेम्बुल मीत् डीक्पे लुस झ्यीप्प ङे थोङ्नी हुदु ॱयोङ्म कुरीक्की थोङ्सदु ङे पत्रुस्ल रङ् यहुदी बेत्। ॱनी हीन्न अक्, यहुदीगी छ्यलु दी फङ्न स्यक्नी ज्यी़त् ॱयोङ्गी छ्यलु डस्सी रङ्गी झ्यीक्केन् बेत्। ॱनी यङ् रङ्गी हुन्दुक् झ्यीबे लेमु झ्यीन ज्यी़त् ॱयोङ्गी पी़न्ज्या घयेत्ल अक् यहुदीगी छ्यलु डस्सी झ्यीत्तु ची़क्केन्? 15 हज्यरङ् को़न्ज्योक्की कल ॱमीत् चीगेन् दीक्च्येन् डस्सी ज्यी़त् ॱयोङ्गी मी मेम्ब, हज्यरङ् यहुदीगी ज्यी़त् बेत्। 16 छ्यो़डीम्गी कल चीन युङे लम्नी ॱनम्बर् धक्पल ॱमीत् थो़ङ्गेन् हीम्ब धङ् ॱनम्बर् धक्प दील येशु ख्रीष्ट्ल छ्य स्यक्पे लम्नी क थो़ङ्गेन् हीम्ब हज्यरङ्ल ॱस्यो़च्च्ये यो़क्केन् बेत्। हुन्दुक् झ्यीन छ्यो़डीम्गी कल चीन युङे लम्नी मीत् युङल ख्रीष्ट्ल छ्य स्यक्पे लम्नी को़न्ज्योक्की ॱनम्बर् धक्पल तो़ङ्गेन् झ्यीनी, हज्यरङ् यहुदी हीन्न अक्, ख्रीष्ट् येशुल छ्य स्यक्न यो़क्केन् बेत्। घन्ड हीन् सीन्न छ्यो़डीम्गी कल चीन युङे लम्नी कोलीमी ॱसु उक् ॱनम्बर् धक्पल थो़न् ॱमीत् छुगेन् बेत्। 17 ख्रीष्ट्की लम्नी ॱनम्बर् धक्पल थो़न्ज्ये ॱनो़बे ॱसम्ल हज्यरङ्गी खुको़र्त्न ॱनी, हज्यरङ् अङ् छ्यो़डीम्गी कल ॱमीत् चीगेन् दीक्च्येन् हीम्बल डोगेन् बेत्। हीगो हीन्न ॱनी, दीक्प झ्यीत्तु ची़क्केन् दी ख्रीष्ट् बेक्क ॱनी? मेम्बेत् हीगो। 18 छ्यो़डीम्नी ॱनम्बर् धक्पल ॱमीत् थो़ङ्गेन् बेत् सीन्न एल्ला हुगो ॱलो़ तङ्न स्यक्। यङ् हुन्दो ङे हुगोरङ् ॱसम्गो़त्न ॱनी, हुगो ङरङ्गी ङरङ् छ्यो़डीम्ल ङीबल डोगेन् बेत्। 19 ङ एल्ला छ्यो़डीम्गी कल चीन युङे यङ्ल छ्यो़डीम्नी ॱनम्बर् धक्पल ॱमीत् थो़म्ब ॱह घोनी, ङ को़न्ज्योक् ङो़ल ॱसोम्बु युङ्ज्ये यो़प्पल छ्यो़डीम्नी भीनी हुगो ङो़नी ॱस्यीनरदङ् छ्येत्मीत् झ्युङ्। 20 ङ ख्रीष्ट्तङ् दल कुरुस्ल तान ॱस्यीनरदङ् च्यीक्प हीन्। हीगो झ्यीनी ङ ॱसोम्बु मेन्। ङे मीजी च्योङ्गेन्, ङे ॱसीम्ल ख्रीष्ट् ॱसोम्बु यो़त्। ङ ॱस्यस्सी़ हील यो़स्स्यीङ् भोर्ल ङल झ्यम्ब जेक्केन्, ङे धो़न्दु ॱरोक् च्यो़गेन् को़न्ज्योक्की ॱरेबुल ङ ॱलो केन दो़क्को़त्। 21 को़न्ज्योक्की ङल नुक्मे थुज्यी छ्यीय ॱनङ्नी, हीगो ङ घो ॱमीत् छ्यो़त्ल ॱमीत् ॱसम्। छ्यो़डीम्गी कल चीन युङे लम्नी ॱनम्बर् धक्पल थो़न् छुगेन् हीन्न ॱनी, ख्रीष्ट् धो़म्मीत्ल ढोङल डोगेन् बेत् सीन्न पत्रुस्ल झ्यीबेन्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.