गलाती 1 - ल्होमी1-2 ङ ठीक्नल पावल् धङ् ॱनी हीन ङदङ् दल यो़क्केन् पी़न्ज्या घयेक्की गलाती लुङ्बे छ्यो़ छो घयेत्ल हीगो ढीन तो़ङ्गो़त्। ॱनी ङ मी घयेत् च्यानी मी को़न तङे ठीक्नल मेन्। येशु ख्रीष्ट् धङ् खोङ् ढोङ्नरनी ॱसोम्बुल ॱलोङ्गेन् यप् को़न्ज्योक्की ङ ठीक्नलल को़न तङ्ज्युङ्। 3 खीत्रङ् घयेत्ल हज्यरङ्गी यप् को़न्ज्योक् धङ् चोव ज्यीन्दक् येशु ख्रीष्ट् च्यानी थुज्यी धङ् ॱसीम् दीव युङ्ज्ये यो़प्प तोङ्। 4 हज्यरङ्गी यप् को़न्ज्योक्की थुल यो़प्पल ख्रीष्ट् हज्यरङ्गी दीक्प घयेक्की ढीक्ल हज्यरङ् घयेत् धीङ्सङ्गी हीगी धी़ ङेम्बे छ्यलु घयेत्नी थर्च्ये यो़प्पल खोङ्गी रोरङ्गी ॱरोक् च्येब बेत्। 5 को़न्ज्योक्ल धी़ नम ज्यी़न्दु तो़प्प युङ् युङ युङ्ज्ये यो़प्प स्योक्च्यीत्। आमेन्। केच्च्य ॱनेम्बु ॱयोङ्म ६-१० 6 ख्रीष्ट्की थुज्यीगी लम्ल भो़क्केन् को़न्ज्योक् खीत्रङ्गी नुक्मे ज्योब ॱलो़ तङ्न केच्च्य ॱनेम्बु ॱयोङ्म ॱसम्गुक् सीर ॱह घोनी, हुल ङ दो़न्दो़त् ॱह लेज्युङ्। 7 हुगो केच्च्य ॱनेम्बु हीन्दोक्प यो़क्केन् बेत्। ॱनी म दी हुगो ॱस्युली मेम्बेत्। हुगी मी यरी खीत्रङ् च्याल युङ्न हुबे खीत्रङ् गो थोम्दु ची़त्न ख्रीष्ट्की ढीक्की केच्च्य ॱनेम्बु दी हुबे ज्युर्च्ये ॱनो़ब झ्यीक्केन् बेत्। 8 ङीक्की एल्ला खीत्रङ्ल ॱस्येत्न टेप्पे केच्च्य ॱनेम्बुल मीत् डीक्केन्, केच्च्य ॱयोङ्म ॱस्यो़त्तु युङ्गेन् ङीत्रङ् हीन्, तेङ् यी़गी भङ्ज्येम्बरङ् हीन्न अक्, हुल को़न्ज्योक्की ॱमो़त्मु सुक्ल ज्युक्च्यीत्। 9 ङीक्की खीत्रङ्ल एल्ला आक् ॱस्येप्पेन्। ॱनी यङ् हुन्दो ओक् सीक्को़त्। ङीक्की च्यानी ॱह घोवे केच्च्य ॱनेम्बुल मीत् डीक्केन्, केच्च्य ॱनेम्बु ॱयोङ्म ॱस्यो़क्केन् ॱसुरङ् युङ्न अक्, हुल को़न्ज्योक्की ॱमो़त्मु सुक्ल ज्युक्च्यीत्। 10 ॱनी ङे हीगी तम् हीगो मी गुदोप्की तम् बेक्क न, न को़न्ज्योक् गुवे तम् बेक्क? ङ मी खल तगेन् मेन्। हीन्न ॱनी, ङ ख्रीष्ट्की ॱयोक्पु हीन् दीरङ् ॱमीत् ॱस्यीगेन् बेत्। 11 पी़न्ज्यासो, खीत्रङ्ल ङे ॱस्येप्पे केच्च्य ॱनेम्बु हुगो मी पीबे, 12 मी च्यानी झ्युङे, मी ॱलबे केच्च्य मेम्बेत्। हुगो येशु ख्रीष्ट्की ङल तो़न्न ॱसल्तु ची़च्च्युङ्। पावल् ठीक्नलल खो़प्पे लेमु १३-२४ 13 ङ एल्ला यहुदीगी छ्यो़लुल चीन दो़प्पे कप्ल ङे छ्यलु खीत्रङ्गी ॱह घोन यो़क्केन् बेत्। को़न्ज्योक्की छ्यो़ छो घयेत्ल ॱङीङ्ज्यी मीप्प, ङे दुक्प अयेक्प तङ्न मीत्तल तोङ् छुब झ्यीबेन्। 14 हुगी यङ्ल यहुदीगी छ्यो़लुल चीगेन् छ्यीट्टो ॱयोङ्माले ङे ॱल्हक्मा ॱसम्न पुबु ॱमुमी़ टोलु घयेत्ल अक् ॱसीम्नी धेप्पे छ्योरी छ्यीम्मु लङ्न झ्यीबेन्। 15 ॱनी ङ आमे ढोप्पे नङ्दु यो़प्पनीरङ् को़न्ज्योक्की दम्न खोङ्गी थुज्यीगी ङ खोङ्गी लेल भो़दुक्। 16 ङ ज्यी़त् ॱयोङ् ॱयोङ्गी मी घयेत्ल खोङ्गी ॱरेबी़ ढीक्की केच्च्य ॱनेम्बु ॱस्येत्न टोम्गेल्ल डो छुज्येल को़न्ज्योक्की ॱरेबु ङल खोङ् थु गुन तो़न्ज्युङ्। ॱनी ङे हीगी ढीक्ल कोलीमी ॱसुल आक् ढो़ मत् ढी। 17 यरुशलेम्न यो़क्केन्, ङले एल्ला खो़प्पे ठीक्नल घयेत् च्याल आक् ॱमत् फीन्। ङ ॱस्यर्च्यक् अरब् लुङ्बल फीम्बेन्। हुनी तीङ्ला दमस्कस् सार्ल लोक्न युङेन्। 18 ॱनी तोम्दु लोङ ॱसुम् ॱसोङ्नी क, हस्सो़त् पत्रुस्तङ् ङोस्स्यीन् झ्यीत्तु ङ यरुशलेम्ल फीम्बेन्। ॱनी हुदु खोङ्जोदङ् दल स्यक्पु च्येङ देप्पेन्। 19 ॱनी हुदु चोव ज्यीन्दक्की मीङ्बु याकुब् मेन्द, ठीक्नल ॱयोङ्मा ॱसु उक् ठेत्मोङ्। 20 ङे ढीबे केच्च्य घयेत् हीगो खुङ्देन् हीन् धङ् मेल्ल को़न्ज्योक् पङ्बुल यो़त्। 21 ङ हुनी सीरीया धङ् सीलीसीया लुङ्बल फीम्बेन्। 22 ॱनी हुगी यङ्ल यहुदीयान यो़क्केन्, ख्रीष्ट्की छ्यो़ छो घयेक्की मीस्सीर् घयेत् दीबे हीजो़त् थुक्ल ङे ङोरी थोङ् ॱमत् ॱनोङ बेत्। 23 हुबे ङे ढीक्ल रोरङ्सो ॱनम्बु हज्यरङ्ल एल्ला दुक्प अयेक्प तङ्न हज्यरङ्गी छ्य स्यक्पे लेमु दी मीत्तल तोङ् छुब झ्यीक्केन् दीगी हुन्दो यङ् हीगी केच्च्य हीगो क ॱस्येत्न टोम्गुक् सीर मेन्द, ॱह मत् घोव हीङ्गो़प्प बेत्। 24 ङ ज्युर्न युङे ढीक्ल हुबे को़न्ज्योक्ल तो़प्प पुब हीङ्गो़प्प बेत्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.