एफीसस् 6 - ल्होमीफम धङ् भीजल ॱलोप्स १-४ 1 भीजसो, खीत्रङ् चोव ज्यीन्दक्की थुल डोवल रङ् रङ् ॱसोस्सो़ फमे खल नेन्ज्यीत्। हीगो ओ़ब यो़क्केन् बेगो। 2-3 हीगी ढीक्ल ॱसुङ्रप्ल थो़ङ्गेन् बेत्। फमल खुच्च्य झ्यीज्यीत्। हुनी रङ् जम्बुलीङ् हीदु छी रीङ धङ् ॱसोदी च्येम्म युङ्गेन् बेगो। (ठीम्लु ५:१६) हीगो छ्यो़डीम्गी क घयेक्की छीक्नी ॱमेल्लम् च्येम्मे क ॱएन्स्युक्म दी बेगो। 4 ॱनी यङ् खीत्रङ् पब घयेक्की रङ् रङ् ॱसोस्सो़ भीजल खोङ्डोक् लङ्गेङ्गी केच्च्य मत् लप्च्यीत्। बोर चोव ज्यीन्दक्की लम्ल डीक्प युङे ॱलोप्च्य तो़न्ज्य झ्यीन ॱसो़ज्यीत्। ॱयोक्पु धङ् दक्पुल ॱलोप्स ५-९ 5 रङ्मो़ मीप्पे ॱयोक्पु घयेस्सो, खीत्रङ्गी ख्रीष्ट्की कल चीय डस्सी दी ॱसोस्सोरङ्गी ज्यीन्दक्की खल आक् नेन्न खुच्च्य झ्यीन ज्यीब खुर्न ॱसीम्बे यीक्नीरङ् स्यप्च्यी़ ज्युज्यीत्। 6 ख यच्च्येक्की दक्पु गुदोप्की ले मत् झ्यीप्प, ख्रीष्ट्की ॱयोक्पु हीम्ब डस्सी को़न्ज्योक्की थुल यो़प्पे ले झ्यीक्को़त् ॱनो़न कप्टी ॱमत् ॱस्यो़प्प ॱसीम्बे यीक्नीरङ् झ्यीज्यीत्। 7 हुगो मील ले झ्यीन तीक्को़त् ॱनो़ब ॱमत् ॱसम्ब, चोव ज्यीन्दक्ल स्यप्च्यी़ पुगो़त् ॱनो़ब ॱसम्न धेस्सो़ झ्यीज्यीत्। 8 घन्ड हीन् सीन्न ले गङ्ज्येन् झ्यीक्केल्ल हुगो रङ्मो़ च्येम्मे मीरङ् हीन्, रङ्मो़ मीप्पे ॱयोक्पुरङ् हीन्न अक्, चोव ज्यीन्दक्की दम्ङीत् मीप्प, लेन् ॱनङ्गेन् बेत् सीर हीगो खीत्रङ्गी ॱह घोव झ्यीज्यीत्। 9 ॱनी यङ् खीत्रङ् ज्यीन्दक् घयेक्की इक् ॱसोस्सोरङ्गी ॱयोक्पुल हुगो डस्सीगी ॱसीम् दीरङ् खुर्न झ्यीज्यीत्। खीत्रङ्गी ॱयोक्पु हुब खीत्रङ्गी खल मत् नेन्न, हुबल ज्यीक्टक् लङ्गेङ्गी केच्च्य मत् लप्च्यीत्। घन्ड हीन् सीन्न खीत्रङ् ॱङीक्कर्ल तेङ् यी़न दम्ङीत् मीत् झ्यीक्केङ्गी चोव ज्यीन्दक् यो़क्केन् बेत् ॱनो़ब ॱसम्ज्यीत्। ॱमक्ल डोये घो़ धङ् छो़न्ज्य १०-२० 10 ह स्युक् थदु खीत्रङ् चोव ज्यीन्दक्तङ् मत् ढेबल खोङ्गी ॱस्यीक् छ्यीम्मी़ ॱलोप्स्यीक् ॱङीत्न, ज्यीक्तु डोज्ये यो़प्प ज्युक्च्यीत्। 11 ॱयोज्यी़ ठम्ज्यी़ झ्यीक्केन् दी़क्की चो हुगोदङ् थुक्न थीरी दो़त् छुबल ॱमक्ल डोये यङ्ल गो़बे को़न्ज्योक्की ॱनङे घो़ धङ् छो़न्ज्य घयेत् कुरीक् खुर्न ॱमक्च्ये ज्योप्च्यीत्। 12 ॱनी हज्यरङ्दङ् थुक्री चीगेन् हुगो कोलीमी मेम्ब, ॱवङ् च्योङ्गेन् घयेत्, ॱवङ् च्येम्म घयेत्, जम्बुलीङ्गी मेन्नक् ङो़गी चोबो़न् घयेत् धङ् ॱलुङ्ल गीर्केन् ॱनो़प्प अयेक्प घयेत् हुब बेत्। 13 हीगो झ्यीनी ॱमक्ल डोये यङ्ल गो़बे को़न्ज्योक्की ॱनङे घो़ धङ् छो़न्ज्य घयेत् कुरीक् खुर्न ॱमक्च्ये ज्योप्च्यीत्। हुनी क ङेम्बे ङीन् ॱलीबे ॱङेस्स्यो हुगोदङ् थुक्न ज्येबर् थो़न्न दो़त् छुब युङ्गेन् बेत्। 14 दीम्बे कबु कीङ्ज्यीत्। ढङ्गोक् छ्योप्केन् ढङ्बी़ च्यागी घो़ दी घो़न्न थीरी दो़च्च्यीत्। 15 ॱसीम् दीव युङे केच्च्य ॱनेम्बु ॱस्यो़त्तु डो छ्योक् च्येम्मे जुत्त दी घो़न्न दो़च्च्यीत्। 16 ॱनी यङ् दी़त्ङेन् हुगी मी बर्केङ्गी द बेन्न युङे यङ्ल हुगो लीङ्गेन् छ्य स्यक्पे फुक् दी छ्यर्च्ये यो़प्पल खुर्च्यीत्। 17 हीनी हरुङ् गोल छ्योप्केन्, थर्वे च्यागी स्यमुङ् दी घो़न्ज्यीत्। लक्ल यङ् धम्बे थुगी ढी पदङ् दी खुर्च्यीत्। पदङ् हुगो को़न्ज्योक्की ॱसुङ्रप् बेगो। 18 धम्बे थुगी लम् ज्यी़त्नी छीगङ् छङ्म थम्ज्येक्की ढीक्ल ॱसुव तप्न स्युदेन् ज्यप् ज्यब झ्यीज्यीत्। हीगी ढीक्ल ॱसीम् च्यङ्जो़त् झ्यीन को़न्ज्योक्की मी चङ्म घयेक्की ढीक्ल धु च्यङ्न ॱसुव तप् तब झ्यीज्यीत्। 19 एल्ला ॱमत् तो़म्बे ॱङीङ्बु केच्च्य ॱनेम्बु हुगो ङे खनी ॱस्यो़प्पे यङ्ल गो़बे तम्गी छीक्ट ॱङीत्न ज्यीक्टक् मीप्प ॱस्यो़त् छुज्ये यो़प्पल ङे ढीक्ल अक् ॱसुव तोप्रो झ्यीज्यीत्। 20 ङ हीगो ॱस्यो़क्केल्ल ख्रीष्ट्की छप्पु हीन्। ॱनी हीगी ढीक्ल ङ चो़ल्ल ॱस्योर्न यो़त्। ज्यीक्टक् मीप्प घन्दुक् झ्यीन ॱस्यो़त् गोगेन् बेक्क हुगो डस्सी ॱस्यो़त् छुज्ये यो़प्पल ङे ढीक्ल ॱसुव तोप्रो झ्यीज्यीत्। स्युक् जोबे केच्च्य २१-२४ 21 ङल घन्दुक् झ्यीब झ्युङ्दुक्क, ङे घन्ड झ्यीगुक्क हुगो खीत्रङ्ल ॱस्यो़च्च्ये युङल हज्यरङ्गी झ्यम्बे पी़न्ज्या चोव ज्यीन्दक्की ॱयोक्पु तेम्बोक्म टैकीकस्की कुरीक् ॱस्येत्न टो़क्केन् बेत्। 22 ॱनी ङीत् हीन घन्दुक् झ्यीब दुक्क हुगो खीत्रङ्ल ॱस्यो़च्च्ये युङल धङ् खीत्रङ् घयेत्ल ॱलोप्स्यीक् टो़च्च्येल टैकीकस् तोङ्गेन्। 23 ॱनी यप् को़न्ज्योक् धङ् चोव ज्यीन्दक् येशु ख्रीष्ट्की खीत्रङ् पी़न्ज्या घयेत्ल ॱसीम् दीव धङ् छ्य स्यक्पे लम्नी झ्यम्बे ॱसीम् ॱनङ्ज्ये यो़प्प तोङ्। 24 हज्यरङ्गी चोव ज्यीन्दक् येशु ख्रीष्ट्ल धी़ ज्यी़न्दु झ्यम्ब यो़क्केङ्गी मी घयेत्ल थुज्यी थोप् थोब युङ्ज्ये यो़प्प स्योक्च्यीत्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.