एफीसस् 5 - ल्होमीओ़ब मीप्पे लेमु घयेत् १-७ 1 खीत्रङ् को़न्ज्योक्की झ्यम्बे भीज झ्यीनी, खोङ्गी ॱमीदेल तेन झ्यीन युङ् गोगेन् बेत्। 2 ख्रीष्ट्की झ्यम्ब छ्यीम्मु जेत्न हज्यरङ्गी धो़न्दु खोङ् रोरङ्गी ॱरोक् दीरङ् च्येब बेत्। ॱनी खोङ्गी ॱरोक् दी को़न्ज्योक् गुवे ढीम स्यीम्बोक्म ॱहीक्केङ्गी छ्यो़प्पल झ्युङ बेत्। ॱनी खीत्रङ्गी इक् घन्ड झ्यीत् गो़ झ्युङ्न अक्, झ्यम्बे लम्नी झ्यीत् गोगेन् बेत्। 3 हुनी खीत्रङ् नङ्दु छ्येगी ले, चङ्ज्ये मीप्पे ढङ्, लोप् धङ् हीन्दुक् झ्यीब म दीरङ् ज्यी़त् च्यीक् इक् युङ्ज्ये मीप्प झ्यीज्यीत्। हीन्दुक् झ्यीब को़न्ज्योक्की मी चङ्म घयेत्ल ओ़ब मीत् युङ्गेन् बेत्। 4 ॱनी ङु छमीक्की ज्यलप्, धो़म्मीक्की तम् धङ् स्यीन्जोक्की तम् हुन्दुक् झ्यीब मत् ओ़बे केच्च्य मत् लब, बोर को़न्ज्योक्ल थु छ्यी पु पुब झ्यीज्यीत्। 5 छ्ये, चङ्ज्ये मीप्पे लेमु, लोप् झ्यीक्केन् धङ् हुन्दुक् झ्यीक्केङ्गी मी ॱसुल आक् ख्रीष्ट् धङ् को़न्ज्योक्की ज्यागक्की थर्वे फक् दी ॱमीत् थोप्केन् बेत्। लोप्की ले हुगो ॱल्ह धङ् कुल छ्यक् छ्यो़प्प पुबल डोगेन् बेत्। हीगो खुङ्देन् हीम्ब ॱह घोव झ्यीज्यीत्। 6 खोङ्गी कल ॱमीत् चीय, हुन्दुक् झ्यीक्केन् घयेत्ल को़न्ज्योक्की खोङ्डोक्की छ्येप्प फोक्केन् बेत्। हीगो झ्यीनी खीत्रङ्ल मी ॱसी़ धो़म्मीक्की केच्च्य ॱस्येत्न च्युदु युङ्गुक्क हुल ॱमत् छ्यी़ब दो़च्च्यीत्। 7 हुन्दुक् झ्यीबे मी घयेत्नी खीत्रङ् जीम्न दो़च्च्यीत्। मेङ्गल युङ्गेङ्गी लेमु घयेत् ८-२० 8 एल्ला खीत्रङ् मेन्नक्ल यो़क्केन् बेत्। ॱनी हुन्दो चोव ज्यीन्दक्तङ् मत् ढेबल मेङ्गल यो़क्केन् बेत्। हीगो झ्यीनी मेङ्गे ज्यी़त् हीम्ब डस्सी झ्यीज्यीत्। 9 मेङ्गे डेबु दील सङ्बु, ढङ्बु धङ् दीम्ब युङ्गेन् बेत्। 10 चोव ज्यीन्दक् थु गुवे लेमु घयेत् नम् च्येत्न ॱस्यीब झ्यीज्यीत्। 11 घो ॱमीत् छ्यो़त् मेन्नक्की ले घयेत्तङ् मत् रीब, बोर हुबे ङीबे ले घयेत् दी हुगो ङीब हीम्ब हुबल तो़न्ज्यीत्। 12 हुबे केत्मीत्ल झ्यीबे ले घयेत् हुगो छीक्टल च्योरल आक् ङु छगेन् बेत्। 13 ॱनी म दी मेङ्ग घदु फोक्कुक्क हुदु थोङ्गेन् बेत्। 14 छङ्म थम्ज्येत् थोङ्सल तो़ङ्गेन् दी मेङ्ग बेत्। हीगी ढीक्ल हीन्दुक् सीर थो़ङ्गेन् बेत्। ॱवे ॱङीत्ल ॱसोङ्नर, ॱङीत् सेत्न ॱस्यीवनी लोङ्। हुनी रङ्ल ख्रीष्ट्की मेङ्ग पेक्केन् बेत्। 15 हीगो झ्यीनी खीत्रङ्गी मीजीगी छ्यलुल खेजो़त् झ्यीन धो़र्रीक् मीप्पे मी डस्सी मेम्ब, धो़र्रीक् च्येम्म डस्सी झ्यीज्यीत्। 16 दङ् हरीङ्गी हीगी धी़ हीगो ङेम्बे धी़ बेत्। ॱनी हीगी धी़गी कप्ल खीत्रङ्गी गये ले घन्ड झ्यीत् छुगुक्क हुगो झ्यीज्यीत्। 17 खीत्रङ् घुवे लेमु डस्सी मत् झ्यीब, खीत्रङ्गी ढीक्ल चोव ज्यीन्दक्की थुल घन्ड यो़दङ् हुगो ॱह घोव झ्यीज्यीत्। 18 च्युर्की मत् सीज्यीत्। हुगी लेमु अयेक्प झ्यीत्तु ची़क्केन् बेगो। बोर धम्बे थुगी घेङ् घेङ झ्यीच्च्ये ॱनो़बे ॱसीम्ब खुर्च्यीत्। 19 ॱसुङ्रप्की गुल्लु, तो़त्लु धङ् धम्बे थुगी ॱनङे ॱलु घयेत् खीत्रङ् घयेक्की कङ्ज्यीक्ल ॱसीम्बे यीक्नी लीन्न चोव ज्यीन्दक्ल पुज्यीत्। 20 धो़न् घन्ड झ्युङ्न अक्, हुगी ढीक्ल यप् को़न्ज्योक्ल चोव ज्यीन्दक् येशु ख्रीष्ट्की छेङ्गी लम्नी छीगङ् थु छ्यी पु पुब झ्यीज्यीत्। छ्योबु छ्युङ्मल ॱलोप्स २१-३३ 21 ख्रीष्ट्ल तो़प्प झ्यीच्च्ये ॱनो़न खीत्रङ् च्यीक्तङ् च्यीक्की ॱवङ्गी होक्ल दो़च्च्यीत्। 22 ॱनी खीत्रङ् भुमु घयेत् चोव ज्यीन्दक्की ॱवङ्गी होक्ल देप्प डस्सी ॱसोस्सोरङ्गी छ्योबी़ ॱवङ्गी होक्ल अक् दो़च्च्यीत्। 23 घन्ड हीन् सीन्न ख्रीष्ट् छ्यो़ छोगी गो हीम्ब डस्सी छ्युङ्मे गो दी इक् रोरङ्गी छ्योबु युङ्गेन् बेत्। ॱनी ख्रीष्ट्की सी़, छ्यो़ छो हीगी च्यप्को़न् दी खोङ्रङ् बेत्। 24 ख्रीष्ट्की ॱवङ्गी होक्ल छ्यो़ छो यो़प्प डस्सी भुमु धो़न् घन्डल अक् ॱसोस्सोरङ्गी छ्योबी़ ॱवङ्गी होक्ल दो़त् गोगेन् बेत्। 25 ॱनी ख्रीष्ट्की छ्यो़ छोगी धो़न्दु रोरङ्गी ॱरोक् दीरङ् च्येन घन्दुक्मे झ्यम्ब छ्यीय जेत्तुक्क हुगो डस्सी छ्योगो घयेक्की इक् रोरङ्सो़ छ्युङ्मल झ्यम्ब झ्यीत् गोगेन् बेत्। 26 ॱनी खोङ्गी ॱरोक् च्यो़ज्येगी धो़न् दी खोङ्गी मीस्सीर् छ्यो़ छो हुगो छ्यी़ टी़न खोङ्गी ॱसुङ्रप्की धक्पर् युङल सो़न, 27 हुल नक्पी़ जी मीप्प, ॱङीम्म मीप्प, च्यो़न् मीप्प, नक्चक् मीप्प, चङ्म झ्युङ्न खोङ् रोरङ्गी ढीक्ल हुगी छ्यो़ छो हुगो ओ़च्च्य च्येम्म जीबोक्म युङे ढीक्ल बेत्। 28 नङ्जङ् च्येम्मे छ्योगो घयेक्की रोरङ्सो़ ली़ल झ्यम्ब झ्यीब डस्सी रोरङ्सो़ छ्युङ्मल आक् झ्यम्ब झ्यीत् गोगेन् बेत्। छ्योबी़ छ्युङ्मल झ्यम्ब झ्यीब हुगो रोरङ्गी रोरङ्ल झ्यम्ब झ्यीबल डोगेन् बेत्। 29 रोरङ्गी सी़ल ॱमीत् तगेङ्गी मी दी ॱसु दी यो़प्प बेक्क? मी ॱसोस्सोरङ्गी रोरङ्गी सी़ल गो़बे से टेत्न गये लेमु झ्यीक्केन् बेत्। ॱनी हीगो डस्सी ख्रीष्ट्की इक् खोङ् रोरङ्गी सी़ छ्यो़ छोल हुन्दुक् दीरङ् जेक्केन् बेत्। 30 ॱनी हज्यरङ् कुरीक् खोङ्गी सी़गी यल्लक् बेत्। 31 ॱसुङ्रप्ल थो़ङ्गेन् बेत्। अबी छ्योगो घयेत् रोरङ्सो़ फम च्यानी भीनी, रोरङ्गी छ्युङ्मदङ् मुल झ्युङ्न हुब ॱङीबी़ ली़ दी च्यीक् हीम्बल डोगेन् बेत्। (छ्यारप् २:२४) 32 हीगो ख्रीष्ट् धङ् छ्यो़ छोगी ढीक्ल ॱङीङ्बु तीङ् सप्पोक्म यो़क्केन् दी बेत्। 33 खीत्रङ् छ्योगो घयेत् ॱसोस्सोरङ्गी रङ्गी रङ्ल झ्यम्ब झ्यीक्केन् डस्सी छ्युङ्मल झ्यीत् गोगेन् बेत्। ॱनी छ्युङ्मे यङ् रोरङ्गी छ्योबुल तो़प्प झ्यीत् गोगेन् बेत्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.