कलस्सी 4 - ल्होमी1 दक्पु घयेस्सो, खीत्रङ्ल आक् तेङ् यी़न चोव ज्यीन्दक् यो़क्केन् बेत् ॱनो़ब ॱसम्न खीत्रङ्गी रङ्मो़ मीप्पे ॱयोक्पु घयेत्ल ढङ्बु झ्यीन हुबल थोबे थोप् ओ़ब घयेत् टो़च्च्यीत्। ॱसुव तप् तब झ्यीत् गोगेन् २-६ 2 खीत्रङ् धु च्यङ्न को़न्ज्योक्ल ॱसुव तप् तब झ्यीज्यीत्। को़न्ज्योक्ल थु छ्यी पु पुब झ्यीन च्यङ्जो़त् झ्यीन दो़च्च्यीत्। 3 ॱनी एल्ला ॱमत् तो़म्बे ॱङीङ्बु ख्रीष्ट्की केच्च्य हीगो ङीक्की ॱस्यो़त् छुज्ये यो़प्पल को़न्ज्योक्की गोच्च पीक्रो झ्यी सीन्न ङीक्की ढीक्ल अक् ॱसुव तोप्रो झ्यी। ङ हुन्दो खोङ्गी केच्च्य ॱस्येप्पे ढीक्ल चो़ल्ल ॱस्योर्न यो़त्। 4 ॱनी हीगी केच्च्य हीगो ङे मी घयेत्ल घन्दुक् झ्यीन ॱस्येत्न टोम् गोगेन् बेक्क हुगो डस्सीरङ् ॱस्यो़त् ॱस्यीज्ये यो़प्पल ॱसुव तोप्रो झ्यीज्यीत्। 5 खीत्रङ्गी मीजीगी लेमु दी छ्यी मी घयेक्की घुङ्दु धी़ ज्यी़न्दु च्यङ्जो़त् झ्यीन युङ् गोगेन् बेत्। 6 ॱयोङ्दङ् लबे यङ्ल खीत्रङ्गी केच्च्य दी ॱनेम्बोक्म छ ढोव डस्सी ॱनेन्ज्य च्येम्म लप्च्यीत्। हुब री रील घन्दुक् झ्यीन तम्लेन् ॱलोक् गोगेन् बेक्क हुगो खीत्रङ्गी ॱस्यीब झ्यीज्यीत्। छ्यक्सुम् थेमु तोङ्गेन् ७-१८ 7 हीदु ङल घङ् झ्युङे केच्च्य घयेत् दी ङे झ्यम्बे पी़न्ज्या ङल दगु थीरी झ्यीक्केन्, चोव ज्यीन्दक्की ॱयोक्पु ङे ले च्यीक्की छ्यीट्टो टैकीकस्की हीगो कुरीक् खीत्रङ्ल ॱस्येत्न टो़क्केन् बेत्। 8 ॱनी खीत्रङ्ल हीगो ॱस्यो़च्च्ये युङल धङ् खीत्रङ् घयेत्ल ॱलोप्स्यीक् टो़च्च्येल टैकीकस् तोङ्गेन्। 9 ॱनी खोङ्जोदङ् दल खीत्रङ् च्येन्नी युङे मी ङीक्की झ्यम्बे तेन्देङ्गी पी़न्ज्या ओनेसीमस् तोङ्गेन्। ॱनी हीदु घङ् झ्युङ घयेत् रोसो़ खीत्रङ्ल ॱस्यो़क्केन् बेत्। 10 ङदङ् दल चो़ल्ल कङ्ज्यीक्ल यो़क्केन् अरीसतार्खस्की खीत्रङ्ल छ्यक्सुम् थेमु सीगुगो। हुनी बार्नाबास्की पी़न् मर्कुस्की इक् खीत्रङ्ल छ्यक्सुम् थेमु सीगुगो। मर्कुस्की ढीक्ल खीत्रङ्ल ङे एल्लादु ॱङान स्यक्पेन्। ॱनी रो हुदु ॱलीत्नी, खीत्रङ्गी ङो धङ् थोङ् झ्यीज्यीत्। 11 ॱनी येशु युस्तस्की इक् खीत्रङ्ल छ्यक्सुम् थेमु सीगुगो। को़न्ज्योक्की ज्यागक्की ले झ्यीक्केन् ङे छ्यीट्टो घयेक्की छीक्नी हीब ॱसुम्रङ् क यहुदी ज्यी़क्की मी बेत्। हीब ॱसुम्गी ङल ॱलोप्स्यीक् गज्येन् टेच्च्युङ्। 12 ॱनी खीत्रङ् च्येन्नी युङे मी ख्रीष्ट् येशुगी ॱयोक्पु इपाफ्रास्की खीत्रङ्ल छ्यक्सुम् थेमु सीगुगो। को़न्ज्योक्की थुल यो़प्पे केच्च्य दी खीत्रङ्गी कुरीक् ॱह घोज्ये यो़प्प धङ् फी़न्सुम् छङल ॱसोङ्न खोङ्गी लम्ल तेम्बर् झ्यीन डो छुज्ये यो़प्पल इपाफ्रास्की खीत्रङ्गी ढीक्ल छीगङ् गन्दीक्म ॱसुव तोप्कुगो। 13 ॱनी खीत्रङ्गी ढीक्ल, लाओडीसीयागी छ्यो़ छो धङ् हीरापोलीस्की छ्यो़ छोगी ढीक्ल इपाफ्रास्की गन्दीक्म कले च्यो़क्कुक्। हीगो खुङ्देन् बेत्। 14 डेमास् धङ् ङे झ्यम्बे दगु ॱमेम्बा लुकागी खीत्रङ् घयेत्ल छ्यक्सुम् थेमु सीगुगो। 15 लाओडीसीयाल यो़प्पे पी़न्ज्या घयेत्, नीम्फस्ल धङ् खोङ्जो़ खीम्दु छुगेन् छ्यो़ छोल छ्यक्सुम् थेमु यो़दो सीन्न सीगुक् झ्यी। 16 हीगी यीगी हीगो खीत्रङ्गी घुङ्दु कुरीक्ल डोन टेत्नी, हुनी लाओडीसीयागी छ्यो़ छोल आक् हीगो डोक्च्येल तोङ्ज्यीत्। ॱनी यङ् ङे लाओडीसीयाल तङे यीगी दी इक् खीत्रङ् च्याल ॱलीत्नी, हुगो ओक् खीत्रङ्गी घुङ्दु कुरीक्की ॱह घोवल डोन टो़च्च्यीत्। 17 ॱनी अर्खीप्पस्ल चोव ज्यीन्दक्की रङ्ल को़बे ले दी कुरीक् डुब झ्यीज्यीत् सीन्न खीत्रङ्गी ॱस्यो़च्च्यीत्। 18 ङ पावल्की खीत्रङ् घयेत्ल छ्यक्सुम् थेमु यो़दो सीक्केन् हीगो ङरङ्गी लक्पे ढीबेनो। ङ चो़न्न यो़प्प दी खीत्रङ्गी टोक् मत् ज्यीब, ढेन्सो़ झ्यीज्यीत्। को़न्ज्योक्की थुज्यी खीत्रङ् घयेत्ल थोप् थोब युङ्ज्ये यो़प्प स्योक्च्यीत्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.