कलस्सी 3 - ल्होमीतेङ् यी़गी ढङ्ल ॱसीम्ब तोङ् १-४ 1 खीत्रङ् ख्रीष्ट्तङ् दल को़न्ज्योक् ङो़ल ॱसोम्बुल ॱलोङ्न यो़क्केन् झ्यीनी, खीत्रङ्गी ॱसीम् दी ख्रीष्ट् झ्यीस्स तेङ् यी़ल तङ्न दो़च्च्यीत्। इगीन ख्रीष्ट् ॱवङ् छ्यीम्मु खुर्न को़न्ज्योक्की ॱये छ्योन स्युन यो़क्केन् बेत्। 2 जम्बुलीङ्न यो़प्पे ढङ्ल मेम्ब, तेङ् यी़न यो़प्पे ढङ्ल ॱसीम्ब तोङ्ज्यीत्। 3 घन्ड हीन् सीन्न खीत्रङ् जम्बुलीङ् ङो़नी ॱस्यीनरदङ् छ्येत्मीत् ढे छर झ्यीनी, खीत्रङ्गी छी दी को़न्ज्योक्की ढुङ्न स्युगेन् ख्रीष्ट्तङ् दल दक्सुम् झ्यीन यो़क्केन् बेत्। 4 ॱनी तीङ्ला खीत्रङ्गी छीये दक्पु ख्रीष्ट् थो़न्न युङे यङ्ल खीत्रङ् ॱअङ् खोङ्दङ् दल थो़न्न खोङ्ल डस्सीगी तो़त्वङ्गी ओ़च्च्य खीत्रङ्ल आक् युङ्गेन् बेत्। आक्पागी ढङ् मत् झ्यीज्यीत् ५-११ 5 हुगो झ्यीनी खीत्रङ्गी ॱसीम्ल लङ्न युङ्गेन् छ्ये, चङ्ज्ये मीप्पे ढङ्, छ्येलङ्गी ॱसीम्, धेच्च्यो ङेम्बे ढङ् धङ् लोप् झ्यीक्केन् हुन्दुक् झ्यीब ङो़नी खीत्रङ् ॱस्यीनरदङ् छ्येत्मीत् ढेन हुन्दुक् मत् झ्यीज्यीत्। लोप् झ्यीक्केन् हुगो ॱल्ह धङ् कुल छ्यक् छ्यो़प्प पुबदङ् छ्येत्मीत् बेत्। 6 हीगी क हील ॱमीत् चीगेन् घयेत्ल को़न्ज्योक्की खोङ्डोक्की छ्येप्प फोक्केन् बेत्। 7 एल्ला खीत्रङ् ॱअङ् हुन्दुक् झ्यीबे ढङ्ल ॱस्योर्न झ्यीक्केन् बेत्। 8 ॱनी हुन्दो खीत्रङ् हुगो डस्सी मेम्बल सीगुक्, खोङ्डोक्, ङेन्सीम्, फालप्, ॱमो़म्बी़त् धङ् 9 खीत्रङ् च्यीक्तङ् च्यीक्ल ॱएलम ज्यक्केन् हीन्दुक् झ्यीबे ढङ् घयेत् फोङ्ज्यीत्। घन्ड हीन् सीन्न ॱएङ्गी ॱसीम् ॱङीङ्ब धङ् हुगी लेमु घयेत् दी ॱलो़ तङ्न, 10 हुन्दो खीत्रङ्ल ॱसीम् ॱसम्ब थोप्न यो़क्केन् बेत्। ॱनी हुगो छ्यादु ची़क्केन् को़न्ज्योक्तङ् खीत्रङ्गी ॱसीम् ॱसम्ब दी ङोस्स्यीन् छ्यीदु युङ धङ् खोङ्गी थुदङ् डगेल्ल गदु युङ सोगेन् बेत्। 11 हीगी ढीक्ल यहुदी हीन्, यङ् ज्यी़त् ॱयोङ्गी मी हीन्, यहुदीगी दक् ज्यबे मी हीन्, यङ् मत् ज्यबे मी हीन्, छ्योनी युङे मी हीन्, यङ् री़ब च्युङागी मी हीन्, रङ्मो़ मीप्पे ॱयोक्पु हीन्, रङ्मो़ च्येम्मे मी हीन्न अक्, हीगो घन्ड अक् मेम्बेत्। ॱनी म चा छ्यीस्स्यो दी ख्रीष्ट् बेत्। खोङ् कुरीक्तङ् दल घदु उक् युङ् छुगेन् बेत्। छ्यो़ छो नङ्जोदु झ्यम्ब झ्यीत् गोगेन् १२-१७ 12 खीत्रङ् को़न्ज्योक्की दम्न चङ्मल सो़बे खोङ्गी झ्यम्बे मी झ्यीनी, खीत्रङ् नङ्दु ॱङीङ्ज्यी, गय, ॱनोम्ज्युङ्, ॱम ॱयुङ्बोक्म धङ् ङङ्रीन् युङ् छुब झ्यीज्यीत्। 13 खीत्रङ् नङ्दु सो़प्प खुर्न दो़च्च्यीत्। चोव ज्यीन्दक्की खीत्रङ्गी ङीब हीन्दुक्रङ्ल धक्तु ची़प्प डस्सी खीत्रङ्गी इक् च्यीक्तङ् च्यीक्की ङीब झ्यीब हीन्दुक्रङ्ल धक्तु ची़च्च्यीत्। 14 ॱनी गो़स्योल च्यीक्तङ् च्यीक्ल झ्यम्ब झ्यीत् गोगेन् बेत्। ॱनी झ्यम्बे लम्नी खीत्रङ् छ्यम्न ॱसीम् च्यीक् ली़ च्यीक् युङ्गेन् बेत्। 15 ख्रीष्ट् च्यानी युङे खीत्रङ्गी घुङ्न यो़प्पे स्यीव दी ज्येबर् युङ स्योक्च्यीत्। घन्ड हीन् सीन्न खीत्रङ् सी़ च्यीक् हीम्ब डस्सी झ्यीन छ्यो़ छोल स्यीव युङ्ज्येल को़न्ज्योक्की भो़ब बेत्। को़न्ज्योक्की ढीन् ॱसम्न खोङ्ल थु छ्यी पुज्यीत्। 16 ख्रीष्ट्की केच्च्य छङ्म खीत्रङ्गी ॱसीम्बे नङ्दु धो़ल्ल ङाब झ्यीज्यीत्। हुनी को़न्ज्योक्की ढीन् ॱसम्न ॱसुङ्रप्की गुल्लु, तो़त्लु धङ् धम्बे थुगी ॱनङे ॱलु ॱसीम्बे यीक्नी लीन्न खोङ्ल पुज्यीत्। हुनी खेजो़त् झ्यीन ॱलप्न च्यीक्तङ् च्यीक्ल फेम्बे ॱलोप्स ज्योप्च्यीत्। 17 ॱनी चोव ज्यीन्दक् येशुगी लम्नी यप् को़न्ज्योक्ल खीत्रङ्गी छीगङ् थु छ्यी पु पुब झ्यीन खीत्रङ्गी तम् लप्लु दी धङ् ले झ्यीत्लु दी चोव ज्यीन्दक् येशुगी मी हीम्ब डस्सी झ्यीन युङ् गोगेन् बेत्। मीजङ् नङ्दु युङ् गोगेङ्गी लेमु ३:१८–४:१ 18 भुमु घयेस्सो, खीत्रङ् ॱसोस्सोरङ्गी छ्योबी़ ॱवङ्गी होक्ल दो़च्च्यीत्। हीगो खीत्रङ् चोव ज्यीन्दक् येशुदङ् मत् ढेब यो़प्प दील ओ़ब युङ्गेन् बेत्। 19 छ्योगो घयेस्सो, खीत्रङ् ॱसोस्सोरङ्गी छ्युङ्मल च्यीब झ्यम्ब झ्यीज्यीत्। चुप्पोक्म मत् झ्यीज्यीत्। 20 भीज घयेस्सो, खीत्रङ् फमे घङ् झ्यीबल नेन्ज्यीत्। हीगो खीत्रङ् चोव ज्यीन्दक्तङ् मत् ढेब यो़प्पे को़न्ज्योक् गुवे लेमु बेत्। 21 फम घयेस्सो, खीत्रङ्गी भीजल मङ् ढाब मत् लप्च्यीत्। लप्न ॱनी, भीज ॱने ॱमदु डोगेन् बेत्। 22 रङ्मो़ मीप्पे ॱयोक्पु घयेस्सो, खीत्रङ् ॱसोस्सोरङ्गी ज्यीन्दक्की घङ् झ्यीबल नेन्ज्यीत्। ख यच्च्येक्की दक्पु गुदोप्की ले मेम्ब, चोव ज्यीन्दक्ल ज्यीब झ्यीन कप्टी मीप्पे ले झ्यीज्यीत्। 23 खीत्रङ्गी घङ् झ्यीप्पे ले दी मील झ्यीन तीक्को़त् ॱनो़ब मेम्ब, चोव ज्यीन्दक्की ले झ्यीक्को़त् ॱनो़ब ॱसम्न ढङ्बु कप्टी मीप्प झ्यीज्यीत्। 24 घन्ड हीन् सीन्न हीगी खीत्रङ्गी थर्वे फक्ल यो़प्पे थोप् ओ़बे ॱल दी चोव ज्यीन्दक् च्यानी थोप्को़त् ॱनो़ब खीत्रङ्गी ढेन्सो़ झ्यीज्यीत्। खीत्रङ्गी स्यप्च्यी़ दी चोव ज्यीन्दक् ख्रीष्ट्ल ज्युबल डोगेन् बेत्। 25 ॱनी यङ् खीत्रङ् ॱसी़ ङीब झ्यीगुक्क हुल हुगी ङीबे छ्येप्प दी फोक्केन् बेत्। घन्ड हीन् सीन्न को़न्ज्योक्की दम्ङीत् मीप्पे ठीम् च्यो़क्केन् बेत्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.