ठीक्नल 9 - ल्होमीशावल्की ॱसीम् ज्युरे तम् १-१९ 1 ॱनी हीगी यङ्ल चोव ज्यीन्दक्की ॱलोप्टुक्ल स्युब घयेत्ल शावल् खोङ्डोक्की ड झ्यीन ॱसो़क्केन् सीन्न ज्यीक्टक् ॱलङ बेत्। ॱनी हुब घयेत् सुङ्ज्येल यहुदीगी छ्यो़प्पो़न् चो छ्यीस्स्यो च्याल 2 पुर्ची लीन्दु फीम्ब बेत्। ॱनी हुगी पुर्ची दी दमस्कस्की सार्की यहुदीगी छ्यो़गी छ्यो़ छो घयेत्ल तो़न्ज्येल बेत्। हुगी पुर्ची दील दमस्कस्तु येशुगी लम्ल डोगेन् छ्योगो भुमु कुरीक् ॱसु ठेत्न आक्, हुगो शावल्की कीङ्न यरुशलेम्ल च्यो़ छुज्ये यो़प्पे ॱहक् हुल ढीन यो़प्प बेत्। 3 हीनी शावल् लम् स्युन फीन्नी दमस्कस्ल ॱलीच्च्येम ॱयेङे यङ्ल इगी तेङ् यी़नी मल्ल ओ़च्च्य छ्यीम्मु च्यीक् शावल्की छीग ॱनमुल पेक्न युङ बेत्। 4 हुनी शावल् म दीरङ् ॱसल डीनर बेत्। हुनी केत् च्यीक्ल ॱवे शावल्, शावल् ङल घन्डल दुक्प अयेक्प तोङ्गेन् सीर रोरङ्गी ॱह घोव बेत्। 5 ॱनी हील शावल्की चोव ज्यीन्दक्, ङल तम् ॱस्यो़क्केन् नीज्यरङ् ॱसु हीम्ब? सीन्न ढीब बेत्। ॱनी हुगी केत् दीगी लेम्बुल ङ येशु हीन्। रङ्गी ङल दुक्प अयेक्प तोङ्गुक्। 6 ह लोङ्ल रङ् हुगी सार् हुल ज्युक्। रङ्गी घन्ड झ्यीत् गोगेन् बेक्क रङ्ल हुदु ॱङक्केन् बेत् सीन्न ॱस्येप्प बेत्। 7 ॱनी शावल्तङ् कङ्ज्यीक्ल डोगेङ्गी दगु दीबे हुगी केत् दी ॱह घोव बेत्। ॱनी केत् दी घोन अक्, ॱसु उक् ॱमत् थोङल नुक्रङ् ओ़न् थोम्न रोङी लेनर बेत्। 8 हुनी शावल् लोङ्न तेनी, घन्ड अक् ॱमीत् थोङ्गेल्ल ॱसोङ बेत्। ॱनी दगु दीबे लक्टी़त् तप्न दमस्कस्ल ठीक्न च्येब बेत्। 9 ॱनी शावल् हुदु स्यक्पु ॱसुम् थुक् ॱमीक्की ॱमत् थोङ लेब बेत्। ॱनी हुगो थुक्ल सम थुङ्म घन्ड अक् मत् सेब बेत्। 10 ॱनी हुगी दमस्कस् दीन येशुगी ॱलोप्टुक्ल स्युबे हननीया सीक्केन् च्यीक् यो़प्प बेत्। ॱनी हुल थोङ्नङ् च्यीक्ल चोव ज्यीन्दक्की ॱवे हननीया सीन्न झ्यीब बेत्। ॱनी हीगी लेल्ल हननीयागी ला चोव ज्यीन्दक् सीन्न झ्यीब बेत्। 11 हीनी चोव ज्यीन्दक्की यङ् हुल रङ् ॱसट्टक् ठीक्म सीक्केन् हुगी लम्ल फीन्न हुगी लम्गी लोल यो़क्केन्, मी यहुदा सीक्केन् च्यीक्की खीम्ल ज्युक्। उन टार्सस्की मी शावल् सीक्केन् च्यीक् यो़क्केन् बेत्। ॱनी हुगो चर च्यो़त्। हुगी हुन्दो ॱसुव तोप्कुक्। 12 हुगी थोङ्नङ् च्यीक्ल रोरङ्गी ॱमीक्की यङ् थोङ्ज्ये यो़प्पल हननीया सीक्केन् मी च्यीक् रोरङ् च्याल युङ्न हुगी रोरङ्ल लक्पे ॱवङ् केन टेप्प थोङ्न यो़क्केन् बेत् सीन्न ॱङाब बेत्। 13 ॱनी हननीयागी लेल्ल चोव ज्यीन्दक्ला हुगी मी हुगी नीज्यरङ्गी मी चङ्म घयेत्ल यरुशलेम्दु घन्दुक्मे दुक्प अयेक्प तङ बेक्क हुगो ङे मी गज्येङ्गी खनी ॱह घोज्युङ्। 14 हुगी हुनी छ्यो़प्पो़न् चो छ्यीया घयेत् च्यानी ॱहक् लीन्न नीज्यरङ्गी छेन् डेन् ज्यप्न युङ्गेन् घयेत् कीङ्न ठीक्तु हीदु उक् ॱलीत्तुक् सीन्न झ्यीब बेत्। 15 ॱनी हुल चोव ज्यीन्दक्की रङ् ज्युक्। हुगी मी हुगो ङे दम्बे लक्च्य हीन्। हुगो म दीरङ् ज्यी़त् ॱयोङ् ॱयोङ्गी मी, ज्याबु घयेत् धङ् इस्राएल्की ज्यी़त् घयेत्ल ङे मीङ् ॱह घोज्येल ॱस्यो़क्केल्ल ङे दम्बेन्। 16 ॱनी हुल ङे मीङ्गी ढीक्ल घन्दुक्मे दुक्प नोङ्गेन् बेक्क हुगो ङे ॱह घोदु ची़क्केन् सीन्न ॱङान तङ बेत्। 17 हुनी हननीया हुगी ज्यी़ तो़म्बे खीम् दील फीन्नी, हुदु शावल् ठेत्न हुगी गोल लक्पे ॱवङ् केन हुल हीन्दुक् झ्यीब बेत्। पी़न्ज्या शावल् रङ् दमस्कस्ल युङे यङ्ल लङ्गक्तु थो़न्न ठेप्पे चोव ज्यीन्दक् येशुगी ङ हीदु तङ्ज्युङ्। रङ्गी ॱमीक्की यङ् थोङ् छुज्ये यो़प्प धङ् रङ्ल धम्बे थु स्युन घेङ्ज्ये यो़प्पल ङ तङ्ज्युङ्। 18 ॱनी हुगो सील्लोङ् मीक्ल शावल्की ॱमीक् दीनी ने पास्योरोक् डस्सी ॱसल घोक्न, थोङ्गेल्ल ॱसोङ बेत्। हुनी शावल् लोङ्न बप्तीस्ल स्युब बेत्। 19 हुनी क सम सेन, ओङ्बु ताब बेत्। हीनी शावल् दमस्कस्तु हुदु येशुगी ॱलोप्टुक्ल स्युन यो़क्केन् घयेत्तङ् दल धोबा च्यीक् थुक् देप्प बेत्। येशुगी ढीक्ल शावल्की दमस्कस्तु केच्च्य ॱस्येप्प २०-२५ 20 ॱनी हुदु दो़प्पे यङ्ल शावल् हुगी यहुदीगी छ्यो़गी छोगङ् घयेत्ल गीर्न फीन्न हुनी झ्यीनी येशु को़न्ज्योक्की ॱरेबु ॱङो़न्ने बेत् सीन्न ॱस्येत्न टेप्प बेत्। 21 ॱनी हुगो नेङ्गेन् यहुदी घयेत् दीब गन्दीक्म ॱह लेन, रोरङ्सो नङ्दु हीगी मी हीगो येशु हुगी छेन् डेन् ज्यक्केन् घयेत् यरुशलेम्दु ॱसो़त् छुब झ्यीक्केन् दी हीगो मेम्बेक्क ॱनी? ॱनी हुगो हीदु उक् हुब घयेत् कीङ्न छ्यो़प्पो़न् चो छ्यीया घयेत् च्याल ठीक्तु युङे मी हीगो मेम्बेक्क ॱनी? सीन्न लप्री चीय बेत्। 22 ॱनी शावल्ल म दीरङ् हरुङ् ॱस्यीक् छ्यीदु ॱङीत्न, च्यप्को़ल्ल को़न तङे ख्रीष्ट् दी ॱनी येशु ॱङो़न्ने बेत् सीन्न धो़न् धक्सी ॱस्यो़त् ॱस्यीनी, हुगी दमस्कस्की यहुदी घयेत् ओ़न् थोम्न लेनर बेत्। 23 हुनी स्यक्पु गज्येन् ॱसोङ्नी, हुगी यहुदी घयेत् दीबे शावल् ॱसो़च्च्येमे ढो़ झ्यीब बेत्। 24 ॱनी हुबे सुङ्न ॱसो़च्च्येगी ढीक्ल सार्की च्यारीगी गोच्चेक् गोच्चेक्तु ङीन् छेन् मीप्प गुन देप्प बेत्। ॱनी हुगो शावल्की ॱह घोनी, 25 रोरङ्गी ॱलोप्टुक्ल युङे मी घयेत् दीबे छेन्ज्याल शावल् भीलीङ्ल ॱलुक्न थक्पे डान च्यारी दीगी थोक्नी फक्की ज्येगोर्की छ्यीनी मल्ल ज्यो़न् ज्यो़ल्ल तङ्न ढो़दु ची़प्प बेत्। शावल् यरुशलेम्ल युङ २६-३१ 26 हुनी ढो़नी, शावल् यरुशलेम्ल ॱलीब बेत्। हुदु हुगो येशुगी ॱलोप्टुक्ल स्युन यो़क्केन् घयेत्तङ् कङ्ज्यीक्ल दो़च्च्ये ॱनो़ब झ्यीब बेत्। ॱनी हुब घयेक्की शावल् येशुगी ॱलोप्टुक्ल स्युबे मी खुङ्देन् मेन्डो ॱनो़ब खुर्नी, हुल ज्यीब बेत्। 27 हुनी बार्नाबास् सीक्केन् च्यीक्की शावल् ठीक्नल दीब च्येल्ल ठीक्न च्येब बेत्। च्येनी, शावल् एल्ला दमस्कस्ल डोये यङ्ल लङ्गक्तु घन्दुक् झ्यीन चोव ज्यीन्दक्तङ् ठेप्प बेक्क, चोव ज्यीन्दक्की हुल घन्ड ॱस्येप्प बेक्क, दमस्कस् सार्तु येशुगी छेन्नी हुगी घन्दुक् झ्यीन ज्यीक्टक् मीप्प केच्च्य ॱस्येप्प बेक्क हुगो कुरीक् बार्नाबास्की हुब घयेत्ल ॱस्येत्न टेप्प बेत्। 28 हुनी क शावल् हुब घयेत्तङ् मुल री छुन यरुशलेम्दु घल अक् गीर्न ज्यीक्टक् मीप्प चोव ज्यीन्दक्की छेन्नी केच्च्य ॱस्येप्प बेत्। 29 ॱनी हुगी ढीक्ल ग्रीक्की तम् लप्केन् यहुदी घयेत्तङ् शावल् केच्च्य थुक्री चीय बेत्। ॱनी हुब घयेक्की शावल् ॱसो़च्च्ये ॱनो़ब झ्यीब बेत्। 30 ॱनी हुगी ढो़ दी पी़न्ज्या घयेक्की ॱह घोनी, हुबे शावल् सीजरीया सार् ॱसक् च्येन हुनी टार्सस् सार्ल तङ बेत्। 31 ॱनी हुगी धी़ल यहुदीया, गालीला धङ् सामरीयान यो़प्पे छ्यो़ छो घयेत्ल घल अक् दुक्प मत् युङ, स्यीव झ्युङ बेत्। धम्बे थुगी ॱलोप्स्यीक् ॱनङ्न, छ्यो़ छो घयेत् हरुङ् ज्यीक्तु ज्यीक्तु ज्येन युङ बेत्। ॱनी चोव ज्यीन्दक्ल ज्यीब खुर्न युङ्नी, छ्यो़ छोल मी ॱसम्ब गज्येन् फीन युङ बेत्। केच्च्य ॱनेम्बु ज्यी़त् ॱयोङ् ॱयोङ्गी लुङ्बल धर्केन् ९:३२–१५:३५ पत्रुस्की लीट्टा सार्तु घोङ्रीय च्यीक् ढक्तु ची़प्प ३२-३५ 32 हीनी पत्रुस् घल अक् गीर्न फीन्नी, हुनी लीट्टा सार्ल हुगी को़न्ज्योक्की मी चङ्म घयेत्ल ठेत्तु सीन्न युङ बेत्। 33 ॱनी हुदु पत्रुस्ल एनीयास् सीक्केङ्गी मी घोङ्रीय च्यीक् ठेप्प बेत्। हुगो घोङ्रीयल ॱसोङ्नी, लोङ ज्येत् ॱसोङ हीङ्गो़प्प बेत्। 34 ॱनी पत्रुस्की हुल ॱवे एनीयास् येशु ख्रीष्ट्की रङ् ढक्तु ची़क्केन् बेत्। ह लोङ्ल रङ्गी तेन् दी दी़लोङ् सीन्न झ्यीब बेत्। ॱनी एनीयास् दी ॱस्यर्च्यक् ॱहोक् लोङ बेत्। 35 ॱनी हुगी सार्की मी धङ् शारोन् लुङ्बे मी घयेक्की घोङ्रीय ढक्प दी थोङ्नी, हुब कुरीक् ॱसीम् ज्युर्न चोव ज्यीन्दक्ल छ्य स्यक्न युङ बेत्। पत्रुस्की तबीता ॱसोम्बुल ॱलोङे तम् ३६-४२ 36 ॱनी हुगी यङ्ल योप्पा सार्तु येशुगी ॱलोप्टुक्ल स्युबे भुमु तबीता सीक्केन् च्यीक् यो़प्प बेत्। हुगी मीङ् दी ग्रीक्की केच्च्यल डोर्कस् सीन्न सीक्केन् बेत्। हुगी छीगङ् कुरीक्ल गये ले धङ् दुक्च्या घयेत्ल दगु झ्यीगो़प्प बेत्। 37 ॱनी हुगो नन ॱस्यीनर बेत्। ॱनी हुगी दगु घयेत् दीबे हुगी रो दी टी़न कोट्ट थोक्स्युक्म दीदु स्यक्प बेत्। 38 ॱनी हुदु येशुगी ॱलोप्टुक्ल स्युन यो़क्केन् घयेत् दीबे पत्रुस् लीट्टा सार्न यो़प्प दी ॱह घोनी, हुगो ङीन्दीक्म ॱनेगेन् झ्यीनी, हुबे पत्रुस् ठीक्तु भो़त्मीय ॱङी तङ्न हुबल पत्रुस्ल स्युव ज्यप्न ज्योक्सी झ्यीन झ्यो़र्रो झ्यी सीन्न ॱङान तङ बेत्। 39 हुनी पत्रुस् भो़त्मीय दीबदङ् कङ्ज्यीक्ल युङ्न कोट्ट थोक्स्युक्म दील स्युब बेत्। स्युनी हुदु हुगी सार्की मोरेङ्मु घयेत् दी पत्रुस्ल घोङ्न ङुजी ज्यप्न रोरङ्सोल एल्ला डोर्कस्की सो़न टेप्पे घो़ नङ् घो़ धङ् छ्यी घो़ घयेत् दी हुबे पत्रुस्ल तो़म्ब बेत्। 40 हीनी पत्रुस्की हुगी मी घयेत् दी छ्यील तङ्न हुनी रोरङ् पीमुङ् चुन को़न्ज्योक्ल ॱसुव तब बेत्। हुनी रो दील तेन ॱवे तबीता लोङ् सीन्न झ्यीब बेत्। हुनी ॱस्यीनरे तबीता दीगी ॱमीक् फोरोक्ल तेन पत्रुस् थोङ्नी, जोक् जोक्ल लोङ बेत्। 41 हुनी पत्रुस्की लक्पे हुगो सुङ्न यल्ल ॱलोङ बेत्। हुनी को़न्ज्योक्की मी चङ्म घयेत् दी धङ् मोरेङ्मु घयेत् दी नङ्ल स्युक्तु ची़त्न हुब घयेत्ल पत्रुस्की तबीता दी ॱसोम्बु ची ज्यब बेत्। 42 ॱनी हीगी केच्च्य हीगो योप्पादु घल अक् धर्न खुर्नी, मी गज्येङ्गी चोव ज्यीन्दक्ल छ्य स्यक्न युङ बेत्। 43 हुनी पत्रुस् योप्पादु पाबोक् ॱङीक्केङ्गी मी शीमोन् सीक्केन् च्यीक्की खीम्दु धोबा च्यीक् थुक् देप्प बेत्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.