ठीक्नल 8 - ल्होमी1 ॱनी हुगी शावल् दी इक् हुगी दो बेङ्गेन् दीबे लेल छ्य झ्यीब बेत्। हुगी ङीन् दीनी झ्यीनी, यरुशलेम्गी छ्यो़ छोल दुक्प छ्यीम्मु नोङ्न, ठीक्नल दीब पी़प्पे ॱयोङ्मा दीब कुरीक् सामरीया धङ् यहुदीयागी नङ्ल घल अक् थोर्न ॱसोङ बेत्। छ्यो़ छोल दुक्प छ्यीम्मु तङ १-३ 2 ॱनी इस्तीफनस्की रो दी को़न्ज्योक्ल धेप्प झ्यीक्केन् मी यरीगी डुन रो बेक्सल ॱलुक्न स्यक्न खोङ्जो़ ढीक्ल नङेन् छ्यीम्मु झ्यीब बेत्। 3 ॱनी छ्यो़ छो तोर्च्ये ॱनो़न शावल् खीम् खीम्ल स्युन छ्य स्योक्केन् छ्योगो हीन्, भुमु हीन्न अक्, कुरीक् ढी़त्न चो़ल्ल ॱलुक्को़प्प बेत्। यहुदीया धङ् सामरीयाल धर्न युङ ८:४–९:३१ फीलीप्की सामरीयादु केच्च्य ॱनेम्बु ॱस्येप्प ४-८ 4 ॱनी छ्य स्योक्केन् थोर्नर घयेत् दीबे रोरङ्सो डोस्स दील घल अक् केच्च्य ॱनेम्बु कुरीक्ल ॱस्येत्न टम्ब बेत्। 5 ॱनी फीलीप् सीक्केन् दी सामरीयागी सार् च्यीक्ल फीन्न हुदु ख्रीष्ट्की ढीक्की केच्च्य ॱस्येत्न टेप्प बेत्। 6 ॱनी हुगी मी घयेत् दीगी फीलीप्की ॱस्येप्पे केच्च्य दी ॱह घो, हुनी हुगी झ्यीबे यीक् छ्यीम्मी़ लेगी ता घयेत् दी थोङ्नी, हुब कुरीक् क हुगी केच्च्य दील गस्सी छोर्न नेन्दु युङ बेत्। 7 ॱनी हुदु मील ॱनो़प्प स्यीलोक्सी स्यीन्नर घयेत् ओ़लोक् ॱस्योर्न थो़न्नर बेत्। ॱनी घोङ्रीय धङ् कङ्लक् यालक् ॱस्योर्नर गज्येन् ढक्नर बेत्। 8 हुगो झ्युङ्नी सार्की मी घयेत् गेस छ्यीम्मु झ्यीब बेत्। जुम्डी़ तो़ङ्गेन् शीमोन् ९-१३ 9 ॱनी उन शीमोन् सीक्केङ्गी मी च्यीक् यो़प्प बेत्। हुगी एल्लानीरङ् सामरीयागी लुङ्बे मी घयेत्ल जुम्डी़ तो़न्न यीक् छ्यीदु ची़क्को़प्प बेत्। ॱनी हुगी रोरङ् ङ ज्यीक्सी हीन् सीन्न सीगो़प्प बेत्। 10 ॱनी मी छ्यीज्युङ्मीत् कुरीक्की हुगो ज्यीक्सी हीम्ब ॱसम्न हुगी ढीक्ल हुगो म दीरङ् को़न्ज्योक्की ॱस्यीक् छ्यीम्मु च्येम्म च्यीक् बेत् सीन्न सीगो़प्प बेत्। 11 ॱलो गज्येङ्गी एल्लानीरङ् हुगी शीमोन् हुगी जुम्डी़ तो़न्न यीक् छ्यीदु ची़त्न युङ्नी, हुगी मी घयेत् दीगी हुल छ्यप्स्यक् स्योक्को़प्प बेत्। 12 हुनी हस्सो़त् फीलीप् दी हुदु युङ्न को़न्ज्योक्की ज्यागक् धङ् येशु ख्रीष्ट्की ढीक्की केच्च्य ॱनेम्बु हुगी लुङ्बे मी घयेत्ल ॱस्येत्न टेप्प बेत्। हुनी छ्योगो भुमु कुरीक्की हुल छ्य स्यक्न बप्तीस्ल स्युब बेत्। 13 ॱनी हुगी शीमोन् दीगी इक् छ्य स्यक्न बप्तीस्ल स्युब बेत्। ॱनी यीक् छ्यीम्मी़ लेगी ता धङ् ॱस्यीक् छ्यीम्मी़ ले घयेत् झ्युङ थोङ्नी, हुल शीमोन् दी ॱह पट्टक् लेन, फीलीप्की दल घल अक् तीङ् दीत्न युङ बेत्। पत्रुस् धङ् युहन्ना सामरीयाल तङ १४-२५ 14 ॱनी सामरीयागी मी घयेक्की को़न्ज्योक्की केच्च्यल नेन्न युङ ठीक्नल दीबे यरुशलेम्दु ॱह घोनी, ॱनी हुबे पत्रुस् धङ् युहन्ना सामरीया लुङ्बल तङ बेत्। 15 ॱनी पत्रुस् धङ् युहन्ना हुदु ॱलीत्नी, हुगी छ्य स्योक्केन् घयेत्ल धम्बे थु ॱनङ्रो झ्यी सीन्न को़न्ज्योक्ल ॱसुव तब बेत्। 16 घन्ड हीन् सीन्न हुब घयेत्ल एल्ला ॱसुल आक् धम्बे थु घप्न मत् युङ हीङ्गो़प्प बेत्। हुब घयेत् चोव ज्यीन्दक् येशुगी छेन्नी बप्तीस्लरङ् स्युब हीङ्गो़प्प बेत्। 17 ॱनी हस्सो़त् हुब घयेत्ल पत्रुस् धङ् युहन्नागी लक्पे ॱवङ् केनी, हुबल धम्बे थु थोब बेत्। 18 ॱनी हुन्दुक् झ्यीन ठीक्नल हुबे लक्पे ॱवङ् केन, धम्बे थु को़न्ज्योक्की ॱनङ्न युङ शीमोन् दीगी थोङ्नी, हुगी पयीसक् तो़न्न हुब ॱङीबुल 19 ङे मी ॱसुल लक्पे ॱवङ् को़गो़दङ् हुल धम्बे थु थोप्च्येमे ॱवङ् हुगो ङल अक् ॱनङ्रो झ्यी सीन्न स्यी़ब बेत्। 20 ॱनी पत्रुस्की हुल को़न्ज्योक्की ॱनङ्ज्येत् हीगो खोक्की पयीसक्की नो छुगो़प्प बक् ॱनो़ज्युङ? रङ् धङ् रङ्गी पयीसक् हुगो म दीरङ् खरप्ल ज्युक्च्यीत्। 21 को़न्ज्योक्की ढुङ्दु रङ्गी ॱसीम् हुगो गज्ये मीप्पल रङ् ङीक्की ले हीगी छ्यल मीत् डीक्केन् बेत्। 22 ङेम्बे लम् हुनी रङ्गी ॱसीम् दी ज्युर्न चोव ज्यीन्दक्ल ॱसुव तप्न ॱनी, रङ्गी ॱसम्ल ङेम्ब हुगो धक्को़ट्टो। 23 रङ् म दीरङ् ठदोक् धङ् दीक्पे ढङ्ल भीङ्नत्तुक् सीन्न झ्यीब बेत्। 24 ॱनी शीमोन्गी लेम्बुल खीत्रङ्गी झ्यीबे केच्च्य घयेत् हीगो ङल फोक्च्ये मीप्पल ङे ढीक्ल चोव ज्यीन्दक्ल ॱसुव तोप्रो झ्यी सीन्न स्युव ज्यब बेत्। 25 ॱनी हुदु पत्रुस् धङ् युहन्नागी चोव ज्यीन्दक्की केच्च्य धङ् खोङ्गी ढीक्की दीम्बे केच्च्य घयेत् ॱस्येत्नी, हुब ॱङीबु यरुशलेम्ल लोक्प बेत्। ॱनी लोक्पे यङ्ल अक् सामरीयागी युगङ् घयेत्ल गीर्न केच्च्य ॱनेम्बु ॱस्यो़क्कील्ल युङ बेत्। एथीयोपीयागी मी च्यीक्ल केच्च्य ॱनेम्बु ॱस्येप्प २६-४० 26 हुनी तीङ्ला चोव ज्यीन्दक्की तेङ् यी़गी भङ्ज्येम्ब च्यीक्की फीलीप्ल रङ् यरुशलेम्नी ॱल्हो ङो़ल पक्क झ्यङ्दङ्गी घुङ्नी फल्ल गाजाल डोस्से लङ्गक्ल ज्युक् सीन्न ॱङान तङ बेत्। 27 ॱनी हुल नेन्न फीन्नी, हुगी लङ्गक्तु एथीयोपीयागी ज्यागक्की पेम्बु छ्यीम्मु च्यीक् फीलीप्ल ठेप्प बेत्। हुगो एथीयोपीयागी ज्यामु कन्दाकी सीक्केङ्गी नोर् घयेक्की गेल्लीङ् झ्यीक्केङ्गी चोबो़न् हीङ्गो़प्प बेत्। हुगो यरुशलेम्दु को़न्ज्योक्ल छ्यक् छ्यो़प्प पुदु फीन्नी लोक्न युङ्गीन् यो़प्प बेत्। 28 हुगो रोरङ्गी ते गरीमल्ल स्युन लङ्गक्ल डोगीन् यो़प्पे यङ्ल कलुङ् ॱस्यो़क्केन् यशैयागी ढीबे ॱसुङ्रप् डोक्कीन् यो़प्प बेत्। 29 हुनी धम्बे थुगी फीलीप्ल रङ् फागी गरीमन् झ्यीस्स हुगी ॱस्यच्चल ज्युक् सीन्न ॱङाब बेत्। 30 हुनी फीलीप् गरीमन् झ्यीस्स दील ज्युन फीन्नी, हुगी पेम्बु दीगी यशैयागी ॱसुङ्रप् डोक्प दी ॱह घोनी हुगोल नीज्यरङ्गी डोक्केन् हुगी धो़न् दी ॱह घोगुक्क? सीन्न ढीब बेत्। 31 ॱनी हुगी लेम्बुल ङल धो़न् ॱस्यो़क्केन् ॱसु उक् मीप्पे, घन्दुक् झ्यीन ॱह घोगेन् सीन्न झ्यीब बेत्। हुनी पेम्बु दीगी हीदु गरीमल्ल जेलेत् सीन्न फीलीप् यल्ल कङ्ज्यीक्ल दो़त्तु ची़प्प बेत्। 32 ॱनी हुगी पेम्बु दीगी डोक्केङ्गी ॱसुङ्रप्की यीगी दील हीन्दुक् सीर यो़प्प बेत्। लुक् ॱसो़त्तु च्यो़गेन्दङ् छ्येत्मीत् खोङ् च्येब बेत्। लुक्टुक्ल भा ढेक्पे यङ्ल केत् मीत् ज्यक्केन् डस्सी खोङ्गी खनी केत् ॱमत् थो़म्ब बेत्। 33 खोङ्ल ॱम पप्न ठीम् ढङ्बु ॱमत् च्येप्प बेत्। ॱस जम्बुलीङ्दु खोङ्गी ॱरोक् दी च्येप्प बेत्। खोङ्गी ज्यी़त् घयेक्की ढङ्ज्युक् ॱसी़ इक् ज्यक् ॱमीत् छुगेन् बेत्। (यशैया ५३:७-८) 34 ॱनी हुगी पेम्बु दीगी फीलीप्ल कलुङ् ॱस्यो़क्केङ्गी ढीबे केच्च्य हीगो रोरङ्गी ढीक्ल हीम्ब न ॱयोङ्मागी ढीक्ल बेक्क? सीन्न ढीब बेत्। 35 ॱनी फीलीप्की हुगी ॱसुङ्रप्की यीगी दीनी झ्यीनी, येशुगी ढीक्की केच्च्य ॱनेम्बु छङ्म हुल ॱस्येत्न टेप्प बेत्। 36 ॱनी हुन्दुक् झ्यीन फीन्नी, छ्यु च्यीक् ठेप्प बेत्। ॱनी हुगी पेम्बु दीगी फीलीप्ल हीन छ्यु दुक्। ङ हीदु बप्तीस्ल स्युन अक्, डीक्को़ट्टो सीन्न झ्यीब बेत्। 37 [ॱनी फीलीप्की हुल नीज्यरङ्गी ॱसीम्बे यीक्नीरङ् छ्य स्यक्न यो़त्न ॱनी, डीक्केन् बेत्। पेम्बु दीगी लेल्ल येशु ख्रीष्ट् को़न्ज्योक्की ॱरेबु हीम्बल ङ छ्य स्योक्केन् सीन्न झ्यीब बेत्।] 38 हुनी पेम्बु दीगी गरीमन् दी दो़त्तु ची़त्न, हुब ॱङीक्कर् हुनी थो़न्न छ्यु झ्यीस्स दील फीन्न, हुगी पेम्बु दी फीलीप्की बप्तीस्ल ॱलुक्प बेत्। 39 ॱनी छ्यु दीनी थो़न्न युङ्नी, हुनी फीलीप् चोव ज्यीन्दक्की थुगी ॱरीप् घङ्ल ॱयोङ्ल ठीक्नर बेत्। हुनी पेम्बु दीगी फीलीप् ॱमत् थोङ बेत्। ॱनी हीन्न अक्, रोरङ् गेस झ्यीक्कील्ल लम् स्युन फीम्ब बेत्। 40 हुनी फीलीप् अश्दोद् सीस्स च्यीक्तु थो़म्ब बेत्। हुनी हुगी लुङ्बे सार् घयेत्ल घल अक् गीर्न केच्च्य ॱनेम्बु ॱस्यो़क्कील्ल फीन्नी, तीङ्ला सीजरीया सार्ल ॱलीब बेत्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.