ठीक्नल 7 - ल्होमीइस्तीफनस्की छोक्तेन् छ्यीम्मुदु तम् ॱस्येप्प १-५३ 1 हुनी छोक्तेन् छ्यीम्मु दीदु हुगी छ्यो़प्पो़न् चो छ्यीस्स्यो दीगी इस्तीफनस्ल रङ्ल ङीब कब हुगो खुङ्देन् बेक्क न मेम्बेक्क? सीन्न ढीब बेत्। 2 ॱनी इस्तीफनस्की लेम्बुल ॱवे फम पी़न्सो, ङे तम्ल नेर्रो झ्यी। धङ्बु हज्यरङ्गी पुबु अब्राहाम् हारान्गी लुङ्बल पो़न ॱमत् फीम्बले एल्ला मेसोपोटामीयागी लुङ्बदु दो़प्पे यङ्ल खोङ् च्येल्ल तो़त्वङ् छ्यीम्मु च्येम्मे को़न्ज्योक् थो़न्न खोङ्ल हीन्दुक् सीन्न ॱङाब बेत्। 3 रङ्गी लुङ्ब धङ् रङ्गी ङीया घयेत् च्यानी रङ् थो़न्न ङे ज्यी़ तो़म्बे लुङ्ब च्यीक्ल पो़ल ज्युक्। (छ्यारप् १२:१) 4 ॱनी हील नेन्न अब्राहाम् कल्दीगी लुङ्ब दीनी थो़न्न हारान्गी लुङ्ब दील पो़न युङ बेत्। हुनी तीङ्ला खोङ्जो़ पब हुदु ॱस्यीन खुर्नी क, हस्सो़त् को़न्ज्योक्की अब्राहाम् हज्यरङ्गी लुङ्ब हील तङ्न युङ्न देप्प बेत्। 5 ॱनी हीगी लुङ्ब हीदु को़न्ज्योक्की अब्राहाम्ल हुगी यङ्ल कङ्ब पो़स्से ॱसने च्यीक् इक् ॱमत् ॱनङ्न आक्, खोङ्ल हीगी लुङ्ब हीगो तीङ्ला रङ्ल धङ् हुनी रङ्गी ज्यी़त् घयेत्ल टेत् योङ् सीन्न ॱसुङ बेत्। ॱनी हुगी यङ्ल अब्राहाम्ल भीज च्यीक् इक् मीप्प बेत्। 6 ॱनी खोङ्ल हीन्दुक् सीन्न अक् ॱसुङ बेत्। तीङ्ला रङ्गी ज्यी़त् घयेत् लुङ्ब ॱयोङ्ल फीन्न, हुदु हुगी लुङ्बे मी घयेक्की हुबल स्येन्दोङ् झ्यीन ॱयोक्ल कुन रङ्मो़ मीप्पल सो़न, हुदु लो ज्यब स्यी थुक् छ्योबा थो़त्न दो़त् गो़ ॱस्यर्केन् बेत्। 7 ॱनी ॱयोक्ल कुगेन् हुगी लुङ्बे मी घयेत्ल ङे छ्येप्प को़गेन्। हुनी यङ् रङ्गी ज्यी़त् घयेत् हुगी लुङ्बनी थो़न्न युङ्नी, हीदु ङल छ्यक् छ्यो़प्प पुगेन् बेत् सीन्न ॱसुङ बेत्। (छ्यारप् १५:१३-१४) 8 हुनी को़न्ज्योक्की खोङ्ल कगो़त् धम्स्यक् ॱनङ्न, हुगो ॱमीत् ॱसम् रीगी ढीक्ल दक् ज्यक् गोगेङ्गी लेमु उक् ॱनङ बेत्। ॱनी अब्राहाम्ल इसहाक् कीनी, स्यक्पु ज्येत् ॱसोङे ङीन् दी हुल हुगी दक् दी ज्यब बेत्। हुनी इसहाक्ल याकुब् कीब बेत्। हुनी याकुब्ल हस्सो़त् हज्यरङ्गी पुबु च्युन्नीबु दी कीब बेत्। 9 ॱनी हज्यरङ्गी पुबु च्युन्नीबु दीबे रोरङ्सो़ फ च्यीक्की पी़न् युसुफ् दील यङ् सीगुक् झ्यीन हुगो मीस्रे लुङ्बल ॱयोक्ल चोङ् तङ बेत्। ॱनी हुदु उक् को़न्ज्योक् युसुफ्तङ् दल स्युब बेत्। 10 ॱनी हुदु युसुफ्ल नोङे दुक्स्यी घयेक्की लक्नी को़न्ज्योक्की छ्यीब बेत्। युसुफ्ल को़न्ज्योक्की झ्यी़रीक् ॱनङ्नी, मीस्रे ज्याबु फारोहा दी हुल गस्सी छोर्न रोरङ्गी ज्यागङ्गी धङ् मीस्रे लुङ्बे पेम्बु चो छ्यीस्स्यो दील को़ब बेत्। 11 हुनी तीङ्ला मीस्रे लुङ्ब धङ् कनान्गी लुङ्ब जेङ्ल तोरी छ्यीम्मु ॱस्योर्न, कुरीक्ल तोबे दुक्स्यी नोङ बेत्। ॱनी हज्यरङ्गी पुबु हुबल अक् सज्ये ॱमत् कोब बेत्। 12 ॱनी मीस्रे लुङ्बन ॱअन्न दुक् सीर याकुब्गी ॱह घोनी, ॱनी रोरङ्गी भु घयेत्, हज्यरङ्गी पुबु हुब मीस्रे लुङ्बल ॱअन्न नोदु तङ बेत्। 13 ॱनी नो़न युङ्नी, तीङ्ला आक् यङ् फीच्च्य नोदु डो गो़ ॱस्यर बेत्। हुगी यङ्ल क हस्सो़त् युसुफ्की रोरङ्गी पी़न् घयेत् दील ङ युसुफ् हीन् सीन्न ङोस्स्यीन् टेप्प बेत्। हुनी फारोहा दील अक् युसुफ्की ङे पी़न् हीन् सीन्न पी़न् दीब ङोस्स्यीन् टेप्प बेत्। 14 हुनी युसुफ्की रोरङ्गी पब याकुब् दी धङ् मीजङ् ॱयोङ्म घयेत् दी कुरीक् मीस्रे लुङ्बल ॱस्योक् सीन्न ठीक्तु तङ बेत्। हुनी याकुब्गी मीजङ् तोम्दु मीरङ् दी़न्ज्यु धो़ङ ठीक्न युङ्न 15 हुदु देप्प बेत्। हुनी याकुब्गी मीजी दी हुदुरङ् ॱसोङ्न ॱस्यीनर बेत्। ॱनी हज्यरङ्गी पुबु ॱयोङ्म घयेत् दीब अक् हुदुरङ् गेन ॱस्यीनर बेत्। 16 ॱनी हुबे कुबुर् दी मीस्रल मेम्ब, कनान्गी लुङ्बे शेकेम् झ्यीस्सल खुर्न हुदु रो बेक्सल ॱलुक्न स्योक्को़प्प बेत्। हुगी रो स्योक्से ॱसने दी एल्ला हमोर्की भु घयेक्की लक्नी अब्राहाम्गी ॱङु टेत्न नो़न स्यक्न यो़प्प बेत्। 17 हुनी अब्राहाम्ल को़न्ज्योक्की एल्ला ॱसुङे केच्च्य डुबे धी़ दी ॱलीच्च्येम ॱयेङ बेत्। ॱनी हुगी यङ्ल मीस्रे लुङ्बदु हज्यरङ् यहुदी घयेत् गज्येन् फीन युङ बेत्। 18 हुनी मीस्रे लुङ्बदु युसुफ् ॱस्यो़च्च्ये मीप्पे ज्याबु ॱयोङ्म च्यीक् ठील जेब बेत्। (थो़म्ब १:८) 19 हुगी ज्याबु दीगी हज्यरङ्गी पुबु ॱमुमु यहुदी घयेत्ल झ्यी़ तङ्न स्येन्दोङ् आक्सी झ्यीन ॱङीङ्ज्यी मीप्प, यहुदीगी भीज च्युङेत्मु घयेत् ॱस्यीदु ची़च्च्येल ॱलो़ तोङ्दु ची़क्को़प्प बेत्। 20 हुनी हुगी यङ्ल हस्सो़त् मोशा कीब बेत्। ॱनी को़न्ज्योक् हुगी भीज हुल गस्सी छोर बेत्। ॱनी हुगी भीज हुगो दव ॱसुम् थुक् पब आम दीबे बेन खीम्गी नङ्दु ॱसो़ब बेत्। 21 हुनी भीज दी ॱलो़ तङ्न स्योक् गो़ ॱस्यर बेत्। ॱनी भीज दी फारोहागी भुमुल ॱङीत्नी, हुगो रोरङ्गी भुयरल ॱसो़ब बेत्। 22 हुनी तीङ्ला मोशागी मीस्रे लुङ्बे धो़र्रीक् घयेत् ॱलप्न, तम् ॱस्येप्पल धङ् ले घङ्गोल अक् खेसी झ्युङ बेत्। 23 हुनी मोशा फोलो स्यीप्च्यु ॱलीत्नी, खोङ्गी ॱसीम्ल रोरङ्गी फम पी़न् इस्राएली घयेत् ठेच्च्ये ॱनो़ब झ्युङ बेत्। 24 हुनी ठेत्तु फीन्नी, मीस्रे मी च्यीक्की इस्राएली च्यीक्ल अयेक्प झ्यीप्प थोङ्नी, मोशा छ्योरी लङ्न मीस्रे मी दी ॱसेत्न ङेल्लेन् च्ये तङ बेत्। 25 मोशागी ॱसीम्ल रोरङ्गी फम पी़न् घयेत् दी रोरङ्गी लम्नी को़न्ज्योक्की छ्यीगेन् बेत् ॱनो़ब हुबे ॱह घोगो़दङ् ॱनो़ब मोशागी छ्यर बेत्। हुबे म दी ॱह मत् घोव बेत्। 26 हुनी नेम्बेत् दी यङ् मोशाल इस्राएली मीरङ् ॱङी दुङ्री ज्यक्पदङ् ठेत्नी, ॱनी हुल मोशागी डीक्च्या झ्यीच्च्येल खीत् फम पी़न् नङ्दु घन्डल थुक्री चीगेन् सीन्न झ्यीब बेत्। 27 ॱनी हुगी मत् ओ़ब च्येम्म दीगी मोशा फल्ल ॱसोर्न पुर्न हुगी खो़त्ल ॱसी़ ङीक्की थोक्ल पेम्बु ठीम् च्यो़क्केल्ल को़ज्युङ? 28 दङ् खोक्की मीस्रे मी ॱसेप्प डस्सी हुन्दो ङ अक् ॱसो़च्च्ये ॱनो़गुक्क? सीन्न झ्यीब बेत्। (थो़म्ब २:१४) 29 हीगी तम् हीगो ॱह घोनी मोशा हुनी ढो़न मीदीयान् लुङ्बदु छ्योबा थो़त्न देत् तङ बेत्। ॱनी हुदु मोशाल भु ॱङी कीब बेत्। 30 ॱनी मोशा हुदु लो स्यीप्च्युजो़त् च्यीक् देत्नी, लेन् च्यीक् मोशाल पक्क झ्यङ्दङ्दु सीनै लदोक्की लस्स्यम्दु चङ्गी दोङ्बुल मी बर्न युङे घुङ् दीदु तेङ् यी़गी भङ्ज्येम्ब च्यीक् थो़न्न युङ थोङ बेत्। 31 हुल मोशा तेक्मु झ्युङ्न ॱह लेबे, फल्ल ॱस्यच्चल तदु फीन्नी, चोव ज्यीन्दक्की केत् तङ्न 32 मोशाल ङ रङ्गी पुबु ॱमुमु अब्राहाम्, इसहाक् धङ् याकुब्गी को़न्ज्योक् हीन् सीन्न ॱसुङ बेत्। (थो़म्ब ३:६) ॱनी हुल मोशा ज्यीबे, दर्न त दीरङ् ॱमत् छुब बेत्। 33 ॱनी चोव ज्यीन्दक्की यङ् मोशाल ॱसुङ बेत्। रङ्गी जुत्त पीक्। हीगी ॱसने हीगो चङ्बो़त्म यो़क्केन् बेत्। 34 मीस्रे लुङ्बदु ङे मीस्सीर्ल अयेक्प झ्यीप्प ङे थोङ्ज्युङ्। हुब घयेत् दुक्स्यीगी घी़रीम थो़म्ब ङे ॱह घोज्युङ्। हुगी लक्नी छ्यीदु ङ इगीनी मल्ल भप्न युङेन्। ह हुगी ढीक्ल रङ् मीस्रल तोङ्गेन्। (थो़म्ब ३:५,७-८) 35 हीगी मोशा हील एल्ला इस्राएली घयेक्की खो़त्ल ॱसी़ ङीक्की थोक्ल पेम्बु ठीम् च्यो़क्केल्ल को़ज्युङ सीन्न मत् गुव हीङ्गो़प्प बेत्। ॱनी हीगी मोशा हीगो क इस्राएली घयेक्की चो छ्यीस्स्योल धङ् इस्राएली घयेत् ॱलुगेल्ल को़न्ज्योक्की चङ्गी दोङ्बी़ घुङ्दु थो़म्बे तेङ् यी़गी भङ्ज्येम्ब दीगी लम् ज्यी़त्नी को़न तङ बेत्। 36 हुनी इस्राएली घयेत् मीस्रे लक्नी खोङ्गी या टेन मीस्रदु, छ्यु ज्यम्जो छ्यीम्मु ॱमप्पुदु धङ् पक्क झ्यङ्दङ्दु लो स्यीप्च्यु थुक्ल यम् छेम्मे ले धङ् यीक् छ्यीम्मी़ लेगी ता घयेत् झ्यीन ठीक्न युङ बेत्। 37 ॱनी हीगी मोशा हीगी इस्राएली घयेत्ल हीन्दुक् सीन्न ॱस्येप्प बेत्। खीत्रङ् इस्राएली घयेत्ल को़न्ज्योक्की ङ डस्सीगी कलुङ् ॱस्यो़क्केन् च्यीक् खीत्रङ् फम पी़न् घयेक्की छीक्नी तो़ङ्गेन् बेत्। (ठीम्लु १८:१५) 38 हीगी मोशा हीगो हज्यरङ्गी पुबु ॱमुमु इस्राएली घयेत् पक्क झ्यङ्दङ्दु यो़प्पे यङ्ल अक् यो़क्केन् बेत्। ॱनी सीनै लदोक्तु उक् हज्यरङ्ल टो़च्च्येगी ढीक्ल खोङ्ल तेङ् यी़गी भङ्ज्येम्बे छीये केच्च्य ॱसुङ बेत्। 39 ॱनी हीन्न अक्, हज्यरङ्गी पुबु ॱमुमु घयेक्की खोङ्ल मत् गुव, खोङ्गी खल मत् नेम्ब, मीस्रे लुङ्बल लोक्च्ये ॱनो़बे ॱसम्ल खुर बेत्। 40 हुगो झ्यीनी हुब घयेक्की हारुन्ल हज्यरङ् घयेत्ल लम्बा झ्यीक्केन्, कु घयेत् स्यङ्न ॱनङ्। हज्यरङ् घयेत् मीस्रनी तो़न्न ठीक्न युङ्गेन् मोशा हुल घन्ड झ्युङ हीम्ब हज्यरङ्ल ॱस्यो़च्च्ये मीप्प सीन्न स्यी़ब बेत्। (थो़म्ब ३२:१) 41 ॱनी हुगी यङ्ल हुब घयेक्की ॱलङ्डुक् डस्सीगी कु च्यीक् स्यङ बेत्। हुनी हुल छ्यक् छ्यो़प्प पुन रोरङ्सो़ लक्पे स्यङे यप्च्य दील तो़त्न गेस झ्यीब बेत्। 42 हुन्दुक् झ्यीनी हुब घयेत्ल को़न्ज्योक्की तक् तो़न्न ॱनम्गी यप्च्य घयेत्ल छ्यक् छ्यो़प्प पुगेल्ल नुक् दीरङ् स्यक् तङ बेत्। हीगी ढीक्ल कलुङ् ॱस्यो़क्केन् च्यीक्की ॱसुङ्रप्ल को़न्ज्योक्की ॱसुङे केच्च्य हीन्दुक् सीर थो़ङ्गेन् बेत्। ॱवे इस्राएली घयेत् खीत्रङ् पक्क झ्यङ्दङ्दु लो स्यीप्च्यु थुक् गीरे यङ्ल खीत्रङ् घयेक्की ॱरोक् धङ् छ्यो़प्प पुब घयेत् ङल मेम्ब, ॱयोङ्ल पुब बेत्। 43 मोलोख् सीक्केङ्गी ॱल्हे घुर्की ॱल्हगङ् धङ् रीफन् सीक्केङ्गी ॱल्ह कर्म डस्सीगी कु खुर्न हुन्दुक् झ्यीब खीत्रङ्गी स्यङे यप्च्य घयेत्ल छ्यक् छ्यो़प्प पुब बेत्। हुगो झ्यीनी ङ खीत्रङ् घयेत् बेबीलोन्गी लुङ्बे तक्नी फल्ल तो़न्न दीत् तोङ्गेन् सीर यो़क्केन् बेत्। (आमोस् ५:२५-२७) 44 हज्यरङ्गी पुबु ॱमुमु घयेत् पक्क झ्यङ्दङ्दु गीरे यङ्ल को़न्ज्योक् झ्यीस्से खोङ्गी घुर्की छ्यो़गङ् दी इक् उनरङ् यो़प्प बेत्। हुगो को़न्ज्योक्की मोशाल तो़म्बे लेमुल पीब सो़न यो़प्प बेत्। 45 ॱनी हीगी घुर्की छ्यो़गङ् हीगो तीङ्मा तीङ्मागी मीदोक्की ङोल अक् झ्युङ बेत्। यहोशुगी ॱवङ्गी होक्ल यो़प्पे यङ्ल हज्यरङ्गी पुबु ॱमुमु घयेक्की दोङ्नी ज्यी़त् ॱयोङ्मा घयेत् को़न्ज्योक्की दीत्न, हुगी लुङ्ब दी ॱनुबे यङ्ल हीगी घुर्की छ्यो़गङ् हीगो ओक् खुर्न डोगो़प्प बेत्। ॱनी हीगी घुर्की छ्यो़गङ् हीगो दाऊद्गी ङोल थुक् ज्यप्न युङ बेत्। 46 ॱनी दाऊद्ल को़न्ज्योक् थु गुव बेत्। ॱनी दाऊद्गी को़न्ज्योक्ल याकुब्गी को़न्ज्योक् नीज्यरङ् स्युस च्यीक् ङल स्योङ्दु ची़त्रो झ्यी सीन्न स्यी़ब बेत्। 47 ॱनी हीन्न अक्, को़न्ज्योक् स्युसे सीङ्गङ् दी दाऊद्गी मेम्ब, तीङ्ला सोलोमन्गी स्यङ बेत्। 48 ॱनी स्यङ्न अक्, कोलीमीगी स्यङे सीङ्गङ्ल इगी थोरी चीदु स्युगेन् खोङ् मीत् स्युगेन् बेत्। हीगी ढीक्ल कलुङ् ॱस्यो़क्केन् च्यीक्की खनी चोव ज्यीन्दक्की हीन्दुक् सीन्न ॱसुङ बेत्। 49 तेङ् यी़ ङे ॱवङ् च्येम्मे स्युडी हीन्। ॱस जम्बुलीङ् ङे कङ्ब पो़स्से तेन् हीन्। हीगो झ्यीनी घन्दुक् झ्यीन खीत् घयेक्की ङ स्युसे खीम् सोगेन्? ङ ङे ॱसोस्स दी घन? 50 हीगी घङ् यो़प्प घयेत् हीगो ङे सो़ब मेम्बेक्क ॱनी? (यशैया ६६:१-२) 51 ॱवे खीत्रङ् ॱअप्स्यी़त् मीप्पे मी घयेस्सो। कगो़त् धम्स्यक् ॱसम्बे दक् दी खीत्रङ्गी ॱसीम् धङ् आम्ज्योक्ल मत् स्युबेत्। पुबु ॱमुमु घयेत् डस्सीरङ् खीत्रङ् ॱअङ् छीगङ् डल लोङ्न धम्बे थुगी ले क च्यो़क्केन् बेत्। 52 खीत्रङ्गी पुबु ॱमुमु घयेक्की धङ्बु दुक्प अयेक्प ॱमत् तङ स्यक्पे कलुङ् ॱस्यो़क्केन् दी ॱसु दी यो़प्प बेक्क? तीङ्ला ढङ्बु च्यीक् थो़ङ्गेन् बेत् सीन्न ॱङो़स्स्यीगी कलुङ् ॱस्यो़क्केन् घयेत् एत् हुबे ॱसेत् तङ बेत्। ॱनी ढङ्बु खोङ् थो़न्न युङ्नी, भर्तु गे ज्युन खोङ् ॱसो़त्तु ची़क्केन् दी खीत्रङ् घयेत् बेत्। 53 स्येन् खीत्रङ्ल क तेङ् यी़गी भङ्ज्येम्ब घयेक्की लम्नी ॱनङे छ्यो़डीम् झ्युङ बेत्। ॱनी झ्युङ्न अक्, हुल खीत्रङ् मत् नेम्ब बेत् सीन्न इस्तीफनस्की लेम्बुल ॱस्येप्प बेत्। इस्तीफनस्ल दोर्तुङ् बेन्न ॱसेप्प ५४-६० 54 हीगो ॱह घोनी, हुगी छोक्तेन् छ्यीम्मी़ मी घयेत् दी खोङ्डोक्की मी बर्न स्यीदङ्गी ॱसो दर बेत्। 55 ॱनी इस्तीफनस्ल म दीरङ् धम्बे थुगी घेङ्न, रोगी इगी तेङ् यी़ल तेनी, को़न्ज्योक्की तो़त्वङ् छ्यीम्मी़ ओ़च्च्य धङ् खोङ्गी ॱये छ्योन येशु लोङ्न दो़प्प थोङ बेत्। 56 हुनी रोगी हुगी मी घयेत् दील तो़लेत्। इगीन तेङ् यी़ भीन खुर्तुक्। ॱनी इगीन को़न्ज्योक्की ॱये छ्योन कोलीमीगी ॱरेबु लोङ्न दो़प्प ङे थोङ्गुक् सीन्न झ्यीब बेत्। 57 ॱनी हीगो ॱह घोनी, ॱसुम्ब हुगी मी घयेत् दी ओ़लोक् ज्यप्न ॱसोस्सोरङ्गी आम्ज्योक् कक्न हुब कुरीक् रुप्न इस्तीफनस्ल बुरुक् घोङ्न 58 सार्की छ्यील ढी़त्न फीन्न हुदु हस्सो़त् दोर्तुङ् बेम्ब बेत्। ॱनी पङ्बुल थो़न्न दोर्तुङ् बेङ्गेन् घयेत् दीबे ली़गी छ्यी घो़ दी पीक्न शावल् सीक्केन् स्यो़म्ब च्यीक्ल च्योब बेत्। 59 ॱनी हुब घयेक्की हुन्दुक् झ्यीन बेङ्गीन् झ्यीप्पे यङ्ल इस्तीफनस्की येशुल चोव ज्यीन्दक् येशु नीज्यरङ्गी ङे ॱसीम् हीगो लीर्रो झ्यी सीन्न ॱसुव तब बेत्। 60 हुनी हस्सो़त् पीमुङ् चुन रोगी केत् छ्यीम्मु तो़न्न ॱवे चोव ज्यीन्दक् हीगी मी घयेत् हीबल हीगी दीक्प हीगो को़रो मत् झ्यीत् सीन्न ॱस्येत्नी, हुनी उ ठोक् छ्येत्नर बेत्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.