ठीक्नल 6 - ल्होमीदगु झ्यीक्केल्ल मीरङ् दी़न् दम्बे तम् १-७ 1 हुनी हुगी यङ्ल येशुगी ॱलोप्टुक्ल मी ॱसम्ब गज्येन् स्युन युङ्नी, छ्यो़ छो नङ्दु हीब्रु केच्च्य लप्केन् यहुदी घयेक्की ढीक्ल ग्रीक्की केच्च्य लप्केन् यहुदी घयेक्की हीन्दुक् सीन्न पोला ज्यब बेत्। सम गो़न टो़प्पे यङ्ल हुबे ङीक्की मोरेङ्मु घयेत्ल दम्ङीत् झ्यीक्कुक् झ्यीब बेत्। 2 हुनी ठीक्नल च्युन्नीबु दीबे येशुगी ॱलोप्टुक्ल स्युब घयेत् दी जोम्दु ची़त्न हुब घयेत्ल हीन्दुक् सीन्न ॱस्येप्प बेत्। को़न्ज्योक्की केच्च्य दी ॱस्यो़च्च्ये स्यक्नी, सम गो़न टो़प्पे ढीक्ल लेदम् च्योक्केन् हीगो ङीत् गज्ये ॱमीत् छोरेत्। 3 पी़न्ज्यासो, खीत्रङ् घयेक्की छीक्नी कुरीक्की तेबल धम्बे थुगी घेङ धङ् झ्यी़रीक् च्येम्मे मी मीरङ् दी़न् दोम्लेत्। हुनी हस्सो़त् हीगी ले हीगो ङीक्की हुबल को़न झ्यीत्तु ची़क्केन्। 4 हुनी हस्सो़त् ङीत् घयेत् ॱसुव तोबल धङ् को़न्ज्योक्की केच्च्य ॱस्यो़क्केङ्गी लेल छ्युवक् दो़त् छुगेन् बेत् सीन्न झ्यीब बेत्। 5 ॱनी हीगी केच्च्य हील हुगी मी घयेत् दी कुरीक् गुन हुल थी़न्नी, इस्तीफनस् सीक्केन् च्यीक् दम्ब बेत्। हुगो छ्य डम्सी स्योक्केन् धम्बे थुगी घेङे मी यो़प्प बेत्। ॱनी ॱयोङ्मा फीलीप् सीक्केन् च्यीक्, प्रखरस् सीक्केन् च्यीक्, नीकनोर् सीक्केन् च्यीक्, तीमोन् सीक्केन् च्यीक्, पर्मीनास् सीक्केन् च्यीक् धङ् एन्टीयोक् सार्की मी यहुदीगी छ्यो़लुल स्युबे मी नीकोलौस् सीक्केन् च्यीक् दम्ब बेत्। 6 ॱनी हुगी मीरङ् दी़म्बु दी ठीक्नल दीबे दोङ्दु ठीक्न युङ्न, हुबल ठीक्नल दीबे लक्पे ॱवङ् केन को़न्ज्योक् च्यानी ॱमेल्लम् स्यी़ब बेत्। 7 ॱनी यरुशलेम्दु घल अक् को़न्ज्योक्की केच्च्य धर्न युङ बेत्। हुनी मी गज्येन् येशुगी ॱलोप्टुक्ल स्युन, हरुङ् मङ्दु फीन युङ बेत्। ॱनी यहुदीगी छ्यो़प्पो़न् घयेक्की छीक्नी इक् गज्येन् छ्य स्योक्पे लम्ल युङ बेत्। इस्तीफनस् छ्यो़गी छोक्तेन् छ्यीम्मुल सुङ्न ठीक्प ८-१५ 8 ॱनी इस्तीफनस् दी को़न्ज्योक्की थुज्यी धङ् ॱस्यीक्की घेङे मी झ्यीनी, मी घयेक्की घुङ्दु यम् छेम्मे ले धङ् यीक् छ्यीम्मी़ लेगी ता गज्येन् झ्यीब बेत्। 9 ॱनी हीन्न अक्, लेन् च्यीक् मी यरी इस्तीफनस्की डल लोङ्न इस्तीफनस्तङ् केच्च्य थुक्री चीय बेत्। ॱनी हुब यरी सैरेनी धङ् अलेक्जेन्डीयागी लुङ्बनी थो़न्न युङे रङ्मो़ च्येम्म यहुदी घयेक्की छ्यो़ छोगी मी, यरी सीलीसीयागी लुङ्बे मी धङ् यरी एशीयागी लुङ्बे मी हीङ्गो़प्प बेत्। 10 ॱनी हुगी थुक्री चीय दील इस्तीफनस्ल धम्बे थुगी झ्यी़रीक् टेत्नी, हुब कुरीक् फम्नर बेत्। 11 ॱनी हुगी थुक्री चीगेन् दीब घीन फीन्नी, हुबे मी यरीब लक्ल लीन्न हुगी इस्तीफनस् सीक्केन् हुगी को़न्ज्योक् धङ् मोशाल ॱमो़म्बी़त् तोङ्गुक्। हीगी केच्च्य हीगो खीत्रङ्गी मी ॱयोङ्म घयेत्ल ॱस्यो़च्च्यीत् सीन्न नक् कोप्च्ये ॱनो़न झ्यी़ तङ बेत्। 12 ॱनी ॱमो़म्बी़त् तोङ्गुक् सीक्केन् दी मीमङ्, छ्यो़डीम्गी चयेलम घयेत् धङ् लुङ्बे गेम्बा चो छ्यीया घयेक्की ॱह घोनी, हुब घयेत् खोङ्डोक् लङ्न, इस्तीफनस् सुङ्दु तङ्न छ्यो़गी छोक्तेन् छ्यीम्मुल ठीक्न युङ बेत्। 13 हुनी हुदु ॱएलम ज्यक्केङ्गी पङ्बु घयेत् ठीक्न युङ्नी, हुगी पङ्बु दीबे हीगी मी हीगी को़न्ज्योक्ल तीम्बे छ्यो़गङ् धङ् छ्यो़डीम्ल ॱमो़म्बी़त् तङ् तङ झ्यीक्कुक्। 14 ॱनी नासरत्की येशु हुगी हज्यरङ्गी छ्यो़गङ् हीगो ॱरुम्न धङ्बु मोशागी ॱनङे टो घयेत् ज्युर्केन् बेत् सीन्न च्योर आक् ङीक्की ॱह घोज्युङ् सीन्न ॱस्येप्प बेत्। 15 ॱनी हुगी छोक्तेन् छ्यीम्मी़ मी घयेत् दीगी इस्तीफनस्ल तेनी, हुगी स्यारे दी तेङ् यी़गी भङ्ज्येम्बे स्यारे डस्सी थोङ बेत्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.