ठीक्नल 28 - ल्होमीछ्यी़ घुङ्गी ॱसने माल्टादु ॱलीबे तम् १-१० 1 ॱनी छीगल थो़न्नी, हुगी छ्यी़ घुङ्गी ॱसने दील माल्टा बेत् सीर ॱह घोज्युङ्। 2 हुगी मी घयेत् दीबे ङीत् घयेत्ल गस्सी झ्यीज्युङ्। छ्येप्प ज्यप्न छ्यासी झ्युङ्नी, हुब घयेक्की ङीत्ल मी तङ्न बीन्न गस्सी झ्यीज्युङ्। 3 ॱनी हुदु पावल्की ॱस्यीङ्सक् बक्सक् डुन युङ्न मील कप्नी, ॱनी हुगी मी ढो़त् दीगी हुगी ॱस्यीङ्सक् दीनी डी़ थो़न्न युङ्न पावल्की लक्पल तोन डी़न् डी़ल्ल देप्प बेत्। 4 ॱनी पावल्की लक्पल डी़ डी़न् डी़ल्ल दो़प्प दी हुगी लुङ्बे मी घयेत् दीबे थोङ्नी, हुबे रोरङ्सो ॱनम्बु हुगो मीस्सेन् हीङ्गो़प्पेत्। छ्यु ज्यम्जो छ्यीम्मी़ लक्नी थर्न युङ्न अक्, हुल ङेल्लेन् दी हीन्दुक् झ्यीन फोक्न ह हुगो ॱमीत् ॱसो़गेन् बेत् सीन्न झ्यीब बेत्। 5 ॱनी पावल्की रोरङ्गी लक्प दी दप्न डी़ दी मील कप् तङ बेत्। ॱनी रोल च्यो़न् घन्ड अक् मत् युङ बेत्। 6 हुगी लुङ्बे मी घयेत् दीबे ह पावल् हुगो बो़गो़दङ् न टक् ॱस्यी डोगो़दङ् ॱनो़न तगीन् देप्प बेत्। ॱनी धोबा च्यीक् थुक् तेनी, पावल्ल घन्ड अक् मत् युङल, हुब घयेक्की ॱनोक्सम् दी ज्युर्न हीगी मी हीगो ॱल्ह हीम्ब न, घन्ड ब अक्? झ्यीब बेत्। 7 ॱनी हुगी थप्स्यील माल्टा लुङ्बे पेम्बु चो छ्यीस्स्यो पप्लीयस् सीक्केन् च्यीक्की ॱसज्य च्यीक् यो़प्प बेत्। ॱनी हुगी ङीत् घयेत्ल थोङ् झ्यीन रोरङ्गी खीम्ल ठीक्न ङीत् हुदु स्यक्पु ॱसुम् देप्पेन्। 8 ॱनी उन पप्लीयस्की पब दी ढो़त् बर्न ज्यम्न नान दो़क्कुक्। ॱनी पावल् नेप्प दी च्याल फीन्न ॱसुव तप्न लक्पे ॱवङ् केन ढक्तु ची़प्प बेत्। 9 ॱनी हीगो झ्युङ्नी, हुगी लुङ्बे नेप्प ॱयोङ्म घयेत् दी इक् पावल् च्याल युङ्न हुब कुरीक् ढक्प बेत्। 10 ॱनी हुगी लुङ्बे मी घयेक्की ङीत्ल यस्सो तो़प्प गज्येन् झ्यीज्युङ्। ॱनी तीङ्ला ङीत् ढुल स्युन डोये यङ्ल अक् ङीत्ल गो़बे खोज्येत् घयेत् कुरीक् हुबे ॱलुक्न तङ्ज्युङ्। पावल्सो रोम् सार्ल ॱलीबे तम् ११-१६ 11 हीनी हुदु गी़म्बु दव ॱसुम् थुक् देप्पेन्। ॱनी अलेक्जेन्डीया सार्की ढु छ्यीम्मु च्यीक् गी़न् घङ् उन स्यक्न दुक्। ॱनी ङीत् हुल स्युन छ्यु ज्यम्जो छ्यीम्मी़ लम्ल फीम्बेन्। हुगी ढी़ दोङ् दीन ॱल्ह छीरुक्की डवु ॱङी सो़न दुक्। 12 ॱनी ङीत् फीन्नी सीराकुस सार्ल ॱलीच्च्युङ्। हुदु स्यक्पु ॱसुम् देप्पेन्। 13 हुनी यङ् ङीत् ढु दीलरङ् स्युन फीन्नी रेगीयम् सार्ल ॱलीबेन्। हुगी नेम्बेत् दीनी ॱल्हो ङो़नी छुल्ल ॱलुङ्बु ज्यप्न युङ्नी, ङीत् यङ् ढुल स्युन फीम्बेन्। हुनी ॱनाङ् दी पटीयोली सार्ल ॱलीत् छुज्युङ्। 14 ॱनी हुदु ङीत्ल छ्य च्यीक्की पी़न्ज्या यरी ठेत्नी, हुबे ङीत्ल दी़न्डक् च्यीक् ङीत्तङ् दो़त्रो झ्यी सीन्न स्युव ज्यप्च्युङ्। ॱनी ङीत् देप्पेन्। हुनी ङीत् रोम् सार्ल कङ्दङ् फीम्बेन्। 15 ॱनी ङीत् युङ्गुक् सीरे तम् दी एल्ला रोम्गी पी़न्ज्या घयेक्की ॱह घोनी ङीक्की दोङ्ल अप्पीयस् सीक्केन् ठोम्ल धङ् सगङ् ॱसुम् सीस्से ॱसनेल ते ॱलीच्च्युङ्। ॱनी हुब घयेत् दोङ्ल युङ थोङ्नी, पावल्ल ॱलोप्स्यीक् ॱङीत्न को़न्ज्योक्ल थु छ्यी पुब बेत्। 16 हीनी ङीत् रोम् सार्ल ॱलीत्नी, पावल् चो़ल्ल ॱमत् ॱलुक्प, रोरङ् रङ्स खीम् च्यीक्तु दो़त्तु ची़प्प बेत्। ॱनी हुदु पावल्ल तगेङ्गी गोराब च्यीक् को़न स्यक्प बेत्। रोम्दु पावल्की दो़स्सदु झ्युङे तम् १७-३१ 17 हीनी स्यक्पु ॱसुम् ॱसोङ्नी, पावल्की हुगी रोम् सार्की यहुदी छ्यीया छ्यीया घयेत् दीब ठीक्तु तङ बेत्। ॱनी हुब युङ्नी, पावल्की हुब घयेत्ल खीत्रङ् फम पी़न् घयेस्सो, हज्यरङ् यहुदी घयेत् धङ् हज्यरङ्गी पुबु ॱमुमी़ टो घयेत्ल ङे ङीब घन्ड अक् मत् झ्ये। ॱनी मत् झ्येन अक्, ङ यरुशलेम्दु सुङ्न रोमीयागी लक्ल ची ज्यप्न कीङ्न स्यक्च्युङ्। 18 ॱनी रोमीयागी पेम्बी़ ङल ठीम् च्येत्न तेनी, ङ ॱसो़च्च्येमे छ्येप्प फोक्केङ्गी नक् घन्ड अक् ॱमत् ॱङीबल, हुबे ङ चो़न्नी तोङ्ज्ये ॱनो़ब झ्यीसोङ्। 19 ॱनी हील हुगी यहुदी छ्यीया घयेत् दी मत् गुव, डल लोङ्नी, ङ सीजर् ज्याबु च्याल ङे खम्ज्यु हीगो पो़त्रो झ्यी सीन्न सीर् गो़ ॱस्यर्च्युङ्। ॱनी म दी ङ हीदु ङे ज्यी़क्की मी हुब घयेत्ल खम्ज्यु ज्यक्तु युङ मेन्। 20 हीगी तम् हीगो ॱस्यो़च्च्येगी ढीक्ल नीज्यरङ्सो ङे भो़बेन्। इस्राएली घयेक्की ॱसुल रीगो झ्यीन गुन दो़क्कुक्क हुगी ढीक्ल ङल च्यागोङ् हीगो ज्यप्न यो़त् सीन्न ॱस्येप्प बेत्। 21 ॱनी हुगी यहुदी घयेत् दीगी पावल्ल ङीत्ल रङ्गी ढीक्ल यहुदीयानी यीगी घन्ड अक् ॱलीत्मोङ्। हुनी फम पी़न् ॱसु युङ्न अक्, रङ्गी ढीक्ल तम् अयेक्प घन्ड अक् ॱस्येत्मोङ्। 22 ॱनी रङ्गी ॱनो़बे केच्च्य घन्ड यो़प्प ङीत्ल ॱस्यो़त्लेत्। ङीत् हुगो नेङ्गीन् थेक्कुक्। ङीक्की ॱह घोवल हीगी छ्यो़लु ङो़गी मी घयेत्ल घदु उक् डल लोङ्गुक् सीर उजो़त् च्यीक् मेन्द, ङीत्ल ॱयोङ् ॱस्यो़च्च्ये मीत् सीन्न झ्यीब बेत्। 23 ॱनी हुगी यहुदी घयेत् दीदङ् पावल् तीङ्ला फीच्च्य जोम्बे ङीङ्गी छ्यो़त्तुम् च्यीक् स्यक्प बेत्। ॱनी हुगी ङीन् दी पावल् च्येल्ल यहुदी घयेत् एल्लाले मङा जोम्न युङ बेत्। ॱनी हुब घयेत्ल ॱङेट्टोनी झ्यीनी गोङ्मु थुक् पावल्की को़न्ज्योक्की ज्यागक्की केच्च्य ॱस्येत्न टेप्प बेत्। हुब घयेक्की येशुल छ्य स्यक्न युङ् छुज्ये यो़प्पल पावल्की मोशागी छ्यो़डीम्नी धङ् कलुङ् ॱस्यो़क्केन् घयेक्की ॱसुङ्रप्नी कोक्न ॱस्येप्प बेत्। 24 ॱनी यरीगी बेत् ॱनो़न छ्य स्यक्प बेत्। यरीगी हुल छ्य मत् स्यक्प बेत्। 25 हीनी हुब घयेत् रोरङ्सो नङ्दु मत् डीक्प बेत्। ॱनी हुब थो़न्न डोये यङ्ल हुबल पावल्की खीत्रङ्गी पुबु ॱमुमु घयेत्ल धङ्बु कलुङ् ॱस्यो़क्केन् यशैयागी लम्नी धम्बे थुगी झ्यीन ॱस्येप्पे तम् हीगो दीम्बरङ् बेत्। 26 हुगी मी घयेत्ल हीन्दुक् सीन्न ॱस्यो़त्। खीत्रङ्गी नेम्ब त नेङ्गेन् बेत्। ॱनी मीत् घोगेन् बेत्। तय त तगेन् बेत्। ॱनी ॱमीत् थोङ्गेन् बेत्। 27 हीगी मी हीबे गट्टक्पे ॱसीम् खुर्नी, हीबे आम्ज्योक् दी इक् गानर, ॱमीक् दी इक् रुप्नर बेत्। हीब गट्टक्प मीत्न ॱनी, हीबे ॱमीक्की थोङेत् क। आम्ज्योक्की इक् घोयेत् क ॱनी। ॱनी हुब ङ च्याल लोक्न, ङे हुब ढक्तु ची़प्पेत् क ॱनी सीर थो़ङ्गेन् बेत्। (यशैया ६:९-१०) 28 हुगो झ्यीनी खीत्रङ्गी ङे तम् हीगो ॱह घोव झ्यीज्यीत्। को़न्ज्योक्की ॱनङे छी थर्वे केच्च्य हीगो ज्यी़त् ॱयोङ् ॱयोङ्गी मी घयेक्की ढीक्ल अक् बेत्। ॱनी म दी हुब घयेक्कीरङ् हील नेङ्गेन् बेत् सीन्न झ्यीब बेत्। 29 [पावल्की हीन्दुक् झ्यीन ॱस्येत्नी, हुगी यहुदी घयेत् दीब हीगी ढीक्ल केच्च्य थुक्री चीगील्ल टप्नर बेत्।] 30 हीनी पावल् हुदु रोरङ्गी खङ्लल ॱयरे खीम् दीदु लोङ ॱङी थुक् देप्प बेत्। ॱनी हुदु रोल ठेत्तु युङ्गेन् घयेत्ल रोगी गस्सी झ्यीब बेत्। 31 रोरङ् च्याल युङ्गेन् घयेत्ल पावल्की ॱहब दुब मीप्प, ॱसुल आक् ज्यीक्टक् मत् झ्यीब, को़न्ज्योक्की ज्यागक्की केच्च्य धङ् चोव ज्यीन्दक् येशु ख्रीष्ट्की धो़ङ्गी ॱलोप्स ज्यप्न टेत् टेप्प झ्यीब बेत्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.