ठीक्नल 27 - ल्होमीपावल्सो रोम् सार्ल फीम्ब १-१२ 1 हीनी फेस्तस्की ह पावल् हीगो इटालीगी लुङ्बल ढु छ्यीम्मुल ॱलुक्न तोङ्गेन् झ्यीब बेत्। हुनी पावल्तङ् दल चो़म्बा ॱयोङ्म ॱयोङ्म आक् तोङ्ज्येमल युलीयस् सीक्केन् ॱमक्पो़न् च्यीक्की गेल्ल स्यक्प बेत्। हुगो सीजर् ज्याबी़ ॱमक्च्यप् सीक्केन् च्यीक्की ॱमक्पो़न् हीङ्गो़प्प बेत्। 2 ॱनी ङीत्तङ् दल मासीडोनीया लुङ्बे थीस्सलोनीका सार्की दगु अरीसतार्खस् दी इक् यो़त्। हुनी ङीत् कुरीक् एशीया लुङ्बे छीगल ॱनेगेन् सार् सार्ल डोगेङ्गी ढु छ्यीम्मु च्यीक्ल स्युन छ्यु ज्यम्जो छ्यीम्मी़ लम्ल फीम्बेन्। हुगी ढु दी एडामीटीयम् सार्की बेत्। 3 ॱनी नेम्बेत् दी सीदोन् सार्ल ॱलीबेन्। ॱनी हुदु ॱमक्पो़न् दीगी पावल्ल गस्सी झ्यीन पावल्ल गो़बे गो़ज्येत् घयेत् लीन्दु रोरङ्गी दगु घयेत् च्याल ढु दीनी थो़न्न सार्ल डोदु ची़प्प बेत्। 4 हुनी यङ् ङीत् ढु दील स्युन छ्यु ज्यम्जो छ्यीम्मी़ लम्ल फीम्बेन्। ॱनी डोये यङ्ल दोङ् ङो़नी छुल्ल ॱलुङ्बु ज्यप्न युङ्नी, ङीत् छ्यी़ घुङ्गी ॱसने सैप्रस्की लुङ्बल च्यीप्न डो गो़ ॱस्यर्च्युङ्। 5 सीलीसीया धङ् पम्फीलीयागी लुङ्बे ॱयेन् ङो़नी फल्ल छ्यु ज्यम्जो छ्यीम्मी़ लम्ल फीन्नी, लैसीयागी लुङ्बे मैरा सार्ल ॱलीबेन्। 6 ॱनी हुदु इटाली लुङ्बल डोगेङ्गी अलेक्जेन्डीया सार्की ढु च्यीक् ठेत्नी, ॱमक्पो़न् दीगी ङीत् घयेत् हुल पो़न ॱलुक्च्युङ्। 7 हुनी छ्यु ज्यम्जो छ्यीम्मी़ लम्ल डोवल घासी झ्युङ्नी, घलुल फीन्नी स्यक्पु गज्येल्ल क कीनीडस् सार्की ॱल्हो ङो़ल ॱलीच्च्युङ्। हुनी ॱलुङ्बु स्युक् छ्यीम्मु ज्यप्न युङ्नी, स्युङ्ज्योङ् डो ॱमत् छुबल छ्यी़ घुङ्गी ॱसने क्रेट्की लुङ्ब ङो़ल च्यी़न फीन्न ॱलुङ्ग कक् योङ् ॱनो़न हुगी ॱस्यर्की सालमोने ॱसनेगी ज्यप् ङो़नी फल्ल कोर्न च्यीप्न फीम्बेन्। 8 ॱनी ॱलुङ्बु अच्च्येत् च्यीक् कक्न युङ्नी, हुगी छीग छीगनी फल्ल छ्यु ज्यम्जो छ्यीम्मी़ लम्ल टेत् च्येत्न फीन्नी हुगी छीगे ॱसने च्यीक्ल ॱलीबेन्। ॱनी उन ढु स्योक्स गस्सी सीक्केन् च्यीक् यो़क्केन् बेत्। ॱनी हीगो लासीया सार्की लोल ॱनेगो़प्प बेत्। 9 हीगो सक् ॱलीबल स्यक्पु गज्येन् थोब बेत्। थोनी यहुदीगी ॱनुक्नेगी धी़ दी यो़नर हीङ्गो़प्प बेत्। ॱनी हुगी यङ्ल छ्यु ज्यम्जो छ्यीम्मी़ लम्ल डोवल फी ढानर बेत्। हुगी धी़ल फीन्न ॱनी, ज्यीसी युङ्गेन् बेत्। हीगी ढीक्ल पावल्की हीन्दुक् सीन्न ढो़ टेप्प बेत्। 10 खीत्रङ् घयेत् नेन्दे त। ङे ॱनो़बल हज्यरङ् घयेत् हन्देन् ढुल स्युन फीन्न, ज्यीसी युङेत्। ढु दील अक् च्यो़न् युङेत्। खेद घयेत्ल अक् च्यो़न् युङेत्। ॱनी हुगो छ्युवक् मेम्ब, हज्यरङ् थम्ज्येत् ॱस्यी योङ् झ्यीब बेत्। 11 ॱनी हुगी ॱमक्पो़न् दीगी पावल्की ढो़ दील मत् नेम्ब, ढु तोङ्गेन् चोबो़न् दी धङ् ढी़ दक्पु दीगी खल मङा नेम्ब बेत्। 12 ॱनी हुदु देत्न गी़न्दोक् यो़दु ची़प्पल ढु स्योक् छुदोक्प मीप्पल, हुब घयेत् मङागी छ्यु ज्यम्जो छ्यीम्मी़ लम् दीलरङ् फीन्न क्रेट् लुङ्बे फोनीक्स सार्ल ॱलीत् छुगो़ट्टो। ॱनी हुदु गी़न्दोक् यो़दु ची़त्तोङ् सीन्न ढो़ झ्यीब बेत्। फोनीक्स दीन ढु स्योक्स यो़प्प बेत्। हुदु झ्यङ् धङ् नुप्की घुङ्नी छुल्ल च्यीक्, ॱनी ॱल्हो धङ् नुप्की घुङ्नी छुल्ल च्यीक् मेन्द, ॱलुङ्बी़ गो ॱमीत् खीगो़प्प बेत्। ज्यम्जो छ्यीम्मुदु भुयुक् ज्यब १३-४४ 13 हीनी ॱल्हो ङो़नी छुल्ल ॱलुङ्बु धोबारङ् ज्यप्नी, हुब घयेक्की ह हज्यरङ् डो छुबेत् ॱनो़न छ्यी़ नङ्दु ॱहप्केन् च्यागी ओक्च्येलेङ्म दी पीक्न ढु दील दी़न हुनी क्रेट्की लुङ्बे छीग छीगनी फल्ल झ्यीन फोनीक्स ङो़ल फीम्बेन्। 14 हीनी अच्च्येत् च्यीक्नी फोनीक्स ङो़ दीनी छुल्ल ॱस्यर् धङ् झ्यङ्गी घुङ्गी ॱलुङ्बु सीक्केन् भुयुक् छ्यीम्मु च्यीक् लोङ्न ॱलीच्च्युङ्। 15 हुनी ङीक्की ढु दी च्यु ॱमत् छुबल, भुयुक्ल घल हीन्न हीन् ॱसोर्तु ची़त् तङ्। 16 हीनी छ्यी़ घुङ्गी ॱसने कलौडा सीक्केन् च्यीक्की ॱल्हो ङो़ल ॱलीच्च्युङ्। ॱनी भुयुक् दी हुगी ॱसने दीगी अच्च्येत् कक्नी, ढु दीगी तक्ल डान यो़प्पे ढु च्युङेत्मु दी टेत् च्येत्न थीन्न नङ्ल ॱलुक् छुज्युङ्। 17 हीनी ढुबा दीबे ढु दी स्यीक्च्ये मीप्पल ढु दीगी छीग ॱनमुल थक्पे कोर्न डम्बोक्म डाब बेत्। हीनी छ्यु तीङ्रीङ्ज्ये मीप्पे ॱसने सीर्तीस्तु ढु दी ॱसल ॱहप् योङ ॱनो़न ज्यीनी, ढु दी ढीम्सी ज्युक्च्ये मीप्पल हुबे ॱनम्ल टम्बे घुलक् दी इक् मल्ल पप्न दोब बेत्। हुनी ढु दी ॱलुङ्बी़ घल ॱसोर्न ॱसोर् स्यक् तङ बेत्। 18 ॱनी भुयुक् दी म दीरङ् हुन्दुक् दीरङ् ज्यप् ज्यब झ्यीनी, नेम्बेत् दी ढु दी यङ्दु तोङ्ज्येल खेद धोबा च्यीक् छ्युल पुर् तङ बेत्। 19 हीनी ॱनाङ् दी यङ् ढुबा दीबे ढी़ यप्च्य घयेत् दी कुरीक् छ्युल पुर् तङ बेत्। 20 ॱनी स्यक्मु गज्येन् थुक्ल ङीम थोङ्गेन् ॱएन् मीन्दुक्। कर्म थोङ्गेन् ॱएन् मीन्दुक्। भुयुक् गन्दीक्म ज्यप् ज्यब झ्यीनी, हुनी ङीत् म दीरङ् ॱस्यी योङ् ॱनो़ब मेन्द, ॱसो़ योङ् ॱनो़बे त रीगो दीरङ् मत् युङ्। 21 हीनी ङीत् कुरीक्की सम स ॱमत् छुबल लेन स्यक्पु गज्येन् ॱसोङ्नी, पावल् लोङ्न उन यो़प्प घयेत् दील ॱवे खीत्रङ् घयेक्की ङे झ्यीबे तम् दील नेन्न क्रेट्की लुङ्ब दीदुरङ् देप्प हीन्न ॱनी, स्येन् हज्यरङ्ल नुक्मे दुक्स्यी धङ् घी़न्नक् मत् युङ यो़ट्टो। 22 ॱनी हीन्न अक्, खीत्रङ् घयेत् ॱसीम्ब ॱलो दीरी झ्यीन दो़त्। हज्यरङ् ॱसु उक् ॱमीत् ॱस्यीगेन् बेत्। ढु हीगोरङ् मीत्तल डोगेन् बेत्। 23 ङे धेप्प मो़ब झ्यीक्केन्, ङे दक्पु को़न्ज्योक्की भङ्ज्येम्ब च्यीक् दङ् छेम्मु इगीनी मल्ल ङ च्याल थो़न्न ॱलीच्च्युङ्। 24 ॱनी खोङ्गी ङल ज्यीब मत् झ्यीत् पावल्। रङ् घन्दुक् झ्यीन हीन्न अक्, सीजर् ज्याबी़ दोङ्दु ॱलीक्केन् बेत्। तेदे को़न्ज्योक्की रङ्ल थुज्यी ॱनङ्न, रङ्दङ् दल ढुल यो़क्केन् घयेत् कुरीक् छ्यीगेन् बेत् सीन्न ॱस्येच्च्युङ्। 25 खीत्रङ् ॱसीम्ब ॱलो दीरी झ्यीन दो़त्। को़न्ज्योक्की ङल घङ् ॱसुङ हुगो दीम्बरङ् डुप्केन् बेत्। ङ हुल छ्य स्योक्केन्। 26 ह हज्यरङ्ल छ्यी़ घुङ्गी ॱसने च्यीक् ठेत् गोगेन् बेत् झ्यीब बेत्। 27 हीनी स्यक्पु च्युप्स्यी ॱसोङे गोङ् दी छ्यु ज्यम्जो छ्यीम्मु एडीया दीगी घुङ्नी फल्ल भुयुक्की ॱसोर्न डोगीन् यो़त्। ॱनी छेङ्गी घुङ्ल हुगी ढुबा दीबे ॱसने च्यीक्की छीगल ज्योक्पु ॱलीक्को़प्पेत् ॱनो़ब छ्यर बेत्। 28 ॱनी हुगो दीम्बरङ् ॱह घोज्येल छ्यु तीङ्रीङ्लो़त् यो़त् छेत् ज्यप्न तेब बेत्। ॱनी दोम्ब ङीस्स्यु यो़प्प ठेप्प बेत्। हीनी अच्च्येत् च्यीक् फीन्नी यङ् छेत् ज्यप्नी, दोम्ब च्येङ ठेप्प बेत्। 29 हुगो झ्यीनी छ्यी़ नङ्गी ढक्ल दु योङ ॱनो़न ज्यीबे ढी़ तक् दीनी मल्ल च्यागी ओक्च्येलेङ्म स्यी छ्युल पुर्न ढु दी दो़त्तु ची़प्प बेत्। हुनी हुबे ज्योक्सी नम् लोङ्रो झ्यी सीन्न ॱमो़त् भोर्कीन् देप्प बेत्। 30 ॱनी हुगी ढुबा दीबे ढु च्युङा दील स्युन फीन्न ॱसो़गो़ट्टो ॱनो़न हुगी ढु च्युङा दी छ्युल पुर बेत्। ॱनी हुबे ढी़ दोङ् दीनी मल्ल ओक्च्येलेङ्म पुर्केन् हीन्दोक्प झ्यीन ढो़ज्येल ढु च्युङा दील स्युक्च्ये ॱनो़ब झ्यीब बेत्। 31 ॱनी पावल्की हुगी ॱमक्पो़न् दी धङ् ॱमक्मी दीबल हीगी ढुबा हीब हीदु मत् देत्न, हज्यरङ् घयेत् ॱमीत् ॱसो़गेन् बेत् झ्यीब बेत्। 32 हुनी ॱमक्मी दीबे ढु च्युङागी थक्प दी दुम्न या टे तङ बेत्। 33 हीनी नम् लोङ्ज्येम ॱयेङे यङ्ल पावल्की हुगी मी घयेत् दील सम सो। खीत्रङ् घयेत् खच्चीङ्नी झ्यीनी ॱसीम्दुक्की स्यक्मु च्युप्स्यी थुक् सम घन्ड अक् मत् सेब देप्प बेत्। 34 ह खीत्रङ् घयेत् सम सरो झ्यी। खीत्रङ् ॱसो़ज्येगी ढीक्ल सी़बुल ॱस्यीक् ॱङीच्च्येल स गोगेन् बेत्। ॱसुल आक् च्यो़न् घन्ड अक् मीत् युङ्गेन् बेत्। टत्तोक् च्यीगी च्यीक् इक् ॱसल ॱमीत् छर्केन् बेत् सीन्न झ्यीब बेत्। 35 हुनी पावल्की ढोप्ची च्यीक् लक्ल खुर्न कुरीक्की थोङ्सदु को़न्ज्योक्ल थु छ्यी पुन ढोप्ची दी च्यक्न सेब बेत्। 36 ॱनी मी ॱयोङ्मा घयेत् दीबे ॱसीम्ब दी तेल्ल भप्न, हुबे एक् सम सेब बेत्। 37 ढु दीन तोम्दु ङीत् मीरङ् ज्यब ॱङीदङ् दी़न्ज्यु धो़रुक् यो़त्। 38 ॱनी कुरीक्की डङ् डङ् सम सेनी, ढु दी यङ्दु तोङ्ज्येल ढे धोबु घयेत् दी छ्युल पुर् तङ बेत्। 39 हुनी नम् लोङ्नी, ढुबा दीबे तेनी फच्चो़त्न ॱसने च्यीक् यो़प्प थोङ बेत्। ॱनी म दी हुगो ङु ॱमत् ॱस्यीब बेत्। ॱनी हुगी छीग दीदु छ्यी़ लुम गर्चम च्यीक्ल झ्यीम यो़त्तोक्प थोङ्नी, हुल ढु दी च्यी़न ॱलुक् छुब झ्यीदोङ् झ्यीब बेत्। 40 हुनी ढुबा दीबे ओक्च्येलेङ्म स्यीबु दी मत् दी़ब, थक्प दी दुम्न छ्यी़ नङ्ल स्यक् तङ बेत्। हीनी ढु च्युगेङ्गी यप्च्य ॱङो़म डान स्यक्प दी ॱस्यीक्न हुगी छीग ङो़ल तोङ्ज्येल दोङ् ङो़गी ॱलुङ्ग लीङ्गेङ्गी घुलक् दी इक् टम्न तङ बेत्। 41 ॱनी छीगल ॱमत् ॱलीच्चो़त्तु छ्यी़ नङ्गी झ्यीमे लस्सुर्ल ढु दी ॱहप्न हुनी डो ॱमत् छुब बेत्। ढी़ दोङ् दी ॱहप्न देत्नी, तक् दील छ्यी़ भजुप् गर्चम बेन्न युङ्नी, ढी़ तक् ङो़ दी च्यक् तङ बेत्। 42 हुनी हुगी नङ्ल यो़प्पे चो़म्बा घयेत् दी च्ये ज्यप्न ढो़ डोगो़ट्टो ॱनो़नी, हुगी ॱमक्मी दीबे चो़म्बा घयेत् दी ॱसो़च्च्येमे ढो़ झ्यीब बेत्। 43 ॱनी ॱमक्पो़न् दीगी पावल्ल छ्यीज्ये ॱनो़न हुगी ढो़ दी डुप्तु ॱमत् ची़प्प बेत्। बोर हुगी मी घयेत् दील खीत्रङ् च्ये ज्यक् ॱस्यीगेन् घयेत् फीर्ल च्ये ज्योप्ल पक्कल थो़ल्ल ज्युक्। 44 ॱनी खीत्रङ् ॱयोङ्म घयेत् दीब ढु छ्यक्नरे गोमुङ्ल हीन्, ज्युक्पल हीन्न अक्, सुङ्न थो़ल्ल ज्युक् सीन्न खक्को़ ज्यब बेत्। हुन्दुक् झ्यीन ङीत् कुरीक् छीगल थो़न् छुन थर्च्युङ्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.