ठीक्नल 26 - ल्होमी1 हीनी अग्रीपागी पावल्ल रङ्गी केच्च्य घन्ड यो़प्प ॱस्यो़त्लेत् सीन्न क टेप्प बेत्। हीनी पावल्की लक्प ॱलोङ्न हीन्दुक् सीन्न रोरङ्गी नक् फी़ज्येमे केच्च्य ॱस्येप्प बेत्। 2 ङल यहुदी घयेक्की नक् कब घयेत् फी़ज्येल ज्याबु नीज्यरङ्गी ढुङ्दु हरीङ् ङल तम् ॱस्यो़च्च्ये ॱनोङल ङ ॱसोदी च्येम्म ॱसम्गो़त्। 3 ज्याबु नीज्यरङ्ल यहुदीगी टो घयेत् धङ् यहुदीगी छ्यो़लुगी ठुक्पल चोक्केङ्गी केच्च्य घयेत् कुरीक् थुज्यी यो़क्केन् बेत्। हुगो झ्यीनी ॱनी, ङे तम्ल धु च्यङ्न ॱसेर्रो ॱनङ् सीन्न स्युदेन् पुगेन्। 4 ङ भीजनी झ्यीनी, ङ कीस्से फयुदु धङ् यरुशलेम्दु ङे मीजीगी लेमु घयेत् कुरीक् यहुदी घयेत्ल ॱस्यो़च्च्ये यो़क्केन् बेत्। 5 ङ एल्ला ङीत् यहुदीगी छ्यो़लु धम्स्यो च्येम्म फरीसी छ्योल स्युन यो़त्। हीगो दीम्बरङ् हीम्ब हुब घयेत्ल एल्लानीरङ् ॱस्यो़च्च्ये यो़क्केन् बेत्। हुबे हीगो पङ्बु झ्यीन ॱस्यो़च्च्ये ॱनो़न ॱनी, ॱस्यो़त् छुगेन् बेत्। 6 धङ्बु ङीक्की पुबु ॱमुमु घयेत्ल को़न्ज्योक्की ॱसुङे छ्यो़त्तुम्ल ङ रीगो झ्यीन देप्पे ढीक्ल हीगी खम्ज्यु हीगो झ्युङ्। 7 ङीत् यहुदी ज्यी़त् च्युन्नीबी़ मी घयेत् कुरीक् ङीन् छेन् मीप्प ॱसीम्बे यीक्नी को़न्ज्योक्ल छ्यक् छ्यो़प्प पुन हुगी छ्यो़त्तुम् जेप्प दी डुप्च्ये यो़प्पल रीगो झ्यीन दो़क्केन् बेत्। ज्याबु अग्रीपाला, हीगी रीगो हीगी ढीक्ल क यहुदी घयेक्की ङल ङीब कोप्कुक्। 8 मी ॱस्यीन खुर घयेत् को़न्ज्योक्की ॱसोम्बुल ॱलोङ्गेन् बेत् सीरल खीक्की घन्डल छ्य स्योक् ॱमीत् छुबेत् सीक्केन्। 9 ङे एक् एल्ला नासरत्की येशुगी छेङ्गी डल लोङ्न घन्ड झ्यीत् छुगो़दङ् हुगो झ्यीच्च्ये ॱनो़बे ॱसम्ल खुरेन्। 10 ॱनी यरुशलेम्दु उक् हुन्दुक् दीरङ् झ्यीबेन्। छ्यो़प्पो़न् चो छ्यीया घयेक्की लक्नी ॱहक् लीन्न ङे को़न्ज्योक्की मी चङ्म गज्येन् चो़ल्ल ॱलुक्पेन्। ॱनी हुगो छ्युवक् मेम्ब, हुब ॱसो़क्केन् दीबदङ् थी़न्न ॱसो़त्लोङ् झ्यीबेन्। 11 यहुदीगी छ्यो़गी छोगङ् घयेत्ल अक् छीगङ् फीन्न हुब घयेत्ल ङे ठीम् तङेन्। हुब घयेत्ल खेरक् तङ्न रोरङ्सो़ छ्य स्यक्पे लम् दील ॱमो़म्बी़त् तोङ्गेल्ल सो छुब झ्यीबेन्। खोङ्डोक्की गन्दीक्म मी बर्न, ङ ज्येङ्गम्गी लुङ्बे सार् घयेत्ल अक् गीर्न दुक्प अयेक्प तोङ्दु फीम्बेन्। 12 ॱनी हीगी ढीक्ल ङल छ्यो़प्पो़न् चो छ्यीया घयेक्की ॱहक् धङ् क टेत्नी ङ ङीन् च्यीक् दमस्कस् सार्ल डोगीन् यो़त्। 13 ज्याबु अग्रीपाला, ङीम घुङ्गी छो़त्ल इगी तेङ् यी़नी ङीमे ओ़च्च्यले टक्पा च्यीक् ङ धङ् ङे दगु दीबे छीग ॱनमुल पेक्च्युङ्। 14 ॱनी ङीत् कुरीक् ॱसल घोप् डीज्युङ्। हुनी हीब्रुगी केच्च्यल ॱवे शावल् शावल् ङल घन्डल दुक्प अयेक्प तोङ्गेन्। तोक्लङ् ॱनोन्दीक्मल ॱमो़लङ्गी ठाग बेम्ब डस्सी रङ्गी झ्यीक्कुक्। हुगो रङ्ल सुक्केन् बेत् सीरे केत् च्यीक् ङे ॱह घोज्युङ्। 15 हीनी ङे खोङ्ल चोव ज्यीन्दक् ङल तम् ॱस्यो़क्केन् नीज्यरङ् ॱसु हीम्ब? सीन्न ढीबेन्। ॱनी खोङ्गी ङल ङ येशु हीन्। ङल रङ्गी दुक्प अयेक्प तोङ्गुक्। 16 ह लोङ्। हुन्दो रङ्गी घङ् थोङ धङ् ॱनी तीङ्ला ङे रङ्ल घङ् तो़ङ्गेन् घयेत् ॱयोङ् ॱयोङ्ल पङ्बु झ्यीन दीम्बे केच्च्य ॱस्यो़क्केन्, ङे ॱयोक्पुल को़त्तु ङ थो़न्न युङेन्। 17 रङ् ङे घल तङ्न आक्, यहुदी घयेक्की लक्नी धङ् ज्यी़त् ॱयोङ् ॱयोङ्गी मी घयेक्की लक्नी छ्योप्केन्। 18 हुब घयेक्की ॱसीम्बे ॱमीक् दी भीदु ची़त्न मेन्नक्नी मेङ्गल, शैतान्गी लक्नी को़न्ज्योक् ङो़ल युङ्ज्येल धङ् ङल छ्य स्यक्पे लम्नी दीक्प घयेत् धक्न को़न्ज्योक्की धक्पर् हीम्बल सो़बे मी घयेक्की घुङ्दु हुब घयेत् युङ् छुज्ये यो़प्पल ङे रङ् हुब घयेत् च्याल तोङ्गेन् सीन्न ॱङाज्युङ्। 19 ज्याबु अग्रीपाला, नुक् झ्यीन तेङ् यी़नी थोङ्नङ् तो़न्नी, हुल ङ मत् नेम्ब दो़त् छुमोङ्। 20 ॱनी ङे हीगो गोम दमस्कस्ल हुनी यरुशलेम्ल हुनी यहुदीयाल घल अक् हुनी ज्यी़त् ॱयोङ् ॱयोङ्गी लुङ्ब घयेत्ल गीर्न फीन्न हुगी मी घयेत्ल ॱसीम् ज्युर्न को़न्ज्योक् च्याल लोक्न युङ्न हुल पीबे ले घयेत् झ्यीज्यीत् सीन्न घल अक् ॱस्येत्न टम्बेन्। 21 हुगो झ्यीनी यहुदी घयेक्की ङ छ्यो़गङ्दु सुङ्न दुङ्न ॱसो़च्च्येम झ्यीज्युङ्। 22 ॱनी हजो़त् थुक्ल को़न्ज्योक् ङे दगुल यो़क्केन् झ्यीनी, ङ हीदु हीन्दुक् झ्यीन मी छ्यीया च्युङा कुरीक्ल येशुगी ढीक्की दीम्बे केच्च्य ॱस्यो़त् छुगेल्ल यो़त्। ॱनी ङे हीगो धङ्बु कलुङ् ॱस्यो़क्केन् घयेत् धङ् मोशागी ॱसुङ्रप्ल घङ् यो़प्प मेन्द, हुल ॱनो़म्ब ज्यप्न ॱमीत् ॱस्यो़त्। 23 ॱनी हुगी ॱङो़स्स्यील च्यप्को़ल्ल को़न तङे ख्रीष्ट्ल दुक्स्यी नोङ्न ढोङ् गो़ ॱस्यर्केन् बेत्। हुनी यङ् खोङ् ॱसोम्बुल लोङ्गेन् बेत्। ॱनी ॱस्यीनरनी ॱएन्स्युक्ल ॱसोम्बुल लोङ्गेन् दी खोङ् झ्यीनी ॱनी, यहुदी घयेत् धङ् ज्यी़त् ॱयोङ् ॱयोङ्गी मी घयेत्ल अक् मेङ्ग पेक्केन् दी खोङ् युङ्गेन् बेत्। 24 ॱनी पावल्की हुन्दुक् झ्यीन नक् फी़बे केच्च्य हुगो ॱस्यो़प्पे यङ्ल फेस्तस्की हुगी केच्च्य दी फीट्ट च्येत्न केत् छ्यीम्मु तो़न्न पावल्ल रङ् ॱनोनत्तुक्। रङ्गी यीगी गज्येन् डोनी, हुगी रङ् ॱनोबुल सो़ तङ बेत् झ्यीब बेत्। 25 ॱनी पावल्की लेम्बुल फेस्तस् रीम्बुर् छ्यी, ङ ॱनोय मेम्बेत्। ङे तम् हीगो दीम्बरङ् धो़ङ्गी तम् बेत्। 26 ज्याबु अग्रीपाला, हीगी तम् हीगो नीज्यरङ्ल कुरीक् थुज्यी यो़क्केन् बेत्। हीगो झ्यीनी ङ नीज्यरङ्ल ॱलो खीन ॱस्यो़त् छुबेत्। हीगी केच्च्य घयेत् हीगो बेक् बेक् ॱसुङ् ॱसुङ् झ्यीन मत् युङ बेत्। हुगो झ्यीनी नीज्यरङ्ल कुरीक् ॱस्यो़च्च्ये यो़प्प हीम्बल ङ देङ् खीन यो़त्। 27 ज्याबु अग्रीपाला, कलुङ् ॱस्यो़क्केन् घयेक्की ॱसुङ्रप्की केच्च्य घयेत् खुङ्देन् हीम्बल नीज्यरङ्गी छ्य स्योक्केन् बेगङ् ॱनी। हुगो ङल ॱस्यो़च्च्ये यो़त् सीन्न ॱस्येप्प बेत्। 28 ॱनी ज्याबु अग्रीपा दीगी लेम्बुल खोक्की नुक्मे ज्योब ङ ख्रीष्ट्यान्ल सोज्ये ॱनो़ब ॱसम्गो़प्प झ्यीब बेत्। 29 ॱनी पावल्की हील ज्योक्पुरङ् हीन्, गज्येर्रङ् थोन आक्, नीज्यरङ् छ्युवक् मेम्ब, हुन्दो ङे तम्ल नेङ्गेन् खीत्रङ् कुरीक् ङल ज्यबे च्यागोङ् हीगो पी़प्पे ङ डस्सीरङ् युङ्ज्ये यो़प्प तोङ् सीन्न को़न्ज्योक्ल ॱसुव तोप्को़त् झ्यीब बेत्। 30 हुनी ज्याबु अग्रीपा दी लोङ्न हुगोदङ् दल फेस्तस् दी धङ् बर्नीस् दी, ॱनी उन यो़क्केन् मी ॱयोङ्म घयेत् दी इक् कुरीक् छ्यील थो़म्ब बेत्। 31 ॱनी थो़न्न डोये यङ्ल रोरङ्सो ॱनम्बु हुल चो़ल्ल ॱस्योर्तोक्प धङ् ॱसो़च्च्येमे छ्येप्परङ् फोक्केङ्गी नक् घन्ड अक् मीन्दुक् सीन्न तम्स्यु लब बेत्। 32 हीनी ज्याबु अग्रीपा दीगी फेस्तस्ल हीगी मी हीगी सीजर् ज्याबु च्याल खम्ज्यु हीगो पो़त्रो झ्यी मत् झ्येब हीन्न, स्येन् हीगो तङ् तङ्न आक् डीक्पेत् झ्यीब बेत्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.