ठीक्नल 25 - ल्होमीपावल्की खम्ज्यु सीजर् ज्याबु च्याल तोङ्गेन् १-१२ 1 हुगी फेस्तस् दी रोरङ् ले झ्यीस्से पो़ङ्गङ् दील ॱलीत्नी, स्यक्पु ॱसुम् ॱसोङ्नी, सीजरीया सार्नी यरुशलेम्ल फीम्ब बेत्। 2 ॱनी हुदु छ्यो़प्पो़न् चो छ्यीया घयेत् धङ् यहुदी चो छ्यीया घयेत् दी फेस्तस् च्येल्ल युङ्न हुबे पावल्की खम्ज्यु दी ॱलोङ बेत्। 3 हुब घयेक्की फेस्तस्ल पावल्की खम्ज्यु दी हीदु यरुशलेम्ल पो़न, ङीत्ल गस्सी युङेत्। पावल् हुगो हीदु तोङ्रो झ्यी सीन्न स्युदेन् ज्यब बेत्। घन्ड हीन् सीन्न हुबे पावल् लम्दु गुन ॱसो़च्च्येमे ढो़ झ्यीन यो़प्प बेत्। 4 ॱनी फेस्तस्की लेल्ल हुबल पावल् सीजरीयान चो़न्न यो़क्केन् बेत्। ङ अक् ज्योक्पु लोक्केन्। 5 पावल् हुगी ङीब झ्यीन यो़त्न ॱनी, खीत्रङ्गी छीक्नी गेन् खुर्केन् मी यरीब ङदङ् कङ्ज्यीक्ल फीन्न नक् दी हुदुरङ् कोप् गोगेन् बेत् सीन्न झ्यीब बेत्। 6 हुनी फेस्तस् हुदु स्यक्पु ज्येच्चो़त् गुजो़त् च्यीक् देत्नी मल्ल सीजरीयाल लोक्प बेत्। ॱनी सीजरीयाल ॱलीबे नेम्बेत् दीरङ् फेस्तस् पो़न् स्युडील स्युन ठीम् च्यो़च्च्येल पावल् चो़ङ्गङ्नी तो़म्ब बेत्। 7 ॱनी पावल् हुदु तो़न्न युङ्नी, यरुशलेम्नी युङे यहुदी दीबे पावल्ल तीक् खीरी कोर्न ङीनक् छ्यीम्मु गज्येन् कब बेत्। ॱनी हीन्न अक्, खुङ् च्यो़ ॱमत् छुब बेत्। 8 हुनी पावल् हुगी ङीब दी फी़ज्येल लोङ्न ङे यहुदीगी छ्यो़डीम्गी ढीक्ल, छ्यो़गङ्गी ढीक्ल धङ् सीजर् ज्याबी़ ढीक्ल ङीब घन्ड अक् मत् झ्ये झ्यीब बेत्। 9 ॱनी फेस्तस्की हुगी यहुदी दीब गुदु ची़च्च्येल पावल्ल रङ् यरुशलेम्ल च्येन रङ्गी ठीम् हीगो हुदु ङे च्येत्न डीक्पेक्कक्? सीन्न ढीब बेत्। 10 ॱनी पावल्की लेल्ल सीजर् ज्याबी़ ठीम् च्यो़स्स दी हीगोरङ् बेत्। ङ अक् हीनरङ् यो़त्। ङे ठीम् हीगो हीदुरङ् च्यो़त् गोगेन् बेत्। यहुदी घयेत्ल ङे च्यो़न् घन्ड अक् ॱमत् तङ्। हीगो नीज्यरङ्ल अक् ॱस्यो़च्च्ये यो़क्केन् बेत्। 11 ङे ठीम्ल ङीन, ङल ॱसो़त् गोगेङ्गी छ्येप्प फोक्न ङ ॱस्यी गो़ ॱस्यको़र्त्न ॱनी, ङ ॱस्यीगेन्। ॱनी हीगो त मेम्ब, यहुदी हीबे ङल नक् कब दी मीत् धक्को़त्न ॱनी, हुबे लक्ल ङ ॱसी़ इक् ची ज्यक् ॱमीत् छुगेन् बेत्। बोर ङे खम्ज्यु हीगो सीजर् ज्याबु च्याल पो़न तोङ्रो झ्यी झ्यीब बेत्। 12 ॱनी फेस्तस्की रोरङ्गी ढो़ टो़क्केन् दीबल ढो़ ढीनी, हुनी पावल्ल रङ्गी सीजर् ज्याबु च्याल पो़त्रो झ्यी सीन्नी रङ् हुदुरङ् तोङ्गेन् झ्यीब बेत्। फेस्तस्की पावल्की ढीक्ल अग्रीपाल ॱस्येप्प १३-२२ 13 हुनी स्यक्पु धोबा च्यीक्नी ज्याबु अग्रीपा धङ् हुगी नुमु बर्नीस् सीक्केन् च्यीक् सीजरीयाल फेस्तस् च्याल ज्यादु युङ बेत्। 14 ॱनी हुदु स्यक्पु धोबा च्यीक् देत्नी फेस्तस्की ज्याबु अग्रीपा दील पावल्की खम्ज्यी़ केच्च्य दी हीन्दुक् सीन्न ॱस्येत्न टेप्प बेत्। फेलीक्सागी ङोल स्यक्पे चो़म्बा च्यीक् हीन दुक्। 15 ॱनी ङ खच्चीङ् यरुशलेम्ल फीन्नी, हुगी छ्यो़प्पो़न् चो छ्यीया घयेत् धङ् यहुदीगी गेम्बा चो छ्यीया घयेक्की ङल पावल् हुगो नक्पो़न् बेत्। हुल छ्येप्प को़रो झ्यी सीन्न स्युव ज्यप्च्युङ्। 16 ॱनी ङे हुब घयेत्ल रोम्गी ज्यागक्की ठीम्ल हुन्दुक् झ्यीब मीत् युङ्गेन् बेत्। नक् कोप्केन् दी धङ् नक् फी़गेन् दी ॱङीक्कर् ठीम् च्यो़स्सदु यो़प्पे यङ्ल नक् फी़गेन् दीगी रोरङ्गी ढीक्ल केच्च्य ॱस्यो़त् छुगेन् बेत्। हुन्दुक् झ्यीन ठीम् च्येत्न, हुगो फम्न क, हस्सो़त् हुल छ्येप्प को़ छुगेन् बेत् सीन्न झ्यीबेन्। 17 हुनी हुब घयेत् ङदङ् दल यरुशलेम्नी हीदु युङ्नी, नेम्बेत् दी ॱस्यर्च्यक् ङ पो़न् स्युडील देत्न हुगी चो़म्बा दी तो़न्न ठीम् च्यो़स्सल ठीक्लेत् सीन्न खक्को़ ज्यबेन्। 18 ॱनी हुगी नक् कोप्केन् घयेत् दीबे तीक् खीरी कोर्सोङ्। ॱनी हुबे नक् छ्यीम्मु च्यीक् कोप्को़प्प ब अक् ॱनो़न, झ्यीबे घन्डे नक् अक् कोप् ॱमत् छुसोङ्। 19 नुक्रङ् रोरङ्सो़ छ्यो़लुगी ढीक्ल ठुक्प ज्यक्कुक् क मेन्द। हुब घयेक्की येशु सीक्केङ्गी मी दी ॱस्यीनर बेत् सीगुक्। ॱनी यङ् पावल्की हुगो हुन्दो ॱसोम्बु यो़क्केन् बेत् सीन्न ओङ्रेन् थप्कुक्। 20 ॱनी हीगी ठीम् हीगो च्यो़त् ॱमीत् ॱस्यीब, नुक्रङ् गो थोम्न लेनी, ङे पावल्ल खो़त् यरुशलेम्ल च्येन ङे हुदु हीगी ठीम् हीगो च्येत्न डीक्पेक्कक्? सीन्न ढीबेन्। 21 ॱनी हुगी लेल्ल हीगी खम्ज्यु हीगो सीजर् ज्याबु च्याल पो़न तोङ्रो झ्यी सीन्न सीच्च्युङ्। ॱनी ङे हीगो सीजर् ज्याबु च्याल नम् तोङ्तोङ् थुक्ल चो़न् दीदुरङ् स्योक् सीन्न खक्को़ ज्यबेन्। 22 ॱनी अग्रीपा दीगी फेस्तस्ल हुगी मी हुगी तम् ॱस्यो़क्केन् हुगो ङ अक् नेङ्गीन् थेक्कुक् झ्यीब बेत्। ॱनी फेस्तस्की नेम्बेत् नेन्ज्ये युङ्गेन् बेत् झ्यीब बेत्। पावल्की ज्याबु अग्रीपाल ॱस्येप्पे तम् २५:२३–२६:३२ 23 हीनी नेम्बेत् दी अग्रीपा धङ् बर्नीस् दी ॱङम्दङ् छ्यीम्मु तो़त्न ॱमक्पो़न् छ्यीया घयेत् धङ् हुगी सार्की मी चोवा घयेत् दीबदङ् मुल पो़ङ्गङ्गी नङ्दु छोस दील स्युब बेत्। हीनी फेस्तस्की पावल् चो़न्नी तो़न्न हीदु ठीक्लेत् सीन्न खक्को़ ज्यब बेत्। 24 पावल् ठीक्न युङ्नी, फेस्तस्की हुगी मी जोम्ब घयेत् दील हीन्दुक् सीन्न ॱस्येप्प बेत्। ज्याबु अग्रीपा नीज्यरङ् धङ् हीन यो़प्प खीत्रङ् घयेस्सो, हीगी मी हील तो़। चो़म्बा दी हीगो बेत्। हीगी ढीक्ल यरुशलेम्गी यहुदी घयेत् धङ् हीगी सार्की यहुदी घयेक्की केत् छ्यीम्मु तो़न्न हीगो ॱमत् ॱसेप्प स्यक्न मीत् युङ्गेन् बेत् सीन्न स्युव ज्यप्च्युङ्। 25 ॱनी ङे हील ॱसो़च्च्येमे छ्येप्परङ् फोक्च्येमे नक् घन्ड अक् थोङ्मोङ्। ॱनी हीगी इक् ङे खम्ज्यु हीगो सीजर् ज्याबु च्याल पो़न तोङ्रो झ्यी सीन्नी ॱनी, ङे एक् हुदु तोङ्ज्येलरङ् ठोक्क झ्यीन स्यक्पेन्। 26 ॱनी ॱअल तोङल हीगी ढीक्ल सीजर् ज्याबुल घन्दुक् झ्यीबे यीगी ढीन तोङ् गोगेन् बेक्क हुगो ॱमत् ॱङीबल हीगी मी हीगो ॱएन्स्युक्ल नीज्यरङ् ज्याबु अग्रीपागी ढुङ्दु धङ् खीत्रङ् ॱयोङ्म घयेक्की घुङ्दु उक् तो़न्न युङेन्। हज्यरङ्गी हील तम् च्युर्न ॱनी, ङल अक् यीगी ढीये लेमु ॱङीक्को़दङ् ॱनो़गुक्। 27 घन्ड हीन् सीन्न चो़म्बागी नक् दी यीगील ढीन तङ्न मेन्द, गज्ये मीत् युङ्गेन् झ्यीब बेत्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.