ठीक्नल 24 - ल्होमीपावल्ल फेलीक्सागी ढुङ्दु नक् कब १-९ 1 हीनी ङीम ॱङ ॱसोङ्नी, छ्यो़प्पो़न् चो छ्यीस्स्यो हननीया दी धङ् लुङ्बे गेम्बा चो छ्यीया यरीबे खबाल तेर्तुलस् ठीक्न सीजरीयाल भप्न युङ बेत्। हुनी हुबे पावल्की ढीक्ल हुगी फेलीक्साल ठीम् स्यी़ब बेत्। 2 हुनी फेलीक्सागी ठीम् च्यो़स्स दील पावल् तो़न्न युङ बेत्। ॱनी हुदु हुगी तेर्तुलस् दी लोङ्न हीन्दुक् सीन्न नक् कब बेत्। पो़न् फेलीक्सा रीम्बुर् छ्यी, नीज्यरङ्गी ङोल लुङ्बल स्यीव यो़क्केन् बेत्। नीज्यरङ्गी ॱवङ्गी होक्ल देत्नी, ङीक्की लुङ्ब गज्येङ्गी गदु ॱसोङ्। 3 नीज्यरङ्गी घल अक् घङ् जेप्प घयेत्ल ङीत् गस्सी छोर्कुक्। हुगी ढील्लेन् ङीक्की ज्या दीरङ् ॱमीत् छुगेन् बेत्। 4 ङ नीज्यरङ् ह गक् मीत् गोर्। ङीत्ल तम् च्यीक् यो़त्। हील स्यी ठीज्ये मीप्प, थु ॱसेर्रो ॱनङ्। 5 हीगी मी हीगी कुरीक्ल ॱनो़त् च्यो़गेन् बेत्। जम्बुलीङ् घल अक् गीर्न यहुदी घयेक्की घुङ्दु हुट्ट ॱलोङ्गुक्। ॱनी हीगो नासरत्की छ्यो़लु सीक्केन् च्यीक्की गोयो़प्प बेत्। 6 ङीक्की छ्यो़गङ् दील अक् हीगी ढीप्लङ् कोप् छुब झ्यीब बेत्। हुगो झ्यीनी ङीक्की हीगो सुङेन्। [ङीक्की हीगोल छ्यो़डीम्ल यो़प्पे ठीम् च्यो़च्च्ये ॱनो़ज्युङ्। 7 ॱनी हुगी ॱमक्पो़न् चो लायसीयस् युङ्न ङीक्की लक्नी हीगो ठोसोङ्। 8 हुनी ङीत्ल नीज्यरङ्गी ढुङ्दु खम्ज्यु ज्योप्लेत् सीन्न सीच्च्युङ्।] नीज्यरङ्गी हीगी मी हील ठीम् च्येत्न तेनी, ङीक्की नक् कब हीगो खुङ्देन् हीम्ब ॱह घो छुगेन् बेत् सीन्न झ्यीब बेत्। 9 ॱनी हुदु युङे यहुदी दीबे एक् रोरङ्सो़ खबागी तम् दील खुङ्देन् बेत् बेत् झ्यीब बेत्। पावल्की रोरङ्गी ढीक्ल खबा झ्यीन ॱस्येप्प १०-२३ 10 हीनी फेलीक्सागी पावल्ल तम् ॱस्यो़त् सीरे लाद ज्युर बेत्। ॱनी पावल्की लेल्ल नीज्यरङ् ङीक्की लुङ्बे ठीम्बो़ल्ल खो़त्न युङ्नी, लो गज्येन् ॱसोङ बेत्। हुगो झ्यीनी नीज्यरङ्गी ढुङ्दु ङ गव झ्यीन नक् फी़ज्येमे केच्च्य ॱस्यो़त् छुबेत्। 11 ङ यरुशलेम्ल छ्यो़गङ्दु ॱसुव तोप्तु युङ्नी, स्यक्पु च्युन्नीरङ् क ॱसोङ्। हीगो खुङ् हीन् धङ् मेल्ल नीज्यरङ्गी ॱयोङ्ल ढीन ॱह घो छुगेन् बेत्। 12 हीगी मी हीबे ङ छ्यो़गङ्दु ॱयोङ्दङ् केच्च्य थुक्री चीय थोङ्ज्ये न, न छ्यो़गी छोगङ्दु धङ् सार्ल घल अक् गीर्न तेन्स्यीक् ॱलोङ थोङ्ज्ये। 13 रोरङ्सो़ ङल नक् कबे तम्गी खुङ् दी इक् च्यो़ब मीत् ज्यो़म्बेत्। 14 खुङ्देङ्गी केच्च्य दी हीगो बेत्। हुबे छ्यी़नरे लम् बेत् सीक्केन् दील फीन्न पुबु ॱमुमु घयेक्की को़न्ज्योक्ल ङे धेप्प मो़ब झ्यीन यो़त्। ङीक्की छ्यो़डीम्गी ॱसुङ्रप् धङ् कलुङ् ॱस्यो़क्केन् घयेक्की ॱसुङ्रप्ल घङ् ढीन यो़प्प घयेत् दी खुङ्देन् हीम्बल ङे छ्य स्यक्न यो़त्। 15 ॱनी यङ् हीबे डस्सी को़न्ज्योक्की मी ढङा हीन्, मत् ढङा हीन्न अक्, मी ॱस्यीन खुर घयेत् कुरीक् को़न्ज्योक्की ॱसोम्बुल ॱलोङ्गेन् बेत् सीक्केङ्गी तम्ल ङे एक् छ्य स्यक्न को़न्ज्योक्ल रीगो झ्यीक्को़त्। 16 को़न्ज्योक्की ढुङ्दु धङ् मी घयेक्की छीक्तु ङल ॱनोङ् मीत् युङ्गेङ्गी लेमु झ्यीन ॱसीम् सङ्बु खुर्न तोक्स्यीप् झ्यीन दो़त् छुब झ्यीक्को़त्। 17 ङ यरुशलेम्ल मत् युङ लोङ गज्येन् ॱसोङ्। ॱनी हन्देन् ङरङ्गी ज्यी़क्की मी यहुदी दुक्च्या घयेत्ल कुम्मु च्यो़दु धङ् को़न्ज्योक्ल छ्यो़प्प पुदु सीन्न युङेन्। 18 ॱनी ङ ठी़ ज्यप्न छ्यो़गङ्दु छ्यो़प्प पुज्येमे लेमु झ्यीप्पे यङ्ल एशीया लुङ्बनी युङे यहुदी यरीबेरङ् हुदु ङ थोङ बेत्। हुगी यङ्ल उन मी इक् गक् मीत्। ॱनी घन्डे हुट्ट अक् मीत्। 19 हुबे तेबल ङल नक् यो़प्प थोङ्न ॱनी, हीदु नीज्यरङ्गी ढुङ्दु हुबरङ् युङ्न कोप्च्येम बेत्। 20 ॱनी हीगो मेन्न ॱनी, हीन यो़क्केन् हीबे ङ छ्यो़गी छोक्तेन् छ्यीम्मी़ दोङ्दु यो़प्पे यङ्ल ङल ङीब यो़प्प थोङ्न ॱनी, हुगो ॱस्येत्न आक्, डीक्केन् बेत्। 21 ङ हुदु लोङ्न यो़प्पे यङ्ल हुगी छोक्तेन् छ्यीम्मी़ मी घयेत्ल ङे मी ॱस्यीन खुर घयेत् को़न्ज्योक्की ॱसोम्बुल ॱलोङ्गेन् बेत् सीरे ढीक्ल ङल खम्ज्यु हीगो ज्यप्च्युङ् सीन्न ङे हुदु केत् ज्यबेन्। ङे ङीनक् दी हीगोरङ् हीन्डो सीन्न ॱस्येप्प बेत्। 22 ॱनी फेलीक्साल चोव ज्यीन्दक्की लम्गी केच्च्य कुरीक् ॱस्यो़च्च्ये यो़प्प बेत्। ॱनी फेलीक्सा दीगी लेल्ल ॱमक्पो़न् चो लायसीयस् युङ्नी मेन्द, खीत्रङ्गी ठीम् हीगो ॱमीत् च्यो़त् सीन्न पीद तङ बेत्। 23 ॱनी रोरङ्गी होक्की ॱमक्पो़न् च्यीक्ल पावल् हीगो ॱमत् तोङ, चो़ल्ल ॱलुक्न हुदु कीप्पोक्म स्योक्। ॱनी हुगी दगु युङ्न हुल गो़बे खोज्येत् तीक्केल्ल क ॱमत् च्यो़त् सीन्न खक्को़ ज्यब बेत्। पावल् सीजरीयागी चो़ङ्गङ्ल २४-२७ 24 हीनी स्यक्मु धोबा च्यीक् ॱसोङ्नी, फेलीक्सागी रोरङ्गी नङ्जङ् डुसील्ला दी ठीक्न पावल् चो़न्नी तो़न्न ख्रीष्ट् येशुल छ्य स्योक्पे ढीक्की केच्च्य ॱस्यो़त्तु ची़प्प बेत्। डुसील्ला दी यहुदीगी ज्यी़त् हीङ्गो़प्प बेत्। 25 ॱनी पावल्की ढङ्बु झ्यीत् गोगेङ्गी ढीक्ल, ॱनो़जो़त् घङ्बु झ्यीच्च्ये मीत् युङ्गेङ्गी ढीक्ल धङ् तीङ्ला को़न्ज्योक्की मी कुरीक्ल ठीम् च्यो़क्केन् हीम्बे ढीक्ल तम् ॱस्येत्नी ॱनी, हुल फेलीक्सा ज्यीबे, ह हन्देन् हीजो़त् च्यीक्की युङेत्। तीङ्ला खोम्बे यङ्ल रङ् तो़न्न यङ् ॱस्यो़त्तु ची़क्केन् झ्यीब बेत्। 26 ॱनी म दी फेलीक्सागी पावल्की घुस् टो़क्को़दङ् ॱनो़न रीगो झ्यीन यङ् अङ् यङ् अङ् तो़न्न तम्स्यु लब बेत्। 27 ॱनी हुन्दुक् झ्यीन लोङ ॱङी ॱसोङ्नी, हुनी फेलीक्सागी छप्पुल पोर्सीयस् फेस्तस् सीक्केन् च्यीक् को़न तङ्न युङ बेत्। फेलीक्सागी यहुदी घयेत् गुदु ची़च्च्येल रोरङ्गी ङोल पावल् ॱमत् तङ, चो़ल्ल ॱलुक् ॱलुक्प दीरङ् स्यक्प बेत्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.