ठीक्नल 23 - ल्होमी1 हीनी पावल्की हुगी छोक्तेन् छ्यीम्मुल जोम्बे मी घयेत् दील ॱवे फम पी़न् घयेस्सो, को़न्ज्योक्की ढुङ्दु हजो़त् थुक्ल ङे ॱनोङ् मीत् लङ्गेङ्गी लेमु झ्यीन ॱसीम् सङ्बु खुर्न देप्पेन् झ्यीब बेत्। 2 ॱनी हुगी छ्यो़प्पो़न् चो छ्यीस्स्यो हननीया दीगी पावल्की लोन दो़क्केन् दीबल पावल्की खल डम्ज्यक् बेन्दु ची़प्प बेत्। 3 ॱनी हुगोल पावल्की ॱवे रङ् चीक्पक्ल छो़ कप्पु ॱही़म्ब डस्सीगी मी बेत्। रङ्ल अक् को़न्ज्योक्की बेन् योङ्। खो़त् चोदु देत्न ठीम् ढङ्बु च्यो़क्को़त् सीक्केन्। ठीम्ल मीप्पे ले ङल घन्डल बेन्दु ची़क्केन्? झ्यीब बेत्। 4 ॱनी उन लोन यो़क्केन् दीबे पावल्ल को़न्ज्योक्की को़बे छ्यो़प्पो़न् चो छ्यीस्स्योल आक् खो़त् ख लोक्केन् सीन्न लप्स्य तङ बेत्। 5 ॱनी हील पावल्की फम पी़न्सो, खोङ्जो छ्यो़प्पो़न् चो छ्यीस्स्यो हीम्ब ङल ॱस्यो़च्च्ये मीत्। ॱसुङ्रप्ल चो छ्यीयाल मीमङ्गी तम् अयेक्प लप्च्ये मीत् युङ्गेन् बेत् सीन्न ढीन यो़क्केन् बेत् सीन्न झ्यीब बेत्। (थो़म्ब २२:२८) 6 ॱनी हुगी छ्यो़गी छोक्तेङ्गी मी घयेत् दी यरी सदुकी, यरी फरीसी यो़प्प पावल्की ॱह घोनी ॱनी, रोगी केत् छ्यीम्मु तो़न्न हुब घयेत्ल फम पी़न्सो, ङ फरीसीगी भु फरीसी हीन्। मी ॱस्यीन खुर घयेत् को़न्ज्योक्की ॱसोम्बुल ॱलोङ्गेन् बेत् सीरल रीगो झ्यीप्पे ढीक्ल ङल हीगी खम्ज्यु हीगो ज्यप्च्युङ् झ्यीब बेत्। 7 ॱनी हीगी केच्च्य हीगी छोक्तेन् छ्यीम्मी़ मी घयेत् दी केच्च्य थुक्री चीन फरीसी छ्यो च्यीक् धङ् सदुकी छ्यो च्यीक्ल भीनर बेत्। 8 घन्ड हीन् सीन्न मी ॱस्यीनी, यङ् हुगो को़न्ज्योक्की ॱसोम्बुल ॱलोङ्गेन् बेत् सीरल, सी़ मीप्पे ॱसीम् घयेत् यो़क्केन् बेत् सीरल धङ् तेङ् यी़गी भङ्ज्येम्ब घयेत् एत् यो़क्केन् बेत् सीरल सदुकी घयेक्की छ्य मीत् स्योक्को़प्प बेत्। ॱनी यङ् फरीसी घयेक्की हीगी ॱनग ॱसुम्बु हील छ्य स्योक्को़प्प बेत्। 9 ॱनी हुगी हुट्ट दी छ्यीदु छ्यीदु ॱसोङ बेत्। हुनी फरीसी छ्योगी छ्यो़डीम्गी चयेलम यरी लोङ्न खेत् गेन्न ङीक्की तेबल हीगी मी हील ङीब घन्ड अक् ॱमीत् थोङेत्। सी़ मीप्पे ॱसीम्गी हीन्, तेङ् यी़गी भङ्ज्येम्बे हीन्न अक्, च्यीक्की हुल तो़न्न ॱस्येत् यो़ट्टो सीन्न झ्यीब बेत्। 10 ॱनी हुबे ठुक्प दी छ्यीदु छ्यीदु लोङ्न युङ्नी ॱनी, हुगी ॱमक्पो़न् चो दीगी पावल् हुब घयेक्की धुम्बु धुम्बुल तुप् तोङेत् ॱनो़न ज्यीबे, ॱमक्मी पोङ्ज च्यीक् हुब घयेक्की घुङ्दु तङ्न पावल् हुनी छ्यीन पो़ङ्गङ्ल ठीक्न युङ बेत्। 11 ॱनी हुगी गोङ् दी चोव ज्यीन्दक् पावल्की दोङ्दु डङी थो़न्न युङ्न पावल्ल रङ् ज्यीक्टक् मत् झ्यीत्। रङ्गी यरुशलेम्दु ङे ढीक्ल दीम्बरङ् बेत् सीन्न केच्च्य ॱस्येप्प डस्सीरङ् रोम् सार्ल अक् ॱस्यो़त् गोगेन् बेत् सीन्न ॱसुङ बेत्। पावल् ॱसो़च्च्येमल केत्मीक्की ढो़ १२-२२ 12 हुनी नेम्बेत् दी यहुदी यरी जोम्न केत्मीत्ल ढो़ झ्यीब बेत्। ॱनी हुब घयेक्की ढो़ दील पावल् हुगो ॱसेत्नी मेन्द, सम थुङ्म मीत् स। सेसोङ् सीन्न ङीत्ल ॱमो़त्मु सुक्च्ये यो़प्प तोङ् सीन्न ॱनगम् झ्यीब बेत्। 13 ॱनी हीगी ढो़ झ्यीक्केन् घयेत् दी तोम्दु मीरङ् स्यीप्च्यु ॱल्हक् यो़प्प बेत्। 14 हुनी हुब घयेत् छ्यो़प्पो़न् चो छ्यीया घयेत् धङ् लुङ्बे गेम्बा चो छ्यीया घयेत् च्याल फीन्न ङीत् घयेत् पावल् हुगो ॱमत् ॱसेप्पल सम थुङ्म घन्ड अक् मीत् स। सेसोङ्न, ङीत्ल ॱमो़त्मु सुक्ल ज्युक् सीन्न ॱनगम् झ्यीबेन्। 15 ह हीगी ढीक्ल खीत्रङ् घयेत् धङ् छ्यो़गी छोक्तेन् छ्यीम्मुनी हुगी ॱमक्पो़न् चो हुल पावल् छोक्तेन् छ्यीम्मुल ठीक्न तम् ढीगेन् हीन्दोक्प डस्सी झ्यीन लेन् च्यीक् तोङ्रो झ्यी सीन्न लो़न् तङ्न हुगो कुक्रो झ्यी। ॱनी ङीत् घयेत् लम्दु गुन ॱसो़त् छ्योक् झ्यीन दो़क्केन् झ्यीब बेत्। 16 ॱनी हुगी ढो़ अयेक्प दी पावल्की छयीक् दीगी ॱह घोनी, रोरङ् पो़ङ्गङ्ल फीन्न पावल्ल ॱस्येप्प बेत्। 17 ॱनी पावल्की ॱमक्पो़न् च्यीक् भो़न हुल हीगी स्यो़म्ब हीगो ॱमक्पो़न् चो च्याल च्यो़रो झ्यी। खोङ्ल ॱस्यो़च्च्येमे तम् च्यीक् हील दुक् झ्यीब बेत्। 18 ॱनी ॱमक्पो़न् दीगी हुगो ठीक्न ॱमक्पो़न् चो दी च्याल च्येन हुल हीन्दुक् झ्यीन ॱस्येप्प बेत्। चो़म्बा पावल्की ङ भो़न नीज्यरङ्ल हीगी स्यो़म्ब हीगी तम् ॱस्यो़च्च्येम च्यीक् यो़त् सीन्न तङ्ज्युङ् झ्यीब बेत्। 19 ॱनी ॱमक्पो़न् चो दीगी हुगी लक्पनी सीन्न फच्चो़त्तु ठीक्न घन्ड ॱस्यो़च्च्येम यो़प्प ङल ॱसोप्ल ॱस्यो़त्लेत् झ्यीब बेत्। 20 ॱनी हुगी स्यो़म्ब दीगी यहुदी छ्यीया घयेक्की पावल् यङ् छोक्तेन् छ्यीम्मुल ठीक्न तम् ढीगेन् हीन्दोक्प डस्सी झ्यीन नीज्यरङ्ल नेम्बेत् तोङ्रो झ्यी सीन्न ढो़गो डीक्न यो़क्केन् बेत्। 21 ॱनी नीज्यरङ् हुल नेर्रो मत् झ्यीत्। घन्ड हीन् सीन्न मीरङ् स्यीप्च्यु ॱल्हक्की मी पावल् ॱमत् ॱसेप्पल सम थुङ्म घन्ड अक् मीत् स। सेसोङ्न, ङीत्ल ॱमो़त्मु सुक्लेच्च्यीत् सीन्न ॱनगम् झ्यीदुक्। ॱनी हुब लम्ल गोङ्न गुन दो़क्केन् बेत्। हुबे ठोक्क झ्यी छर बेत्। नीज्यरङ्गी घन्ड ॱसुङ्गो़दङ् हुलरङ् गुन दो़क्केन् बेत् सीन्न ॱस्येप्प बेत्। 22 ॱनी ॱमक्पो़न् चो दीगी हुगी स्यो़म्ब दील रङ्गी ङल ॱस्येत्न टेप्प हीगो रङ्गी ॱयोङ्ल ॱसुल आक् ॱमत् ॱस्यो़त् सीन्न तङ बेत्। पावल् फेलीक्सा च्येल्ल च्यो़गेङ्गी तम् २३-३५ 23 हुनी हुगी ॱमक्पो़न् चो दीगी रोरङ्गी होक्की ॱमक्पो़न् ॱङी रोरङ् च्याल भो़न हुब ॱङीबुल हन्दरङ् गोङ्मु छ्युजो़त् गुल पावल् सीजरीया सार्ल च्यो़ज्येमल ॱमक्मी ज्यब ॱङी, तल स्यो़ङ्गेन् ॱमक्मी दी़न्ज्यु धङ् दुङ् खुर्केन् ॱमक्मी ज्यब ॱङी ठोक्क झ्यीन स्योक्। 24 पावल् तल केन गन्दीक्म छ्योप्न लुङ्बे पेम्बु छ्यीम्मु फेलीक्सा च्याल च्यो़लेत् सीन्न ॱङाब बेत्। 25 ॱनी हुगी ॱमक्पो़न् चो दीगी फेलीक्साल हीन्दुक् झ्यीबे यीगी च्यीक् ढीब बेत्। 26 पो़न् फेलीक्सा रीम्बुर् छ्यी, नीज्यरङ्ल ङ कलौडीयस् लायसीयस्की छ्यक्सुम् थेमु यो़दो। 27 हीगी मी पावल् हीगो यहुदी घयेक्की सुङ्न ॱसो़च्च्येम झ्यीदुक्। ॱनी हीगो रोम्गी ज्यागक्की मीस्सीर् हीम्ब ङे ॱह घोनी, ॱमक्मी घयेत् ठीक्न फीन्न हुब घयेक्की लक्नी ङे छ्यीबेन्। 28 ॱनी हील यहुदी घयेक्की घन्डे ढीक्ल नक् कोप्केन् बेक्क हुगो ॱह घोज्ये यो़प्पल ङे यहुदीगी छ्यो़गी छोक्तेन् छ्यीम्मुल हीगो ठीक्पेन्। 29 हीगो चो़ल्ल ॱलुक्च्येम धङ् ॱसो़च्च्येमे छ्येप्परङ् को़ज्येमे नक् ङे घन्ड अक् थोङ्मोङ्। हुबे खम्ज्यु दी रोरङ्सो़ छ्यो़डीम्गी ढीक्लरङ् दुक्। 30 ॱनी हुबे हीगी मी हीगो ॱसो़च्च्येमल केत्मीक्की ढो़ अयेक्प झ्यीदुक् सीर ङे ॱह घोनी ॱस्यर्च्यक् ङे हीगो नीज्यरङ् च्याल तङेन्। ॱनी हील नक् कोप्केन् घयेत् दी इक् नीज्यरङ् च्याल ज्युक् झ्यीबेन् सीन्न ढीन तङ बेत्। 31 ॱनी हुगी ॱमक्पो़न् चो दीगी कल चीन, हुगी ॱमक्मी घयेत् दी हुगी गोङ् दीरङ् पावल् ठीक्न छेङ्गङ् फीम्ब बेत्। ॱङेट्टो दी एन्डीपाटीस् सार्ल ॱलीब बेत्। 32 हुनी ॱमक्मी ॱयोङ्म घयेत् दी यरुशलेम्गी पो़ङ्गङ्ल लोक्प बेत्। ॱनी तल स्यो़ङ्गेन् ॱमक्मी घयेत् दी पावल् ठीक्न सीजरीयाल थुक् फीम्ब बेत्। 33 ॱनी हुदु यीगी दी फेलीक्साल टेत्न पावल् हुदु ची ज्यब बेत्। 34 हीनी हुगी यीगी दी फेलीक्सागी डोन तेनी, हुनी पावल्ल खोक्की फयु दी घल ॱनेगो़प्प? सीन्न ढीब बेत्। ॱनी हुल पावल्की सीलीसीया लुङ्बल ॱनेगो़त् झ्यीब बेत्। 35 ॱनी हुगी लेल्ल फेलीक्सागी रङ्गी खम्ज्युव घयेत् दी हीदु ॱलीत्नी मेन्द, ठीम् ॱमीत् च्यो़त् झ्यीब बेत्। फेलीक्सागी पावल् हेरोद्गी सो़बे पो़ङ्गङ्ल ॱलुक्न रोरङ्गी होक्की ॱमक्मी घयेत्ल तो़ सीन्न गोराब स्यक्प बेत्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.