ठीक्नल 22 - ल्होमी1 ॱवे फम पी़न् घयेस्सो, ङे नक् फी़ज्येमे केच्च्य हील नेर्रो झ्यी सीन्न झ्यीब बेत्। 2 ॱनी पावल्की हीब्रु केच्च्यल ॱस्यो़प्प हुगी मी घयेत् दीबे ॱह घोनी कुरीक् ॱसीङ् थागील देत्न नेम्ब बेत्। 3 हीनी पावल्की ङ सीलीसीया लुङ्बे टार्सस् सार्तु कीबे यहुदी हीन्। ङ हीदु यरुशलेम्दु चयेलम गामलीएल्की ॱलोप्टुक्ल स्युन खोङ्गी च्यादु ॱसो़बे मी हीन्। हज्यरङ्गी पुबु ॱमुमी़ छ्यो़डीम् जेङ् ङे ॱस्यीप् धक्पोक्म ॱलप्न खोक् लोङ्न यो़त्। खीत्रङ् हुन्दो को़न्ज्योक्ल ॱसीम्नी धेप्पे छ्योरी छ्यीम्मु झ्यीक्केन् डस्सी ङ अक् हुगी यङ्ल हुन्दुक् दीरङ् यो़त्। 4 ॱनी हुगी यङ्ल ङ हुन्दो डोगेङ्गी लम् हील डोगेन् छ्योगो भुमु घयेत् सुङ्न चो़ल्ल ॱलुक्पेन्। हुबल ॱस्यी ॱस्यी थुक् दुक्प अयेक्प तोङ्गील्ल गीरेन्। 5 हीगो हीन् धङ् मेल्ल छ्यो़प्पो़न् चो छ्यीस्स्यो धङ् छोक्तेन् छ्यीम्मी़ हज्यरङ्गी गेम्बा छ्यीया घयेत्ल ॱस्यो़च्च्ये यो़क्केन् बेत्। हुब घयेक्की क ङल रोरङ्सो़ फम पी़न् दमस्कस्की यहुदी घयेत्ल तो़न्ज्येमे पुर्ची ढीन तङ्ज्युङ्। ॱनी हीगी ॱहक् हीगो ङल थोप्नी, येशुगी लम्ल डोगेन् घयेत् कीङ्न यरुशलेम्ल च्येन छ्येप्प को़ज्येल ङ दमस्कस्ल ठीक्तु फीम्बेन्। 6 ॱनी ङ दमस्कस्ल ॱलीच्च्येम झ्यीप्पे यङ्ल ङीम घुङ्गी छो़त् ॱलीत्न यो़त्। हुगी यङ्ल इगी तेङ् यी़नी मल्ल ओ़च्च्य छ्यीम्मु च्यीक् ङे छीग ॱनमुल पेक्च्युङ्। 7 हीनी ङ ॱसल घोप् डीज्युङ्। हीनी हस्सो़त् ॱवे शावल् शावल् खो़त् ङल घन्डल दुक्प अयेक्प तोङ्गेन् सीरे केत् च्यीक् ङे ॱह घोज्युङ्। 8 ॱनी हील ङे चोव ज्यीन्दक् ङल तम् ॱस्यो़क्केन् नीज्यरङ् ॱसु हीम्ब? सीन्न ढीबेन्। ॱनी हुगी केत् दीगी लेम्बुल ङ नासरत्की येशु हीन्। रङ्गी ङल दुक्प अयेक्प तोङ्गुक् सीन्न ॱस्येच्च्युङ्। 9 ॱनी ङदङ् दल यो़प्पे दगु घयेत् दीबे हुगी ओ़च्च्य दीरङ् थोङ बेत्। ङल लबे केत् दी हुबे ॱह मत् घोव बेत्। 10 हीनी ङे खोङ्ल चोव ज्यीन्दक् ह ङ घन्ड झ्यी सीन्न ॱसुङ्गो़प्प? सीन्न ढीबेन्। ॱनी चोव ज्यीन्दक्की ङल रङ् लोङ्ल दमस्कस्ल ज्युक्। रङ्गी झ्यीच्च्येमे ले घयेत् हुदु रङ्ल ॱङक्केन् बेत्। 11 हुगी ओ़च्च्य टक्सी दीगी ङ ॱमीक्की ॱमीत् थोङ्गेल्ल फीन्ज्युङ्। हुनी ङे दगु दीबे ङल लक्टी़त् तप्न दमस्कस्ल च्येज्युङ्। 12 ॱनी उन मी यहुदी हननीया सीक्केन् च्यीक् दुक्। हुगी छ्यो़डीम्ल ॱसम्न को़न्ज्योक्ल धेप्प झ्यीक्कुक्। हुल हुगी सार्की यहुदी ॱयोङ्म घयेत् दीबे एक् छ्यप्स्यक् स्योक्कुक्। 13 ॱनी हुगो ङ च्याल युङ्न ङे लोदु देत्न ङल पी़न्ज्या शावल् रङ्गी ॱमीक् दी थोङ्गेल्ल ज्युक् सीच्च्युङ्। हुगो सील्लोङ् मीक्ल ङे ॱमीक्की थोङ्गेल्ल फीन्न हननीया दी थोङ्ज्युङ्। 14 हुनी रोगी ङल हज्यरङ्गी पुबु ॱमुमी़ को़न्ज्योक्की खोङ् रोरङ्गी थुल यो़प्प घयेत् रङ्गी ॱस्यीज्ये यो़प्प, ढङ्बु सीक्केन् खोङ् थोङ्ज्ये यो़प्प धङ् खोङ्गी ॱसुङे ॱसुङ्गेत् दी ॱह घोज्ये यो़प्पल रङ् दम्ब बेत्। 15 ॱनी रङ् खोङ्गी पङ्बुल थो़न्न रङ्गी घङ् थोङ धङ् घङ् घोव घयेत् दी मी कुरीक्ल ॱस्येत्न टो़क्केन् बेत्। 16 ह घन्डल थोब यो़प्प। लोङ्ल खोङ्गी छेन् डेन् ज्योप्। हुनी बप्तीस्ल स्यु। हुनी रङ्गी दीक्प धक्केन् बेत् सीन्न ॱस्येच्च्युङ्। 17 हुनी तीङ्ला ङ यरुशलेम्ल लोक्न युङेन्। ॱनी हीदु छ्यो़गङ्ल स्युन को़न्ज्योक्ल ॱसुव तोबे यङ्ल ङ ढेम्ब यङ्मीक्मल ॱसोङ डस्सी च्यीक्ल 18 चोव ज्यीन्दक् थोङ्ज्युङ्। हुनी खोङ्गी ङल रङ् ज्योक्सी झ्यीन यरुशलेम्नी ॱयोङ्ल ज्युक्। घन्ड हीन् सीन्न ङे ढीक्ल रङ्गी ॱस्येप्पे केच्च्यल हीगी मी हीबे ॱस्युली मीत् नेङ्गेन् बेत् सीन्न ॱङाज्युङ्। 19 हीनी ङे खोङ्ल चोव ज्यीन्दक् ङे त यहुदीगी छ्यो़गी छोगङ् घयेत्ल फीन्न नीज्यरङ्ल छ्य स्यक्न दो़क्केन् घयेत्ल दुङ्गीन् धङ् चो़ल्ल ॱलुक्कील्ल गज्येन् गीरेन्। ॱनी हीगो हुब कुरीक्ल ॱस्यो़च्च्ये यो़क्केन् बेत्। 20 नीज्यरङ्गी ढीक्ल पङ्बुल थो़न्न दीम्बे केच्च्य ॱस्यो़क्केन् इस्तीफनस् ॱरोक् च्यो़प्पे यङ्ल अक् ङ हुबे छ्यल देत्न खोङ्जो ॱसो़क्केन् घयेत् दीबे घो़ पीक्न स्यक्प घयेत् दी दक्पु झ्यीन देप्पेन्। 21 ॱनी खोङ्गी ङल रङ् हीनी ॱयोङ्ल डो गोगेन् बेत्। ज्यी़त् ॱयोङ् ॱयोङ्गी मी घयेत्ल तम् ॱस्यो़त्तु थक्रीङ्मुल ते तोङ्गेन् ॱसुङ्ज्युङ्। पो़ङ्गङ्दु पावल्ल बेन्ज्येम झ्यीब २२-२९ 22 ॱनी हीगो थुक्ल हुगी मी घयेत् दीगी नेन्न देप्प बेत्। हीनी यङ् केत् छ्यीम्मु तो़न्न हीगी मी हीगो ॱसो़त् गोगेन् बेत्। ॱमत् ॱसेप्पल म दीरङ् मीत् युङ्गेन् बेत् सीन्न ओ़लोक् ज्यब बेत्। 23 हीनी म दीरङ् रोरङ्सो़ घुलक् धङ् थेदुक् धङ् ॱनम्ल तोर्न ओ़लोक्की गन्दीक्म ॱस खो़ब बेत्। 24 हुगो झ्यीनी ॱमक्पो़न् चो दीगी पावल् पो़ङ्गङ्गी नङ्ल ॱलुक्तु ची़प्प बेत्। ॱनी यहुदी घयेत् पावल्की डल लोङ्न नुक्मे ओ़लोक् ज्यक्केन् हीगी धो़न् दी घन्ड च्यीक् हीम्ब न ॱनो़न ॱमक्पो़न् चो दीगी हील डेङ्ज्यक् बेन्न तम् च्युर् सीन्न खक्को़ ज्यब बेत्। 25 ॱनी डेङ्ज्यक् बेन्ज्येमल कीङ्न स्योक्पे यङ्ल पावल्की रोरङ्गी लोन दो़क्केन् ॱमक्पो़न् च्यीक्ल रोम्गी ज्यागक्की मीस्सीर्ल ठीम् ॱमत् च्येप्पल हीन्दुक्रङ्ल डेङ्ज्यक् बेन्ज्येमे ॱहक् खीत्ल यो़प्प? सीन्न ढीब बेत्। 26 हीगो ॱह घोनी हुगी ॱमक्पो़न् दी रोरङ्गी चो दी च्याल फीन्न हुल हीगी मी हीगो रोम्गी ज्यागक्की मीस्सीर् हीन् सीगुक्। ह घन्ड झ्यीक्केन्? झ्यीब बेत्। 27 ॱनी ॱमक्पो़न् चो दी पावल् च्याल युङ्न खो़त् गन्दीय रोम्गी ज्यागक्की मीस्सीर् हीम्ब? सीन्न ढीब बेत्। ॱनी पावल्की लेल्ल हीन् झ्यीब बेत्। 28 ॱनी ॱमक्पो़न् चो दीगी ङ त खर्च गज्येन् झ्यीनी क, रोम्गी ज्यागक्की मीस्सीर्ल झ्युङ् छुज्युङ्। ॱनी हुल पावल्की ङ त कीजी़नीरङ् रोम्गी ज्यागक्की मीस्सीर् हीन् झ्यीब बेत्। 29 हुनी ॱस्यर्च्यक् पावल्ल तम् च्युर्तु युङे मी दीब तक्ल घीक् झ्यीब बेत्। ॱनी रोम्गी ज्यागक्की मीस्सीर् कीङ्दु ची़त्नी हुगी ॱमक्पो़न् चो दी इक् ज्यीक्टक् लङ बेत्। पावल् छ्यो़गी छोक्तेन् छ्यीम्मी़ दोङ्दु २२:३०–२३:११ 30 ॱनी यहुदी घयेक्की पावल्ल घन्डे ढीक्ल नक् कोप्केन् बेक्क हुगो जेङ् ॱह घोज्ये यो़प्पल ॱमक्पो़न् चो दीगी नेम्बेत् दी यहुदीगी छ्यो़प्पो़न् चो छ्यीया घयेत् धङ् छ्यो़गी छोक्तेन् छ्यीम्मी़ मी घयेत् दी जोम्लेत् सीन्न खक्को़ ज्यब बेत्। हुनी पावल्ल च्यागोङ् ज्यब दी या टेन हुगी पो़ङ्गङ् दीनी तो़न्न छोक्तेन् छ्यीम्मुल च्येब बेत्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.