ठीक्नल 20 - ल्होमीपावल् यरुशलेम् धङ् रोम् सार्ल डोगेन् २०:१–२८:३१ पावल् मासीडोनीया धङ् ग्रीक्की लुङ्बल १-६ 1 हीनी हुगी हुट्ट दी यो़नी, पावल्की उन ॱलोप्टुक्ल स्युन यो़प्प घयेत् दी जोम्दु ची़त्न हुब घयेत्ल ॱलोप्स्यीक्की केच्च्य ॱस्येप्प बेत्। हुनी पीद स्यी़न पावल् मासीडोनीया लुङ्बल टप्नर बेत्। 2 ॱनी हुगी लुङ्ब दीगी घुङ्नी फल्ल गीर्न डोये यङ्ल छ्य स्योक्केन् घङ् ठेप्प घयेत्ल ॱलोप्स्यीक्की केच्च्य गज्येन् ॱस्येत्न टेप्प बेत्। हुनी ग्रीक्की लुङ्बल ॱलीब बेत्। 3 ॱनी हुदु पावल् दव ॱसुम् थुक् देप्प बेत्। हुनी सीरीया लुङ्बल ढुल स्युन छ्यु ज्यम्जो छ्यीम्मी़ लम्ल डोज्येम झ्यीप्पे यङ्ल यहुदी घयेत् दीबे रोरङ्गी ढीक्ल केत्मीत्ल ढो़ अयेक्प झ्यीप्प ॱह घोव बेत्। हुगो ॱह घोनी पावल्की ङ हुगी लम्ल मीत् डो। मासीडोनीया लुङ्बे घुङ्नी फल्ल कोर्न लोक् डोगेन् सीन्न टप्नर बेत्। 4 ॱनी बेरीया सार्की पैर्रस्की भु सोपाटर् सीक्केन् च्यीक्, थीस्सलोनीका सार्की मी ॱङी अरीसतार्खस् सीक्केन् च्यीक् धङ् सीकन्डस् सीक्केन् च्यीक्, ॱनी डर्बी सार्की मी गायस् सीक्केन् च्यीक्, ॱनी तीमोथी, ॱनी एशीया लुङ्बे मी ॱङी टैकीकस् सीक्केन् च्यीक् धङ् त्रोफीमस् सीक्केन् च्यीक् पावल्तङ् दल टप्नर बेत्। 5 ॱनी हुब एल्ला फीन्नी, हुब त्रोआस् सार्तु ङीस्सोल गुक्कीन् देप्प बेत्। 6 ॱनी ङीस्सो च्युर् मत् ज्यबे ढोप्ची सगेङ्गी धी़रीम् यो़नी, फीलीप्पी सार्नी ढुल स्युन छ्यु ज्यम्जो छ्यीम्मी़ लम्ल फीन्नी ङीम ॱङल त्रोआस् सार्ल ॱलीबेन्। ॱनी हुदु खोब ॱएम्मा दीब ठेत्नी, हुदु दी़न्डक् च्यीक् देप्पेन्। पावल्की युटीकस् ॱसोम्बुल ॱलोङ ७-१२ 7 ॱनी हुदु स पीम्बे गोङ् च्यीक् ङीत् कुरीक् खीम् च्यीक्ल स्युन झ्यील्लप्की ढोप्ची च्यक्न सदु जोम्बेन्। ॱनी पावल् नेम्बेत् दी डोगेन् झ्यीनी, हुदु मी जोम्ब घयेत् दील केच्च्य गज्येन् ॱस्यो़क्कीन् देत्नी, छेङ्गी घुङ् छीनर बेत्। 8 ङीत् घयेत् जोम्से कोट्ट थोक्स्युक्म दील बत्ती गज्येन् पेक्न यो़क्केन् बेत्। 9 ॱनी उन मी स्यो़म्ब युटीकस् सीक्केन् च्यीक् स्याज्युङ्गी लोन देत्न यो़प्प बेत्। ॱनी हुदु पावल्की तम् दी रीङ्मु ॱस्येत्नी, हुगो ॱङीत्ल ॱसोङ हीङ्गो़प्प बेत्। हुनी ॱङीत् मत् सेप्पल हुगी थोक्क ॱसुम्मे स्याज्युङ् दीनी मल्ल हुगो छर्नर बेत्। ॱनी छर्स दील तदु फीन्नी, हुगो ॱस्यीनर ठेप्प बेत्। 10 ॱनी पावल् मल्ल भप्न हुगी ॱस्यीन खुर दील ज्यङ् घप्न फङ्ब तब बेत्। हुनी रोगी ॱयोङ्म दीबल ज्यीक्टक् मत् झ्यीत्। उ लोक्च्युङ् सीन्न झ्यीब बेत्। 11 हुनी पावल् यङ् हुगी थोक्स्युक्मे कोट्ट दील जेन हुनी कुरीक्की झ्यील्लप्की ढोप्ची दी च्यक्न सेब बेत्। ॱनी नम् लोङ् लोङ् थुक् हुगी मी दीबदङ् दल पावल् तम्स्यु लप्कीन् देप्प बेत्। हुनी क घीन टप्नर बेत्। 12 ॱनी हुगी स्यो़म्ब दी ॱसोम्बु रोरङ्गी खीम्ल च्येनी, हुगी मी घयेत् दी ॱसीम् तेल्ल भप्न युङ बेत्। एफीसस्की गोयो़प्पल पावल्की केच्च्य ॱस्येत्न स्यक्प १३-३८ 13 हीनी ङीत्ल पावल्की खीत्रङ्सो अस्सोस् सार्ल ढुल स्युन ज्युक्। ङ हुदु कङ्दङ् ॱलीत् योङ्। ॱनी हुदु हज्यरङ् ठेप्पे योङ् सीन्न सीच्च्युङ्। ॱनी ङीत् ढु छ्यीम्मुल स्युन छ्यु ज्यम्जो छ्यीम्मी़ लम्ल फीन्न अस्सोस्ल ॱलीबेन्। 14 ॱनी हुदु पावल् ठेच्च्युङ्। ॱनी ठेत्नी, खोङ्जो ओक् ङीत् युङे ढु दीलरङ् ॱलुक्न हुनी यङ् छ्यु ज्यम्जो छ्यीम्मी़ लम्ल फीन्नी, ङीत् मीतीलेने सार्ल ॱलीबेन्। 15 हुनी यङ् ज्यम्जो छ्यीम्मी़ लम्लरङ् फीन्नी नेम्बेत् दी खीयस् सीक्केन् छ्यी़ घुङ्गी ॱसने च्यीक्की लोनल ॱलीबेन्। हुनी इक् यङ् फीन्नी, ॱनाङ् दी क सामोस् सीक्केन् छ्यी़ घुङ्गी ॱसने च्यीक्लरङ् ॱलीबेन्। ॱनी हुनी इक् यङ् ङीत् छ्यु ज्यम्जो छ्यीम्मी़ लम्लरङ् फीन्नी, स्यी दी क मीलेटस् सार्ल ॱलीच्च्युङ्। 16 पावल् पेन्तीकोस्की धी़रीम्गी यङ्ल यरुशलेम्ल ॱलीत् छुज्ये यो़प्पल छप्सी झ्युङ बेत्। हुगो झ्यीनी एशीया लुङ्बल फीन्न, हुदु गक् थोगो़ट्टो ॱनो़न पावल्की एफीसस् सार्ल अक् मीत् डो सीन्न फच्चो़त्नीरङ् ढुल स्युन फीम्ब बेत्। 17 हुगो झ्यीनी मीलेटस् सार्तु दो़प्पे यङ्ल पावल्की एफीसस्की छ्यो़ छोगी गोयो़प्प घयेत् दील हीदु ठेत्तु ॱस्योक् सीन्न लो़न् तङ बेत्। 18 ॱनी हुब ठेत्तु युङ्नी, पावल्की हुबल ङ गोम एशीया लुङ्बल युङ्नी खीत्रङ्दङ् दल दो़प्पे यङ्गी ङे मीजीगी लेमु खीत्रङ्ल ॱस्यो़च्च्ये यो़क्केन् बेत्। 19 यहुदी घयेक्की केत्मीत्ल ढो़ झ्यीन ङल दुक्प गज्येन् तङ्न छो़त्लीङ्गी लेमु झ्युङ्। ॱनी हीन्न अक्, ङ ॱनोम्ज्युङ् झ्यीन ॱमीक्च्यु फीक्कील्ल चोव ज्यीन्दक्की ॱयोक्पी़ ले झ्यीन देप्पेन्। 20 खीत्रङ्ल फेम्बे तम् ङे च्यीगी च्यीक् इक् बेन मत् स्यक्प, कुरीक्की घोस्सल ॱस्येप्पेन्। हुनी खीम् खीम्ल आक् फीन्न खीत्रङ्ल ङे ॱलोप्स ज्यप्न टेप्पेन्। हीगो ओक् खीत्रङ्ल ॱस्यो़च्च्ये यो़क्केन् बेत्। 21 यहुदीरङ् हीन्, ग्रीक्की ज्यी़क्की मीरङ् हीन्न अक्, मी ॱसीम् दी ज्युर्न को़न्ज्योक् छ्योल लोक्न हज्यरङ्गी चोव ज्यीन्दक् येशुल छ्य स्योक् गोगेन् बेत् सीन्न ङे गज्येन् ॱस्येप्पेन्। 22 ङ ॱनी ह धम्बे थुगी तो़म्बल यरुशलेम्ल डोगेन्। ॱनी हुदु घन्ड नोङ्गो़दङ् हुगो ङल ॱस्यो़च्च्ये मीत्। 23 ॱनी ङ सार् सार्ल घल फीन्न आक्, ङल दुक्स्यी दी हुदु नोङ्गो़त्। हुनी चो़ल्ल ॱस्योको़र्त् सीन्न धम्बे थुगी ॱस्येत्न यो़त्। हीजो़त् च्यीक् ङल ॱस्यो़च्च्ये यो़त्। 24 ङे मीजी यो़स्स्यीङ् भोर्ल चोव ज्यीन्दक् येशुगी को़न तङे ले को़न्ज्योक्की थुज्यीगी ढीक्की केच्च्य ॱनेम्बु ॱस्यो़क्केन् हीगो डुप्च्ये ॱनो़बे ॱसम्ल दी मेन्द, स्येन् ङरङ्गी ॱरोक्ल आक् फङ मीन्दुक्। 25 खीत्रङ् घयेक्की घुङ्दु को़न्ज्योक्की ज्यागक्की केच्च्य ॱस्यो़क्कील्ल ङ गज्येन् गीरेन्। ह हीनी झ्यीब दी खीत्रङ् ॱसुल आक् ङ ॱमीत् ठेक्केन् बेत्। हुगो ङल ॱस्यो़च्च्ये यो़त्। 26 ह हीगी ढीक्ल ङे खीत्रङ्ल गन्दीय ॱस्येत् योङ्। खीत्रङ् खरप्ल ॱसोङ्न ॱनी, खीत्रङ् सोक्प बेत्। 27 घन्ड हीन् सीन्न छी थर्वे ढीक्ल को़न्ज्योक्की थुल घङ् यो़प्प घयेत् जेङ् ङे बेन मत् स्यक्प, कुरीक् खीत्रङ्ल ॱस्येत्न टेप्पेन्। 28 खीत्रङ् ॱसोस्सोरङ् च्यङ्जो़त् झ्यीन दो़च्च्यीत्। धम्बे थुगी खीत्रङ् गोयो़प्पल को़न खीत्रङ्गी गेल्ल स्यक्पे लुक् घयेत्ल च्यङ्जो़त् झ्यीन तो़ज्यीत्। को़न्ज्योक्की खोङ् रोरङ्गी ठक्की ॱली़बे छ्यो़ छोल तगेङ्गी लुक्चीब खीत्रङ् झ्यीज्यीत्। 29 ङ ॱसोङ्नी, खीत्रङ्गी घुङ्दु च्यङ्गु ॱमङ्ङम् लङ्नर घयेत् युङ्न लुक् घयेत् ढी़त्न चीमीत् फङ्मीत् झ्यीक्केन् बेत्। 30 खीत्रङ्गी घुङ्नीरङ् मी यरी हुन्दुक् झ्यीब थो़न्न हुबे तम् फीलोक्प ॱस्येत्न ॱलोप्टुक्ल स्युन यो़प्प घयेत् रोरङ्सो़ तीङ्ल ठीक्च्ये ॱनो़न ॱयो कोर्केन् बेत्। 31 हुगो झ्यीनी खीत्रङ् च्यङ्जो़त् झ्यीज्यीत्। ङे लोङ ॱसुम् थुक् खीत्रङ् रीदङ् रील ॱमीक्च्यु तोङ्गील्ल घन्दुक् झ्यीन ङीन् छेन् मीप्प ॱलोप्स ज्यप्च्युङ हुगो ढेन्सो़ झ्यीज्यीत्। 32 ह खीत्रङ् घयेत् को़न्ज्योक् धङ् खोङ्गी थुज्यीगी लक्ल च्योन स्योक्केन्। थुज्यीगी केच्च्य हुगी खीत्रङ् ज्यीक्तु चव छुदु ची़क्केन् बेत्। ॱनी हुनी को़न्ज्योक्की धक्पर्ल सो़बे मी घयेत्तङ् दल खीत्रङ्ल आक् थर्वे फक् थोप्केन् बेत्। 33 खीत्रङ् ॱसी़ च्यानी इक् ङे लोप् झ्यीन ॱसीर्, ॱङु धङ् घो़ नोङ् योङ् ॱनो़ब मत् झ्ये। 34 खीत्रङ्लरङ् ॱस्यो़च्च्ये यो़क्केन् बेत्। ङ धङ् ङे छ्यीट्टो घयेत्ल घङ् गो़ब घयेत् ङरङ्गी लक्प हीगी ले झ्यीन सेबेन्। 35 खीत्रङ्ल ॱमीदे युङ ङे कुरीक् झ्यीन तो़म्बेन्। ॱनी हुगो डस्सी खीत्रङ्गी इक् दुक्च्या घयेत्ल दगु झ्यीत् गोगेन् बेत्। हीगी ढीक्ल चोव ज्यीन्दक् येशुगी नुक् ॱसुङ्न यो़क्केन् बेत्। छुल्ल लीम्बले त, फल्ल टेप्पल ॱसीम् गया युङ्गेन् बेगो सीक्केन् हीगो ढेम्ब ॱसो़ब झ्यीज्यीत् सीन्न ॱस्येप्प बेत्। 36 हीन्दुक् सीन्न पावल्की ॱस्येत्नी, हुगी एफीसस्की गोयो़प्प दीब पावल्तङ् दल पीमुङ् चुन ॱसुव तब बेत्। 37 हुनी घीबे यङ्ल हुब ङुच्च्यङ् ॱस्योर्न, पावल्ल फङ्ब तप्न च्युप् झ्यीब बेत्। 38 हुब दुक्नङ् लङ्ज्ये दी एल्ला पावल्की ह हीनी झ्यीब दी नम् नम्ल अक् ॱमीत् ठेक्केन् बेत् सीन्नी लङ बेत्। हुनी हुबे पावल् ढु दी झ्यीस्सल च्येन ॱलुक्न तङ बेत्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.