ठीक्नल 19 - ल्होमीपावल् फीच्च्य एफीसस् सार्ल ॱलीब १-२२ 1 ॱनी अपोल्लोस् अखैया लुङ्बे कोरीन्थ् सार्तु यो़प्पे यङ्ल पावल् लुङ्ब ॱयोङ्गी घुङ्नी फल्ल झ्यीन फीन्नी एफीसस्ल ॱलीब बेत्। ॱनी हुदु येशुगी ॱलोप्टुक्ल स्युन यो़प्प यरी ठेत्नी, 2 पावल्की हुबल खीक्की गोम छ्य स्योक्पे यङ्ल खीत्ल धम्बे थु थोप्च्युङक्? सीन्न ढीब बेत्। ॱनी हुबे लेल्ल थोप्च्ये त फ स्यक्पे, धम्बे थु यो़क्केन् बेत् सीर दी इक् ङीक्की ॱह घो ॱमत् ॱनोङ् झ्यीब बेत्। 3 ॱनी पावल्की नुक्म हीन्न, खीत् घन्दुक् झ्यीबे लेमी़ बप्तीस्ल स्युब? सीन्न ढीब बेत्। ॱनी हुल हुबे युहन्नागी बप्तीस्ल स्युबेन्। 4 ॱनी पावल्की यङ् हुबल युहन्नागी बप्तीस्ल स्युब हुगो ॱएङ्गी लम्नी ॱसीम्ब ज्युरे ढीक्लरङ् बेत्। युहन्नागी रोरङ्गी तीङ्ल थो़न्न युङ्गेन् दील छ्य स्योक् गोगेन् बेत् सीन्न मी कुरीक्ल ॱस्येत्न युङ बेत्। ॱनी हुगो दी क हस्सो़त् येशु बेत् सीन्न ॱस्येप्प बेत्। 5 हीगो ॱह घोनी हुब घयेत् चोव ज्यीन्दक् येशुगी छेन्नी बप्तीस्ल स्युब बेत्। 6 हुनी पावल्की हुब घयेत्ल लक्पे ॱवङ् केनी, हुनी हस्सो़त् धम्बे थु हुबल घप्न, हुब कुरीक्की केच्च्योक् ॱमीत् च्यीक्पल तम् ॱस्येप्प बेत्। ॱनी कलुङ् ॱस्येप्प बेत्। 7 उन मी घयेत् दी तोम्दु मीरङ् च्युन्नीजो़त् च्यीक् यो़प्प बेत्। 8 हीनी पावल् हुगी यहुदीगी छ्यो़गी छोगङ्ल छीगङ् फीन्न दव ॱसुम् थुक् हुदु जोम्न युङ्गेन् घयेत्ल दीम्बरङ् हीम्ब ॱलो खीदु ची़च्च्येल को़न्ज्योक्की ज्यागक्की ढीक्ल ज्यीक्टक् मीप्प, तम्स्यु लप्री चीय बेत्। 9 ॱनी यरीगी छ्य मत् स्यक्प, ॱसीम् गट्टक्प खुर्न चोव ज्यीन्दक्की लम्गी ढीक्ल कुरीक्की ॱह घोस्सल तम् अयेक्प लब बेत्। हुनी पावल् हुबदङ् घीन उन येशुगी ॱलोप्टुक्ल स्युन यो़प्प घयेत् दी कङ्ज्यीक्ल ठीक्न फीम्ब बेत्। ॱनी हुनी झ्यीब दी टीरान्नस् सीक्केन् मी च्यीक्की छोक्तेन् छुस च्यीक्ल ङीन्दङ् फो़स्स्यी फीन्न हुदु जोम्न युङ्गेन् घयेत्तङ् तम्स्यु लप्री चीय बेत्। 10 हुन्दुक् झ्यीन हुदु लोङ ॱङी देप्प बेत्। ॱनी हुगी यङ्ल एशीया लुङ्बदु दो़क्केन् यहुदी हीन्, ग्रीक्की ज्यी़क्की मी ॱसुल हीन्न अक्, कुरीक्ल चोव ज्यीन्दक्की केच्च्य नेन्ज्ये ॱनोङ बेत्। 11 हुगी यङ्ल हुदु पावल्की लम् ज्यी़त्नी को़न्ज्योक्की ॱस्यीक् छ्यीम्मी़ ले ॱमीत् च्यीक्प गज्येन् जेप्प बेत्। 12 पावल्की रुमल् हीन्, ली़गी घो़ हीन्न अक्, हुगो मी ॱयोङ्म घयेक्की लीन्न नेप्प घयेत्ल रेक्तु ची़त्नी, नज ढक्नर बेत्। ॱनी ॱनो़प्प अयेक्प स्यीन्न यो़प्प घयेत् एत् थो़न्नर बेत्। 13 ॱनी हुगी यङ्ल उन ॱनो़प्प अयेक्प तो़न्न दीक्को़त् सीक्केन्, यहुदी गीर्च्यम्ब यरी उन यो़प्प बेत्। ॱनी हुबे एक् चोव ज्यीन्दक् येशुगी छेन् डेन् ज्यप्न ॱनो़प्प अयेक्प स्यीन्नर तो़न्न दीच्च्ये ॱनो़ब झ्यीब बेत्। ॱनी तो़न्न दीप्पे यङ्ल हुबे तम् दी पावल्की ॱस्यो़क्केङ्गी येशु हुगी मीङ्नी ह रङ् थो़ल्ल ज्युक् सीन्न खक्को़ ज्यक्केन् सीन्न झ्यीगो़प्प बेत्। 14 ॱनी यहुदी घयेक्की छ्यो़प्पो़न् चो छ्यीस्स्यो इस्केवा सीक्केन् च्यीक्ल भु दी़न् यो़प्प बेत्। ॱनी हुबे एक् नुक् दीरङ् झ्यीब बेत्। 15 ॱनी हुन्दुक् झ्यीप्पे यङ्ल ॱनो़प्प अयेक्प दीगी लेम्बुल येशु हुगो धङ् पावल् हुगो ङे ङु ॱस्यीगो़त्। खीत् घयेत् ॱसु हीम्ब? सीन्न झ्यीब बेत्। 16 हुनी हुगी ॱनो़प्प अयेक्प स्यीन्नरे मी दी छुल्ल घप्न युङ बेत्। घप्नी, हुगी पी़न् दी़म्बु दील दुङ्न घो़ घयेत् दी कुरीक् बरक् कोरक् च्येत्न, काबु ॱस्यीबु ॱसोङ्न हुब च्यरेङी सी़बु दीलरङ् ॱम च्यङ्ज्यङ् खुर्न खीम् दीनी ढो़ गो़ ॱस्यर बेत्। 17 ॱनी हीगी तम् हीगो एफीसस् सार्तु दो़क्केन् यहुदी धङ् ग्रीक्की ज्यी़क्की मी घयेक्की ॱह घोनी, हुब कुरीक् ज्यीक्टक् लङ्न, चोव ज्यीन्दक् येशुगी छेन् छ्यीम्मु हीम्ब ॱसम्न तो़प्प बेत्। 18 हीनी हुगी यङ्ल छ्य स्योक्केङ्गी मी गज्येन् युङ्न रोरङ्सो़ एल्ला ले अयेक्प झ्यीब घयेत् दी तो़न्न ङीब झ्यीबेन् सीन्न ॱस्येप्प बेत्। 19 ॱनी एल्ला जुम्डी़ तो़ङ्गेन् जुम्डी़ब अक् गज्येन् युङ्न हुबे रोरङ्सो़ पीज्य घयेत् दी दी़न मी कुरीक्की थोङ्सदु ॱहे तङ बेत्। ॱनी हुगो जेङ्ल रीम्बोप् ज्यप्न, हुगी रीन् दी ॱङुगी टङ्ग तोङ्डक् ॱङप्च्यु छीगो़प्प बेत्। 20 हुन्दुक् झ्यीन चोव ज्यीन्दक्की ढीक्की केच्च्य दी घल अक् ढम्न ज्यीक्तु ज्यीक्तु ज्येन युङ बेत्। 21 हुन्दुक् झ्युङ्नी हुनी पावल् मासीडोनीया धङ् अखैयागी लुङ्बे घुङ्नी फक्की लम्ल झ्यीन गीर्न यरुशलेम्ल डोज्ये ॱनो़ब झ्युङ बेत्। हुनी यरुशलेम्ल फीन्नी हुनी रोम् सार्ल अक् डोज्ये ॱनो़ब झ्यीब बेत्। 22 हुनी पावल्की रोरङ्गी लेल दगु झ्यीक्केन् तीमोथी धङ् इरास्तस् दी मासीडोनीया लुङ्बल एल्ला तङ बेत्। ॱनी रोरङ् यङ् धोबा च्यीक् थुक् हुदु एशीया लुङ्ब दीदुरङ् देप्प बेत्। एफीसस्तु हुट्ट लङे तम् २३-४० 23 हीनी हुगी यङ्ल एफीसस् सार्तु थर्वे लम्गी ढीक्ल हुट्ट छ्यीम्मु लङ बेत्। 24 हुदु ॱङु सोव भाबु डेमेत्रीयस् यो़प्प बेत्। ॱनी हुगी उन यो़क्केन् ॱल्हमु आर्तेमीस्की ॱल्हगङ् डस्सी च्युङेत्मु च्युङेत्मु ॱङुल गज्येन् सो़न चोङ्न हुगी रोरङ्गी होक्की ले झ्यीक्केन् घयेक्की पयीसक् गज्येन् ॱसक्को़प्प बेत्। 25 ॱनी हुगी डेमेत्रीयस् दीगी रोरङ्गी लेमीय भाबु घयेत् दी धङ् भाबु ॱयोङ्म घयेत् ॱयप्न हुब घयेत्ल ॱवे खीत्रङ्सो, हज्यरङ्ल पयीसक् युङ्से लम् दी हीगो बेत्। हीगो हज्यरङ् कुरीक्ल ॱस्यो़च्च्ये यो़क्केन् बेत्। 26 हुगी पावल् हुगी झ्यीबे लेमु घयेत् खीत्रङ्गी ॱह घोव बेत्। एफीसस्तु छ्युवक् मेम्ब, एशीया लुङ्ब जेङ्ल हुगी मी गज्येन् ॱयो कोर्न छ्यी़दु ची़स्सोङ्। ॱनी हुगी मी लक्पे स्यङे ॱल्ह म दीरङ् ॱल्ह दीरङ् मेम्बेत् सीगुक्। 27 हुगो झ्यीनी मी घयेक्की हज्यरङ्गी ले हील गज्ये मेम्ब छोर्केन् बेत्। ॱनी हुगो छ्युवक् मेम्ब, हज्यरङ्गी ॱल्हमु आर्तेमीस् छ्यीम्मी़ ॱल्हगङ्गी मीङ् दीरङ् ये डोगेन् बेत्। हज्यरङ्गी ॱल्हमु छ्यीम्मु हील एशीया लुङ्ब धङ् जम्लीङ् की़ङ्गी छ्यक् छ्यो़प्प पुगेन् बेत्। ॱनी हुगो ओक् ॱमीत् ॱसम्गेल्ल टप् डोगेन् बेत् सीन्न ॱस्येप्प बेत्। 28 ॱनी हीगी तम् हीगो ॱह घोनी हुगी मी घयेत् दी खोङ्डोक्की मी बर्न म दीरङ् एफीसस्की आर्तेमीस् छ्यीम्मु छ्यीम्मु बेत् सीन्न कुरीक्की केत् ज्यब बेत्। 29 हुनी सार्की मी घयेत् दी कुरीक् म दीरङ् गन्दीक्म हुट्टे ॱस खो़ब बेत्। हुनी पावल्तङ् कङ्ज्यीक्ल गीरे दगु मासीडोनीया लुङ्बे मी गायस् धङ् अरीसतार्खस् हुब घयेक्की रुप्न सुङ्न सार्की तेक्मु तो़न्स छ्यीम्मु दील ठीक्प बेत्। ॱनी सार्की मी घयेत् कुरीक् हुदु ज्युन फीम्ब बेत्। 30 ॱनी पावल् हुदु डोगेन् झ्यीब बेत्। ॱनी उन ॱलोप्टुक्ल स्युन यो़प्प घयेत् दीगी डोदु ॱमत् ची़प्प बेत्। 31 ॱनी पावल्की दगु हुगी लुङ्बे पेम्बु यरीगी इक् पावल्ल हुदु हुब घयेत् च्येल्ल ॱस्युली थो़र्रो मत् झ्यीत् सीन्न लो़न् तङ बेत्। 32 ॱनी हुगी मी जोम्ब घयेत् दी उन हुट्ट गन्दीक्म लङ्न, यरीगी तम् च्यीक् सीन्न केत् ज्यब बेत्। यरीगी तम् ॱयोङ् च्यीक् सीन्न केत् ज्यब बेत्। उन मी गज्येल्ल हुदु घन्डे धो़ल्ल छोब हीम्ब हुगो ॱस्यो़च्च्ये दीरङ् मीप्प बेत्। 33 हुनी यहुदी घयेत् दीगी अलेक्जेन्डर् सीक्केन् यहुदी च्यीक् खबाल ॱलोङ बेत्। हुनी अलेक्जेन्डर्की हुगी मी घयेत् दील ॱहरक्प दो़त् सीन्न लाद ज्युर बेत्। 34 ॱनी हुगी मी जोम्ब घयेत् दीगी हुगो यहुदी हीम्ब ॱह घोनी हुब कुरीक्की केत् छ्यीम्मु तो़न्न एफीसस्की आर्तेमीस् छ्यीम्मु छ्यीम्मु बेत् सीन्न छ्युजो़त् ॱङीजो़त् च्यीक्की ची केत् ज्यब बेत्। 35 हीनी स्युक्ल सार्की सच्च्यीप् दीगी स्यीवल सो़न हुगी मी घयेत् दील ॱवे एफीसस्की मी घयेस्सो, ॱल्हमु आर्तेमीस् छ्यीम्मी़ ॱल्हगङ् धङ् ॱनम्नी मल्ल छरे आर्तेमीस्की कु हील तगेङ्गी दक्पु दी हज्यरङ् घयेत्रङ् बेत्। हुगो ॱस्यो़च्च्ये मीप्पे मी ॱसु दी यो़प्प बेक्क? 36 हीगो ॱसी़ इक् मेम्बेत् सीर् ॱमीत् छुगेन् बेत्। खीत्रङ् ॱनोक्सम् मीप्पे ले मत् झ्यीब, स्यीव झ्यीन दो़च्च्यीत्। 37 हीगी मीरङ् ॱङीबु हीगी ॱल्हगङ्नी की़न्नक् ॱमत् की़ब बेत्। हज्यरङ्गी ॱल्हमुल ॱमो़म्बी़त् ॱमत् तङ बेत्। ॱनी हीन्न अक्, खीत्रङ्गी सुङ्न च्येदुक्। 38 डेमेत्रीयस् धङ् रोरङ्गी लेगी छ्यीट्टो घयेत्ल ङीब झ्यीन यो़त्न ॱनी, पो़ङ्गङ्ल फीन्न लुङ्बे ठीम्बो़ल्ल ठीम् स्यु गोगेन् बेत्। 39 धो़न्दक् ॱयोङ्गी केच्च्य यो़त्न ॱनी, ठीम्ल डीक्केन् छोक्तेन् छुबे यङ्ल युङ्न केच्च्य झ्यीत् गोगेन् बेत्। 40 हरीङ् हज्यरङ्गी हीन्दुक् झ्यीन धो़म्मीत्ल हुट्ट थप्नी, हज्यरङ्ल नक् घप्केन् बेत्। हीगी ढीक्ल घन्डे लेम्बु ॱलोक्केन् सीन्न झ्यीब बेत्। 41 हुन्दुक् झ्यीन हुगी मी छोब घयेत् दी घीदु ची़प्प बेत्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.