ठीक्नल 18 - ल्होमीपावल्सो कोरीन्थ् सार्ल ॱलीब १-१७ 1 हीनी पावल् एथेन्स् सार्नी फीन्नी कोरीन्थ् सार्ल ॱलीब बेत्। 2 हुदु पावल्ल अक्वीला धङ् प्रीस्कीला यहुदी नङ्जङ् ॱङी ठेप्प बेत्। हुब ॱङीगी फयु दी पोन्टस्की लुङ्बन यो़प्प बेत्। हुब ॱङी रोम् सार्तु दो़प्पे यङ्ल सीजर् ज्याबु कलौडीयस्की यहुदी घयेत् कुरीक् यी़दो़न् ज्यप्न दीत्नी, हुब ॱङीबु इटालीगी लुङ्बनी युङ्नी कोरीन्थ् सार्न ॱलीत्न देत्नी, धोबा च्यीक् ॱसोङ हीङ्गो़प्प बेत्। 3 पावल्की डस्सीरङ् हुब ॱङीगी ढोप्प ॱसोये ले दी घुर् सोगेन् झ्यीनी ॱनी, पावल् हुब ॱङीबु च्याल फीन्न कङ्ज्यीक्ल देत्न ले झ्यीब बेत्। 4 ङीत्तुवे ङीङ्गी यङ्ल छीगङ् पावल् हुगी यहुदीगी छ्यो़गी छोगङ्ल फीन्न हुदु जोम्गेन् यहुदी धङ् ग्रीक्की ज्यी़क्की मी घयेत् छ्य स्योक्पे लम्ल ठीक् छुब झ्यीच्च्येल पावल् हुबदङ् तम्स्यु लप्री चीय बेत्। 5 हुनी सीलास् धङ् तीमोथी मासीडोनीया लुङ्ब दीनी हुदु ॱलीत्नी, पावल् हुनी झ्यीब दी केच्च्य ॱस्यो़क्केल्ल ॱस्यीदा देप्प बेत्। येशु गन्दीय को़न्ज्योक्की को़न तङे च्यप्को़न् ख्रीष्ट् दी बेत् सीन्न यहुदी घयेत्ल ॱस्येप्प बेत्। 6 ॱनी हुगी यहुदी घयेत् दी पावल्की डल लोङ्न ॱमो़म्बी़त् तङ बेत्। हुनी रो हुबदङ् घीन डोज्येमल रोरङ्गी घो़ दी पीक्न दप्न हुब घयेत्ल खीत्रङ्गी ङीबे गेन् दी खीत्रङ्गी गोल खीगेन् बेत्। हीगी गेन् दी ङे मेम्ब, खीत्रङ्गीरङ् बेत्। ह हीनी झ्यीब दी ङ ज्यी़त् ॱयोङ् ॱयोङ्गी मी घयेत् च्याल ॱस्यो़त्तु डोगेन् सीन्न झ्यीब बेत्। 7 हीनी पावल् हुगी छोगङ् दीनी थो़न्नी, हुगी छोगङ्गी लोल ॱनेगेन्, तीतस् युस्तस्की खीम्ल फीन्न देप्प बेत्। हुगो को़न्ज्योक्ल धेप्प मो़ब झ्यीक्केङ्गी मी च्यीक् बेत्। 8 हुगी यहुदीगी छ्यो़ छोगी गोयो़प्प क्रीस्पस् धङ् हुगी मीजङ् घयेत् दीगी चोव ज्यीन्दक्ल छ्य स्यक्न युङ बेत्। ॱनी पावल्की तम्ल नेन्दु युङे सार्की मी घयेक्की छीक्नी गज्येङ्गी छ्य स्यक्न बप्तीस्ल स्युब बेत्। 9 हीनी पावल्ल गोङ् च्यीक् थोङ्नङ्ल चोव ज्यीन्दक्की रङ् ॱसीङ् थागी मत् दो़प्प, ज्यीब मीप्प, केच्च्य ॱस्येत् ॱस्येप्प झ्यीज्यीत्। 10 रङ्गी ज्यप्तक्ल ङ यो़त्। रङ्ल मी ॱसी़ इक् लक् तङ्न च्यो़न् तोङ्दु मीत् युङ्गेन् बेत्। घन्ड हीन् सीन्न हीगी सार् हीन ङे मीस्सीर् गज्येन् यो़क्केन् बेत् सीन्न ॱसुङ बेत्। 11 हुनी पावल् हुदु लोङ छ्यीदङ् ॱङी थुक् देत्न हुगी मी घयेत्ल को़न्ज्योक्की ॱसुङ्रप्की ॱलोप्स ज्यप्न टेप्प बेत्। 12 हुनी अखैयागी लुङ्बे पेम्बु चो छ्यीस्स्योल गल्लीयो यो़प्पे यङ्ल हुगी कोरीन्थ् सार्की यहुदी घयेत् दी ढो़गो च्यीक्ल डीक्न पावल् सुङ्न ठीम् च्यो़स्सल च्येब बेत्। 13 च्येनी, हुबे हीगी मी हीगी मी घयेत् ॱयो कोर्न हज्यरङ्गी ठीम्ल मीप्पे ले, को़न्ज्योक्ल धेप्प झ्यीत्तु ची़क्कुक् सीन्न ङीब कब बेत्। 14 ॱनी पावल्की तम् ॱस्यो़च्च्येम ॱयेङे यङ्ल गल्लीयो दीगी हुगी ङीब कोप्केन् घयेत् दील हीगी मी हीगी नक् ङीन धङ् ले अयेक्प झ्यीन यो़त्न क, खीत्रङ् यहुदी घयेक्की ठीम् स्यी़बल ङ धेन्न नेम्बेत् क ॱनी। 15 हीगो खीत्रङ्गी छ्यो़लु, मीङ् घयेत् धङ् छ्यो़डीम्गी ढीक्ल थुक्री चीगेङ्गी केच्च्य बेत्। खीत्रङ्गीरङ् च्यो़त्लेत्। ङ ॱनी ॱमीत् च्यो़त् सीन्न झ्यीब बेत्। 16 हुनी हुब कुरीक् छ्यील दीत् तङ बेत्। 17 हुनी हुब कुरीक्की यहुदीगी छ्यो़ छोगी गोयो़प्प सोस्थेनेस् सुङ्न हुगी पो़ङ्गङ्गी दोङ् दीदु हुल दुङ बेत्। ॱनी गल्लीयो दीगी हुल आम्न मत् झ्यीब स्यक् तङ बेत्। पावल् एन्टीयोक्ल लोक्पे तम् १८-२२ 18 हुनी पावल् कोरीन्थ् सार्तु स्यक्पु गज्येन् देत्नी, हुगी पी़न्ज्या घयेत् दील पीद स्यी़न सीरीया लुङ्बल डोज्येल ढु छ्यीम्मुल स्युन छ्यु ज्यम्जो छ्यीम्मी़ लम्ल फीम्ब बेत्। ॱनी प्रीस्कीला धङ् अक्वीला दी इक् कङ्ज्यीक्ल फीम्ब बेत्। ॱनी कीङ्गीरीया सार् दीदु पावल्की को़न्ज्योक्तङ् छ्यो़त्तुम् झ्यीब दी मीत् झ्यीत् रीगी ढीक्ल रोरङ्गी गो दी ॱउर्तीङ् ढेब बेत्। 19 हुनी पावल्सो एफीसस् सार्ल ॱलीब बेत्। ॱनी हुदु अक्वीला धङ् प्रीस्कीला स्यक् तङ बेत्। पावल् रोरङ् हुगी यहुदीगी छ्यो़गी छोगङ्ल फीन्न हुदु यहुदी घयेत्तङ् तम्स्यु लप्री चीय बेत्। 20 ॱनी हुगी यहुदी दीबे पावल्ल ङीत्तङ् धोबा च्यीक् दो़त्रो झ्यी सीन्न स्युव ज्यब बेत्। ॱनी पावल्की ङ हुन्दो दो़त् ॱमीत् छुबेत् सीन्न झ्यीब बेत्। 21 ॱनी हुगी मी दीबदङ् घीन डोये यङ्ल पावल्की को़न्ज्योक्की थुल यो़त्न ॱनी, ङ तीङ्ला खीत्रङ् च्याल ॱलीत् योङ् सीन्न झ्यीब बेत्। हुनी पावल् ढु छ्यीम्मुल स्युन छ्यु ज्यम्जो छ्यीम्मी़ लम्ल टप्नर बेत्। 22 हुनी ढु दी सीजरीया सार्ल ॱलीत्नी, हुनी थो़न्नी पावल् यल्ल यरुशलेम्ल छ्यो़ छोल ठेत्तु फीम्ब बेत्। ठेत्नी, हुनी यङ् मल्ल भप्न एन्टीयोक्ल लोक्नर बेत्। 23 हुनी पावल् एन्टीयोक्तु स्यक्पु धोबा च्यीक् थुक् देत्नी, हुनी यङ् गलाती लुङ्ब धङ् फ्रीगीया लुङ्बे सार् युगङ् घयेत्ल गीर्न फीन्न येशुगी ॱलोप्टुक्ल स्युन यो़क्केन् घयेत्ल ॱलोप्स्यीक् टेप्प बेत्। अपोल्लोस् एफीसस् धङ् अखैया लुङ्बल फीम्ब २४-२८ 24 ॱनी अलेक्जेन्डीया सार्की यहुदी अपोल्लोस् सीक्केन् च्यीक् एफीसस्ल पावल् मीप्पे कप्ल युङ बेत्। हुगो को़न्ज्योक्की ॱसुङ्रप् खेसी ॱस्यीगेन्, ॱस्यीब च्येङ्गी मी यो़प्प बेत्। 25 हुल चोव ज्यीन्दक्की लम्गी ढीक्ल एल्ला मी ॱयोङ्गी ॱस्येत्न बीन्न, ॱस्यो़च्च्ये यो़प्प बेत्। ॱनी हुगी हीगी यङ्ल येशुगी ढीक्की केच्च्य मी घयेत्ल ॱस्यो़क्कीन् थेप्पे ॱसीम् खो़न युङ्नी, येशुगी ढीक्की केच्च्य घयेत् ॱस्यीप् धक्पो़त्म झ्यीन मी घयेत्ल ॱस्येत्न टेप्प बेत्। ॱनी हुल म दी बप्तीस्की ढीक्ल युहन्नागी बप्तीस् दीरङ् ॱस्यो़च्च्ये यो़प्प बेत्। 26 ॱनी एफीसस्तु यहुदीगी छ्यो़गी छोगङ्दु ज्यीक्टक् मीप्प, अपोल्लोस्की हुनी झ्यीब दी केच्च्य ॱस्येत् ॱस्येप्प झ्यीब बेत्। ॱनी हुगी तम् ॱस्येप्प दील अक्वीला धङ् प्रीस्कीलागी नेन्नी अपोल्लोस् दी हुबे रोरङ्सो़ दो़स्सल ठीक्न को़न्ज्योक्की लम्गी धो़न् दी हुल हरुङ् गदु कुरीक् ॱस्येत्न टेप्प बेत्। 27 हुनी अपोल्लोस् अखैया लुङ्बल डोगेन् सीन्नी एफीसस्की पी़न्ज्या घयेत् दीगी हुल हुगी लुङ्बन येशुगी ॱलोप्टुक्ल स्युन यो़प्प घयेत्ल यीगी च्यीक् ढीन तङ बेत्। ॱनी यीगी दील हीगी अपोल्लोस् हील थोङ् झ्यीत्रो झ्यी सीन्न स्युदेङ्गी यीगी तङ बेत्। ॱनी अपोल्लोस् हुदु फीन्नी, हुदु को़न्ज्योक्की थुज्यी ॱनङ्न छ्य स्योक्केल्ल झ्युङ घयेत्ल दगु गस्सी झ्युङ बेत्। 28 घन्ड हीन् सीन्न कुरीक्की थोङल हुगी यहुदी घयेत्तङ् अपोल्लोस् केच्च्य थुक्री चीनी, अपोल्लोस्की को़न्ज्योक्की ॱसुङ्रप्नी कोक्न ॱस्येत्न को़न्ज्योक्की को़न तङे ख्रीष्ट् दी येशु बेत् सीन्न खेत् गेन्न ॱस्येत्न यहुदी घयेत् दी फम्दु ची़प्प बेत्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.